قصايد خالده لشاعرحرب الشاعر بدر الحويفي

[ابو عضيله]

الشاعر الكبير
بدر بن عواد الحويفي
شاعر متمكن وقوي وصقار
وله اسلوبه القوي في التعبير
وكل قصيدة من قصائد بدر ترى
بها الجزاله وكل بيت من بيوت
بدر تره به قوة
وهذي رائعه من روائع
بدر الحويفي
احببت ان اشارك بها

**********
يامل قلبٍ دق به كل طاري =
طواريٍ باقصى الضماير تتله

***************
وشفقٍ على شوف الفضا والبراري =
لاصار معه مشببٍ مسندٍ له

**************
خطو ابلجٍ لملاقف الصيد ضاري
=جدع الضريبة بالسهم عادةٍ له

*************

قرم بوجهه للمروه شواري
= رايه سديد وكل دربٍ يدله
*********
ماهو حضيبيٍ مزاجه تجاري
= ليا عقدت الراي عوّد يفله

*********
اول نهارك يعجبك مانت بداري
= مار البلا تالي نهارك تمله

*********

ابمدح الطيب ولاني مداري
= واللاش لاخايف ولا حاسبٍ له

**********

الفرق باللي ياصلون المحاري
= والا الردي شرهات مثلي تزله

*********

ابي خويٍ ضاريس بالمساري
=ماهو مهينٍ يرقد الليل كله

***********
ومعنا قطاميٍ يصيد الحباري
= لحّاق لاكوبر له الخرب شله

**********
خطو اشقرٍ جثل من الريش عاري
= افحج مخاليبه سوات الأهله
************
به دق ريشٍ مثل دق الخزاري =-
مهدف ورا مناكبه مستقله

************
منخر وبوز وفيه عدة مواري
= يحتار به راع النظر لافطن له

************

ماهو بكفاخ ٍ طفوقٍ ازعاري
= طلعه حقاق ان شافهن ساوقن له


لاشافهن متطاولات المذاري
= عقّد وحق الطلع والسير تله

ويّحول اللي طار منهن اجباري
=ذباح للي يوم هد اسجدن له

يازين طلعه بالضحى والعصاري
=لامن خشناات الغلب خيشن له

هذيك منوتي واختياري
= لو كل من يطلب لزوم يحصله

ولو ان حظي مع مزاجي يباري
= سجلت له صفحة وفا بالمجله

مالي هدف بالسوق بايع وشاري
= قلبي ذعاذيع الهواء ولعةٍ له

انا غرامي مع فجوج الصحاري
= وشوف الرجوم النايفات المطله

لاشفت بالريضان نقع وخباري
= راح الزعل والبسط حل بمحله

بارضٍ بها لصيد عينه واثاري
= فيها القطا تلقى فروعه محله

مهامل تردم شجرها الذواري
= نبني لنا فيها وناسه وفله

يازين شبة نارنا بالغداري
= والكيف ابو صالح جلس وارتجله

والماء مفوح في نظيف الغواري
= وصفرٍ يجاذبهن على جال مله

وصاحب لهن تقول ماخذ حذاري
= وفنجالهن يجلى عن الكبد عله

واللي على مثلي من الناس زاري
= لاسامعٍىقوله ولا مصغيٍ له

وافخر بحبي لصقارة واماري
= ورزقي على اللي كون الكون كله

[/poet]

[ابوناصر السهلي]

بيض الله وجهك ولا هنت يابو عضيله وصح لسان بدر الحويفي

[ابو صقر 111]

الشاعر بدر الحويفي غني عن التعريف ومن اساطين شعراء النبط من حيث قوة المعنى وجزالة اللفظ ومشكور على هذا الأختيار الموفق لهذه القصيدة الجزله