الاختبار الحقيقي للسيارات بدأ من اليوم صراع من أجل البقاء ....

[درباس فرناس]

مع بداية دخول شهر الصيف اللاهب ودخول مربعانية القيظ
تبدأ الحرارة بالارتفاع الشديد حتى تصل في بعض الاحيان الى خمسون درجة :f
هنا أتذكر قول ذلك الشاعر
ستعلم حينما ينجلي الغبار .....أفرس تحتك أم حمار
وأقول ستعلم حينما يدخل طباخ التمر ومربعانية القيظ قوة تحمل السيارة وصبرها على الشدائد أما أنها كسرة حديد تتهاوى أمام أول ضربة من ضربات شمس صحراءنا المهلكة :s
ولعلنا نسمع تجارب المجربين وخصوصا في السيارات الجديدة التي بدأت تغزو السوق
مثل سوبر سفاري نيسان وسكويا تويوتا واللاند الجديد والتاهو واليوكون ...الخ قائمة هذه السيارات
تكرما منك أذكر لنا التقييم الفعلي لتحمل سياراتك لهذه الاجواء اللاهبة أعاذنا الله وأياكم من فيح جهنم
نريد أن تبين لنا
1حرارة السيارة كم تصل
2 كفاءة المكيف وهل يبرد السيارة بصورة قوية أم أنه يضعف ويخور
شاكر ومقدر لكل من يذكر لنا تقييمه

[هبــ حريملاااء ـبوب]

وعليكم السلام !
وين الددسن ؟ حراره اقل من الطبيعي ولله الحمد والمكيف على رقم 2 فوق تحت

[راعي النياسين]

اخوي الباترول والددسن لاتدور غير حرارتها

دائما على الربع ونادر جدا ماترتفع عليك واذا ارتفعت يكون حلها بسيط

اما باقي السيارات الله اعلم بس اليوكون حرارته تحت النص بشرطه واذا كان الجو شديد الحراره ترتفع الى النص غريب

[ارمااداا LE]

^
^
^

افا ما فيه ارمادا بعد !! عندي حراره الجو ما بين 40 الى 43 على الشاشه
الساعه الواحد ظهرا وحرارة الموتر ربع ثابت والمكيف ممتاز

[راعي النياسين]

بالنسبه لسيارتي

سوبر سفاري 2006 حرارته اللهم لك الحمد في عز الظهريه على الربع والمكيف من ابدع مايكون

ماشاء الله تبارك الله

[ذعذآع]

عندي جمس 2000 مع المكيف تحت النص بخط او خطين وتبريد جيد جدا

[بعيد الهقاوي6]

التاهو ماشاء الله تبارك الله المكيف ثلللللللللللللج



وكل يوم الظهر اراجع بالدوائر الحكوميه واخليه شغال لمدة ساعتين الى ثلاث ساعات

بالمواقف وحرارته ثابته ولله الحمد قولو ماشاء الله ترا العين حق ياخوان

[قناصه]

هدد 2006 مزبوط الثلث صيف شتاء مكيف شغال طافي

جمس سييرا مفخذ 2006النص دائما عدا عند الاشارات اذا طول تتعدا النص

اما اذا طالع من الخرارة لللرياض فترة الطلعه >القدية<الثلثين

[NissaN 1990]

الباترول ماشاء الله الحراره ثابته والمكيف ثلج

[ساري 111]

هدد

الحراره ثابته على الثلث

المكيف دائماً على Lo

[أبوغيث 2003]

باثفندر

الحرارة على الربع

لكن التبريد مش ولا بد

الله يخلي التظليلة

[بروق ساق]

سيارتي داتسون 97 الحرارة ولله الحمد شتاء قيظ الحرارة على الربع والمكيف زي الحلاوه في عز الظهيرة

[NOYEB]

كلً بيمدح موتره يادرباس

[محسن اليامي]

سوبر سفاري 2003 ماشاءالله تبارك الله في عز الظيره الحرارة ثابته فوق الربع بشخطه

والمكيف ماشاءالله تبارك الله بارد

[ابوقاسم]

مع احترامي لك اخي
فان اختيارك لتقييم السيارات فيه تحيز
يعني عند 3انواع من التويوتا
وين الباث سيارة الشباب
بالنسبة لي
الباث فيه الحرارة على الربع
والمكيف فل الفل

[ابوقاسم]

مع احترامي لك اخي
فان اختيارك لتقييم السيارات فيه تحيز
يعني عند 3انواع من التويوتا
وين الباث سيارة الشباب
بالنسبة لي
الباث فيه الحرارة على الربع
والمكيف فل الفل

[ولد وايل..]

ياخي عندنا ناس غريبه ...

كيف تقارن بسوبر سفاري 2010 وهو ما نزل بالشوارع نزول فعلي ....؟


كيف تنزل له تصويت .. ولا بس موتر هويته اخمن انه يتحمل !!!؟




عموما ان صوتي راح للتاهو واليوكن << اللي مجربه 2007 وفوق...


ولاصار قيض وشمس والهوا قاسي .. فأركب على الجمس وخله يلعب فنونه ...

والجمس لا من ركبته طار عوماسي ..لو طال ممشاه ما يتعب دركسونـه ...


يوميا امسك عليه خط 180 كيلوا رايح 180 جاي = 360.. في عز القيظ السنتين اللي فاتت كلها...

والأن اطلع كل اسبوع خط الرشرقية وارجع ولا يول اح والتبريد افضل من رائع...


ومستعد اتحدى اطلق هدد يا اخوي (قناصه) انا اوقف موتري ساعة وساعتين بعز الظهر واخذها نوووومة من الساعة 12 الظهر وقت البريك وبدون مظلات ولا شي والحرارة ما ترتفع على حدها الطبيعي ...

ثاااااااااااااابته على 100 على النص من أول ماأشغلة الى ما انتهي من مشواري وهو ثابت ما تزيد نقطة وحده...


والله اقولها شهادة حق ومحايده اليوكن والتاهو الجديده والله ماتعرف الحرارة ابدا...

[ساري 111]

كيف تقارن بسوبر سفاري 2010 وهو ما نزل بالشوارع نزول فعلي ....


انا ودي ادري كيف وصل عدد المصوتين لهذا العدد ؟؟

ودي اسأل اللي صوتو بناء على ايش ؟؟ هم مجربينه او اخذين الدعوى فزعه

المصداقيه بالتصويت لك عليه شوي :D

[بواردي تربة]

تريل بليزر

الحرارة في الصيف والشتاء وحدة النصف والمكيف ممتاز

[metub1404]

الددسن وبس

[الوايلي...501]

ددسن مكيف ماشاء الله بارد ولا تشتكي لاحرارة ولا شي
عموما النيسان كله مكيف خذ ولد وحرارة نادرا ماتطلع

[أبو عابد2000]

سلم لي والله على طيرة شلوى ( الددسن ) بعز القوايل والمكيف على 3 ( براد يا الله الجنه ) والحرارة ماتعدى الربع بتاتاً :)

[أبوعتقان]

والله افضل سياره مرت علي في حياتي تتحمل الحر وماترتفع حرارتها
هي لاند كروزر
كان عندنا لاند 2003 ثم غيرناه بفكسار 2007 ثم خذا الوالد فكسار 2010 والله انا كادينها مكدة الله لايوريكم
في عز الصيف نقطع بها بالبر من عند الحلال رايحين جايين ما قد ارتفعت حرارته ماشاء الله تبارك الله
وكان عندي ددسن 98 ماشاء الله ما قد ارتفعت حرارتها الا نادر و بعت الددسن وشريت نافارا نيسان
والله يا ان النافارا ماتسوى ريال يندفع فيها
المكيف تبريده ماشاء الله تمام لاكن حرارة السياره من دخل الحر من الشهر الماضي والسياره حرارتها ترتفع زهقتني
وديناها الوكاله ولا نفع والسياره جديده وحرارتها ترتفع
فنصيحه انحش عن النافارا الددسن افضل منها
وشكرا

[عميد سامودة]

مافيه ددسن ولا هلي ولا باث

[ام صتمه 87]

عندي اليوكن في عز الظهر ودرجة الحرارة 45 ومكيف زي الحلاوة بارد جدا ..

