بس... عبد اللطيف جميل..كشفتة وعلمة عندي أدخل وتعرف السالفة...

[اسيزو 4x4]

أخواني بعد العديد من التحريات وغيرها من التنبيشات تبين لى ما يلى:

1 - أن لعبد اللطيف جميل مصانع في (الصين - وتايوان) لصنع قطع غيار تويوتا

2 - والشعب قاعد يستعمل قطع صيني في صيني وتايواني في تايواني والمستفيد عبد اللطيف جميل

3 - الكلام هذا موثوق ليس ألاعيب

[العنقري]

الحا ل من بعضه الاسيوزو كل السياره صناعه تا يلند وقطعها نار

[اسيزو 4x4]

حياك الله أخوي العنقري ومشكور على مرورك الكريم

صدقت الحال من بعظها بس أنا ماقلت الاسيزو وكيلها مسوي مصنعها في تايلند (يعني ماقلت باخشب أو الميمني) مسوين مصانع


أنا أتكلم عن عبد اللطيف جميل وش دخل الاسيزو؟؟؟؟؟
:confused: :confused: :confused: :confused: :confused:

:D :D :D :D :D

[Dr.M]

صدقت اخوي اسيزو 4x4

فحمات الكامري 2002 بالوكاله ب 70 ريال و ما تكمل 15 الف كيلو الا هي منتهيه

و سألت عنها بالبازعي طلعت بحول ال300 ريال وتكمل الى 30 الف بالراحه

يعني غش عيني عينك .. ما اقول الا الله يعين بس

[صقرنجد]

هلا والله أبو حمـــود

عبدالللطيف ذا منتهي خلاص

لاعب بحسبت التيوتا لعب

لكن مالإلنا إلا التويوتا

والعوض على الله

أخوكم ومحبكم في الله:صقرنجد

[ZEISS]

اذا تبي تايوتا اصلي القطع عليك بالخليج واترك عبد اللطيف جميل

عبد اللطيف جميل يجيب السيارات ستندر ويبداء بتركيب القطع بجده عندك مثلا الخطوط والمسجل والانوار

والاسطبات والجنوط معظمها تايون

وجنوب افريقيا حتى الديكورات اللي بالسياره ايام الصيف تطلع من مكانها بعكس السيارات الخليجيه التي تاتي

بمواصفات عالميه ومخصصه للخليج وانا لو بسائلكم عن فرق الجي اكس بمواصفات خليجيه وعن الجي اكس

بمواصفات سعوديه ولاحظو الفرق لاحظ الجي اكس ار جي ( جي اكس جميل اسمه ) قطعه تايوان 100%

وبالسوق مايسوى شي

نصيحه لك اذا بتشتري سياره جديده جبها من الخليج اقل سعر وافضل مواصفات

[ابو درع]

حدث ولا حرج عن شركة عبدالطيف جميل ...

:hot: استغفال لكن هييين لكل جواد عثره

[ZEISS]

عندي اضافه بسيطه رحت العام

الماضي للامارات ابي اشتري سياره من وكالة االفطيم رفضو البيع قلت ليه وش السبب قالو عبد اللطيف جميل

مانع البيع لسعودين والجمرك ماريح يجمرك السياره لك اذا كانت من الفطيم بما انه الوكيل بالشرق الاوسط

ورحت شريتها من

المعارض جديده والحمد الله شريتها

وجبتها معي وربحت فيه مبلغ وقدره 12000 ريال

[شاهد عيان]

سيارتي لون أنوار الطبلون برتقالي

لون أنوار المسجل أخضر !!

يعني بالله عليكم اليابان ماعندهم ذوق يحطونها لون واحد ؟؟ هذه من ألاعيب الزفت عبداللطيف جميل

وأذكر مرة أرسلت لهم شكوى بذلك وحطيتها بصندوق الاقتراحات بمعرض تويوتا وحتى الآن ما أحد رد منهم علي !!

_____

وأخذت علي عهد إذا أردت أن أشتري موتر جديد مالي إلا الخليج وبس !

