لماذا نحن مداومين على أكل الـــرز ؟!

[جبال الهملايا]

ليش نتــغداء رز كل يو م
اليوم وانا على الغداء سألني خوي الصغير وقالي ليش ي كل يوم انتغدى كبسه وأي احد يعزمنا للغدى

لازم نلقى كبسه قدامنا.... انتم مامليتوا من هالكبسه

وهو بصراحه صادق يعني الواحد من يجي عمره خمسين سنه وكل يوم يدبغ في ها الكبسه (( الله لايخلنا منها )) وياعيني على أبو كأس :love2: :heart:

الأكلات الأخرى لايستطيع الشخص المداومة عليها طويلاً . ويمل منها بعد فتره بسيطة
بينما تشذ الكبسه من هذه القاعده وقد يصاب الواحد منا بالغضب الشديد ويعصب لو فقد الكبسة ليوم من الأيام ...
أيضاَ في رحلاتنا البرية لابد أي يكون كيس الرز 45كم في مقدمة العفش ولايمكن الأستغناء عنه بحال من الأحوال .

المهم أخوي الصغير أبلشني وغثني بالسؤال و قطعني عن شغالي الشاغل وهو الرز حاولت تجاهل الأمر أكثر من مرة ولكنه أصر على سؤاله البايخ
عندها قلت له بصوت غاضب

.
.
.
.

.

.

.

.

... قم عطني ماء ( من باب أني أبي اصرفه )

فرجاء افزعولي برايكم حتى لا أطيح من عين اخوي

ليش حنا مداومين علي بلع الرز علي مدار العمر

[((( الحر)))]

شف ياخوي
انت جبال الهملايا
والرز من حولكم يعني من الهند
واكلك للرز شي عادي علشانه من دياركم
هههههههههههههه ارجو انك ماتواخذني على هالمداخله
لاكن هذا الرابط بين اسمك والرز وانا انشالله ابحاول اجاوبك على سوالك
وانا متاكد اني اكل الرز اكثر منك
يمكن من اسباب اكلنا للرز في وقت الغداء خاصه وفي المناسبات عامه لانه هو الوحيد الي تعودو عليه الشعب .
لو حطينا جريش او قرصان او مرقوق او اي شي ثاني ( والحمدلله على نعمته الوفيره) كان لقيت ناس ماتاكل منه لانهم ماتعودو على اصناف غير الرز لاكن الرز حوالي 99 بالميه منا ياكلونه وبعضهم بشراهه واولهم محاكيك وهذ الي طلع لنا كروش .
وعلى طاري الكروش عندي نصيحة للاخوان.
من اكثر اسباب ظهور الكروش عندناان الواحد بعد مايتغدى او يتعشى ويبلز (يملى) بطنه من الرز والنعمه ثم يشرب من الماء او البن لين يختم على مايقولون ثم يسحب نفسه لم السرير او الفراش للعزوبيه . وطبعاً الواحد اذا نام ترتخي جميع عضلات جسمه ومنها عضلات البطن وحيث ان البطن مليان الى اخر حد يتمدد شوي وعلى هالحاله كل يوم لين تلقى الواحد منا بطنه مايقوى يشيله كنه في التاسع
والحل الوحيد إنا قبل النوم مانملى بطونا لاكن على مايقولون(( من يقول للحاج اوقف)) وسلامتكم

[الخبير]

السلام عليكم
شف يا طويل العمر ، الرز من اوفر الوجبات عندنا بالسعودية و مهما تركته ما يخرب ( على العكس افضل رز هو المعتق ) .
الرز عبارة عن كربوهيدرات ، والكربوهيدرات اذا ما حرقتها تحولت لدهون .
الرز اسهل طبخة ممكن ان تقدم ، و اكثرها اشباعاً .
الرز ناكله كل يوم لاننا تعودنا ناكله كل يوم ، و من شب على شئ شاب عليه.

[بدوية متحضره]

اهل الخليج بالذات كذ بغو يموتون من الجوع في الزمان الماضي

ويوم فتح الله عليهم

اول شي عرفوه الرز

فصارو يتقائلون بوجوده لانهم من يوم عرفوه والكروش ماشالله كل مالها تكبر

والجيوب تنتفخ .... جاز لهم الوضع :D

[السرحان]

سوؤالك وطرحك غريب وعجيب
لان الرز اصبح شيء من عاداتنا وتقاليدنا واكثر من ثلث الكره الارضيه على فكره تاكل الرز لعدة اسباب منها ما نعرفه ومنها ما نجهله ..... ولكن الاهم على الاطلاق انه من الثمره المعتقه التي كلما تعتق تزين كما ذكر احد الاخوه الافاضل ولا تحتاج الى ثلاجه او غيرها من الامور المكلفه في حفظ بعض الاطعمه
واخي الحبيب هناك الكثير من الامور ما تعارف عليه الناس وليس لها تفسير او سبب والله يعينك على اخوك اذا كان من النوع الفضولي ويحب يعرف كل شيء وهي على فكره فترة وتعدي على خير !!!!
ولكن كلمحه تاريخيه للموضوع او للرز فهو لم تعرفه العرب الا حديثا ولم يكن معروف ايام الرسول صلى الله عليه وسلم وهو من نتاج معركة القادسيه مع الفرس الذين يسبقون العرب في الطبخ ولا زالوا
حيثق وجده الصحابه والمسلمون في مزرعه تركها الفرس وكان منقوع في سطل ماء فلم يعرفه المسلمون فاكلته الخيل فانتفخ بطنها فماتت فقال المسلمون لعله سم تركه الفرس لنا ...هذه هي بدايته تقريبا
وبعدها اصبح رمز لكل الشعوب
اخوكم السرحان

[النعيريه]

قل لخوك احنا ناكله مره وحه في اليوم لاكن شرق اسيا ياكلونه فطور وغدا وعشاء والحمد لله احنا احسن بكثير00 وهو سيد السفره اذا ما وجد قالو وين الغداء مع ان السفره مليانه اشكال ولله الحمد

[شاهد عيان]

حسب توقعي بأن السبب الرئيسي لأكل الرز هو ( رخص القيمة ) مقارنة بالمأكولات الأخرى .
ويقوم بدفن المعدة حتى السقف .

