الحقوني يا أصحاب الباثفاندر

[طمطماية]

السلام عليكم ورحمة الله وبركاته يا النشاما

انا معاي باثفاندر2004 ... وقدر الله علي وخربت علي من أسبوع تولع لمبة المكينة ويفصل الأبنص ( دواسة البانزين)..

غيرنا فلتر البانزين لاكن بدون فايدة .... وكم من ورشة مريت بها عليهم بدون فايدة

تكفون عطوني حل


تحياتي

[قرم]

هلا والله بالي ماتصلح الكبسه بدونه :D

ياخوي مره حبرشت بالكشافات وصار عندي مثل ماعندك بمعنى المحرك يعمل زي الساعه بس دواسة البانزين ماحولك احد ماتشتغل بالمره تدعس ولا ماتدعس المهم طفيت السياره ثم فكيت الأصباع السالب
للبطاريه وانتظرت 5 دقايق ورجعت الأصباع كما كان وصارت السياره طبيعيه هذه الحركه تجعل الكمبيوتر
يعمل ري ست ( إعادة تهيئه ) جرب مانت خسران لعل الله يقدر وينفع بهالحركه وترى الكمبيوتر نفسه شينه
لاتحبرش بالكهرب إلا عند خبير .. إذا صلحت هالحركه بالله خبرنا بجدواها :good: اخوك قرم

[الطعس الذهبي]

رح للوكالة

[نمر بن حثلين]

اخوي الخلل هذا معروف في الباثفايندر
وسببه خراب حساس الهوا ولازم يتغير وسعره غالي
لذلك انصحك تروح الوكاله وتراهم يصلحونه على حساب الضمان

وغالبا يخرب الحساس اذا اهملت تنظيف فلتر الهواء يصير يدخل رمل للحساس وعلى طول يتعطل
لذلك احرص على التنظيف دائما وكل سنه غير الفلتر

[طمطماية]

أخوي قرم :

مشكور على المشورة ..... وإذا على أصبع بطارية أمره هين

نسويها ألحين ونعلمكم بالنتايج .... ما يصير خاطرك إلا طيب
مع أنك سببتلي ربع مكلمتك (( ما تصلح الكبسة بدونك )) ;)


الطعس الذهبي :
مشكور على مشورتك ... بس أنا أقول (( الله من زين الوكالة ))


نمر بن حثلين:

وربي نفس اللي في بالي ... أنا قلت يا حساس الهوا ... يا حساس البخاخات .

بس أخوي نمر السيارة ماشية 70 ألف ... أتوقع مافيه أمل يصلحونها على الضمان ؟ صح ولا أنا غلطان ؟

[المكحل/ابو]

اخوي
ترا ماعندنا مهنسين صح
اشور عليك تراجع الوكالة وتطلب فقط فحص ( معاينة الاعطال ) لكي يحددو لك المشكلة
وانت بالخيار تصلحها عندهم او عند ورشة اخري
تحياتي

[نمر بن حثلين]

70 الف مهيب الظنه يصلحونه على الضمان لكن انت هايط عليهم وقل ان الخلل مصنعي والمفروض انتم تتحملونه واكثر الباثفايندرات والماكسيمات يصيبها هذا العطل
وان ما طاعوك الله الله بالمكاسر نشف حلوقهم

واشور عليك تركبه عندهم حتى ولو زاد عليك شوي قروش
لانهم على سوءهم الا ان الخلل هذا معروف عندهم ودايم يصلحونه وما يبي معهم شي

مهب مثل الورش الثانيه يمكن يتعلمون بموترك

[أبوفيصل]

70 الف مهيب الظنه يصلحونه على الضمان لكن انت هايط عليهم وقل ان الخلل مصنعي والمفروض انتم تتحملونه واكثر الباثفايندرات والماكسيمات يصيبها هذا العطل
وان ما طاعوك الله الله بالمكاسر نشف حلوقهم

واشور عليك تركبه عندهم حتى ولو زاد عليك شوي قروش
لانهم على سوءهم الا ان الخلل هذا معروف عندهم ودايم يصلحونه وما يبي معهم شي

مهب مثل الورش الثانيه يمكن يتعلمون بموترك

أخوي نمر

هذه المشكلة حصلت لأغلب الباثفايندرات .. وخصوصاً من 2003 وأنت طالع .. والخطأ مصنعي .. وزي ما قلت .. الوكالة .. أحسن السيئين ..

