ماحصل معي في ميزان العضب اليوم

[بلادي بخير]

حسبي الله ونعم الوكيل
حسبي الله ونعم الوكيل
خسورني مبالغ طائله وقطع سليمه تم تغيرها وفحص سيئ ومعامله سيئه جداااااااااااااااااا عامل يتلفظ علي والاخر يشد على يده
هذا ماحدث والله خير الشاهدين كنت عندهم اليوم من الساعه8 صباحا حتى الساعه 7 مساء علما بان السياره بعد الاستلام فيها حذف من الجهه اليمني

[ابو مريم]

ياخي احس كثرت الملاحظات على ميزان العضيب بين فتره وفتره تنزل مواضيع عنهم يمكن يكون كثر الفروع له دور في هالمشكله الله يكون بعونك اخوي لاكن انصحك ترا العمال ما ينعطون وجه واذا حسيت انك وقفت عند محل وحسيت من ان معاملته سيئه وفيها غرور انصحك اتركه ورح لغيره حتى لو كانت سمعته زينه وموفق خير

[راكب الشفر]

ميزان العضيب صار من الماضي
لما كسبوا الاسم بدأ الاستهتار بالزبون

[طايش 06]

المشكله هذي بأي فرع تكفى
لان العضيب تراهم ثنين كانو جميع همن انفصلو
وانا سمعت ان العضيب الجديد اللي على طريق الميه إمتداد مخرج 15 مهب مضبوطين

[بلادي بخير]

المشكله صارت في الصناعيه القديمه يعني الفرع الاصلي وانا حبيت انبه الاخوان احنا مو لعبه وحلفت بعدها سيارتي ما تروح الا للوكاله لو ادفع الضعف عالاقل معامله وحسن استقبال

[Abu Saad]

خذها قاعده لو كانت سيارتك سليمه ووديتها لأي ميزان راح يقولون غير كذا وبنكبس لك الذراع وبنوزن ...
ويقصبون منك اقل شي 200 ريال على الاقل والسيارة تبقى كما هي ماتغيرت!.
نصيحه:
لاتذهب للميزان الا لوزن الاذرعة فقطططط وان تكون الحذفه واضحه جداا.
او للترصيص فقط .
غير كذا لاتروح لانك ماراح تستفيد شي الا الخسارة ومضيعة الوقت
واذهب الى الميزان الالكتروني حقيقي مدمج في كمبيوتره ارقام اغلب الماركات .
سبق ان حذرنا ان الموازين ياكلون الاموال بالباطل ..لانه يخسرك ولاينفعك.
ولايهون المجد وباقي البهرجه وكل واحد حاط في لوحته الاول والاقدم الخ !!
وبالتوفيق

[ابوخلف الحربي]

اخوي اكثر ما كثر الله ورش الميزان وفي غيرهم واجد حسن استقبال وشغل مضبوط
واسعار مقبوله جدا والا انا من عقب ما سمعت عنهم ماقد جيتهم تقبل مروري..:

[شمالات نجد]

والله اني اذكر قبل سنين كنت اوزن عند اي ميزان طارف ولا يصير الا العافية

والحين (الميزان المشهور) تتردد عليهم مرتين او ثلاث عشان يضبطونه وفي الاخير يقولون هذا مشكله لازم كبس ولازم قطع غيار ولازم شغل (الله من الخرط).

الوزن والترصيص الأرضي شغلتها بسيطه وهم مستغلين الاسم فقط

ولا احد يقول فرع عن فرع يختلف التجارب كانت في الفرع اللي عليه الكلام ما غيره.

