ودي الرأي والمشورة وفقكم الله قبل ماأخذ سيارة تأجير مع الوعد بالتملك

[jeep2008]

السلام عليكم ورحمة الله وبركاته
صراحة اللي حادني على هالنظام قلة السيولة , ويوم تفكر فيها انت بتاخذ سيارة وكالة بتعيش معك ان أراد الله .
ودي من اخواني اللي مجربين هالنظام ايش عيوبه (غير التفويض ) وايش احسن البنوك اللي باخذ منها ؟
وعسى الله يوفقنا واياكم لما فيه الخير

[هواوي صيد]

ان شاء الله يفيدونك الاخوان

ولكن احب اوصيك على شي

لازم تقرا بنود العقد زين وتستفسر عن أي بند ماهو واضح لك

تأكد من التأمين على ايش يشمل

لازم تعرف نظامهم زين اذا لا قدر الله صار للسيارة حادث

هذي نقطه مهمه لأن واحد من الشباب صار عليه حادث

وعدمت السياره واخذوها منه وطالبوه بالاقساط اللي مابعد جات

وفي الباديه استخر وتوكل على الله


هذا مالدي وتقبل مروري

[aboeyade]

والله النظام حلو , لكن مشكلته لا صار على السيارة حادث قوي , يمكن يفنشونك من السيارة زي الحلاوه .
أتمنى قبل تقرر الشراء إنك تتعرف على التأمين 100%

وأنا لو رجعت للوراء وعرفت طريقة التأمين لترددت كثيراً بالشراء , لكن ما أقول إلا الله يسترنا بستره ويبارك لي بالسياره

[بدوي جنوبي]

حاول تبتعد عن التملك
وتاخذ بالتقسيط

لانك اذا تاخرت تقريبا 3 اقساط يسحبوا عليك السياره والفتره السابقه تعتبر تأجير
عشان كذا اغلب المشائخ حرم نظام التاجير ،،، لانه فيه ظلم على صاحب السياره
فى حال حصل له ظروف خارجه عن ارادته

الله ييسر امرك

[الاستراتيجي09]

نصيحه لوجه الله ....انننننننحش تكفى انحش عنهم والله العظيم انهم حراميه ونصابين اذا صار قيمه الموتر فرضا 100 الف يطلع عليك منهم بـحدود 160 الف مع الدفعه الاولى والاقساط وفوايدها والدفعه الاخير ناهيك عن التعقيد فرضا اذا جيت تجدد الاستماره قسم بالله يطلعون عيونك عشانها معامله تاصل لاسبوع عشان استماره والا لاسمح الله اذا صار عليك حادث وتبي التأمين ..ياساتر هذي معامله شهر مافيها كلام صايره صايره الله لايعوق بشر ..والا فرضا اذا جيت تكسر العقد وتقول خلاص مابي السياره ...يطلبون عليك مبلغ لكسر العقد يختلف اذا صرت بالسنه الاولى او الثانيه او الثالثه ويشوفون الكيلوات اللي انت ماشيها لنه لك بالسنه 25 الف واذا صار زود يحسبون عليك الكيلو بحدود الـ 35 هلله وخذ حسابات تطلع عيونك من المبلغ يعني فرضا موترك ماشي 60 الف وانت بالسنه الاولى يقولوك عطنا تقريبا 26 الف ويليت تعطيهم وتفتك على طول لا ياحبيبي لازم تنتظر شهر الله لايهنيك الى ان تجي الموافقه يارجال خله على ربك وخذ العلم انحش منهم تكفى قبل لاتطيح بهم انحش ياخوي انحش ....وخذ لك قرض واشر موتر استمارته باسمك طال عمرك متى ماطاب خاطرك منه بعته وكل الكلام هذا والله من تجربه واحد من الشباب ماصدق على الله افتك منهم حتى والله انه كسر العقد بمبلغ وقدره بس يقول ابفتك منهم باي ثمن فنصيحتي لك دامك على بر الامان لاتغرق ببحر احتيالهم ونصبهم وفوايدهم الخياليه ولاتغرك سالفه فايده 7% بس لا ياحبيبي الــ 7% هذي فايده السنه الوحده بس والعقد خمس سنوات واضرب 7x5 وشف كم تطلع الفايده الخياليه اللي يمصونها منك مصهم العذاب ان شاء الله يعني الفايده بحدود الــ 35% حسبي الله عليهم

[هويدي]

