يا اخوان هذي اول مشاركة وسؤال يحدد قراري بعد اسبوع ...الله الله بالضيافة

[وش احط]

السلام عليكم ورحمة الله وبركاته..... في البداية احب ابدي اعجابي بهالمنتدى المفيد واللي شدني الحقيقة له من خلال متابعتي لمشاركات اعضائه المتميزين....واللي وثقت فيهم وفي شورهم .

أنا راعي ابل وروحاتي للبر كثيرة وأبشتري ان شاء الله سيارة خلال هالأسبوعين وابيها مريحة وقوية في الطعوس وراسية فالخط وتصبر ولا همني القيمة(إذا طقيت فاوجع) ومترجح عندي الشاص النيسان ال4 في 4 غمارة واللي طاحوا فيه أمن الطرق هالسنة والحقيقة جدااا محتار وتكفون يالأجواد أبي الشور والله الله فالضيافة.....

ملاحظة: لاأحد ينقد على الاسم ترى جربت اسامي واجد وكل مرة موجود وتوقعت ان فيه عطل في التسجيل لأني جربت اسامي غريبة وفالاخير قلت وش احط وناوي اطلع وفجأة سجل. وجزاكم الله خير.

[اسيزو 4x4]

حيا الله الغالي وش أحط

مالك غير بعد الله سبحانة وتعالى شاص تويوتا أو شاص نيشان

وأنا اشوف الشاص النيسان ممتاز وأرسى بالخط من التويوتا ومريح ..

وبالتوفيق .....

[ابو شهاب]

السلام عليكم ورحمة الله وبركاته

اخي وش احط اشوف اهل البل غالبيتهم يستعملون تايوتا شاص


اما النيسان الجديد شكله مايتحمل المكده

[وش احط]

بيض الله وجيهكم وعزالله ماقصرتوا..... اما الشاص تويوتا جربته ومتعب جداااااا فالمطاب واللي خلاني افكر فالنيسان خف المطب على ما أسمع والله يستر اشتريه ثم يصير مثل النيسان وذا العالم يقولون مطب النيسان شاص مثل الجيب نيسان ولانستغني عن الخبرات شرواكم يفيدنا من حيث
1-المطبات
2-يمسك سعرة او لأ
3-متماسك او يهرقل بسرعة
4-أفضل مكان اشتريه منه
وانا أتعبتكم معي
وجزاكم الله خير

[بن محارب]

بسم الله الرحمن الرحيم
حياك الله وبياك اخوي ((وش أحط))
طيع شوري وخذ توتويتا
لك ولزمن وللجبل والسهل وشيك بجيبك اذا دار الزمن الله لايجيب الدورات
وحط لك
مقعده بسست مقاعد نقل جماعي مريحة جداً وحط بين الريش ((السست)) سيور وخل الجيب محمل لوقت طويل وشوف كيف الفرق
اما نسيان صحيح مريح بس بعد شهر تحس انك راكب فوق زنك طاير من العجاج وهات ياغبار وقرقعه وزيوت تهرب واذا بعته طاح نص القيمة
.......................................
الشاص
منوت غريباً شف باله بعيدين ..., الدرب لو طول بسرعه يلوبه
مايمنعه لارمل لاحجار لاطين ... غريب ماتمشي المواتر دروبه
وان قلت لسواق يالخومن وين... يعطيك علم ارضاً قفر ماوطوبه
..
..
..
..
ماهي زمالة عايلات وراعين .. ولاهي زمالة للعفون وجلوبه
سلعه ثمينه لرجال الثمنين .. راع الولع يشريه لو باع ثوبه
من قصيدة الشاعر ... حمود بن نايف العنزي
تحاياي لكم

[وش احط]

جزاكم الله خير جميعا

[حرباش]