[الجني العبد]

عندي باترول 99 مكيف زي الزباله أعوذ بالله أنوااع الحر ..
والمشكله على حرارة المكيف السيارة تحتمي فوق النص ،، احشفا وسوء كيله :( !

والله إني انطبخت ياجماعه الربع وش السوااااااااااااااة ..

[بروق ساق]

عندي باترول 99 مكيف زي الزباله أعوذ بالله أنوااع الحر ..
والمشكله على حرارة المكيف السيارة تحتمي فوق النص ،، احشفا وسوء كيله :( !

والله إني انطبخت ياجماعه الربع وش السوااااااااااااااة ..
نظف الأديتر وشيك على بلف الحرارة والمروحه
وحط ماء أصلى
وإن شاء الله يكون زي الحلاوه

[((ابوملاك))]

شف يا بعد حي مرن علي سيارات واجد والحين اللي عندنا

سوبربان

وجيب فورتشنر

وبريفيا وهذي اتركه وضع خاص !

جيب موتسبيشي

وكلها حرارتها ممتازه تراهم يدرون انها بتجي للخليج وماخذين حساب هالشئ لاتحسبهم بس صنع ارسل ! كل منطقه له سياراته

[شمالات نجد]

من رايي أن كل المواتر زينه بشرط ما يكون فيها عله

بعدين ودي أفهم وشو له محطوط سوبر سفاري 2010 وهو ما جا منه إلا سفاري تيب1

والداهيه اللي صوتو له على أي أساس ههههههههههه

سلام

[درباس فرناس]

شاكر ومقدر لكل من شارك برأيه القيم
والمعذرة لمن طلب إدراج بعض السيارات كنت سأقوم بتعديل التصويت الا أنه ذهب وقت التعديل
الرجاء من المشرفين وفقهم الله إدراج ما سهيت عن وضعه من دون أي قصد وخصوصا البافندر والارمادا
علما أن المقصد الرئيس هو معرفة كفاءة السيارات الجديدة بشكل خاص
أما السيارات القديمة فسمتعها تكفي عن أي استبيان ولذلك حرصت على إدراج باترول سوبر سفاري من نيسان وسكويا من تويوتا لأنها حديثة في السوق ولم نعرف قدرتها على تحمل صحارينا اللاهبة
أكرر الشكر والاعتذار من الجميع

[سليمان 10]

دائما اللاند في الطليعه مع احترامي الشديد للنياسين واهله 000

[قناصه]

من رايي أن كل المواتر زينه بشرط ما يكون فيها عله

ككككككككككككككككككلام سليم

ومستعد اتحدى اطلق هدد يا اخوي (قناصه) انا اوقف موتري ساعة وساعتين بعز الظهر واخذها نوووومة من الساعة 12 الظهر وقت البريك وبدون مظلات ولا شي والحرارة ما ترتفع على حدها الطبيعي

شكل موتري فية علة مع العلم مودية قبل اسبوعين للتشييك في الوكالة وسليم بس تراه قديم 2006

وانا لا صنعت هذا ولاذاك بس كتبت اللي عندي للفايدة لي وللجميع الواحد هنا يستفيد من اخوانه ويفيدهم قد مايقدر للرقي والفائدة من ها المنتدى الطيب بمشرفية واعضاءه ومعروف الحرارة والمكيف النيسان ثم التويوتا ثم الامريكي هذا بالقديمات

لالالالالالالكن الاستفسار هنا عن الجدد سكويا؟؟؟؟ولخ من السيارات الجدد لو لاحظت الهلي والددسن وبعض سيارات المكشاتية المفضلة ليست موجودة لاانها من وجهة نظر الكاتب الاخ القدير <<درباس>>ماتحتاج اثبتت

كفائتها والكل عارفها

وفي الاخير اسف جدا على الاطالة والله يوفق الجميع لما يحب ويرضى ويبعدنا عن الورش ويكفينا شر حرارة الدنيا والاخرة

[بن سليمان]

الاخوان اللي زعلانين من ادراج بطل الدروب بالتصويت ترى الزعل يسبب الشيخوخة المبكرة ومن علامات الشيخوخة المبكرة ( الهذرة )
الموتر له أكثر من خمس سنوات وهو تحت التجارب وأكثر من 13 ألف ساعة خلال سنتين تجارب في المناطق الحدودية الواقعة بين الامارات والسعودية وتحت اشراف 40 مهندس من نيسان واختبارات تحت اقسى واصعب الظروف الجوية والتضاريسية

وفي مثل المناطق هي التي تبين إذا تحتك حمار او حصان واللي ما يتحملها الا بعير هرش

http://free-desert-sun-screensaver.smartcode.com/images/sshots/free_desert_sun_screensaver_26083.jpeg

عاصفة الصحراء

http://www.i1i1i.net/download.php?img=1144

http://play-auto.net/wp-content/uploads/2010/02/2011-Nissan-Patrol-121.jpg

[ولد الغلباء]

انا جرب الاند كروزر الشكلين الجديد والقديم وفل الفل واليوكن بعد عسل

[طربان على صوت]

والله ياخيي تسان هي على المكيف خذلك هايلوكس غمارة ولا ددسن غمارة وعش حياتك براد بمعنا الكلمة ثلج يالله من فضلك (وصوتي للاند)

[ابو يعقوب 2]

سيارتي داتسون 97 الحرارة ولله الحمد شتاء قيظ الحرارة على الربع والمكيف زي الحلاوه في عز الظهيرة

ماأزيد على كلامك شي
الا ان موتري موديله 95
ابد موتري اخو موترك :D
والواقع الصراحه
التحمل لـ ( TOYOTA )

[السليطين]

تدرون وش لون التجربه ؟؟؟؟؟؟؟؟؟؟؟؟؟؟

خذ الموتر للنفود الساعه 2 الظهر . وشغل المكيف . وادخل به النفود وعره لمده نص ساعه ..

واذا ماحتر ..... فهذا هو الموتر ....


هذا الكلام مايتحمله الا نيسان وتويوتا . يليه الباجيرو ...... اوما الامريكي فمن جنبها ...


تجربه وليست كلام ..