سلام

[كاشت وحداني]

العضيب ولا يزعلون علي يفتح فروع ويأجرها بالحفره
كل حفره مؤجره على عامل
ولما تراجعهم كل واحد يرميك عالثاني
وكنت في وقت سابق اختلفت انا واحد الزملاء على جودة شغل العضيب قلت له ساثبت لك
ورحنا فرعهم اللي في طريق الملك عبدالعزيز حي المصيف ودخلت الموتر وقلت الفحص مجاني قال مجاني
قلت شيك على الموتر قال قدام ووراء قلت قدام ووراء
شوي طلع العامل ويهرج مع اللبناني مدري السوري مدير الموقع وقال السياره بتكلفك 2400 ريال
قلت فصلها لي وش 2400
قال بدك كبس مساعد خلفي يمين وكبس كمر قدام الجهتين وركبه يسار فوق ووزن .
قلت شكرا بروح اسحب فلوس واجي خلوكم جاهزين .
ورحت لفرع ثاني ونفس النصب بس بسعر اقل
ونزلت الصناعيه القديمه ورحت للمجد اللي مزعجينا قال عندك انحراف في البودي عن الشاص 3 سم ولا بيضبط الوزن الا بوزن البودي مع الشاص وبيكلفك 3000ريال وبعدها نشوف وش يحتاج الوزن قلت خلاص بروح استاجر موتر واجيكم .
ومريت ميزان اليرموك وقل ابي اشيك على السياره وركبو عدتهم عليها وشيكو على الركب والمقصات قال سيارتك تمام
قلت اقولك عندي ميول في المساعد الخلفي قال ما تشوف الجهاز معطيك الوزن ميه ميه اصفار .
وبعدها اي شئ احتاجه اروح لليرموك مباشره وحتى اسعارهم معقوله جدا جدا .

[فارس ملهم]

نصيحة اخوية

اذا صارت لك مشكلة اعرض موترك على 5 - 6 - 7 ورش

وشف وش متفقين عليه

ولا تنسى خطة يشوفها الا في مكة
الفحص مجانا

[ford]

ياشباب والله لوتطلع سيارتك من الوكاله ان يطلعون فيها البلاوي اصحاب وزن الاذرعه نادر تلقى اللي يخاف الله

[الأجودي]

ياخوي الوكالة انصب مايكون
لكن وش يخليك تدفع الدراهم قبل تجرب السيارة ؟!

[moooj]

اولا الله يعوض عليك دنيا وآخرة وانا اخوك
وخير ما قلت : حسبنا الله ونعم الوكيل.
ثانيا : احنا اكثر ناس نسمع اشاعات وتمشينا الأشاعات ومسرع ما تنتشر شهرة محل وهو ما عنده سالفة لكن السؤال الي يطرح نفسه ....
كم محل ميزان بالرياض؟؟؟؟؟
هل كلهم خسرانين ؟؟؟؟
هل هذا المحل الوحيد الي يحقق ارباح وشغله مضمون؟
فيه ناس ما تعرف المحلات المشهورة ولا تهتم بسمعة المحل ولا ديكوراته؟
تعرف تسفط باي محل وتقضي غرضها وتاخذ فاتورة مفصلة وتمشي بشرط تكون المشكلة انحلت والا يرجع له ويصلح السيارة على حساب المحل او يعيد الخسائر كاملة بعد خصم اجور اليد.

احنا الي علمناهم يسرقونا بعدم اخذ فواتير مفصلة ومشروطة
ولا تستحي من حفظ حقوقك
غير كذا فيه ناس تقعد توسوس بالموتر فلو الهوا جايه من الجنب اليوم وهو راجع من الدوام تلقاه العصر بالورش يدور سبب حذفة الموتر حتى لو ماعاد يلاحظ حذفية
والله المستعان والله يوفق الجميع

[همس الغدير]

نصيحة لأسف اغلب التاجر لا يعرف كيف يستمر على نفس السمعه الطيبه ومن الحسن الى احسن نحن ناس نتاجر بالخبره وليسى بطرق علمية ودورات تفيد في الاستمرار

[ابوو زيد]

العضيب صار عندي افشل ميزان معامله سيئ جدا ونصب عيني عينك

تدخل عنده يعطيك قامه بالخربات وانت ماعندك الا مشكله وحده

وانصب محل شفته الي على طريق 100

[شيخ الذيابه]