أولا اخوي وش احط حياك الله في هذا المنتدى واعتبر نفسك بين ربعك وخوانك وهذا مالمسته في الشباب هنا ونا ايضا جديد ومالي مده
ثانيا انت طلبت الشور ولو انا في محلك بعلمك وش اسوي
الشاص سواء كان تويوتا او نيسان كلاهما قويه ومافيها شك
لكن انا بشور عليك بجمس حوض ونا داري ان اكثر اللي هنا بيعارضون على هذا الشور
الجمس في السعه اوسع وفي القوه اقوى ولكن يبيلك تراعي صيانته من فتره الى فتره وقطع غياره متوفره وفي غايه الرخص ، ونا كان عندي جمس 97 دفرنشين وندمان قد شعر راسي على بيعته والصراحه له متعه خاصه في القياده ( طربه ) وتحس انك تسوق موتر ودبله قوي ،طامرت به مابقيت به محل لا في شرق الجزيره ولا غربها ولا جنوبها اما الشمال من حفر الباطن وفوق الصراحه ماقد جيتها اكون معك صريح خخخخخخخخ ، اضافه الى ان الشباب في الطلعات يتسابقون من يركب معي والسبه الراحه اريح من الجيوب التويوتا والنيسان بأنواعها
احد اخوياي كان عند ابوه جمس حوض 96 وهو راعي حلال ، حب خويي يهدي ابوه هديه وشراله شاص ، جلس الشايب على الشاص فتره ثم رد السياره لولده ورجع على جمسه الأولي .
وبرضه لا تنسى انك راعي حلال وراعي الحلال في الغالب يحتاج كل فتره الا شديد ( انتقال من منطقه لأخرى ) تأكد من ان الجمس راح يعينك في تنقلاتك ونقل عفشك
ونا اقولك لك لا تستعجل والله يوفقك ان شالله

وهذه صوره للجمس اللي كان معي التقطت له في الصمان في عيد الحج
http://www.mekshat.com/pix/upload/images8/mk11985_gmc.jpg





واعذرني على الإطاله مع تحياتي اخوك حرباش

[وش احط]

جزاك الله خير وعزالله اني حسيت بصدقكم كلكم معي وهذا من طيبكم........... بصراحة وانا اخوك اني وعقب مشاركات الشباب صار عندي نوع من التحطيم لأني منحاش من الشاص تويوتا(مرة خذيته من عمي وكليت لي جرف وبغيت انقلب) ومن عقبها وانا محرم اني ما أشتريه مع اني عارف انه عملي وقوي ويصبر ويمسك قيمته وغيرها واما النيسان كان فرد اخواني بن محارب وابو شهاب تحطييييييييم خلاني اكنسله من مزاجي ورد الاخ اسيزو كان مريح وجزاهم الله خير..... واما الجمس وماأدراك عن الجمس...والله اني أعشقه عشق مايعلم به الا الله وكنت ناويييييييييه وكااااالة من الجميح بس العالم خرشوني في امور:1_مايعيش يعني يهرقل بسرعة...2_تطيييييييح قيمته بسرعة...3_يخون في البران ماتدري الا وهو طافي عليك...4_ طرنبة البنزين

وشف وانا اخوك بصراحة أنا ودي به وبآخذة ان شاء الله وكالة من الجميح وبأشيك عليه كل فترة.... بس ابي شور بعض الاخوان وشورك بعد وأتوكل على الله...ويالبا قلبه هو والله الطرب

وباااااااااارك الله فيكم جميعا

[طمطماية]

حياك أخوي وش تحط :)

شف وأنا أخوك ،

استعن بالله ... واستخر في آخر الليل وبتزين أمورك ان شاء الله.

يا طويل العمر والسلامه ... دامك تحيرت في الشاص والجمس صحن ... فخذ الكلام اللي يجمد على الشارب

الشاص يبيله واحدن عارفله وانا أخوك، ولاهوب أي واحد يعرف يسوقه، والبنسبة لمطبه فسمعت إن له يايات تخلي مطبه لي والشباب هنا اللي معاهم خبره في الشيصان ما يقصرون. وحسب ما تقول إنك راعي بل .... فأتوقع لا غنا عنه لأنه يشيل ويشيل ويشيل ماشاء الله.


الجمس الصحن: بصراحه الجمس له شهرته مثل الشاص ومعروف من قديم

والجمس أوسع وأريح .. وفيه الخير والبركة وتراه ممتاز

لكن زي ماقالوا الاخوان يبيله اهتمام في الصيانه بعكس الشاص

فأنت شف وش تحتاج له أكثر ...