[بيرق العزة]

من جد في الرحلات مايصلح نسوي طبخه غير الرز واذا فيه ياليت احد يقولنا وشهي وبتفصيل والشرح

[aan]

انا اعتقد ان الناس بحاجة دائمة الى احد الكربوهيدرات (لازم شويت فلسفه) مثل الرز او الخبز او البطاطه او ... و هذه الاطعمة ما يمل منها الانسان لو اكلها في كل وجبه. جرب كل بطاطه و شوف كان مليت منها و الا تدري ورنا الشطاره و اترك الخبز الابيض. تدري ليه ما تقدر تترك الخبز الابيض و غيره من الكربوهيدرات لان فيها سكريات اذا ما تخليت عنها لفتره طويله بنصاب بهستيريا. و السموح على الفلسفه الزايده لانها كلها من رايي الخاص و انا ماني دكتور و لا اخصائي اغذية و الله اعلم.

سلامتكم يا اهل الكرم و الجود

[نسناس ليل]

بالعربي الفصيح والمختصر ( مافيه شي يتكي في المعدة غير الرز )

بعدين لحظ أخوي ترا قليل اللي يتعب او يتضايق من الرز ( اقصد يعني المعدة وغيرها) اما الاكلات الثانية تحصل ناس كثير يشتكون منها
بالاخير ...... الله يديم هالنعمة علينا

[طبيب بيطري]

اعتقد والعلم عند الله ان الاسباب هي:
- سهولة الطبخ مقارنة بالطبخات الاخرى .
- الطعم المميز اذا حكر مضبوط.
- كمية قليلة من الارز تكفي لاشخاص اكثر .

هذا ماعندي وقد يتفق معي طرف وقد يخالفني طرف اخر وهو مجرد اجتهاد شخصي .

وللجميع تحياتي،،،،،،

[حزم الجلاميد]

الله لايخلينا .................
الرز يجمع اكثر حسنات الطعام لذيذ ومتجدد ( لايمل ) وخفيف ( وجبة المرضي في المسشفيات )
الوافدين للمملكه لما عرفوه اغرموا به .....
ولايهنا للمعده الا الرز
هل ينفع سحور غير الرز................. ما اظن :o

[1500]

بداية اما بعد.......


(اعلمه الرماية كل يوم فلما شتد ساعده رماني)
هذا وصلى الله على نبينا محمد

امزح:D
بخصوص الرز فهو متعودين عليه الناس فصار اكله رئيسه
فيه نا سيفطر ويتغدى ويتعشى رز ولا بعد يحطه وجبه خفيفه ( حشى ماصار)

ولا يحلي بعد

احس ثقلت عليكم (شويه)
:j



والسلام

[طحنون]

اعوذبالله من كلمه انا
اذامااكلت الرزفي اليوم تجيني نفظه في اليدين
وتصيرالنفسيه والاخلاق تجاريه
واذابغيت تعذبني لا تسوي رزعلى العشا اوالغدا
والله يا جماعه على التعود
ومره من المرات سويت رجيم وحطيت الرزبالسندويش علشان يصير خفيف

[احمد الثقفي]

الرز من الطبخات السهلة ويؤكل من قبل الكل صغير وكبير ....
واحد من الأصحاب الله يرحمه قال ليتهم يصنعونه زي الدواء وينباع في الصيدلية
ومرة قال لو ينقطع من عندنا الرز ...أهاجر إلى الهند:D
الله يرحمه ويرحم جميع موتى المسلمين

[مدور ربيع]

في اعتقادي ان العرب مايحبون التفلسف الزايد بالطبخات

ومن هالمنطلق نلاحظ ان الرز شطف المركز الاول بين الانواع الاخرى

اولا لانه سريع الطبخ 15 دقيقة وهو جاهز بعكس المطازيز يبيله حول الساعتين
ثانيا متجدد ,, يعني حسب اللحمه اللي معه
ثالثا عمليه طبخه سهله اغسله وقب عليه الغاز
رابعا خل اخووك يشوف صحن رز منثور على قميري ... و مشويات وسمك ولاوحقها ... وعلمنا ويش يختار هو ماهوب انت !

[كرار]

مادري إذا كان هناك بديل مناسب بعد الغلاء الفاحش للأرز ؟؟

مع أني ماتوقع أن يخف إقبال الناس عليه مع أرتفاع سعره

[ابوقتيبه]

ومره من المرات سويت رجيم وحطيت الرزبالسندويش علشان يصير خفيف

هههههههههههههههههههههههههههههه

تلعب على نفسك

ياحليلهم حقين الرجيم اعرف واحد داخل نادي يبي يخفف الكرش اذا طلع من النادي راح اقرب معلم شورما ينقنق بصاروخين على مايجي العشا


على العموم الزر غذاء الكل ويمشي على الكل وبكل وقت وانا من المتعصبين لرز واضن ا للي يميزه اكثر هو تعدد اساليب طبخه وطعمه وسهولة تخزينه ورخص سعره