الله يعوضك أخوي عن خسارتك ،،،
والله انك صادق ،، كلهم نصابين .
ومثل ما قالوا الأخوان - المال السايب يعلم السرقه - وحنا صراحة ما ناخذ عليهم فواتير ،، وإن أخذنا نتكاسل عن مطالبتهم بحقوقنا ،، يعني يسرقنا العامل وهو مطمئن ،، ماراح يجيه شئ
ولو كل واحد صلح عندهم أخذ فاتورة وأخذ القطع القديمة حتى يثبت بها أنها سليمة ، ونشب في حلوقهم كان ما أحد تجرأ أنه يتطاول على المواطنين وينصب عليهم عيني عينك ، وهو عارف أنه محمي من التيس اللي يدعي انه صاحب ورشة ورجل أعمال وفي الآخر يرمي عليه العامل كل نهاية شهر المبلغ المعلوم وعلى الجزمة .
والله يا أخوان أن حصل لي موقف مشابه مع اللي حصل مع أخينا ،،
وهو أني صلحت سيارتي وكلفتني 1200 عند الدرع بيه ، وعلى قولتكم ديكورات وزبرقه وعلى الفاضي .
آخر شي السيارة صار فيها رجه ، مع العلم أني مدخلها مافيها رجه ، ورحت وتخسرت وغيرت كفرات ، ثم رجعت لهم ، وقلت السيارة ما ضبطت ، ونزلوها الميزان مرة ثانية وقالوا سليمة ،، وآخر شئ رحت المدير وكانت إجابت أسوأ منم شغلهم ،، قال الوزن سليم لو في سيارتك رجه رح ودها ميكانيكي !!!
بصراحة مين يحاسب هذولا - حسبي الله ونعم الوكيل -
نهاية السالفة وديتها واحد فلسطيني شايب يخاف الله محله يدوب تدخل فيه السيارة ،، أقسم بالله أن السيارة رجعت مثل اول واحسن ، وما كلف نصف تكلفته . ويوزن بيده .
لا وأزيدكم من الشعر بيت قال لي خذ رقمي ومعك شهر إذا تغيرت السيارة تعال أوزن مجاناً

أخوكم شيخ الذيابه،،

[حزوبر]

السلام عليكم
مشكلتنا إنا نموت في شيء اسمه ديكور وفخامة محل، وإسم رنان، ويازين لوحة المحل وبلاطه، وسكبة العمال بالزي الموحد (إذبحونا الأن بالسعر لأنكم كشخه:d )
قبل مده أحد الأخوان كتب موضوع في مكشات عن محل باكستاني بشارع الجمعيه، ورخيص جدا"، وكمبيوتر
وصفه شارع الجمعيه مقابل التقوى على اليسار ، وأنت وجهك شرق

[شاهي نثري]

السلام عليكم
بلادى بخير لازم ترجع لهم وسئل عن المدير الفاشل الي امخلين هل عمال علاكيفهم
نفسن شينه وشغلن من جنبه

[عقيل2009]

العضيب صار عندي افشل ميزان معامله سيئ جدا ونصب عيني عينك

تدخل عنده يعطيك قامه بالخربات وانت ماعندك الا مشكله وحده

وانصب محل شفته الي على طريق 100

صح لسانك وانا أشهد

[فهد33]

غريب .!!!

أنا البارح مع مجموعة شباب ويقول واحد منهم عنده سيارة وداها للوكالة فورد فيها طقة برفرف يمين وغيروا له أذرعة ومانفعت وغيروا مساعدات مانفعت نصحه أحد الإخوة يروح للعضيب ويحددون له المشكلة بعدين يروح للوكالة وهذا دليل أنهم خبرة ..
أنا صار معي مرة سيارة فيها نفاضة عند 120 كم رحت لكم ميزان ماعرفوا الحل قال لي واحد منهم رح للعضيب .. رحت لميزان العضيب اللي بالصناعية القديمة وفيه باكستاني ممتاز جاب ماطور مثل الدينمو حطه بالكفر والسيارة مرفوعة شغله شوي طفاه قال لي غير كفرات قلت أكيد قال مية بالمية والكفرات جدد غيرتها وفعلاً انضبطت وصارت مريحة جداً واليوم أول مرة أسمع أن العضيب مو زينين .

