الله يرحم والديكم طالبكم طلب!!!!!!

[الضارب]

تكفون انا ان شاء الله بتزوج قريب ابغى افضل محل اقضي فيه اسبوعين مع زوجتي مع العلم ان اللغه الأنجليزيه عندي ليست قويه يعني ابغى اروح وانا مرتاح نفسيآ مع العلم اني شخص محافظ انا وزجتي واحتمال كبير يكون في شهر 10 في اجازة عيد

الفطر المبارك.

[المهند511]

انصحك حفضا لع رضك ودينك تقضيهخا في مكة والمدينة وجدة والطايف ولاتخرج خارج المملكة]

[الضارب]

يعطيك العافيه ياالمهند 511 لكن فيه ناس قالوا لي رح لمصر ارخص بس مادخلت راسي مصر.

[المهند511]

اي مصر وانا اخوك فلوسك في بلدك وش تبا عن مكة والمدينة والبراد في الجنوب ابك هي شهر القشطة

[الضارب]

الله يكتب اللي فيه الخير والله الموضوع اتعبني من كثر التفكير.

[المهند511]

لابد لاتفكير ولاهم ولاغم (شهر العسل متى جا تزوجت اقعد في بيتك عند الحرمة وماعندنا شهر سعل الاياكود مكة والمدينة)

[لؤلؤة الخليج]

مرحبا أخي الكريم

أنا أنصحك ان تذهب الي أروبا دولة ا(التشيك )فيها روعة وجمال للطبيعة ...

تمارس فيها اي حقوقك الدينيه ...ناسها محترمين ورائعين يحترمون العرب جدا ... فيها



العاصمة براق جدا جميله ولكني انصحك ان تذهب الي مدينة (ياخموف) ..ومدينة

(كارافاري )فهي مثل الريف ...جدا جميله وجوها رائع ...وانصحك فيها ..

او ان تذهب الي ماليزيا فهي مدينه العرسان الجدد..رائعه جدا وطبيعتها خلابه

او تركيا ايضا رائعه جدا بطبيعتها

أما مصر فهي لاتنفع الا للتسليه مسارح سينما وهكذا وانت تقول انكم محافظين فلا تنفعك

أبدا ...

راي لك التشيك ...او ماليزيا ...او تركيا

تحياتي لك

[الضارب]

لؤلؤة الخليج يعطيك العافيه لكن اللغه لك عليها وش الحل لأن بصراحه مليت من كثر الروحه

لجده والشرقيه وابها والطايف ابغى شي جديد.

[abo_hoor]

الف مبروك اخوي

شوف اذا كنت تبي تروح حق الامارات ترا حلوه وجميله

وفيها اماكن رائعه وفنادق حلوه وشي خيالي وفيه شارقه بعد واذا تبي فنادق ومنتزهات
اقدر احطهم لك باجر لان وقت الحين متاخر وانت تشوف وتحكم

[الستانس]

وش رايك في

سريلانكا

ولا اسبانيا

ولا اندنوسيا

اسأل عنها عند تنظيم الرحلات مثل الصرح

وخذ لك شهر عسل مرتب ومنظم

ولا كوستريكا ولكن مالقيت تنظيم رحلات لها

وانكانك تبحث عن التوفير المادي

اسأل عن اريتيريا فيها مناطق حلوة والغالب عليهم عرب ومسلمين

والامان عندهم ممتاز والأسعار رخيصه ولكن ما اعتقد تلقى فنادق 5 نجوم

وسعر التحوي من الريال بعملتهم نغفا نظامي 4 نغفا

ومن السوق السوداء 11 نغفا

اصرف 100 دولار نظامي عشان ما يكون عليك شي والباقي خلك على السوداء ارخص لك

واهم شي لو رحت لأي دولة تسجل جوازك عند السفارة عشان ترتاح كل ماجيت تروح لمكان تتصل

وتعلمهم وين انت رايح الخ... من المعلومات عشان تكون بمأمن من اي مشاكل

وفيه طريقين للسفر

رحلة من جدة إلى العاصمة اسمرا

ولا ترانزيت في اليمن ثم على اسمرا بتوفير مبلغ معقول

واكثر شي راح تصرفة 15 الف مع التذاكر لنفرين

ولكن ما ادري عن طبيعتك انت فيه ناس تتأقلم وعادي وفيه ناس ماتبي شوارح حوسة
وناس حوسة ولو كانت الطبيعة حلوة

وفيه ناس تهمة التقنيه والتطور والعماير والخ...

فيه ناس يبي انهار واماكن رومنسية وجلسات ودلع

((ما اعتقد تلقاها إلا في اسبانيا ))>>>يمدحها لي واحد من الشباب

وفيه ناس يحب يشوف الناس على طبيعتها

وفيه من يحب الجزر وإذا كانت امكانياتك المادية قوية انصحك بجزر
موريشيوس

اهم شي اسأل عن الأجواء لا تروح وتنصدم من حرارة الجو او رطوبتة

وتخرب عليك السفرة



والف الف مبروك الزواج


ولك رسالة على الخاص

[بن بدرااان]

اللف مبرووك ...الله يوفقك دنيا واخرة


وخطوة موفقة ..ترا احسن شي ان الواحد يسافر مع زوجتة برا السعودية دامكم خفيفين ما عندكم عيال


اما داخل السعودية لاحق عليها باذن الله اذا وفقكم الله وكثرتو راح تجبر اصلا انك تسافر داخل المملكة((التذاكر تحكمك)):mad:


ترا الميزانبة مهمة لتحديد وجهتك ..وخلي ببالك تراك بترح بشهر 10 بعد العيد والناس زحمة


وانصحك اذا كانت لغتك مقبوله نوعا ما تروح نيوزلندا ميزتها متعودين على الطلاب السعوديين
وتكون لغتهم اول ما يجون مكسرة ويعرفون يتعاملون معهم ثاني ميزة طبيعة جناااان طول السنة وثالث ميزة شعب طيب جدااا وعينهم مليانة ومناطقهم متنوعة من ثلوج الى غابات شواطىء ((انواع الفللله))
وان كنت متخوف من نيوزلاندا تروح لماليزيا بتنبسط فيها باذن الله


بالتوفيق اخوي
:good2:

[لؤلؤة الخليج]

أخي الكريم أنت روح بقروب ..وراح يحطون لك جدول وتنسيق ..


وهم راح يكونوا الدليل حقك ..طيب ماليزيا رائعه وجميله وراح تلاقي اكثر العرب هناك


واذا لغتك مشي الحال ..في أفضل لغة اتفقوا عليها العالم الأشارة ومشي حالك ..ترى اتكلم جد...


في التشيك مايتكلمون حتي اللغة الأنجليزيه ...ومشي الحال وتمشينا فيها


فاروح ماليزيا وتوكل على الله ...


وكمان في سوريا جدا رائعه . ورخيصه مرة ...أولبنان


كلها رائعه


فانت أجلس وفكر سردنا لك بلاد جدا رائعه فاختار منها ماتريد وان شاء الله زواج مبارك


تحياتي لك
لؤلؤة الخليج

[صقرحايل]

الف مبروك ان شاءالله

[مخاوي الليل1]

السلام عليكم

اخوي واستاذي الضارب

نصيحه لله خلي شهر العسل في مكه يومين وبعدها عليك بالجنوب ابها انماص وفي بلدك وعرضك مصيون

ولا احد يتجرى يمس كرامتك بشي وخاصه انك بتسافر بزوجتك واول مره

بالله عليك لو سفرة وجاك احد وجرحك بكلمه في عرضك وش بتسوي في دوله يقل فيه الدين او معدوم ولا شيم ولا مبادي

ابن عمي في سفاره في تركيا يحكي لنا قصص عن المتزوجين الجدد ومشاكل العوائل السعوديه هناك ولا يخفاك

من فتره قصيره ماحصل لعائله سعوديه في احد الدول القريبه ودوله عربيه وتدعي حبها لنا نزلوه من سيارته جيب

2009 واخذو وحده من بناته لاحول ولا قوة الابالله موقف يجمد العروق ويوقف القلب وهو في دوله عربيه

ولا كل مره تسلم الجره والله نصيحه من اخ

ولا اتكلم لك من فراغ اتكلم من وقايع شفتها في مجال عملي وانصحك والله من قلب صدوق

والا باامكاني ارتب لك في اي دوله تبيها بس شوري عليك بلدك بلدك وبعد فتره اذا حابب تسافر سافر لوحدك

او مع شباب حتى لولاسمح الله حصل شي انتم رجال

ومبروك الزواج مقدمآ والله يوفقك في حياتك

اخوك مخاوي الليل


.

[الضارب]

اشكر جميع من تفاعلوا مع الموضوع والله يوفقهم دنيا وآخره والعزابي الله يزوجه والمتزوج

اخاف تزعل ام العيال الله يرزقه بزوجه ثانيه.

[ريم البراري]

انصحك بسيرلنكا ولا راح تندم ان شاء الله شهر 10 مناسب جدا
غالبا البرامج السياحية يحطون لك سواق يجيد العربية يسهل لك كل شيء باذن الله

[الضارب]

يعطيك العافيه ياريم البراري بس المشكله اني ماقد طلعت من السعوديه ابد وخايف اصير مشتت ذهنيآ اذا رحت هناك

[ابوصالح3]

اخوي الضارب
الف مبروك مقدما -اما السفرة خلها لماليزيا - اسلام وامان -وحط لك ميزانية 15 الف ريال بتكفيك وزيادة (لين تطيح الميانه بينكم) بعدها اذا بغيت تسافر ثاني مره 8الاف تكفيك
اسال الله ان يرزقك بالذريه الصالحه

[ابوصالح3]

الاخ مخاوي الليل
كلامك في محله وكله حكم ودرر - وصدقت اذا تعرضت لموقف وانت غريب ووحيد - وش عاد تسوى عقب هالموقف حياتك - والله لايبلانا - لكن ماليزيا تراها حليلة -ويمكن تكون افضل الموجود واللي قاسمه الله بيصير -

[الضارب]

اشكر كل من تفاعل مع الموضوع فردآ فردآ ولكم جزيل الشكر

[سعود بن حايل]

خذ لك تمشيه بالجنوب او اذهب الى حائل لان جوها اقرب الى الاعتدال ومدينة جميلة كل شي متوفر من منتزهات وشقق وتستحق الزيارة
واذ تبي برا رح لسوريا بلاد عرب ومسلمين
وانصحك بشمال سوريا وبالاخص مدينة اللاذقيه ومدينة قريبة منها نسيت اسمها جوها كانك باوربا
او الاردن اوصلاله شف اللي
يصلحلك

[السنع كله]

ماليزيا لا غير بل ما يصلح لك سواها

[ana bassam]

اول شي الله يوفقك ويرزقك الذريه الصالحه
رح لماليزيا تراها مناسبه وزينه واسعارها حليوه ومسلمين وبتلقى اللي يتكلمون عربي هي مره وحده في العمر رح ووسع صدرك اسبوعين في الطبيعه والخضار والجو الزين وفنادق على ارقى المستويات لاحق على ربوع بلادي وبتمل منها .

[عبدالعزيزالثبيتي]

ماشاءالله
الله يعطيك العافيه

[YOU1]

اول شي مبروك الزواج وعسي الله يوفقكم ويصلحكم لبعض....
اخوي بالنسبة للعريس وين مايروح اعتقد راح يستمتع بكل شي حولة بحكم الفرحة اللي هو فيها ... انا عن نفسي ارشح لك قبرص... بصراحة جميلة جدا وشعبها محترم جدا وجميلة ونظيفة وفيها كل الاجواء... بس ابتعد عن السواحل بحكم انها ماتصلح لنا... وانصحك لما توصل لارنكا العاصمة اجر سيارة من المطار وانطلق لجبال ترودوس حيث الهدوء وجمال الطبيعة والثلوج... واذا بغيت التمشي والدفي رح ليماسول 30 كيلو تقربيا وخذ لك يوم لمدينة بافوس وهي جميلة جدا ويوم بنيقوسيا وهكذا اهم شي انك تأجر سيارة ولا تستخدم التكاسي لانها غالية ... صدقني راح تنبسط... والله يوفقك.

[زعفرانه]

بما انك خايف ومتشتت لانك اول مره تطلع برى البلد انصحك بدبي وراح تعجبك

[سليمان الربيعان]

الله يجمع بينكم بالخير

[سرطوقا]

انا ماخشت براسي فكرة تزوج وسافر على طول ، يعني خلك تعرف عليها وبعدين سآفر


موفق اخوي

[مرباع]

الله يوفقك ويرزقك الذريه الصالحه

شوف سيرلانكا احسن مكان لك خصوصا مدينه اسمها بنتوته راح تنبسط فيها كثير جدااا وبعدين ما عندك اي مشاكل لا تقول لغه ولا شي راح تلقى شخص يستقبلك بالمطار ويستمر معاك وتحت خدمتك 24 ساعه لين ترجع للمطار والفنادق تحجزها وتحددها وتحدد الليالي والأماكن قبل تمشي من السعوديه يعني توصل الفندق يكونون بإستقبالك وتحجز وجبة فطور وعشا تبع السكن ويكون عندك غدا فقط تاخذ معاك عزبتك وتتغدا انت والمدام على نهر او على البحر او في غابه من الغابات وماراح تكلفك اعتقد الرحله كلها مع التذاكر لمدة اسبوعين اتوقع 10 الف ريال للشخصين
ولو تبي مساعده بكل تأكيد يزيدني شرف

[راعي الخريب]

اخوي روح ماليزيا وانت مغمض
دولة مسلمه وامان وشرحه وكل الي تبيه موجود
انصحك فيها وبشدة

[الأحمدي أحمد]

اي مصر وانا اخوك فلوسك في بلدك وش تبا عن مكة والمدينة والبراد في الجنوب ابك هي شهر القشطة

[احمد ديزرت]

الله يوفقك بزواجك وهذا اهم من كل شئ سوا قضيت شهر العسل برا او بالداخل