[GS5]

^^ مجربه بسوبر سفاري 2006 يالسليطي
الظهريه تقريبا كله بالغميس بالقصيم (بين البدائع والخبراء)
بالدبل و اللعن والله ان الحراره بالخط الثاني ماشاء الله تبارك الله
+ ماكنت مضلل و المكيف مطولن له و يالله براد الجنه , تبريد ممتااز
الكلام بآخر 7 كاني منب ناسي او انه بـ8 هجري سنة 1429هـ
و اللاند يمدحه الوالد هو واللكسز 470 راعيهن و ابخص بهن من يقول مهب شينات بالحراره والتبريد
عاد الحمد لله تمت هداية الوالد على يدي و تحويله للنياسين بعد التيوتا واللكسز :p

[Magellan]

أخي الكريم
أغلب السيارات اليابانية والأمريكية تتجمل بالحرارة في الصيف ،
انامعي شيفروليه تريل بليزر الحرارة طبيعية بالصيف النصف لاتزيد ولاتنقص
لكن بالقايلة تحت الشمس يترادى عزم الموتر بسبب استهلاك الطاقة للمروحة بالإضافة للمكيف مشي حالك وإذا مشيت زان ...
واعتقد بالقيظ مشاوير اي شخص لاتتعدى جهة عمله اودراسته إلى البيت
مو فاضي الواحد يهجهج يمين وبسارلأنه جسمك مايتحمل هالحرارة فما بالك بالحديد
وأغلب من يشتكي من الحرارة اصحاب السيارات الأوروبية فهم الخاسر الأكبر من حرارة الصيف

[راعي البحري]

ياراعي الجمس خذت الفوز بالكاسي
لله در الذي بالدين يشرونه
لاصار قيض وشمسِ والهواء قاسي
اركب على الجمس خله يلعب فنونه
-----------------------

الجمس صمم للوجيه المسافير
ياظالمين الجمس وين العدالة
سواقه اللي نصف راسه مغاتير
طيبه على عمه ومن ساس خاله
-----------------------
قامت شكامينه تعزف معزوفه
وراعيه قام يجاوب الجمس بغناه

[ابوخلف الحربي]

ياناس ليه كل واحد يمدح موتره مهي معقوله انا لوقفت عند اشاره الضهر الحرارهhوالكمبرسر يخرب كابرس2005

[ولد وايل..]

تدرون وش لون التجربه ؟؟؟؟؟؟؟؟؟؟؟؟؟؟

خذ الموتر للنفود الساعه 2 الظهر . وشغل المكيف . وادخل به النفود وعره لمده نص ساعه ..

واذا ماحتر ..... فهذا هو الموتر ....


هذا الكلام مايتحمله الا نيسان وتويوتا . يليه الباجيرو ...... اوما الامريكي فمن جنبها ...


تجربه وليست كلام ..





تقول جربت ..؟ ونص ساعه بس..؟

الواحد يبعد عن تكذيب الناس له يا عزيزي...


انا داخلن سلمك الله طعوس الشرقية الطعوس البيض الهياااار ولأكثر من نص ساعه على قولتك يمكن راحت ساعه ونص الى ساعتين في عز القايلة ايام القيض الله يكفينا شرها... والله وربي شاهد علي ان الحرارة ما ارتفعت عن الطبيعي ...

وغيرها مرات كثيره بس ما اذكر المده والوقت...

أرجوك لا تتكلم الا بشي تعرفه وتثبت عليه...

الياباني اللي تتكلم عنه والاند كروزر حرارته ماتثبت مجرد ما تشغل الدبل الثقيل وتمشي لك مترين ثلاثه وتقبع الحراره...

وع الخفيف تمشيه وبالليل ترتفع الحراره...

وانا اعرف 3 معهم لاندكروزر والله 2 يشتكون من حرارته والثالث يتجمل عند موتره وانا اشوف الموتر انبير الحراره ياصل الى ثلاث ارباعه ويقرب من ال h

عموما كلهم فيهم الخير والبركه لكن لا تقول شي وانت ما عندك عليه اثبات ...

[ولد وايل..]

الاخوان اللي زعلانين من ادراج بطل الدروب بالتصويت ترى الزعل يسبب الشيخوخة المبكرة ومن علامات الشيخوخة المبكرة ( الهذرة )
الموتر له أكثر من خمس سنوات وهو تحت التجارب وأكثر من 13 ألف ساعة خلال سنتين تجارب في المناطق الحدودية الواقعة بين الامارات والسعودية وتحت اشراف 40 مهندس من نيسان واختبارات تحت اقسى واصعب الظروف الجوية والتضاريسية

وفي مثل المناطق هي التي تبين إذا تحتك حمار او حصان واللي ما يتحملها الا بعير هرش

http://free-desert-sun-screensaver.smartcode.com/images/sshots/free_desert_sun_screensaver_26083.jpeg

عاصفة الصحراء

http://www.i1i1i.net/download.php?img=1144

http://play-auto.net/wp-content/uploads/2010/02/2011-Nissan-Patrol-121.jpg




أجل اركد على عمرك لا تجيك شيخوخه اجل...

هههههههههههههه
اجل له خمس سنوات تحت التجربه ماشاء الله...

هذا التجربه تحد يد من ؟؟؟
مهيب تجربه تحد يد صناااعه ؟؟

راعي الصناعه يمدح صناعته ويصدقوووون المطبلين...

عموما المقصد الاول والأخير الموتر اللي يطرح له تصويت لازم يكون مجرب من المصوتين انفسهم...


اترك عند الكلام والمكابره....

[حبل الوريد]

النيسان والتيوتا

فقط لا غير والامريكي كان معي

اوقف ساعه بالقيض الحرارهـ ثلاثة ارباع

[راعي المجهم]

عندنا جمس حوض 84 الحرارة على الثلث في عز الظهرية والمكيف ثلج

ماشاء الله تبارك الله

[راعي النياسين]

بالنسبه لي صوت للباترول الشكل القديم 2009

حرارته مابه مثلها والمكيف ممتاز لكن الاشكال الجديده ماجربتها

[أبو مهند الزهراني]

امتنع عن التصويت بسبب عدم وجود fj cruser

[ابو سليمان 11]

وين راح السيزازو ديمكس ؟

[سوبر مكشات]

الحررررررررررررررررررررررررررررر
شييييييييييييييييييييييييييييييييييييييييييييييييي ييييين






الحررررررررررررررررررررررررررررررررررررر
حررررررررررررررررررررررررررررررررررر






الجو حااااااااااااااااااااااااااااااااااااااااااااااااا اااااااااااااااااااااااااااااااااار



حااااااااااااااااااااااااااااااااااااااااااااااااا اااااااااااااااااار الجوووووو









8
8
8
8
8

8
88

8
8
8

8
88
8
8
8
8
8

8
8
888




الحراره تسوي اكثر من كذا






ياخي تحذيرات المرور ان محديسافر من بعد الساعه العاشره حرا

الى الساعه الربعه حرا


يعني من10 الى 4 شف لك محطه ولااقعد ببيتكم

لاتمشي الا بالليل


بس مدري لييه المرور مغفل الموضوع
















ــــــــــــــــــــــــــــــــــــــــــــــــ





قل نار جهنم اشد حرا



لنتذكر الاخرة

ويكون الجو هذا لنا عبره


















موفقين

[أبو حرب 111]

انا اقول الى تبون تعرفون كيف قوة تحمله للحراره من 2006 وتحت اما الى يقلي 2009 و2010 يخوي الموتر جديد لو انه تاتا مابترتفع الحراره المهم
الاند وبس تايوتا ربع
ومن تجربه باثفندر 2005 جنني بالمكيف كل يوم خربان مع العلم الموتر ورده البترول من يوم يقدم معاد يتحمل حراره واليوكن كمان والجموس بصفه عامه

[ساري بريدة]

لاند كروزر شيك مصدق

[فهد33]

صدق ..لاند كروزر شيك مصدق

[ارمااداا LE]

اليوم الجمعه الحراره غير !!!!

الموتر ارمادا مدة الوقوف بالشمس 40 دقيقه تقريبا بدون ظل الساعه الواحده بعد الصلاة ..
ما شاء الله تبارك الله ثابت والامور طيبه والمكيف ممتاز ..

http://img689.imageshack.us/img689/6100/20100611322.jpg (http://img689.imageshack.us/my.php?image=20100611322.jpg)


http://img821.imageshack.us/img821/9480/20100611323.jpg (http://img821.imageshack.us/my.php?image=20100611323.jpg)

[حلال المشاكل]

سيارتي ما فيها مقياس حرارة
بس لمبة حمراء

[راعي جيوب]

أما مجرب التويوتا من عام 1410هجري أكثر من ثلاثين جيب شاص ولاند الحراره ما تتعدى الثلث

[ولد وايل..]

