اف جي vs فورنشر

[القناص20.20]

السلام عليكم ورحمه الله وبركاته امابعد الموضوع ومافيه انا ناوي اشتري موتر و محتار بين الاف جي والفورنشير انا صقار يعني راعي بر وين احسن في البر والطرد والنزين وين الي يصرف وكم ياخذ فيه البنزين يعني كم يقطع الله ليهينك الي راعي بر ولا صقار يعلمني وين اقوى تماسك في البر ومشكورين مقدمان
وبغيت عيوب كل واحد منهم الي يعرف يعلمنا ولله يجزاه الف خير

[fof6666]

الفورتشنر أوجه ونشيط خصوصا إذا معك عائلة
طبعا أتكلم عن الفورتشنر 6 سلندر
وعيب الفورتشنر ان مركبه غير مريح وذلك من خلال تجربتي له

[قرناس صلا]

السلام عليكم ورحمة الله وبركاته

اذا صقار ابعد عن الا اف جي ما يصلح , لعيب فى الروية الاماميه والجانبيه محدوده
يعني تعدي الشيهانه من فوق والا من جنبك ما تشوفها.
سعة خزان البنزين 65 لتر يمشيك بالبر 300 كم او اقل
تبلش بطيرك والزريق ما له مكان مناسب , السيارة ضيقة
يصلح للمطامر والرحلات القريبه من محطات البنزين
الفورتشنر ما ادري عنه

تقبل تحياتي

[طير آلفلآء]

حياك ربي ياابو اسامة

الــ fj من وجهة نظري شبابي ومكينه ممتازه والجوده الداخليه فيه ممتازه

ولكن ابي منك بس تشوف تصميمه مع داخل وطريقه الاضائه (( من وجهة نظري تتعب القلب وتجيب الاكتئاب ))

مو تنقيص فيه ولكن مع واحد من الشباب والله يوم ركبته حسيت بكتمه من تصميمه

ولكن انا اشهد جودته الداخليه ممتازه جدا

يعني قبل لاتتخذ القرار روح وشوفلك fj واركبه وشوف التصميم الداخلي له


ومن ناحيه مشاكل الحمدالله ماذكر احد اشتكى من الــ fj

/

الفشفش

افضل تصميم من الداخل وشكله رسمي ولكن الجوده في اقل من الــ fj ( اقصد جوده المكونات الداخليه ديكور وغيره ) ولكن تعتبر جيده جدا

والحمدالله معي السياره ممتازه ولا تشكو من شيء ولكن ملاحظ انها تصرف بترول وهي 4 سلندر

مع العلم ان موديل سيارتي 2010 وتانكي البنزين اكبر من موديل 2008 وتحت

ولكن ممكن لاني جديد في عالم الجيوب

/

اهم نقطه واذا كانت تهمك

الــ fj ( تجميع وقطع ياباني )

الفشفش ( قطع ياباني تجميع تيواني )

وربي يوفقك في اي سياره ناوي عليها

واستخر ربك

والربع ان شاءالله يفيدونك
وشف بع الروابط ان شا الله تفيد

http://www.toyota4arab.com/forum/t133343.html

http://www.assayyarat.com/forums/thread136793.html

وان شا الله اكون قد افدتك والله يكنت لك الخير وما فيه

[عميد سامودة]

الفورنشر عزمه تعبان ,,,الاف جي فيه ناس يمدحونه في القومه ونشيط

[العبله]

الاف جي ما يصلح لك لانه ضيق عليك وتانكيه صغير جدا.
قد يكون الفورتشنر افضل.

[الشنه]

اخوي انصحك بالفوتشنر

اما بالنسبه الى تانكي الأف جي

عادي غيره بواحد اكبر

[إبن عويشز]

حياك الله اخي الكريم


انا احد ملاك الإف جي ، والموتر ممتاز جدا من ناحية العزم والقومة
ومريح جداً ولا عليه كلام ، وفي الرمال يهقويك


لكن بالنسبة لك كصقار ، ما يصلح لأن مجال الرؤية فيه محدود
والصقار يبيله موتر يمكنه من كشف اكبر منطقة حوله


الفورتشنر إستخدمته فترة بسيطة ، ممتاز في الرمال لكن مشكلته غير مريح
روح للوكيل وخذه سياقة تجريبية وشوف اذا بيعجبك او لا


وبالتوفيق إن شاء الله

[أبو يوسف]

ما أظن يصلح لك الفورتشنر لأن مشكلته الكبرى -في نظري ومن واقع تجربه- مشكلته الرساوة
والصقار حسب ما أعرف راعي سرعة ولفات فجائية والفورتشنر سريع الانقلاب على ما يقال
بالنسبة للعزم والنشاط الستة سلندر خذ رجال
الاف جي نفس المكينة يعني النشاط جيد وغيره ما أفتيك فيه
هذا ما عندي وأتمنى أن يفيد مع التحية

[اسبيدر مان]

ايضا الفورتشر به ميزه انه يجي قير عادي بعكس الاف جي
لكن ان بغيت رائيي فاالفتك هو موتر القناصيين الاول

[ولد وايل..]

ما أظن يصلح لك الفورتشنر لأن مشكلته الكبرى -في نظري ومن واقع تجربه- مشكلته الرساوة
والصقار حسب ما أعرف راعي سرعة ولفات فجائية والفورتشنر سريع الانقلاب على ما يقال
بالنسبة للعزم والنشاط الستة سلندر خذ رجال
الاف جي نفس المكينة يعني النشاط جيد وغيره ما أفتيك فيه
هذا ما عندي وأتمنى أن يفيد مع التحية




افضل كلام...


وأن كانك صقار كما تقول....

أبعد عنهم وخذ لك اما جي ولا سفاري سلق...


من بغى الدح ما قال أح....

[القناص20.20]

بيض الله وجيهكم ماقصرتو عرفت منكم ملاحظات ماكنت ادري عنها مثل الرؤيه وتانكي البنزين وننتظر الافاده من الاخوان الباقين

[سوبر مكشات]

خذ لك سفاري او شاص


المواتر ذي ضيقه ولا ماتصلح



احد الشباب كان يصيد على كامري



كل المواتر تروح للبر لكن وين اللي يريحك ولايخسرك ولايضايقك

[القناص20.20]

الحين وين اكبر تانكي الفورنشر ولا الاف جي وكم يقطع في كل واحد وهل في تانكي كبر يركب بدل الي فيه او تانكي ثاني يركب معه وشكرا على الردود

[واحد مبسوط]

يارياجيل والله يالاف جي انه عز
لا من ناحية العزم والرساوة والصبر والقوة
الاف جي ينومس
انت مر حقين الاجار واستاجر كل واحد لمدة يوم وتشوف

[عاشق السيل]

أنا أخبر الصقار يدور حول الباترول بالدرجة الأولى وبعده اللاند !!

بس مدامك حطيت هالموترين أنا أرشح الفشفش بس بشرط (( 6 سلندر )) ،، والله يوفقك للي فيه الخير ....

[القناص20.20]

عندي لند 2009 بس ابي موتر حق دعو الند حق المقانيص الطويله