إذا تحتاج ... قوة تحمل + سيارة تشتريها وتنسى قطع الغيار = شاص

إذا تحتاج ... قوة عزم + رفاهية = جمس صحن


أتمنى اني وصلت لك المعلومة ...

تحياتي

[وش احط]

شكرا على مشاركتك اخوي طماطاية والحقيقة ان كلامك أثر فرأيي كثير ...وعلى حسب خبرتك وخبرت الاخوان وش رايكم نطرح موضوع الجمس على أعضاء المنتدى وخاصة اني دورت فالمنتدى على موضوع مخصص للجمس مالقيت وإذا فيه دلوني تكفون عليه وإذا مافيه وش رايكم نطرح موضوع نححلل فيه مزايا وعيوب الجمس الغمارة الدفرنسين التوماتيك وكالة من الجميح وآخر موديل وعسى هالموضوع يفيد الكثير.....وجزاكم الله الف خير

[طمطماية]

انت أبوها وسمها أخوي (( وش أحط ))

اطرح الموضوع والشباب ما يقصرون


تحياتي

[وش احط]

جزاكم الله خير جميعا وأنا طرحت الموضوع ولاتحرمونا خبرتكم

[الكابتن]

[b]اخوى وش احط توكل على الله وخذلك شاص وسو عليه تعديلات مثل ماذكرو الاخوان وباذن الله ما راح تندم وتسلم من الاعطال المفاجئه وكثرة تهريب الزيوت وارتفاع الحراره ونقص الما ولخبطة الكهرب

[الضاحي]

يا اخوي ما تدري وش تحط

انا مثلك صار لي فوق الشهرين ابي اشتري حوض ومحتار

شفت الشاص تويوتا والنيسان الشاص والجمس الحوض والفورد الغمارتين والدودج الرام الغمارة والغمارتين وهذي نتيجة مقارناتي:

1- اذا تبي سيارة تشيل ولا تحتاج صيانة الا شي بسيط ولا يصرف بنزين وتمسك سعرها فعليك بالتويوتا الشاص وعيبه عدم الراحة وغمارة وحدة فقط .

2- اذا تبي قوة مكينة وقوة عزم وقوة سحب وتحميل عفش الى ما لانهاية ورااااااحة وفخامة فعليك بالأمريكي وانا شخصيا افضل الفورد غمارتين (لارييت) من الوكالة بحدود 130 الف ضمان 4 سنوات وعليه هيكل غير طبيعي وعيوبها صرف بنزين وطلب صيانة وطيحة سعرها عند البيع .

ولا تتعب نفسك بالباقي .

تحياتي .

[صالح المطيري]

لكن انا بشور عليك بجمس حوض ونا داري ان اكثر اللي هنا بيعارضون على هذا الشور ...
وبرضه لا تنسى انك راعي حلال وراعي الحلال في الغالب يحتاج كل فتره الا شديد ( انتقال من منطقه لأخرى ) تأكد من ان الجمس راح يعينك في تنقلاتك ونقل عفشك
ونا اقولك لك لا تستعجل والله يوفقك ان شالله

وهذه صوره للجمس اللي كان معي التقطت له في الصمان في عيد الحج
http://www.mekshat.com/pix/upload/images8/mk11985_gmc.jpg


أنا أول المعارضين على الجمس الحوض وعذراً يا حرباش لأن الجمس مركب فقر ياكل اللي قدامك واللي وراك وكله خرابات وانا عندي واحد موديله 91 دفرنشين شريته للبر وكل يوم خربان وهات قطع غيار وتهريب زيوت مع كل مكان عجزت عنه صحيح انه قوي ويتحمل البر بس إذا كان جديد لأن عمره الإفتراضي 6 إلى 7 سنوات وعلى كذا موديلات 98 ونازل كلها سكراب في سكراب! طبعاً محشوم الجمس 79 هو وحده دون غيره قهر الزمان .
هذي صور جمسي الله يخلف :mad:

http://www.mekshat.com/pix/upload/images8/mk11967_gmc91.jpg http://www.mekshat.com/pix/upload/images8/mk11967_gmc91-2.jpg