[طمطماية]

ما قصرتوا يا أخوان ...

أنا دخلتها أمس الوكلة .... وبيدقون علي اليوم يعلموني وش المشكلة والتكاليف ...

وراح نعلمكم بالأخبار


سلملم

[path_poth]

أخوي طماطماية
كان غيرك أشطر

الراي إنك تنقد 4000ريال لأن الخربان عندك هو الatc وهذا هو اللي يدخل هواء للمكينة

للمعلومية 1 من الشباب غيره على 40000كم وعلى44000 كم خرب ثانية
هو خلل مصنعي بس هالكلاب ماهم معترفين وتراهم ياخذون قيمة العيب من المصنع ومن المواطن المطحون

((((أنا بايع 2003 عشان هالمشكلة والله يعينك ويصبرك

[طمطماية]

والله أخوي باث بوث خرعتني بذا القيمه

بس الغريب أخوي أن خويك غيره بعد 4آلاف حسب كلامك ..... يعني مافيه شي عندهم أسمه ضمان على القطعه ؟!!!!!!!

شكلي بأخذ معي الوالد أخليه يتوطى بطونهم .


تشكرات أفندم

[غضنفر]

بما ان اهل الباثفايندر تجمعوا في هل الموضوع (بروفوسور الباثفايندر نمر والاخوان) قلت لازم اشارك معكم
انا ايضا صارت لي نفس المشكلة والسيارة ما كملت 15 الف (موديل 2003) كلم طلعت لطعوس مرة وقام الموتر
يقطع علي ويناتع ولا يعطيني كل الدعسة وديت الموتر للوكالة وقعدوا يماطلون وان ما فيه خلل بس انا كنت مصر
المهم فحصوا المكينة بالكمبيوتر ولا لقوا شيء بالاخير قالى المهندس ان يمكن فلتر الهوا يكون مليان غبار وقالى
خل البنشري ينظف فلتر الهوا سويت الى قال واضفت عليه شيء وهو اني مسيت الموتر ولعنت جده من الغيار الاول الى الخامس ومسيتبه خط.
الحمد لله الموتر الحين تمام لكن الي قاهرني انه قبل ما تصير فيه المشكلة ما قد طلعتبه للطعوس الا مرتين
وهذي مشكلة النيسان ان المتانة فيها مش ولا بد

[نمر بن حثلين]

يا اخوان للمحفافظه على حساس الهواء من الخراب باذن الله عليكم ب :

1= تغيير فلتر الهواء كل سنه او اقل وملاحظه نظافته بشكل دائم وعند تغيير الزيت التاكيد على البنشري عند تنظيف مكان الفلتر على سد الفتحه الداخله للمكينه جيدا لعدم دخول الرمل لها

2= عند التطعيس الحرص على عدم لمس وجه الموتر للنفود عشان ما يثير الرمل ويدخل للمكينه

وطبعا اذا كنت شاد على الموتر يكون سحب الهواء عالي واذا كان الفلتر وصخ وزاد عليه دخول الرمل للمكينه من لمس الوجه للنفود يحدث دخول الرمل للحساس وعندها لا قدر الله تحدث المشكله

[أبوفيصل]

يا اخوان للمحفافظه على حساس الهواء من الخراب باذن الله عليكم ب :

1= تغيير فلتر الهواء كل سنه او اقل وملاحظه نظافته بشكل دائم وعند تغيير الزيت التاكيد على البنشري عند تنظيف مكان الفلتر على سد الفتحه الداخله للمكينه جيدا لعدم دخول الرمل لها

2= عند التطعيس الحرص على عدم لمس وجه الموتر للنفود عشان ما يثير الرمل ويدخل للمكينه

وطبعا اذا كنت شاد على الموتر يكون سحب الهواء عالي واذا كان الفلتر وصخ وزاد عليه دخول الرمل للمكينه من لمس الوجه للنفود يحدث دخول الرمل للحساس وعندها لا قدر الله تحدث المشكله

أنا أنصح .. بتغيير كل 4 - 5 شهور

[غضنفر]

كفيت ووفيت يا نمر لكن ليش سالفة الفلتر مهيب في السيارات الثانية مثل الاند و الباترول

[salehhd]

السلام عليكم

بصراحة خوفتوني

شكلي بروح اليوم بغير فلتر الهوى او على الاقل انضفه