^^

ماشاااء الله الله يزيييدك...


بس أسأل اي واحد من ملاك الاند ولا الشيصان وشف ...

مع الكر واذا تم سنه او اقل يبي له تسييخ وبهذله...

[أبوعتقان]

^^
^
هذا واحد منقهر من تيوتا

جربنا ثلاث لاندكروزرات وشاص ماشفنا منها بلا
ولمعلوماتك استخدامها كان استخدام ابو كلب وانت بكرامه

[ساري 111]

س أسأل اي واحد من ملاك الاند ولا الشيصان وشف ...

مع الكر واذا تم سنه او اقل يبي له تسييخ وبهذله...

8
يمكن قصدك سياره ثانيه معروفه بالحراره وشعر الراس
اما الاند كديناه ولاشفنا منه خلاف

وعلى اقل الاحول هو افضل من غيره بمراحل

[ادولف هتلر]

موضوع ماله فايده معينه ..
اي موتر محافظ عليه راعيه ويشيك عليه بيصير زين ومكيفه بارد

كل مواتركم مع الوقفه الطويله تقل بروده المكيف <<<<<<<<<<<<<<< عبط



تحياتي للعقول الكبيره فقط <<<<<<<<<<<<<<< اما تويوتا احسن نيسان احسن يصبحون على خير

[هوايتي مكشات]

السفاري بس ماهو 2010 هذا اللي اقصد

[ولد وايل..]

الأخوان أبو عتقان وساري...


لا والله ما ني حاقد ولا شي ماتاااصل لا ابوها لا ابو تبن بوجه العدو سيارات راس مالها

انا ما أتكلم الا عن تجربه ومعرفه انا ما استنقصت بشي من الموتر...

انا قلت الموتر يحافظ على حرارته بمحافظتك عليه...

والان وغيره لو جربت مهوب 30 الا 30 الف سيارة

انا وأخوي عنده 2006 جكسار والحرارة ازعجته ماتاصل للأتش لكن مع الكر يبدأ يرتفع حرارته وراح وسيخه والحمدج لله ضبط....

ونفس الشي واحد من عيال عمي عنده 2003 وكل سنه وعليها كود ينزل الرديتر ويسيخه والله على ما اقول شهيد..

وبعد خالي عنده 2003 محااافظ علييها والحرارة تلعب عنده ما تثبت...


ولو تبي تتاكد رح شف خيمة الاعطال وشف اللي يشتكون من حرارته...

يكفينا تقديس لتويوتا وغيره الواحد يحكم عقله ما يحكم شي ثاني!!...


بالتوفيق...

[قنآآآص حريملا]

والله معي انا سيلفرادو شفر صحن 2007 وحرارته دايم فالنص بالضبط والمكيف على 4
مشاءالله ولا حول ولا قوة الا بالله

[monsixnet]

-

×مشكور ويعطيك العافيه

[ابو نعمه]

انا جربت

تاهو 2009 الحراره طبيعيه جدا بحكم تجربتي الاخيره مكيف جيد جدا

اما من السيارات الي جربت مكيفها و كان اقوى مكيف من الجديد

الكرسيدا والله المكيف الصاحي

التيما 92

ددسن 90

عموما السيارات الجديده كلها حرارتها في الصيف و الشتاء نفس الشي

اصوت للتاهو

[السرحان502]

أنا استعرت الددسن 97
ممتاز اقل من الربع او مايرتفع بعد
وهذي ميزه للنيسان

[العبله]

النيسان لو توقف في القايله تحت الشمس وتشغل المكيف ما ترتفع الحراره وهذي ميزه تحسب للنيسان وهالكلام مهوب جديد ولا فيه مقارنه مع غيره.
طبعا انا جربت الكامري 2004 حرارتها فوق الربع وكذالك هايلوكس 2005 حرارته فوق الربع.

بالتوفيق..

[خشم العرمة]

اي موتر جديد ماراح ترتفع حرارتة وتبريدة زين لوانة وشو
وبعدين الناس تجارب وكل واحد يمدح ويسب من تجربة وحده وهذا خطاء
الناس كلها خير وبركة المواتر الهدف منها تشيل رجل الانسان عن الارض وكل واحد وقدرتة

لكن المهم ان الشخص يراعي موترة ويتعامل معه بحنية بعض الاخوان يقول اوقف الموتر في عز الشمس والقايلة واشغل المكيف وانوم والثاني يقول في المواقف ساعتين مشغل مكيفة !!! حرام والله ياخوان ترى مهوب زين الحين تشوف انه عادي بالكثير سنة سنتين وتطلع خرابات وتقول الموتر مهوب زين الا زين بس تعاملك معه في البداية هو اللي يحوسة عليك بعد فترة الموتر تخدمة يخدمك تراعيه وتحن عليه يعيش معك لكن تجور عليه وتزعل اذا خرب هاذي مشكلة

[ولد وايل..]

^^

يالبى اللي مثلك بس...

بس يااااخي احياااانااا تصير مجبووور ...

ولا بيدك تسوي شي خاصة مع اوقات الدوامات الخايسه..

ان مانمت بالسيارة وين تنام...


سؤالي هو وش الأضرار المحتمله من تشغيل المكيف والسيارة واقفه والتطويل ..؟

يعني وش اللي يحتمل يخرب ع شان نداريه <<< يجرح ويداوي..

[أبوحمييد]

الأخوان أبو عتقان وساري...


لا والله ما ني حاقد ولا شي ماتاااصل لا ابوها لا ابو تبن بوجه العدو سيارات راس مالها

انا ما أتكلم الا عن تجربه ومعرفه انا ما استنقصت بشي من الموتر...

انا قلت الموتر يحافظ على حرارته بمحافظتك عليه...

والان وغيره لو جربت مهوب 30 الا 30 الف سيارة

انا وأخوي عنده 2006 جكسار والحرارة ازعجته ماتاصل للأتش لكن مع الكر يبدأ يرتفع حرارته وراح وسيخه والحمدج لله ضبط....

ونفس الشي واحد من عيال عمي عنده 2003 وكل سنه وعليها كود ينزل الرديتر ويسيخه والله على ما اقول شهيد..

وبعد خالي عنده 2003 محااافظ علييها والحرارة تلعب عنده ما تثبت...


ولو تبي تتاكد رح شف خيمة الاعطال وشف اللي يشتكون من حرارته...

يكفينا تقديس لتويوتا وغيره الواحد يحكم عقله ما يحكم شي ثاني!!...


بالتوفيق...

اخوي الله يبارك فيك عندي جمس 2005 حجم 2500...
ترتفع حرارته مع المكيف في عز الظهر وتبريد المكيف الله بلخير ومع الجور بدون مكيف ومن وكالته طبيعي ...
ومن 2004 وتحت الجمس معروف بالحراره...

ويغيرون مراوحه يركبون حقت 2005 حجم 1500 وفوق...

وعساه تنعفع لاكن الياباني عماما ولاند خصوصا معروف ماشاءالله بعدم ارتفاع الحراره
وكان عندنا فكسار 93... في عز القوايل مايتعدى الثلث... الله يذكرك بالخير لاتعرف طرمبه ولاطفيات بياخه ولازبايل الله يكرمكم الجميح جحش ادلكو ...
وهاذا معروف عن لاند اي موديل الا ماندر وتلقى الاي يشتكي مع احترامي له من اهماله واتحدى لاند من وكالته يشتكي زي الامريكي الي مامداني طلعته الصبح من الوكاله وقفت الظهر عند محطه والا الحراره تقول هلابك وش جابك للامريكي وانا ماخذيته الاعرفه بس وش اسوي الاهل مايبون الاهاذا عشانه كبير...