[datsun 1984]

أخواني ترا ((((((((((عبداللطيف متوفي أتركو الرجال بحاله))))))))) لكن الكلام في الإداره الموجودة حاليا
أعرف أقارب أشتروا هايلوكسات 2004سعودي 2005خليجي لكن الفرق كبيرجدا مع العلم أن الـ2004 السعودي مثل 2005السعودي بس فرق الخطوط
1/مراتب الخليجي مخمل ومفصول زي الكامري ومريح في القياده بخلاف السعودي قماش وأردى الخامات بعد
ومع البطناج تنخفس المرتبه يعني بدال ماتقعد على المرتبه تقعد على الشاصي :p
2/متوفره بزجاج مفصول بينما السعودي لا وتلقا الزجاج عند قطع الغيار بـ800 ريال
3/المسجل يجي أصلي ياباني راكب مع الديكور أماالسعودي فلون وجه المسجل فضي والديكور أسود بأحمر
4/ حطو السعودي لنا الحسساسات والريموت وكلهن هك بهك واحد أعرفه شرى هايلكس2004 جديده والرجال محافض جاك حط القير على الريوس وطلع الحساس صوته الطبيعي لكن إذاكان وراك شي لكن المشكله أنه رجع القير للفاضي وبتل الصوت معلق وبانسبه للريموت واحدمن الشباب يقول أحيانا يرن جرس الإنذار والموتر بالقراش ماأحدلمسه
وجزاكم الله كل خير

[توونا]

لاحول ولاقوه الابالله اسال الله ان يقيض لهذه الشركه المحتاله والتي تاكل اموال الناس بالباطل بغشها الواضح للعيان من ابناء وطني من يوقفها عند حدها فكما قال الاخوان ان الخليجي بحق سيارات ذات جوده عاليه وهناك احترام لعقول العملاء

[Mohammad]

بخصوص فحمات الكامرى انصحك بالتقليد لانك حسب وصفك ستوفر 160 ريال بعد 30 الف كم

[abo s3od]

((((((((((عبداللطيف متوفي أتركو الرجال بحاله))))))))) البلى بعياله النصابين

[رفيع الشان]

أخوي اسيزو .. ممكن لاهنت نعرف مصدر الخبر .. مع العلام ان فيه قطع مكتوب عليها ميد ان شاينا بالجي اكس ار الجديد حسب ماروي لي ..

فمان الله

[هيج]

اخوانى
انا عارف الكلام هذا من قبل وكان عندى gxr من البازعى وبعته قبل شهر
ولكن السؤال هل تنصحونى الشرا من البازعى اوالخليج واذا الخليج من وين بضبط
وانا شاكرا لكم جميعا بعد الله

[شاص]

شي يقهر ويضيق الخلق .. لكن وش الخطوات العملية التي ممكن يتخذها المستهلك حول هالمشكلة ؟؟
أنا أرى أن من أهم الخطوات مخاطبة الشركة برسائل إليكترونية يبين فيها هذا التلاعب ,,
وإن ما حصل تجاوب فالله لايخلينا من وارد الخليج
وإلا وش رايكم ؟؟

[طحنون]

مالك ألا خشمك ولو كان عوج
المقوله هاذي نبي نغيرها
لاكن مع ابو جميل محد يقدر نغيرها لاننا مانعرف شي غيرالتيوتا وكن التيوتا هي احسن سياره بالعالم
ياجماعه الخير فيه بدائل عن التويتا لاكن حنا للأسف مبرمجين على التيوتا وهاذا جزانا اللي قاعد يصيرمن جشع وطمع من المذكورابوجميل لاننا عطيناه وجه
:director:
لاحياه لمن تنادي
اكثر من 36 شركه مصنعه للسيارات ولانعرف غير التويتا
اذاكان خصمك القاضي من تقاضي :mad:

[القناص]

الناس ضحية الدعاية
ولا السيارات واجد
ازين وارخص من التايوتا
اجل تنكة كامري فل اوبشن ب80الف ........قيمة كابرس يعني....والله دعاية كذابه.