ان طعت شوري رجليك

اخوي طلع كابرس جديد على وقته بعد سنتين صار عليه حادث
وبدت المرمرطه

مماطل وعذاريب بالتقرير وادفع ولا تدفع دفع يوم خلص قالوه السياره تالفه

يا انك تشوف سياره بنفس موديلها ونشريها لك وتكمل اقساد او تدفع 2500 ونقفل العقد

قالهم واللي انا دفعت .: قالو تأجير

مع انه دافعلهم 25 الف دفعه اولى واكلوا حقه حسبي الله عليهم

اذا ماعليك قرض خذلك قرض اصرفلك

[مقلع الرمث]

قبل كل شي ابقولك حاجه


انا رحت لهم وقلت اباخذ سياره قيمتها ب 130 الف حلو


ابدفع دفعه اولا تقريبا 50 الف


اقساط على اربع سنوات ومدري كم على 2000 ريال


دفعه اخيره 28 الف


انا يوم حسبتها طلعت دافع كم كااااش احسب معي 50 الف و 28 الف = 80 الف تقريبا دافع مع الرسوم الاداريه


يعني كم قسطت كم اجروك تدري كم اخصم = 50 الف واخذو عليها تقريبا اجمالي ب 200 الف


واذا قلت شي قال هذا التأمين



ياخي انا مااغثني بالتأجير انك انت ياالمقسط تدفع التأمين للشركه وليس لك ليحميك من جشعهم :good2:


المفروض اذا صار حادث على السياره ولا شي يدفع لك المبلغ لانك انت اللي دفعت التأمين والله قهررررررررر:mad:



ياخي واحد من الربع اخذ هايلكس من ابو جميل


دفع دفعه اولا جلس سنتين مدري 3 سنوات وهو يقسط بعدها صار عليه حادث :eek:


والسياره راحت فيها تدري وش كسبت الشركه


احسبها معي


1800 في 36 = 64800 تبي تقولي رخيصه صح تراها عااادي غمارتين 2005


مع دفعه اولا مدري كم ورسوم اداريه المهم طلعت بكم قيمتها تقريبا ب 80 الف ولسى توه ماخلص


نرجع الرجال صدم بالسياره


عبد اللطيف جميل وش حصل عليه


حصل ياطويل العمر والسلامه على 80 الف من الرجال


والتأمين راح يعوضه تقريبا 40 الف


يعني كامل المبلغ ب 120 الف شفت وشلون يطلعون مكاسبهم:eek:


اخوي والله لو اكتب من اليوم اللى بكرى ماااخلصت من النكبات حقاتهم


وشف اكثر اللي ماخذ اجار منتهي بالهلاك لازم يصير عليه حادثين اقل شي


واليوم واحد اتصل على المفتي المملكه يسأله قاله اتق الله وابتعد عنه لانه فيه غبن على المشتري



لو تروح محلات التأجير السيارات العاديه وتشوف السيارات عندهم بالهبل وتقول كيف هذولا يحصلون مكاسب تتسغرب انا


ابقولك نفس طريقت التأجير المنتهي بالهلاك


1 تجي تستأجر
#لازم تدفع تأمين طبعا#
2 قدر الله وصار حادث
3 السياره مأمن عليها من زمان لكن ياخذون منك لازم


4 التأمين راح يعوضهم الخسائر اللي حصلت بالسياره اذا كانت تتصلح طبعا


راح تكلف السياره 20 الف وهو راح يصلحها ب 2000 ريال فقط


وحط في جيبه 18 الف


طيب نقول مثلا السياره راحت كلها تلفيات اكثر من 75%


السياره مأجره لها سنه تقريبا وطلعت تقريبا 20 الف


والتأمين راح يعوضهم كامل المبلغ للسياره


واستفادو سياره جديده و 20 الف




انصحك بالهروب عن التأجير المنتهي بالهلاك


ودورلك موتر ب 30 الف
ولو سلف وبعد سنه او اقل راح تسددها ولا تقعد لك 5 سنوات وانت تدفع وبالتوفيق

[hamido]

الله لا يحدنا على الديون تبي نصيحتي عض ثوبك ودورلك موتر عبر وادخلك جمعيه بكذا تقدر تجمع وبدون فوايد ولا نصب وكالات
انا ياقبيلك شريت موتر اقصاد ماهو تاجير تحسفت وقلت ليتني داخلن جمعيه ولا شي مالله حد اكبر ثوبي بالرقع ....والله واقعد 10 شهور معي الموتر وابيعه وهذاي اجمع روحي ابسدد القرض الله يعين بخير
ماش الدين ثقيل على القلب والسياره وسيله وليست غايه

[هوايتي مكشات]