[قناص خلاوي]

للأسف في هالديرة ريالك ما يخدمك
بالصناعية ، بالمستوصفات ، باي مكان
والسبب قلة أمانة كثير من العمالة وأصحاب العمل
وعجزنا حنا عن المطالبة بحقوقنا
وعدم فهمنا للي لنا واللي علينا

لو انك اخذتهم بالصوت العالي وطالبت بحقك خصوصا اذا كان فيه ناس كثير بالورشة كان اخذت حقك على داير هلله
ولا فيه مانع لو اتصلت على الدوريات او وقفت اقرب دورية مارة وخليتهم يتفاهمون معهم

على الاقل لو ما اخذت حقك تنبه غيرك وتقلل من سمعتهم وشعبيتهم .

لكن للأسف حنا نستحي ونبلع الخسارة ونتحسب على الظالم ...

ارجع لهم ياخوي وسو اللي قلت لك وابشر بحل مشكلتك
بس دور الوقت اللي يكون فيه زحمة عندهم ..

[كيبك كبك]

رصصت الكفرات عندهم ترصيص ارضي ممتاز
بس وزنت الطاره وسبب لي حذفه يمين ... اخر شي ماعرف قلي غير الدوده ودوده سليمه

[رعد الصحراء]

المشكله هذي بأي فرع تكفى
لان العضيب تراهم ثنين كانو جميع همن انفصلو
وانا سمعت ان العضيب الجديد اللي على طريق الميه إمتداد مخرج 15 مهب مضبوطين


السلام عليكم ورحمة الله وبركاته

حبيت أضيف على كلام أخي طايش

مشكله حدثت معاي في ميزان العضيب اللي في طريق

سعد بن عبدالرحمن ( الميه سابقاً )

تغيير مساعدات أماميه للجيب جي اكس آر 2008

وكنت واقف عند الفني على قولتهم ويحاول يفك المساعد ماعرف

ويحاول فيه ويكلم اللي معاه وحاولو وماعرفو جلسو تقريباً نصف ساعه وللأسف فشلت محاولاتهم !!!

بالأخير قلت لهم شوف المسمار هذا وفكه ويناظر فيني ولا هو عاجبه كلامي :)

المهم

إقتنع بكلامي وفك المساعد

سؤالي لكم لو ماكنت عندهم وش راح يصلحون بالسياره !!!

نصيحه للجميع

من خلال مشاهدتي للعماله ما أنصح بميزان العضيب لسببين ؟

الأول الأسعار غاليه

ثانياً مافيه عماله تشتغل صح

ونصيحه لك أخي صاحب الموضوع حاول تروح لكذا محل وبالأخير تقرر

الله يعوضك

تقبل تحيتي

[sultan18]

ميزان العضيب صار من الماضي
لما كسبوا الاسم بدأ الاستهتار بالزبون

[ولد وايل]

عزيزي ميزان العضيب ولله الحمد عمري مافكرت اتعامل معه
لانه سيئ

المجد وبس مديره عبدالله العضيب ونعم الرجل

كان شريك لابناء عمه ولم يعجبهم الطريق وانفصلوا عن الشراكه

[رفيع المقام]

العضيب ما تعاملت معه إلا مره ترصيص وشغلهم منظم.
وكما يقال الكمال لله.

وفيه حاجه ثانيه أثاروها الأخوان في ردود سابقة، وهي عندما تذهب لتصليح موترك فلا تكتتفي أن تذهب لورشه واحدة.

على الأقل إذهب إلى 10 ورش لكي تستفيد خبرة ولا تتعرض للنصب وتذكر أنك لست خسران.
مشكلتنا شعب ملول ويبي ينجز أعماله على عجل.

[ولد عم هتلر]

اما العامل يسبك والله لو تكلم علي للقطه ولخه لين يخيس
ودور لي ميزان ثاني
بليلة ببشاشة خير من ذبيحه بعفاشة