[اسيزو 4x4]

اخواني النشاما الاعزاء :

DR.m

معاك حق والله يعين

ابوسليمان(صقر نجد)

حيا الله النشمي والله انك صادق مالنا غير التويوتا والله المستعان

ZEISS

صدقت مافي مثل وارد الخليج

ابودرع

والله انك صادق استغفال لابعد حد ولكن وش السواة

شاهد عيان

هذي سوايا ابو جميل والله المستعان

datsun 1984

والله كلامك فمحله الله يرحمه ويغفرله والبلا من اداره تويوتا"عبد اللطيف جميل"الاهو ميت مابيده شي

توونا

صح لسانك يالنشمي

mohammd

صدقت اخوي

abo s3od

حيا الله النشمي ابو سعود والله انك صادق عياله يسرحون ويمرحون بدون رقيب

رفيع الشان

المصدر مثل ماقلتك من صديق لي في أبها وانا واثق من صحه كلامه

هيج

مالك غير الخليجي وبس وبالتوفيق

شاص

كلامك من ذهب بس وين الصاملين وتسلم

طحنون

كلامك عين العقل بس الشعب مغسول مخه مايعرفون غير" التويوتا "

القناص

كلامك صح حرام كامري على قولتك تنك وبـ 80000 ريال

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ

يعطيكم العافيه على مروركم الكريم الذي زاد الموضوع اشراقا وتميزا

اما بالنسبه لمصدر الخبر فهو من صديق لي وهو جاب الخبر من مكان موثوق

ومثل ماقالو بعض الاعضاء عبد الطيف جميل ميت

الله يرحمه ويغفرله يارب وهو مايدري عن اللي صاير بشركته على زمانه ماكان يصير اللي يصير الحين

::سبحانك اللهم وبحمدك اشهد ان لااله الا الله وحده لاشريك له استغفره واتوب اليه::
الرجا ترديدها ::كفــــــاره المجلس::

[السالمي]

ويقولون تايوتا وبس

غير الشروكي والنيسان لاتدور جوده ومصداقيه


سبحان الله


مع ان النيسان قليله فروع وكالته الا ان الشكاوي عليه قليله

ومع انه كل سنه يتطور اكثر من السنه اللي قبلها

وتطلع منه انواع واشكال افضل

كذالك الشروكي

لاكن الناااااس خلاص حطو في بالهم ان النيسان يهرقل والشروكي مايفارق الورش

وان التايوتا اجود انواع الجيوب ومشت ها السيره مادرو ان التايوتا فقط جودته من عام 98 وجاي



ومع ذالك مازالو المتخلفين شريطيتنا وحقين المعارض

معنفصين على التايوتا

مع انه من اردي الا اردي ماعاد الشاص


حتى الهايلوكس كانت تمام

لاكن من شاف الدفرنسين لامرت من عندك تشوف قيرها ماعاد الايطيح

مثل هاك العنز الا تجر ديدها

من جد شي يقهر

[اسيزو 4x4]

حيالله أخوي السالمي

والله كلامك عين العقل وصح لسانك

[أبويزن]

علينا أن نغير نظرتنا إلى الصناعات الصينية والتايوانية فالمصانع الأمريكية واليابانية والاوربية تزحف اتجاه مناطق ذات العمالة الرخيصة لذا ليس المهم إين صنع المهم جودة الصناعة واعتقد (شخصياً) أن الشركات المحلية أصبحت تحرص على سمعتها وإذا لم تصدقوا ذلك على من لديه اشكالية مع أي شركة (وهو صادق) ومعه حق واضح أن يتجه أو يهدد بالتصعيد الاعلامي ويرى النتيجة أما إذا فكر في المقاضاة فعليه أن يغني يا ليل ما أطولك لأنه سيبيع سيارته وهو لم يحصل على موعد جلسه...
تحياتي

[الطعس الذهبي]