مساء الخير يالغالي
تبي نصيحتي ابد عن التامين اولا دفعة اولى + دفعة اخيرة = 80 % من قيمة السايرة اذا حررتها وجيت تبيعها بالمعارض هذا طبعا اذا ماصار على السيارة شي من صدوم
ثانيا الدفعة الاخيرة قيمة 40% من قيمة السيارة اذا جيت بتحرها
ثالثا لو جمعت الدفعة الاولى بتجيب لك سيارة حلوة محركات وبدي
رابعا بعد شهر او شهرين بتتحسف على انك اخذت اقصاد (الدين سقم عين) تتعلق ماتقدر تبيعها لو تجيك ضروف
واذا رجعتها راح عليك كل اللي دفعته وتدفع قصد مجاني من نظام التامين
خامسا الله يكتب لك الخيرة

تبقى وجهة نظر من معايشة الشباب اللي جربو التامين

[سالم11]

خذها نصيحه من اخوك

خط قرض من بنك البلاد بنسبه 2،7 قليله جدا وطلع قرض مبلغ 90 الف ودور لك سياره جديده أو اخت الجديده واسلم من الشبه والمشاكل طعني اترك التاجير والتقسيط من الوكالات

[jeep2008]

الله يجزاكم خير وينوّر بصيرتكم
والله بعد هالنصايح أقول باب هالتأجير طاح من عيني ,و تقسيط السيارة أرحم وأهون بكثييييييييير , لكن مشكلة هالوكالات ياكاش يا تأجير , التقسيط الظاهر مايوكلهم عيش !
عسى الله يكفينا واياكم بحلاله عن حرامه ويغنينا بفضله عمّن سواه
تحياتي وتقديري لكم

[بو خالد77]

السلام عليكم

اخوي عندك نظام التورق سمعت انه حلال واريح لك من التأجير...

رح البنك واسال عن النظام واسال شيخ معروف عن النظام وتوكل على الله او شوف لك جمعية وريح راسك....

بالتوفيق يالغالي والله يعينك...

[.أبوعبدالرحمن]

كخبرة بنكية وأني موظف بنك

أخذ لك قرض واشتر سيارة احسن لك

[بو خليفه]

انا اقول ابتعد

اذا حدك الزمن اخذ من البنك سيوله نقدية و اشتر السيارة نقد لتحصل على تخفيض النقد او اشتر من معرض النسيم سيارة جديدة بلوحة او تكون ما شية اقل 5000 كم و توفر جزء من قيمتها والسيارة ملك شخصي وتستفيد من العروض النقدية و تستفيد من سعر السوق هذا هو افضل الحل و اشتر سيارة صغيرة على قد فلوسك لا تصعد الى فوق

[سبع البوادي]

اخوي ابعد عن التأجير والله مافيه بركه

سرق ونصب واحتيال وضحك على اللحى

والله لو تستأجر سيارة من محلات تأجير السيارات ارحم لك

[قيس 2]

السلام اخوي
الاجار المنتهي بالتمليك
حرام شرعا
لانه عقدين بعقد واحد
وقد نهى عنه الرسول صلى الله عليه وسلم

[محمد بن سعيد]

انحش اسمع الكلام طال عمرك خذ عن طريق الراجحي فيه شيء اسمه تقسيط السيارات أبتعد عن التأجير ابتعد عن التأجير ابتعد عن التأجير

[jeep2008]

جزاكم الله خير جميع ونسأل الله من فضله
وفقكم الله

[يوكن]

ياأخي طلع قرض وريح نفس من وجع الراس وترا مبلغ الزيادةأقل بكثر من التأجير الله يوفق ..

[ABSS]

التاجير المنتهي بالتملك زين اذا انت منحد عليه يعني كل الطرق الاخرى

لشراء السياره كاش مسكره فتوكل على الله وخذ تاجير بس قبل كل شي

لازم تهيئى نفسك 1000% للقسط والالتزام بالسداد بدون تاخير وتقنن

مصروفاتك ويكون لديك المقدرة بالوفاء بالسداد حتى نهاية العقد لانك لو تاخرت

لو بقسطين فقط يبون ياخذون السياره وتصير مثل( معايد القريتين) لاانت اللي

سددت السياره كامل وصارت السياره باسمك ولا انت اللي جمعت فلوس وشريت

لك سياره ...


بالنسبه للحلال والحرام موجود فتوى عند بعض البنوك توضح كل شي ومن مشائخ

لهم علمهم وفقهم بامور المعاملات البنكيه ولا يهمك كلام عامة الناس اللي يعتمدون على

وكالة يقولون من دون الاطلاع على مضمون الفتوى...


بالنهايه الله يسهل امرك وامر كل مسلم ويكفينا جميع بحلاله عن حرامه واذا تبي نصيحتي

ووجهة نظري الخاصه فحاول تبعد عن الدين عامه قدر المستطاع وقبل كل شي زي ماقلت لك

قبل تقدم على اي موضوع فادرسه دراسه كامله مستوفيه