[أبوفهد7]

وين ابو شنب

[خشم العرمة]

^^

يالبى اللي مثلك بس...

بس يااااخي احياااانااا تصير مجبووور ...

ولا بيدك تسوي شي خاصة مع اوقات الدوامات الخايسه..

ان مانمت بالسيارة وين تنام...


سؤالي هو وش الأضرار المحتمله من تشغيل المكيف والسيارة واقفه والتطويل ..؟

يعني وش اللي يحتمل يخرب ع شان نداريه <<< يجرح ويداوي..

هلابك اخوي ولد وايل بالنسبة للضرر المتوقع على المحرك بشكل خاص راح احاول اشرح شرح مبسط
درجة الحرارة لاي محرك هي درجة متذبذبة يعني تطلع وتنزل حسب الجو والسرعه والحمل على المحرك ومنهذا المنطلق المفروض يكون امبير الحرارة متذبذب حسب قياس حارارة المحرك
ولكن الشركات المصنعه وضعت نطاق معين لمقياس الحرارة يعني مدامت الحرارة بين كذا وكذا فالمؤشر ثابت لذلك وانت واقف في الشمس ومشغل المكيف درجة حرارة السيارة تكون مرتفعه ولكن المؤشر ثابت على النصف او الربع لان الحرارة لم تصل للوضع الخطر ولكن في الوقت نفسة يكون اجهاد على المحرك
الامر الثاني تجمع الكربون في المحرك لان المحرك يشتغل والمركبة واقفة مع زيادة طفيفة في ضغط الكمبريشن حق المكينة بسبب حمل كمبروسر المكيف مما يزد من انتاج الطاقة في المحرك ولكن الطاقةلاتجد مكان للتفريغ بسبب وقف المركبة مما يسبب في تجمع الكربون.

تجربة بسيطة : في الصباح الباكر وانت ذاهب للدوام شغل السيارة اول مايرتفع مؤشر الحرارة للوضع الطبيعي سواء الربع او النصف افتح الكبوت ضع يدك على المحرك والاجزاء الاخرى هل تستطيع؟؟ نعم ولكن بعد مشوار طويل في الشمس ودرجة الحرارة على الوضع الطبيعي افتح الكبوت هل تستطيع وضع يدك على المحرك؟؟ لا طبعا اذان لما في الصباح كان الحرارة اقل وفي الظهر الحرارة اكثر مع ان المؤشر لم يتغير

ان شاء الله تكون الفكرة واضحة ولعل الاخوان اكثر مني خبرة يفيدونا اكثر من هاذة الناحية

[ولد وايل..]

اخوي الله يبارك فيك عندي جمس 2005 حجم 2500...
ترتفع حرارته مع المكيف في عز الظهر وتبريد المكيف الله بلخير ومع الجور بدون مكيف ومن وكالته طبيعي ...
ومن 2004 وتحت الجمس معروف بالحراره...

ويغيرون مراوحه يركبون حقت 2005 حجم 1500 وفوق...

وعساه تنعفع لاكن الياباني عماما ولاند خصوصا معروف ماشاءالله بعدم ارتفاع الحراره
وكان عندنا فكسار 93... في عز القوايل مايتعدى الثلث... الله يذكرك بالخير لاتعرف طرمبه ولاطفيات بياخه ولازبايل الله يكرمكم الجميح جحش ادلكو ...
وهاذا معروف عن لاند اي موديل الا ماندر وتلقى الاي يشتكي مع احترامي له من اهماله واتحدى لاند من وكالته يشتكي زي الامريكي الي مامداني طلعته الصبح من الوكاله وقفت الظهر عند محطه والا الحراره تقول هلابك وش جابك للامريكي وانا ماخذيته الاعرفه بس وش اسوي الاهل مايبون الاهاذا عشانه كبير...




شف عزيزي ...
الأمريكي اول المروحه كلتشات...

وغير هذا لا تنسى ان اللي معك جمس 2500 هو نا يقول اليوكن والتاهو...

ووالله ان اللي اقول لك عنهم كلهم فاكينها وكاله...

المقصد من كلامي عدم تقديس موتر معين لان كل المواتر اذا واجهت إهمال تبدأ تستهبل...


ما فيه موتر مع الإهمال ما يشتكى خل نفكر بعقل وبدون مكابرة...

[ولد وايل..]

هلابك اخوي ولد وايل بالنسبة للضرر المتوقع على المحرك بشكل خاص راح احاول اشرح شرح مبسط
درجة الحرارة لاي محرك هي درجة متذبذبة يعني تطلع وتنزل حسب الجو والسرعه والحمل على المحرك ومنهذا المنطلق المفروض يكون امبير الحرارة متذبذب حسب قياس حارارة المحرك
ولكن الشركات المصنعه وضعت نطاق معين لمقياس الحرارة يعني مدامت الحرارة بين كذا وكذا فالمؤشر ثابت لذلك وانت واقف في الشمس ومشغل المكيف درجة حرارة السيارة تكون مرتفعه ولكن المؤشر ثابت على النصف او الربع لان الحرارة لم تصل للوضع الخطر ولكن في الوقت نفسة يكون اجهاد على المحرك
الامر الثاني تجمع الكربون في المحرك لان المحرك يشتغل والمركبة واقفة مع زيادة طفيفة في ضغط الكمبريشن حق المكينة بسبب حمل كمبروسر المكيف مما يزد من انتاج الطاقة في المحرك ولكن الطاقةلاتجد مكان للتفريغ بسبب وقف المركبة مما يسبب في تجمع الكربون.

تجربة بسيطة : في الصباح الباكر وانت ذاهب للدوام شغل السيارة اول مايرتفع مؤشر الحرارة للوضع الطبيعي سواء الربع او النصف افتح الكبوت ضع يدك على المحرك والاجزاء الاخرى هل تستطيع؟؟ نعم ولكن بعد مشوار طويل في الشمس ودرجة الحرارة على الوضع الطبيعي افتح الكبوت هل تستطيع وضع يدك على المحرك؟؟ لا طبعا اذان لما في الصباح كان الحرارة اقل وفي الظهر الحرارة اكثر مع ان المؤشر لم يتغير

ان شاء الله تكون الفكرة واضحة ولعل الاخوان اكثر مني خبرة يفيدونا اكثر من هاذة الناحية



الله يجزاك خير ما قصرت...

بالنسبة للكربون امره ييسر انا قبل لا أنزل ما اطفيها مباشر ادعس عليها واخذ دورة صغيره
واطفي الموتر...


اما الحرارة انت صادق والله المؤشر ما يتغير والحرارة تفرق...!

الله يعين يارجل...

[خشم العرمة]

الله يجزاك خير ما قصرت...

بالنسبة للكربون امره ييسر انا قبل لا أنزل ما اطفيها مباشر ادعس عليها واخذ دورة صغيره
واطفي الموتر...


اما الحرارة انت صادق والله المؤشر ما يتغير والحرارة تفرق...!

الله يعين يارجل...


الله يكون في عون الجميع ان شاء الله ويكفينا شر هالحر

[برق الوسيطاء]

ياخوي وش هالضلم لنيسان:no2:
واضح من قبل لا اشوف النتيجة انه سوف تكون لصالح الاندكروزر لانه فيه كم موديل سوف يكون له التصويت وهو سيارة شعبية ولا ينافس الاندكروزر الا الباترول الي انت حصرته وحشرته بموديل واحد وهو2010
المفروض اذا انك تبي نتيجه صح وقياس واستطلاع للراي دقيق اما انك تحدد موديل واحد لجميع الانواع او تختار نوع لجميع الموديلات

[الشنه]

لاند 97
على الربع
المكيف على 2 واحسن من الممتاز ( ثلاجه )
عز الظهر

[أبوحمييد]

شف عزيزي ...
الأمريكي اول المروحه كلتشات...

وغير هذا لا تنسى ان اللي معك جمس 2500 هو نا يقول اليوكن والتاهو...

ووالله ان اللي اقول لك عنهم كلهم فاكينها وكاله...

المقصد من كلامي عدم تقديس موتر معين لان كل المواتر اذا واجهت إهمال تبدأ تستهبل...


ما فيه موتر مع الإهمال ما يشتكى خل نفكر بعقل وبدون مكابرة...

اليوكن 2004 مرواح كلتشات ....
ولاكن ياعزيزي انا كنت اسمع كلام الناس ان الامريكي مايتحمل وقلت هاذي خرابيط ...
وجربت بنفسي ولقيته فعلا مايتحمل من حراره الى طرمبة زيت الى طفيات الى لمبات الخ ...
وخلنا وقعيين ليش تويوتا ونيسان والياباني عمومامعروف بالصبر وتحمل الجور والبر والمقانيص...
وهاذا ماجا من فراغ جا من تجارب وروحات وجيات...

[شمالات نجد]

^^

يالبى اللي مثلك بس...

بس يااااخي احياااانااا تصير مجبووور ...

ولا بيدك تسوي شي خاصة مع اوقات الدوامات الخايسه..

ان مانمت بالسيارة وين تنام...


سؤالي هو وش الأضرار المحتمله من تشغيل المكيف والسيارة واقفه والتطويل ..؟

يعني وش اللي يحتمل يخرب ع شان نداريه <<< يجرح ويداوي..


أتمنى أنك تشوف ردي

يا أخوي لا تفكر في الموتر فكر في نفسك

يا أخوي ترا فيه عائلة كاملة ماتت والسبب أنهم ناموا في السيارة والمكيف شغال

أنا عارف منتب ميت قبل يومك

لكن

أنتبه وأنا أخوك وأفعل الأسباب ولا تروع كل عزيز عليك

يمكن يجيك اغماء لسنوات ويمكن يجيك شلل ويمكن تنهبل

اي شي وارد اذا انقطع الاكسجين عنك

اذا كان ولا بد تنام على الاقل خل الدرايش الأربع مفتوحة 3 سنتي

تراك تنام ولا تحس باللي يصير لجسمك

سلام

[ولد وايل..]

^^ الله يجزااك بالجنة وانا اخوووك....


وتسلم ووالله انك صادق...

خاصة لا صرت نايم في كراج ولا موقف مسكر...


احيانا والله اني الواحد يقوم وهو ما يدري وش هو عليه ...

بس ربك يستر...


والله يكتب اللي فيه خير...

[مطيعيس]

السلام عليكم ورحمة الله وبركاته
مع احترامي لكاتب الموضوع الاستفتاء كله خطأ لأن مفروض تحط الاستفتاء على السيارات اللي من 2000وتحت لأن الجديد بيبقاء محافظ على نفسه لمدة معينه اما القديم تشوف وين اللي بيتحمل يعني بتقول سفاري2010 يمكن محد شراه الا قليل واذا شراه اكيد بسكون روعة اما القديم هو اللي بتشوف ان كان رايح فيها والا محافظ على قوته وتحمله.
تقبل احترامي

[ابوسلوى]

سوبر سفاري 2003 ماشاءالله تبارك الله في عز الظيره الحرارة ثابته فوق الربع بشخطه

والمكيف ماشاءالله تبارك الله بارد

[ابو ملقاط]

وينك ياالكرسيدا xL
ماقد شهدت مكيف زيه
فريزر بمعنى الكلمة

[السليطين]

تقول جربت ..؟ ونص ساعه بس..؟

الواحد يبعد عن تكذيب الناس له يا عزيزي...


انا داخلن سلمك الله طعوس الشرقية الطعوس البيض الهياااار ولأكثر من نص ساعه على قولتك يمكن راحت ساعه ونص الى ساعتين في عز القايلة ايام القيض الله يكفينا شرها... والله وربي شاهد علي ان الحرارة ما ارتفعت عن الطبيعي ...

وغيرها مرات كثيره بس ما اذكر المده والوقت...

أرجوك لا تتكلم الا بشي تعرفه وتثبت عليه...

الياباني اللي تتكلم عنه والاند كروزر حرارته ماتثبت مجرد ما تشغل الدبل الثقيل وتمشي لك مترين ثلاثه وتقبع الحراره...

وع الخفيف تمشيه وبالليل ترتفع الحراره...

وانا اعرف 3 معهم لاندكروزر والله 2 يشتكون من حرارته والثالث يتجمل عند موتره وانا اشوف الموتر انبير الحراره ياصل الى ثلاث ارباعه ويقرب من ال h

عموما كلهم فيهم الخير والبركه لكن لا تقول شي وانت ما عندك عليه اثبات ...


انت افهم وش اقول قبل ترد ..... منهو اللي انا كذبته ؟؟؟ انا ماكذبت احد الله يهديك .. لكن المشكله الواحد يجيك مدرعم ولا يدري وش السالفه .
انا مصدقك الان باللي تقوله . ان موترك ماتحركت حرارته مع الجلد .. لكن هل هو عام على غير الياباني ؟؟؟؟ اتحداك ... لاني ولله الحمد عايش بين طعوس . وديرتي بوسط الطعوس . ولايمشي معنا الا التويوتا والنيسان ....
التويوتا اللي انت تقول انه يحتر . اكيد فيه عله .. اديتره وسخ ولا بلف حراره . ولا كلتش مروحه . اوما اذا صار الموتر مافيه علله فهو ابرك من غيره ...
وانا اخوك مجربين غلب السيارات بالنفود ولافيه غير اللي قلت لك
موترك اللي تقول عليه . انه يصبر (عسى الله يطعمك من خيره ويكفيك شره ) اصبر له شوي اذا صرت تجور عليه دايم ويجيك مجاوب ... وان شاء الله انه مايجيه شئ ...

[ولد وايل..]

^^^


حبيبي ...


انت افهم انا وش قلت...

انا اقوول انت ابعد عن تكذيب الناس لك... لما تقول شي حاول تبين كونها حاله شخصية...

يعني قل شي يدخل العقل مهوب نص ساعه وترتفع حرارة الموتر...الا بالياباني



موتري الان يبي يتم السنة الرابعه ووالله شاهد علي ما لمست فيه شي لا رديتر ولا ماء ما غيرت ولا سويت به شي وعلى كرفي والخطوط اللي اضربه بها...

الحين ماشي حول 200 الف ماشاء الله تبارك الله
الله يحفظك ...