فعلا لاعب بالناس لعب

[شخاميط]

ايسوووووووووووووووووووووووزو حبيبي هلا وغلا :heart:

الا تعلم ان جميع وكالات السيارات لدينا بالمملكة بدون استثناء يحتالون على المستهلك هل هذا جديد علينا لا اعتقد الكثير منا له قصص كثيره معهم لكن ربي يرزقنا موظفين :o :o :o واعين بالقطاعات المسئولة عن ذلك ويفكوننا من هالغش اللي صار الواحد يشوفه حتى بالبيدجان مو السيارات كثير من البيدجان اللي بالسوق كوسه مو بيدجان بس الكوسه من زمان ماقصت شعرها و ماخذه حمام شمس ههههههههه :confused:

لكن ذا الصينين يعرفون من اين تؤكل الكتف استطاعوا بوقت قصير جدا التمكن من غزو جميع اسواق العالم الا ماندر . وبيني وبينك منتجاتهم حليله ورخيصه وتفي بالغرض اهم شئ تلمع ولها رائحة الجديد .

انا لا اتندر على الانسة بيدجانه ومدام كوسه ولكن المواد الغذائية تعتبر اهم من السيارات فكم من اعلان تحذيري صدر بجرائدنا عن اغذية معلبة فاسدة وكم مره سمعنا وقرانا عن سحب كثير من المنتجات من السوق والغريبة لايلزم الوكيل بدفع اي تعويضات او حتى اعادة فليساتنا الا يقول خذ وحده غيرها وادفع الفرق لا وعينه قويه والعامل اللي يقولها بعد . عجبي :rolleyes:

بس تصدقون ولا مره سمعت انهم سحبوا سيارات من السوق عندنا مع العلم كثير من الشركات بالعالم تعلن عن وجود عيوب بالتصنيع وتسحب سياراتها من السوق الا عندنا اللي يجينا هو الزين حسب كلام الوكلاء مو مثل اللي عندهم اكيد والا كان سحبوه من السوق :good2:

[اسيزو 4x4]

حيا الله النشمي أبو يزن

والله كلامك صح بس وين الى بيجزموون :hot: :butt3: :butt3:


حيا الله النشمي الطعس الذهبي

والله أنك صادق!!! :good:


حيا الله الحبييب النشمي شخاميط

والله شرف الموضوع :D

والله أنك صادق كلامك من ذهب وخاصة المقطع الا خير :good:

[محب الشمال]

الرجال مات الله يرحمة واعتقد ان سيارات تويوتا زمان من افضل السيارات في المملكة وقويق ومتينه بس الحين صراحه فيها مميزات مثل المنظر الخارجي والجعصة اذا ركبتها وتكشخ بها اذا رحت للديرة عشان يقولون معه في اكس ار وغيره ما عندك احد
اخوي السالمي من قال لك النيسان يهرقل انا اكلمك عن جيب نيسان موديل 97 كان عندي ولعنت والدين والدينه ولا اعتقد انه في منكم واحد في المنتدى كرف سيارته زي ما كرفت وهبلت بالجيب الباترول من صمان وطعوس وارصفه واستهبال وسحب سيارات وطرد حصاني وصيد وغيره كثير ولا هرقل ولا شي وعلى العموم ما فيه سياره ما تخرب الا ماشاء الله وبشكل عام السيارات زمان افضل من الحين لجميع الشركات
بعدين الشركة تويوتا اذا غشت صراحه مشكلة وشركات الاغذيه والادويه صراحه حرام عليهم ورايح يحاسبون على غشهم ويمكن ربي يجعل غشهم عليهم ويتأثرون به انفسهم
وغير كذا من امن العقاب اساء الادب
الله يحفظنا ويعافيه ويغفر لنا ولجميع المسلمين الاحياء منهم والاموات

[اسيزو 4x4]

حيا الله أخوي النشمس( الميناء )

والله أنك صادق تيوتا زمان لكن الحين حق تجعيص وبس

مشكور على مرورك الكريم يالغالي :good2: