هذي هديتي للمشرف العام والمشريفين والاعضاء والزوار مع التحيه

[ابو عمر اللاحم]

قلت هذه القصيدة بعد تصفحي هذا الموقع وهي متواضعه لاكن ارجو قبوله بصدر رحب مع السموحه عن التقصير ولكم مني التحية والتقدير

سلام مني لهل المكاشيت والطيب = طيب العلوم اهل المراجل ادروبه
اللي لهم بالبر جولات ما تخيب = ما همهم كود المشي والصعوبه
كم من خريمه بالخلاء مرتع الذيب = ياما ارتعوا فيها و ياما مشوبه
ما طبه المقرود دونه دباديب = وأهل الشعور المقصقصة ما حكوبه
عذراء جميلة خلقت الله ما هيب = تأخذ مساحيقٍ وتفتن بثوبه
والحر ما ياقع الا بروس الشخانيب = والبوم حده بالمخربات دوبه
ياما حلى والشمس من قبل ما تغيب = والجو غيم والنسايم جنوبه
في خبةٍ تختارها وتوقف الجيب = وتشب نار من الارطاء شبوبه
إرطاء ونداء ما هيب حر ولواهيب = والطير صوّت للمبيت وطروبه
وتدني معاميل به احلى المشاريب = هيلٍ وبن غاليات وعذوبه
مع دلةٍ رسلان ترفاء عن العيب = له نصبةٍ والجمر يوضي لهوبه
يفوح رايحها كما غالي الطيب = والجو صافي عن عيوبٍ تشوبه
وربعٍ اقروم معطبين المظاريب = حسبت رجالٍ والردى ما رضوبه
هاذي حلاته يا خوي ما بها عيب = وفروض ربي قايمه ومحسوبه
وصلاة ربي عالم السر والغيب = اعداد ما ينشي سحاب وهبوبه
على النبي الهاشمي مبعد الريب = وعداد ما يطلع نهار وغروبه


وسلامكم مع تحيات ابو عمر

[مكشات]

إهداء حلو ويجنن عسى مانعدمك
تخيلت هالوناسة وفزيت ، عسانا من الحيين للشتاء :)
وش خليت يوم قلت :
ياما حلى والشمس من قبل ما تغيب = والجو غيم والنسايم جنوبه
في خبةٍ تختارها وتوقف الجيب = وتشب نار من الارطاء شبوبه
...........
إهداء مقبوووووووووووووووول الله يعطيك العافية
تحياتي لك

[السمح]

يا جعل عمرك يطول .. وهدية مقبولة يا بعدي .. وعز الله إنك شاعر فحل جزل المعاني والألفاظ ...
ونيابة عن بقية مشرفي وأعضاء مكشات أقدم لك الشكر على روحك الطيبة ونفسك الخفيفة ..
والحر ما ياقع الا بروس الشخانيب **** والبـوم حـده بالمخربـات دوبـه
ألف ألف تحية وشكر ..

[الخبير]

السلام عليكم
الصراحة انشرح صدري بعد ما قريت القصيدة
و يا وجدي على الربيع و المطر ( الله يجيبه )

[هاوي مقناص]

صح السانك : وصح السانك علي هاالقصيده الرائعه ::good: ، حياك الله بين اخوانك من مشرفين ،

واعضاء مكشات0 وشوقتناااااااا لوقت المكاشيت 0


ودمت0

اقبل تحياي: اخوك هاوي مقناص

[بدوية متحضره]

واسمح لي اباخذ منها بيتين اعجبتني ابحطها توقيع

[السرحان]

صح لسانك ....
لكن هالقصيده تألم أكثر منها تفرح .... ولوحاتها مرسومه رسم ينهـــــــــــــــــــــار
ومشكور على الهديه

[ابو عمر اللاحم]

أخي -المشرف العام - اخي- السمح- اخي -الخبير- اخي -هاوي مقناص- اختي- بدوية متحضرة- اخي- السرحان اقول
صحت ابدانكم ومشكورين -
وهالقصيدة هي خاصة لموقع مكشات ارجو ان لا تنقل الى غيره من الموقع او المنتديات وشكراً

[العاشق2]

تسلم اخوي ابو عمر يا ايوها الشاعر المخضرم ولا تخلينا من ذا الون
اخــــــــــــــــــــوك الصغير""""""""""""""""""""":o

[أبوتركي]

السلام عليكم...

مشكور على هالقصيدة ياشاعر مكشات...

ومانقول إلا..:

أبوعمر راعي الأولة والمراجل ماتغيب وماهي غريبة إن كانت هذي اعلومه




( نحاول نحتك) بشاعرنا الهمام....

وسلامك....وإلى المزيد ..


أبوتركي

[ابو عمر اللاحم]

الله يذكر ايامك بالخير يا بو تركي

[المري]

اخي نهار


صح السانك وبيض الله وجهك


وماعليك زود

[ابو عمر اللاحم]

صح بدنك يالمري و ما عليك زود الله يعطيك العافيه .

الف تحيه ،،،

[عاشق الصحراء]

مشكور و الهدية مقبولة .
اللي لهم بالبر جولات مـا iiتخيـب ما همهم كود المشـي iiوالصعوبـه
كم من خريمه بالخلاء مرتع iiالذيب ياما ارتعوا فيها و يامـا iiمشوبـه
انا اشهد ان هذا الي يحلي البر و مكاشيته (((((((مغامراته))))))))

انا اشهد انه مسكته .
تحياتي لك يا نهار.

[ابو عمر اللاحم]

الحمد لله انه اعجبتك القصيدة والله يعطيك العافيه ، وتسلم .

تقبل تحياتي ،،،

[الروقــي]

هذي ابيات بسيطه ومربكه لأني ماني شاعر وارجوا تقبلها يابو عمر



يابوعمرلك سلام مني والف ترحيب=وسلام لنشامى مكشات اللي ماشفنافيهم عوبه
منتدى رجال مافيهم راعي التكاذيب=ومنتدى شعار مثل ابوعمر زينوه وطربوبه
بشعرك يانهار رديت الشباب للشيب=وشافيت قلب(ن)عليل من عذوبه
اشهد انك يانهار عريب ابن عريب=واشهد انك شهم والشر ماوطيب دروبه
انا ماني بشاعر ولااعرف بحكي المناديب=لكن شعرك يخلي الواحد ينسى فعوله
وهديتك مقبوله يانهار بكل ترحيب=مادري اللي يردها هو صاحي ولابغيبوبه

[ابو عمر اللاحم]

مقبوله يالروقي ولا عليك زود يالغالي الله يعطيك العافيه .

تقبل تحياتي ،،،

[المسفهل]

ما أروع هذا الشعر وما أعذبه لأنه من شاعر يدرك الجمال ويشعر به

ويحن للصحراء ويشتاق لهوائها العليل وهدوئها الجميل ...

سر أخي نهار على هذا المنوال وعين الله تكلؤك......

[ابو عايد]

مشكور على هذا الا ختيار الجميل أخي نهار ومشكور على هذه الرد أخي الروقــي



وصح لسانك ولسان الروقي


وتقبل تحياتي // العاشق الولهان


http://www.mekshat.com/pix/upload/images2/oo33.jpg

[راعي مرات]

الغالي000 نهار0
0تسلم يالعزوة00
ويسلم رأسك000
قصيدة جميلة00ومعبرة000ولك الغلى والطيب يالغالي000

[راعي مرات]

الروقي000الغالي000
وصلت مشاعرك بقوة00
وبتعبير جميل000
قد تكون هذه الخاطرة أبلغ من قصيدة00
والشعر يا عزيزي مشاعر0000وهذه مشاعرك فياضة00
تسلم00وتحيا وتدوم على طاعة الله000

[بوعبود]

اخوي نهار كلمات راااائعه جداااا تستحق الاعجاب والتقدير :good:

صح لسانك وبانتظار جديدك وابداعك تمنياتي لك بالتوفيق ,,

تحياتي لك : اخوك بوعبود

[صقر]

فـي خبـةٍ تختارهـا وتوقـف الجـيـب=وتشـب نـار مــن الارطــاء شبـوبـة



هدية مقبولة ياولد الاجواد


وصح لسانك على النظم الجميل والتصوير البديع

تقبل تحياتي

[ابو عمر اللاحم]

المشرف الغالي المسفهل :

اشكرك على كلمات الرقيقة والمحرجة بفس الوقت الله لا يحرمنا منك يا ابو سهيل.

تقبل تحياتي ،،،

[ابو عمر اللاحم]

اخي ابو عايد

اشكرك اخي على مرورك وصح بدنك يا بعدي .

تحياتي ،،،

[ابو عمر اللاحم]

مشرفنا الغالي وشاعرنا : راعي مرات .

يسعدني دائما مرورك على مشاركاتي المتواضه فلك جزيل الشكر على كلماتك الرقيقه بارك الله فيك .

وتقبل تحياتي ،،،،

[ابو عمر اللاحم]

اخي بو عبود

صح بدنك يالغالي ومشكور على اعجابك الله يعطيك العافية .

وتقبل تحياتي ،،،

[ابو عمر اللاحم]

اخوي صقر

صح بندك والله يعطيك العافية يالغالي .

تقبل تحياتي ،،،،

[مكشات]

السلام عليكم ورحمة الله وبركاته
أخي أبو عمر أستأذنك بنسخ القصيدة ووضعها في موقع مكشات من ضمن القصائد هناك ..
وعندما ينتهي نسخها سيتم وضع رابط لها هنا كي تراها وتبدي لنا ملاحظاتك إن وجدت ..
بارك الله فيك
أخوك
مكشات

[ابو عمر اللاحم]

وعليكم السلام ورحمة الله وبركاته

يا هلا وغلا يا بو ياسر

بكل سرور وهذا شرف ووسام اعتز به .

الله يعطيك العافيه.

تقبل تحياتي ،،،

[flan]

بعدي والله يالغالي هذي عوايدك

وربــعٍ اقــروم معطبـيـن المظـاريـب
حسبـت رجـالٍ والـردى مـا رضـوبـه
هاذي حلاتـه يـا خـوي مـا بهـا عيـب
وفــروض ربــي قايـمـه ومحـسـوبـه

والله والنعم يالسنافي وجعلك ذخر في الليالي المعاسير اخوك فلان

[نقا هشال]

ابو عمر



صح لسانك مليون ولاهنت

[مرووع القميري]

صح لسانك
قصيدة رائعة جدا
الله يعطيك العافية

[ابو عمر اللاحم]

صح بدنكم اخوتي الكرام جميعاً شرفتو صفحتي

[wrs3975]

يامروع القمري نخيتك تخاوين = في رحلةٍ وياك يكمل طربها
ياماحلا في تالي الليل سارين = عز المواتر تطرب اللي ركبها
ألفين وستة شاص لاقيل من وين = قلت البريمي ميتٍ في ولعها
فكر وتفكيره بكل الموازين = يرجح بكفته الذكية طلبها
ماهو مثل غيره يغش القوانين = بأردى المزايا ظالمٍ في غلاها


بعد إذن أخونا مروع القميري ......
بارك الله فيك يابو عمر وصح لسانك على هالقصيدة الرائعة