[حبل الوريد]

الصدز يا ولد وايل كل ما جيت ابسب الامريكي تذكرتك

وخفت.... تطب على الواحد بكل ما أوتيت من قوة

والله يا بعدي لا شفروليت ولا نيسان ولا تويوتا

همهم الاول والاخير استنزاف الي بمخباك

[الغدير]

جربنا الامريكي ومن قبله الاوربي وجربنا الياباني
وعن هذه التجربة الياباني هو الافضل منذ اواخر السبعينات وهو الي صمد في جو المنطقة الحار:good2:
اليابان غزت العالم واكتسحت امريكا بمنتجاتها من السيارات اما امريكا ماقدرت تصد الياباني مع ارتفاع سعره ودعم الحكومة الامريكية للسيارات الامريكية في امريكا والعالم
واذا بغيت الحكم في ذلك شوف الاسعار تلقى الياباني اغلاها سعرا مع كمياتها المهولة في الانتاج
اذكر حادثة حصلت لنا في مقناصنا في مصر 1980 او 1979غرس الكروزر الجديد(ذاك الوقت وكان اول تغيير له في شكل الكروزر للثمانينات وهو اول الدفعة) وانكسرت قطعة اسفل الكروزر في ذاك التغريز وبعد الاتصال بالوكيل في قطر اهتمت الشركة في اليابان اهتمام شديد بهذه القطعة وطرشوها مصر وغيروا جميع القطع في الكروزرات المنتجة
اخواني هذا الفرق بين الياباني وجميع المنتج من السيارات في العالم اليابان غيرت مفهوم العميل ونوعية المنتج (مع تحفظي على تعامل الوكلاء) تلقاهم يهتمون بمنتجهم كانه ابن لهم على العكس من ذلك الامريكي يعامل منتجه كانه ابن حرام من امريكا ولذلك سمعته سيئة ووكيله اسوأ وكيل (كانت عندي سيارة امريكية في الثمانينات تطفى في الشارع والله كرهتها وبعتها بابخس سعر وسافرت مع احد الاخوان هو في سيارته الجديدة الامريكية وانا في كروزري والا هو يتصل بي يسئلني عن السرعة بسبب تعطل عداد السرعة :mad: وغير ذلك الكثير)
انا ما اعمم على جميع الامريكي فلكل سلعة طلب وعلى سعرها انت تحكم وحتى الياباني ما خلا من الاعطال ولكن الياباني هو الافضل والتيوتا على القمة وحاولت النيسان اكثر من مرة ان تنتزع اللقب ونكتشف بعد ذلك عيوب للنيسان ترفع من مقدار التيوتا عندنا :good: ;)
شاكرا لك اخي العزيز والاخوان كذلك

[أبو الخطوط]

البرادو وما ادراك ما البرادو (99موديل)
على الخط c في الصيف ولا الشتاء
اقصا ماوصل الربع في عز الصيف بعد ماوقف الظهريه نص ساعه

[ZIAD_KSA]

التايوتا طير شلوى يافكه الله من الصدم
ادعس لانه قطعه وحده والصدم لاقدر الله يأثر فيه
والبدو ابخص مايركبون الا تايوتا وراع القروش
منهم معه لكزس

[درباس فرناس]

ما شاء الله
عدنا لشهور الصيف والعود احمد
وما يزال اللاند هو الذي في الصدارة

[abo_ghala]

السلام عليكم ورحمة الله و بركاته


والله يا أخوان أحس الإستطلاع يغلب عليه العنصرية في حب السيارة فقط لإسمها

و إن بعض الأخوة صوت لسيارة بانحياز تام وليس بموضوعية و دراية بتحملها

والدليل أن اللاندكروزر حصل على 55 بالمئة تقريبا من الأصوات :mad: و جيب اللكزس أخذ 8 بالمئة تقريبا من الأصوات

إن لم يكونا بنفس المستوى من الكفائة في تحمل الحرارة و تبريد التكييف لتفوق اللكزس على اللاندكروزر

و هذ ليس رأيي أنا أو تصنيفي و لكن هو رأيي وتصنيف شركة تويوتا

أقل شيئ يوضعون في خانه واحدة كما وضع التاهو واليوكن

و آسف إذا أخطأت

[نوماس1]

الى يبي يفحص سيارته صح يطلع فيه الساعة الثانية ظهرا طلعة كرى هناك يتضح ويبين الفرس من الحمار

[أطلال نجد]

جميع ما ذكر من السيارات تتحمل الحرارة العالية في رأيي
وتكييفها ممتاز دام أن صاحب السيارة متابع ويهتم بدور الصيانة الدورية لجميع أجزاء سيارته .

الأخوة الذين يشتكون من حرارة السيارة أو سوء التكييف يشيك على النقاط التالية :

1 - فحص الأرديتر والتأكد من سلامته وتنظيفه سنوياً مع استعمال الماء المقطر + استخدام المحلول المركز -الأصلي- وليس التجاري
2 - التشييك على بلف الحرارة سنوياً واستبداله إذا تطلب الأمر .
3 - التشييك على أداء تماتيتك مراوح التبريد .
4 - تنظيف الفلاتر وليات التبريد وفلتر المكيف واستبداله إذا تطلب الأمر بجديد أصلي .
5 - تعبئة فريون جديد أصلي مع التشييك على منسوب الفريون سنوياً .
6 - التشييك على أداء وقوة الكمبرسر واستبداله إذا تطلب الأمر بجديد أصلي .

تحياتي للجميع

[comابوسليمانwww]

مع احترامي الشديد موضوع ليس فيه اي فائدة سوا انه يثير التعصب
كل واحد يصوت للسيارة او الوكالة الي يميل لها وااكاد اجزم ان اغلب الي صوتوا لايمكلون واحدة من هذه السيارت الموجودة في الاستطلاع

[ذئب اليل]

إكسنت الحرارة النص صيف وشتاء و المكيف ثلاجة مشا الله 2006

[مخاوي دابذريع]

معروووف أغلب النيسان بالصداره لكن فيه من ينافسه ( الديزل ) برودة محرك و مكيف وتحمل ......

[دل البحار]

فورد فكتوريا
الحراره ثلج على الربع صيف شته
والمكيف ولا سودة عسير في الربيع
قولوا ماشاء الله
اهم شيء موية اللديتر تكون مياه مقطره مع محلول اللديتر الاخضر او الاحمر
والمراوح للتبريد تكون شغاله وسليمه

[معشوقي الصمان]

جميع ما ذكر من السيارات تتحمل الحرارة العالية في رأيي
وتكييفها ممتاز دام أن صاحب السيارة متابع ويهتم بدور الصيانة الدورية لجميع أجزاء سيارته .

الأخوة الذين يشتكون من حرارة السيارة أو سوء التكييف يشيك على النقاط التالية :

1 - فحص الأرديتر والتأكد من سلامته وتنظيفه سنوياً مع استعمال الماء المقطر + استخدام المحلول المركز -الأصلي- وليس التجاري
2 - التشييك على بلف الحرارة سنوياً واستبداله إذا تطلب الأمر .
3 - التشييك على أداء تماتيتك مراوح التبريد .
4 - تنظيف الفلاتر وليات التبريد وفلتر المكيف واستبداله إذا تطلب الأمر بجديد أصلي .
5 - تعبئة فريون جديد أصلي مع التشييك على منسوب الفريون سنوياً .
6 - التشييك على أداء وقوة الكمبرسر واستبداله إذا تطلب الأمر بجديد أصلي .

