مارايكم في كفر ماكسس

[HILUXES]

السلام عليكم ورحمة الله وبركاته
انشاء الله انكم بخير


ياشباب ابي ارائكم في كفر ماكسس العادي
مقاس 265\70\16
للجيب من ناحية خطوط والنفود
واذا فيه افضل منه لاتبخلو علينا


انتظر ردودكم بفارغ الصبر

[العبقري 2008]

اذا كان الجيب تايوتا

انا افضل الدلوب ...

[كرم القلوب]

ررااائع جدا الماكسس من تجربتي بـــ 760

[بعيد الهقاوي6]

السلام عليكم ورحمة الله وبركاته



انشاء الله انكم بخير


ياشباب ابي ارائكم في كفر ماكسس العادي
مقاس 265\70\16
للجيب من ناحية خطوط والنفود
واذا فيه افضل منه لاتبخلو علينا



انتظر ردودكم بفارغ الصبر


تكتب كذا ان شاء الله

لان في كتابتها بهذه الطريقه انشاء تغيير للمعنى تعال الله عز وجل عن ذلك





بالنسبه للماكسس ممتازه بس اهم شي تاكد من تاريخ الانتاج يكون 2010

[stewrd]

اخوي انا جربته والله انه ممتاز له الان معي سنه واربع شهور ما شكيت من وارخص من الدانلوب بكثير

[شمالات نجد]

يمدحونه كثير وتوي طاق طقم خمس كفرات

ماكسس برافو 760 جنط 16 مقاس 265/75 (طبعاً هذا المقاس إذا كان ما يحك عندك بالرفرف)

مهم: تأكد أنه تايلندي الصنع لأن فيه اماراتي أو صيني ما ينفع

مهم: تاريخ 2010 متوفر بالأسواق

مهم: ترا سعره ارتفع لكن يستاهل حول 400 تنقص أو تزود

وفقك الله

سلام

[HILUXES]

اشكر كل من شرف على موضوعي وانار موضوع برده


واخوي بعيد الهقاوي6 مافيه انسان مايخطي الخطا وارد


واخي كرم القلوب وشمالات نجد
وش قصدكم بـ 760

[النادر نايف]

السلام عليكم
ماكسس راائع جدا
لاكن أنتبه من التايواني

[ابوراس الدحمي]

مركب في سيارتي نفس المقاس ... جيد خاصة في التحمل ...ولكن لاحظت انه شديد على الموتر من ناحية المطبات والحفر
وسعر جدا مناسب
تحياتي........

[HILUXES]

النادر نايف
ابوراس الدحمي

اشكركم على مروركم العطر

[الجني العبد]

كفرات ماكسس كنت حاقرها قبل ماأركبها
وصدق من قال اللي مايعرفك يحقرك

والان أنا مركبهن ويتميز بالليونه وأقل مناقز والراحه وأيضا مابهن رجه مثل الدنلوب

[التميمي 20]

كفر ممتاز وما علية وسعره رخيص ...

بالنسبة للدنلوب ممتاز و احذروا الغير أصلي مافيه فرق بينه وبين الاصلي ( ابن زقر ) !!!!!!!!!

[تربو]

كفر ممتاز من تجربة اكثر من سنتين
الي هو برافو 760

[أبو يوسف]

المقاس اللي تقوله أخوي أظنه لجيب فورتشنر
سألت عنه بحدود 380 حسب ما أذكر (قبل 15 يوم)
وما قويت أشتريه لأنه تايلندي بس أشوف الشباب يمدحونه وحتى البنشري يقول أنصحك به
بس قلت وجه تعرفه ولا وجه تنكره خصوصا أني كنت على جناح سفر للحجاز مع العائلة ولا ودك تغامر
شاركت لعرض السعر ولا عندي أي معلومة تخص الجودة
مع التحية

[القناص20.20]

هذا انا مركبها ما مثلها بس بالنفود زي الحجري لازم تنزل هواه و لا مع الخطوط تمام التمام

[مكشاتي النماص]

انا مركبها على يوكون 2001 والحمد لله ممتازة ولم الاحظ فيها اي عيوب حتى الان ولله الحمد توكل على الله وخذها

[معهم]

صناعتة (تايوان) تخوف على جونا الحار ..

[أبو ياسر العمراني]

لي مع الماكسس تجربتين
الاولى على شروكي 2001
والثانيه على تاهو 2004 معي الآن
ممتاز وخاصه إن سعره مناسب

[جهام القصيم]

الكفر على حسب الاستخدام إذا كنت راعي بر او بطناج او حصا فهو مناسب جداً اما داخل البلد وفي الخطوط السريعة فهو غير مناسب ابداً

[سهم قيادي]

انا مركبها على لاندكروزر حتى الان جيدة جدا وما ركبتها الى بعد ما سالت ناس مجربينها ومسكو علهيا خطوط وواحد منهم ركبه مرتين
ويقول عنها زينه ولا لاحظ عليها شي
صرحه حتى الان بالنسبه لي افضل من الدنلوب من ناحيه اليونه و صوت الضجيج الماكسس اخف

[سالم11]

يا جماعه وين الكفرات تقعد سنه ونصف انا لي سبعة اشهر والي ورا مودعه طبعا ماكسس

[سهم قيادي]

يا جماعه وين الكفرات تقعد سنه ونصف انا لي سبعة اشهر والي ورا مودعه طبعا ماكسس
وكم المسافه المقطوعه بالكيلو لاهنت تقريبا ؟
لاني اشوفها مع اخوي لها الان سنه ما شاء الله ما تغييرت ما شي عليه تقريبا 27 الف

وهل تقصد البلون ؟