سؤال لفطاحل مكشات وشيبانه

[ابواروى20]

يا شباب أبي أعرف كم حمولة الشاص .... يعني لو حطيت لي شراع للماء كم يشيل طن الجيب الشاص الجديد
نفعنا الله بعلمكم .......

[اسيزو 4x4]

على حسب علمي أنة يشيل (طن ونصف) هذا أخر حد

والله اعلم....

[عاشق الرملة]

حاضرين للطيبين..................

أنا مركب عليه تانكي بنزين ألف (1000 ) لتر ..... وتانكي مويه خمسمية (500 ) لتر .

وأشيل ثلاث عزب ورواقين ودبّة غاز صغيره وثلاث دوافير ايطاليات أكبر حجم ( 12 )رطل .

طبعا مع أغراض التموين كامله . ( وأنا وخوي شرواك ومن يقرأ )>>> :) :) :)


عاد مدري كم وزنهن ............الظاهر حول (2) طن ..... :dance:


ننتظر بقية الأعضاء .

[عطيب الشوق]

-
-
-
-
-
-
-
-

أخي العزيز
السلام عليكم ورحمة الله وبركاتة

تحيه طيبة

أولاً والله أعلم يعتمد على مديل السيارة .. لأن المديلات الجديدة ماهي اللي على خبرك والشاص تبعها ماعاد يصنع من مادة الحديد الخالص ، يصنع من مادة تسمى (خبث الحديد) ..

لتصنيع المواد الحديد (الصافي) يحتاج الحديد لتنظيف من الشوائب حتى يصبح حديد خالص ، ولكن في التالي أتجهت أغلب مصانع السيارات في العالم إلى خبث الحديد حتى يكون أخف وزناً ليستفاد من الوزن العام ويعطي خفة السياره وبتالي سرعتها ( زمن السرعه )

وأذكر أن لي صديق روى لي حادثه غريبه فعلاً يعمل في شركة سكيكو ( الكهرب ) في قسم فني لا أدري ما أسمه تحديداً .. ولكن يذكر لي عندما يحملون الشاص الجديد ويقول لي من المديلات الجديده الـ 2000 وطالع - يحملونه مادة تستخدم في محطات الكهرب توضع في براميل ، عزكم الله ، يقولي والله ما ندخل البر وناخذ كم مطب إلا والشاص منكسر ونضظر لتخفيض الحموله مع أن عندنا منه - يقصد الشاص - كم مديل قديم يتحمل حمل ماهوب سهل لدرجه تفوق الخيال ويمشي ماكنك شادن عليه شي مشالله .. لكن الجديد ماعندك أحد ..

وعلى العموم أنت إذا فتحت باب الموتر يبين عندك تحت في برواز الباب من الداخل وزن السياره ورقم الشاص احياناً ، والوزن المسموح به أثناء التحميل ، وتذكر انه فيه وزن مسموح به وفيه وزن يزيد عن ذالك
فإذا قديم حمل لين ما ترتخي السست مايقول أخ أقصد من الـ 99 وجاي أما الجديد فالعلم عند الله ما أتوقع

تحياتي لك وأعتذر عن طول الرد

أخوك أبو سعد

[الدبل الثقيل]

أخونا عاشق الرملة ماشاء الله يعطيك العافية انت وموترك .. وين مفصل تانكي البنزين وبكم سعره وهل هو تحويل مباشر .. وكم موديل الشاص اللي معك وجزاك الله خير....

[طعه]

السلام عليكم ورحمه الله وبركاته

لي احد الأصدقاء معه 2004

يقول انه محمل اكثر من 5طن ويقول انه بلخط ممتاز

واحد ثقه أنشاء الله

ودمت سالم

[ابواروى20]

اشكر الجميع المرور والرد والتفاعل وهذي علوم مكشات ومن فيها مايخلون خويهم وش عاد لصار ضيف مثلي أكيد بيردون عليه ويكرموه وبيض الله وجه الجميع لكن يا الربع أنا أبي شي مؤكد من الوكالة مثلا أو الكتلوج أو ..... ( علم وكاد ) اكرر شكري علما أني أسأل عن موديل 2005

[عاشق الرملة]

أخي العزيز الدبل الثقيل حياك الله انت والأخوام وأبقاكم بخير ان شاء المولى سبحانه .

الحوض اللي معي 2002 ...... وبالنسبه للتوانك مفصلهن عند ورشة الضويان بالقصيم(الرس)

وطبعا عاديات يعني مهوب تحويل مباشر ....أعبي البنزين والمويه بهنادل (هندل خاص لكل تانكي)

وطبعا ستيل . كلفن علي تقريبا 3500 مع الهنادل .


أخي الغالي ابواروى20 حياك الله في منتداك وبين اخوانك ...أكرر عزيزي الشاص اللي معي 2002

يعني اخو الــــ 2005 وبالنسبه للوكاله والكتالوج لاتدقق بالحيل (اسأل مجرب ولاتسأل طبيب ).


هذا والله أعلم .