[الراعي الرسمي]

ليهمونك حذ الموتر اللي يصلحلك بس مسمعت الشاعر وشيقول




واهمي الي همني حيل واغرق.. حالي وفرحى العين مني سرقيا
وقفت تالي الليل والخيط ماشق.. والدمع من عين المولع غرقيا
الي تامل في حياتي وبرق.. وشاف الامل في دنيتي مابرقيا
يلقى وشوم الحزن في مهجتي دق.. وقليل من عمري هو الي عتقيا
مابين علم الطافي نق في نق.. ومابين علم في بالزفير وشهقيا
ومابين سم في حشى الروح يشلق.. وحطم خلايا بالوريد ومحقيا
ومابين حزن لاصق الروح والصق.. ومن كثر ماهو لاصق به سحقيا
اجتاحني حزني وغرب وشرق.. وانا الاسير الي من العام شقيا
فرقى الونيس الي فلق حالتي فلق.. علمه هدم حالي وموجه صفقيا
بالشدة القصوى وباليوم الامحق.. هو العضيد الي له الروح تقيا
عزاه ياقلب بك الهم طبق.. وارهش عليك الحزن فوقه نعقيا
وسريت في ليلي مع الجيب الازرق.. الي زراق الليل معه انزرقيا
جيب زرق بالبيد معها تمزلق.. الي المتاهات الفيافي عشقيا
عشق العشوق الي تعاشق وتعشق.. تلقى الرضم من حدر بديه رشقيا
شقاق رشاق الفيافي ليا شق.. يشبه الرشاش النياشن مطقيا
جيب على حلو الفيافي تمطق.. مع الفجوج الي تعقد نطقيا
جيب سفاري للمسالي تدلق.. مشيه على غيره بدا به فرقيا
سميته الوافي وهو وافي حق.. حقق وانا حققت فيه الحققيا
دايم على خوض الصعيبات يشفق.. لاشاف صعب قال ربي رزقيا
عزمه قوي ماعمر يوم تعلق.. لاشاف حمر النفط فاع انطلقيا
يشبه الشيهان مع الجو حلق.. لاجاك مهو بشايفن له سمقيا
لاشم راس الطعس ارقب ودنق.. والقمه نمره وانتهض وانصلقيا
يكسر عناد النفط حين يتزحلق.. في سكته تسفي رمال الحمقيا
لاجامع الضلعان وقام يتسلق.. تقول هذا مابراسه علقيا
يفرح اذا شاف الوعر ويتشقق.. قلبه حديد وقلب غيره مزقيا
يامر طلعات الشباب يتعنفق.. يقفى ولايقفى شبيه الفشقيا
عذروبه انه دايم الدوم يسبق.. يبدع جديد يقول منهو لحقيا
حب الوفي مني تملك وغلق.. كامل وصوف الكينغ فيه انطبقيا
من يركب البترول ماراح يزهق.. ولا يعرف التهميز هو ان لزقيا
في خوة البترول تقسم وتنطق.. خوة وفى خوة صويب الشلقيا
اركى على كبد المواتر وحرق.. من بينهن يشدى لميع البرقيا
الجمس والتايوت والفورد الاخرق.. كله مع البترول خاقر وخقيا
كينغ الصحاري دقدق خشومها دق.. دقدق خشوم الي تريد السبقيا
خلاني الجى للخلا واتملق.. لان الخلا من واقعي هو نفقيا
حاولت اقاوم لكن الهم حرق.. كل الامل واخرس جميع النطقيا

:D :good:

[ابو درع]

وش احط حياك الله ونا اقولك وش تشري

بيت شعر .. التنكر هناك ( الوايت).. جمل ودك تكحل عينك حطه بيمناك .

الو ضحى وهذي الملاحي والصفراء .. وهذا الحر حق السبق لا يتعداك

ومشورتي يخوي لجل تكمل الصوره بترول جديد يخليك شيخ ولا كل يتعداك

[وش احط]

جزاكم الله خير..... ومشاركاتكم اسعدتني ...وخلتي ما أندم على التسجيل فهالمنتدى وعزالله ضيافتكم اثلجت صدري والله يجمعنا على العز والطاعة...

