ياشباب من يلقالي حل ؟؟؟؟

[أبوتركي]

السلام عليكم ......
أنا ياشباب عندي مشكلة في سيارتي .. قامت ترتفع حرارتها على غير العادة .... وهي من أول ماهنا حليلها . وش السواة يالربع ؟؟؟؟؟؟؟؟؟ اللي عنده حل ينورنا بسرعة
وسلامتـــــــــــــــــــــــــــــــــــكم.

[مخاوي الهايلكس]

هلا ابو تركي كيف حالك حبيت اسأل وش نوع سيارتك؟وكم مديلها؟ عشان اعطيك الجواب

[جواب]

اهلا ابو تركي شوف هذا الرابط يفيدك ان شاء الله
اضغط هنا (http://www.mekshat.com/vb/showthread.php?s=&threadid=3007)

[أبوتركي]

أما عن نوع السيارة فهي باترول نيسان ...
والموديل 99....
وترى الحرارة ماترتفع إلا مع المكيف خاصة وقت الظهر...
مع إنها ما كانت كذا قبل فترة..

[مخاوي الهايلكس]

هلا اخوي كيف الحال شف انا اقوول يمكن من غطا السياره ( غطا الاديتر) ترى يمكن ولا تضحك على الجواب طيب عشان تتأكد هو من الغطا ولا فك الغطا وشغل السياره زي العاده وشغل المكيف اذا طلعت السياره بارده فغير الغطا واذا نفس الشي حاره انا ماادري وش البلا.

[العيد]

طيب شف المراوح الكهربائيه تشتغل الثنتين او لا الظاهر فيه وحده تشتغل مع المكيف بس الله يسر امرك ويبرد عليك موترك :)

[((( الحر)))]

حياك الله يابو تركي
شف يالحبيب ارتفاع الحراره في السيارات والفائده للجميع من عدة اشياء اذكرها باختصار:---
1- البلوف اذا صارت ماوزنت مزبوط او وزنها واحد غشيم ترتفع الحراره.
2- الديلكو اذا احد حركه وغير وزنته ترتفع الحراره.
3- الشكمان اذا جته ضربه قويه تسببت في تضييق مجرى العادم ترتفع الحراره.
4- المروحه وخاصة تماتيك المروحه اذا صار خفيف او متعطل ترتفع الحراره.
5- غطاء الاديتر مثل ماقال اخوي مخاوي الهايلوكس وهذا تلقى الماء ناقص في الاديتر والقربه مليانه فترتفع الحراره.
6- بلف الحراره اذا مايشتغل على الوجه المطلوب ترتفع الحراره
((( ملاحظه)))
ارتفاع الحراره في السياره نوعين :
الاول : ترتفع الحراره مع المشي وتشغيل المكيف.
الثاني: ترتفع الحراره والسياره واقفه .
وكل نوع له اسبابه لعلي اشرحها في موضوع مستقل في خيمة السيارات وصيانتها.
وعساكم ماتحتاجونها وتسلم سياراتكم من الحراره.

[مكشات]

تسلم أخوي ((( الحر))) على التفصيل اللي يدل على خبرة ممتازة ، وبانتظار موضوعك على أحر من الجمر .
وأود ان أضيف بعض الأشياء التي لم يتطرق لها الإخوان :
1 - أحيانا تأتي المشكلة من وجود شعر في الرأس ولكي تتأكد من ذلك عليك بفتح غطاء الإديتر - طبعا قبل ان ترتفع حرارتها - :) وانظر الى حركة الماء هل يخرج منه فقاعات هواء ام لا ؟؟
إذا كان هناك فقاعات هواء فهذا دليل على وجود شعر بالرأس لذا يلزم الذهاب بالسيارة الى مخرطة لمسحه .
2 - أحيانا تأتي المشكلة من انسداد فتحات الإديتر ، وغالبا يكون ذلك بورق شجرة البرسوبس المنتشرة في كل مكان ، لأن ضآلة حجمها يسمح لها بالدخول والالتصاق ، ولحل هذه المشكلة عليك بالذهاب الى مغسلة سيارات وتنظيف فتحات الإديتر بالهواء أو الماء أو كليهما معا .
3 - أحيانا تأتي المشكلة بسبب وجود إنسداد في القنوات المائية سواء في الإديتر او الماكينة ، ولحل المشكلة عليك بتسييخ الإديتر وتنظيف القنوات المائية بجهاز التنظيف المعد لذلك .
4 - أحيانا يكون هناك إرتخاء في خراطيش المياه ، فعندما تمتص الطرنبة الماء يحدث إنكماش للخرطوش فلا يعبر الماء بالنسبة المطلوبة .
هذا مالدي الآن و أدعو الله أن تنتهي مشكلتك مع الحرارة .
وتقبل تحياتي