تحياتي للجميع
هذا الكلام الصحيح :good2::good2:

[قمة افرست]

تم تجربة يوكون 2011

من المدينة وحتى الامارات في وقت النهار
وكانت تجربة ممتازة حيث وصلت في بعض الاحيان درجة الحرارة الى 48 في منطقة الخفوس بين الاحساء والامارات

السيارة تكييف ماشاء الله والحرارة ثابته
ولم الحظ شي غير طبيعي

ولاكن
يبقى حالة السيارة هي الحكم في التقييم
فاحيانا يكون حالة السيارة ماهي جيده فيكون التقييم ضالم
لوجود خلل اوعطل
ايضا الاستخدام فمثلا لو ماشي بسرعة 160 في حرارة 48 ممكن تتعرض لانفجار كفر
حتى لوجديد

فالافضل يكون التقييم على سيارات حديثه اوجديده ولايوجد بها اعطال

شكرا صاحب الموضوع

[ام صتمه 87]

كراون فتكوريا 2003 خطوط مسافة 1200 كيلو رايح وراجع 1200 كيلو في القوايل ماشاء الله ولا ترتفع شخطه وحده

[الله يزينها]

لو التقييم كان بالعكس كان افضل
لكي نعرف صديق الصناعيه (ن)

[عود رمثه]

النيسان خذ برودة والتايوتا خذ حديد

[ابونبيل]

التويوتا اولا ثم النيسان

ومن جرب الياباني يشهد له خاصه بالمملكه

[رسيس نجد]

الياباني ناجح في بيئتنا 0

[abdull_ah]

وين الباجيرو ياشبااب ؟؟ ولا مايعتبر جيب اذا كان التقيم ع فئة الجيووب

ما شاء الله مكيف ممتاز وحرارة ثابته في جميع الاوقات

انا بصراحه متحيز جدااا للنيسان بالنسبة للحرارة وقووة المكيف

ماشاء الله تبارك الله لوريل (240L) موديل 88 مكيفها ممتاز جدا في عز الظهيرة والحرارة فوق الربع بشوي ..

ما شاء الله تبارك الله

وايضا جربت التيدا ماشاء الله تبارك الله المكيف ممتاز جدااا

[مركز الثقل]

ههههههههههه شفت انا شعب مطبل وعقلة وتفكيرة لا يتعدي قدمية
والله مقدين فيكم التجار

[أبوعابد 22]

يأبن الحلال مافيه أحسن من النيسان في الحراره
وعندك الفكسار بعد

[مكشاتي 2011]

عندي BMW


الحراره فوق الثلث

ونا بالنفود مشغل الدبل والمكيف ثلج


اذكرو الله ترون العين حق


والبر والطرد ماعليها مركبلها كفرات سلق بوالين 900

وماشيه معي زي الحلاوه

[رااس القطاه]

غير الاند لاتدور سياره

[هواي البر فهد]

ددســــــــــــــــــــــــــــــــــــــن
مكيـــــــــــــــف على كيف كيفك وحراره تحت ربع وقف عند الاشاره ساعه لو تبي لحراره ماترتفع لنص ابد ومكيــــــــف ثلاجه خصوصن لاكان في تضليله كاتمه تبريد على 2 وثلاج

من وقع تجربه ددسن 1998 كربريتر

[loranso]

سلام

اف جى 2008
مشوار من الدمام للامارات مدينة دبى الاسبوع الماضى
الحرارة من 47 الى 51 فى الامارات ...
الوقت ...11 الظهر ...الى 5 المسا
المكيف تبريدة ممتاز
السرعة 120 الى 140 لوجود الكامرات والجو جدا حار
حالة السيارة جدا ممتازة
الكفرات جديدة
السير والمروحة وموية الريديتر والبلف وباقى الزيوت مغيرها على 100000 تشيك الوكالة
وباقى الامور بتيسير الله

[الليث الذهبي]

وين الاكستيرا والفورشنر

[remth]

الياباني عموما ,,, جربت اكثر الياباني كله متقارب

[Vortech]

الجي..... ولا غيره شئ وانا اخوك... مافيها ملوا

[white heart]

بفضل الله سيارتي كامري 98 الحرارة على الخط يعني c وهذا بسبب شيل بلف الحرارة + مرواح مشبوكة دايركت لديتر وكاله ولو اخلياه شغالة 10 ساعات ماتتعدى الربع في عز الحر

[بركاني حربي]

على حسب نظافة السيارة و إهتمام صاحبها فيها

سؤال لأهل الخبرة // هل لو شلت بلف الحرارة هناك ضرر على السيارة أم لا ؟

[بركاني حربي]

تويوتا بعز القايلة من يومين (( ما شاء الله تبارك الله )) تحت الربع

السرعة من 100 - 140

المكيف ما شاء الله تبارك الله لا تعليق ثلج

[Abusliman]

من رايي ان جميع او اغلب السيارات اليابانية تتحمل الحرارة
لكن اشوف ان اللاندكروزر بجميع انواعه هو الافضل بينهم

[أطلال نجد]

على حسب نظافة السيارة و إهتمام صاحبها فيها

سؤال لأهل الخبرة // هل لو شلت بلف الحرارة هناك ضرر على السيارة أم لا ؟


أخي الكريم
وجود بلف الحرارة ضروري جداً لحماية محرك السيارة وهو عبارة عن منظم ( ثيرموستات ) لوزن حرارة المحرك
ولا يتسبب أبداً في رفع درجة حرارة المحرك - إلى درجة غير طبيعية - إلا في حالة عطله
أو عطل في الرديتر , أو في كلتش المروحة , أو شعر في رأس المكينة ناتج عن تعرض المحرك للحرارة سابقة .
وعمل بلف الحرارة بكل بساطة هو عدم السماح للماء البارد - الموجود بالرديتر - بالدخول للمحرك إلا في حالة طلب المحرك ذلك
ويتم ذلك عند وصول المحرك إلى درجة حرارة معينة - مقننة من قبل المصنع -
وثق تماماً بأن المصنع لم يضع شيئاً عبث في سيارتك.

وعند الشراء لا تأخذ إلا بلف خاص بنوع سيارتك ويكون - أصلي - من الوكالة

لأن كل بلف حرارة له مقياس ضغط معين مهيأ لكل سيارة.

[- النشمي -]

التاهو ماشاء الله تبارك الله المكيف ثلللللللللللللج



وكل يوم الظهر اراجع بالدوائر الحكوميه واخليه شغال لمدة ساعتين الى ثلاث ساعات

بالمواقف وحرارته ثابته ولله الحمد قولو ماشاء الله ترا العين حق ياخوان


مكيف اليوكن والتاهو لايعلى عليه بارد في الصيف لدرجة اني اخليه على واحد من شدة برودته

[شرقااااااوي]

الياباني بوجة عام يتفوق قديما بخصوص الحرارة على الامريكي

والآن واضح تكافؤ بينهم

صوتي للسفاري لانه نيسان

[تميم2222]

في الحراره ما فيه مثل النيسان ... والله لو تطير وتوقع ..خااااااامده ولا تقارنها باي سياره

[مسمار شداد]

فيه تحيز ليش تحدد مديل السفاري ب2010 الذي لم يجرب منه الا القليل لماذا لم تكتب فتك مثلا

[هائم]

عندي الددسن مديل 97فكيت البلف منها الحراره علي اول مؤشر النبير بالصيف حتي وقت السفر المكيف فليزر الله يبارك فيها...

[يكفيني نظرة]

الموضوع قبل سنتين الا شهرين !!!

[مخ العالم]

امال فين سيارات الجيلي

[YUKON_GMC]

كل السيارات الجديده والنظيفه .. تتحمل الحراره حتى لو توصل 100 درجه

النظيف نظيف واصلاً كل السيارات الحديثه الحراره مثبته عن طريق بلف الحراره صيف وشتاء ولاتحر الا مع المكيف اثناء الوقف طويلاً

دايم اللي تخور السيارت الخجم اللي اما فيها الاديتر وسخ ومنسد والا فيها الراس مشعور والا فيها الخراطيش تتصفط والا فيها بلاوي زرقاء

[ابوحنش الشريف]

تجربة 4سنوات وانيت ددسن 2007سوبر غمارتين حرارتة ثابتة واقف وماشي وتكييف جنان لايوصف درجة ودرجتين
ولم ازودة فريون على بلدة