اخوي صالح المطيري ولايهونون الربع.....أنت عارضت الجمس وفي الاخير تبين انك تعارض المستعملة....ولكن الجديد(الوكالة للي يبيه خمس سنين بس) حسب خبرتك فالجموس تنصح فيه أو لا وجزاك الله خير.

[صالح المطيري]

نعم انا عارضت المستعملة بس اذا تأخذ جديد وتحافظ عليه فإن شاء الله يعيش معك خمس سنين ما يطلبك مسمار وبعدها الله يعينك لأنه بعد سبع سنين راح تكون البكرات والصوّف مستهلكة .
وبعدين احب اذكرك يا عزيزي "وش احط" أن كل ريال تدفعه للجمس راح يروح جزء منه للجيش الأمريكي ولا تنسى انهم محتلين العراق ولا تنسى انهم دنسو القرآن وعذبوا المساجين وانهم يساعدون اليهود في اسرائيل ولمعلوميتك شركة جنرال موترز اللي تصنع الجمس تصنع دبابات وبنادق وذخيرة للجيش الأمريكي يستخمها في ذبح المسلمين في العراق وأفغانستان وانصحك بتركهم ومقاطعتهم لعل الله يبدلك بخير من ما تريد وعليك بالسيارات اليابانية اطيب واصبر وهم ما يحاربون العرب والمسلمين وكافين خيرهم شرهم .

الشاص لك وللزمن
http://www.jumy.de/suv/toyota/big/ToyotaLand_Cruiser_FJ-45.jpg

[محب الشمال]

اخوي وش احط حياك الله ويا هلا
تبي ماكنيه اقوى من تويوتا والجمس
تبي دبل اقوى من تويوتا والجمس
تبي الدورات اقوى من تويوتا والجمس
تبي سياره مريحه اكثر من تويوتا والجمس

عليك بالباترول صالون
انا جربته وكرفته كرف فوق ما تتصور ولفيت الصمان كله فيه والبراري فيه ولا خليت طعس ولا رصيف ولا جبل الا وطلعته فيه
والي يقولك انه يهربد تراه غلطان ولا يعرف الباترول زين
كان عندي واحد وكنت حتى مهمل في صيانته ومع ذلك بس غير زيت
ابد ما يهربد هذا من واقع تجربه كرف وهجوله في الباترول حتى الارصفه الي طلعت بها الباترول لو انها تويوتا كان انكسر عندي العكوس من زمان
هذا رايي الشخصي والله يستر عليك ويعطيك خير السيارات ويكفيك شرها وجميع اعضاء مكشات

[القناص]

وانا اشير عليك بالنيسان شاص
اريح
وارسى
واجمل
وبعده الجمس الحوض
والله يوفقنا وياك

[Mohammad]

حقيقه جعلتونا نفكر وكاننا بنشترى اليوم الثانى...اذا انت راعى حلال فانت لا تملك الوقت ولا تحتمل سياره تحتاج صبانه ومراقبه متكرره وانت بحاجه ان تبقى فى البر فتره فى وقت من الاقات وتبى تقوم الصبح او تسرى بالليل كلما احتجت وتبى سياره لو تعطلت تمر بها على اقرب ورشه وانت تحتاج سياره لو تعطلت ولقيت لك ميكانيكى بالبر يمكن يقدر يساعدك وانت تحتاج سياره تنسى قد تنسى او تتناسى تغيير زيتها وتشييكها لانك مشغول واحيانا مستــــــــــــــــــــــعجل!!...انت بتسأل اخوانك عشان انت تبى تحط فلوسك فى المكان المناسب ولو كان عندك زوووووووود فلوس كان بسيطه ما صلحت غيرتها والحمد الله! والله يرزقنى ويرزق منى!
اذا انت صاحب حاجه وليس رفاهيه وكذلك دخلك محدود!!! ونسيت اقول هل تحتاج للتحميل باستمرار ام فى فترات محدوده؟؟ لنقل الحلال وما شابه!

نحن المستاشرين قد نكون اهل كشتات ونعيش فى المدينه والبر بالنسبه لنا نزهه وليس عمل اى اننا غير مجبورين ان نذهب الى البر ولدينا الوقت للتشييك وقد نسافر فى مجموعه ! فى اى وقت اما انت فقد تذهب نزهه ولكن فى اغلب الاحوال مجبور! ومشاويرك كثيييييييييييييره! وقد تكون لوحدك فة معظم المشاوير!

اذا تنطبق عليك المواصفات فعليك بتويوتا الشاص وحاول تخفيف جفافه اذا امكن ونتمنى ان يشرح الاخوه كيف؟ بالتفصيل واين؟ لتعم الفائده!
انا رجل عملى ولكن لى رغبه شديده قد تتغير عند توفر المال فى الفورد غمارتين الجديد ولو انه غالى و حقيقه حرام الواحد يشتريه جديد بقيمة لاندكروزر والمقاطعه اولى وابرك واجمل فى الدنيا وفى الاخره!

لو حاجتك الى التحميل كما ذكرت محدده بظروف معينه اشترى لانكروزر ومقطوره كبيره من عالم السيارات نوع المانى وقوى تبقى معك تركبهاعلى اى سياره حتى لو استعرتها!!!وحتى لو كانت كامرى!!


اضيف ان هناك كلام منطقى ان تويوتا قد تخرج بموديل جديد يشبه الهمر وكذلك هناك فرصه قد تكون سنه او سنتين او اقل او اكثر وسوف يكون هناك تجديد جذرى كما جرت العاده على سيارات تويوتا فربما اللاند الجديد يكون اكثر جبروت! فتستطيع ان تمشى حالك لفتره والصبر مفتاح الفرج وخصوصا انه ليس لديك مانع ان تضرب فتوجع!

فى الختام نسأل الله لنا ولك وللاخوه جميع التوفيق والبركه ولا تنسونا من دعائكم بظهر الغيب ولا تنسى الاستخاره الاستخاره الاستخاره عندما تقرر!

والحمد لله رب العالمين

للمعلوميه النيسان ومتسوبيشى و ال جى ام والفورد والرام والجييييب سيارات محترمه ولكن الظروف هى التى تحكم !















.
.


.

.

[وش احط]

السلام عليكم جميعا....شكراً شكراً شكراً ووالله انها من قلب...وانا عند كتابة الموضوع كنت احمل أفكار...تفتقد للخبرة...ومرت أفكاري بمراحل...واستفدت كثير......وأنا جدا فخور بأني أتناقش مع أناس مثلكم مخلصين في الردود لوجه الله...وانا طلعت بأمور:

1_بناءً على مشاركة اخواني صالح المطيري و Mohammad فأنا أشهد الله وثم اشهدكم أني ورغم تعلقي بالجمس وكان هو قراري الأخير أنني سأتركة لوجه الله واسأل الله أن يعوضني خيراً منه فقد غابت فكرة المقاطعة في حماسي الزائد واسأل الله أن لايحرم من ذكرني بها الاجر.
2_أقنعني اقتراح الاخ mohammad في فكرة اللاند كروزر والمقطورة ويمكن ان تكون نيسان بترول ومقطورة فشكراً أخي.

وفي الختام..جزا الله كل من شارك في الموضوع خير الجزاء .....

[صالح المطيري]

:) :) :)
بارك الله فيك يا أخي العزيز وش أحط وأسأل الله العلي العظيم أن يخلف عليك بما يسرك في دنياك وآخرتك وأن يوفقك في مبتغاك وأن لا يحرمك الأجر بما تركت لوجه الله وأن يجعل ذلك في موازين حسناتك ويسعدك في دنياك وآخرتك يا سميع يا مجيب .
:) :) :)

[الطعس الذهبي]

لاتدور غير اللاندكروزر مشكلة غالي نار سعرة ياصل سعر اللكزيس 430 والجيب الـ Vxr يصبر ومريح مهو على اسمة جيب