عطونا الراي والشور يالنشاما ... وش الأفضل ...

[الضاحي]

يا مكشاتية يا كرام

عليكم من الله السلام

نبي رايكم في الأفضل للبر والطلعات وتحمل البران والخطوط وتكاليف الصيانة وقطع الغيار ومسكة السعر بين:

1- الفورد غمارتين F-150 حوض موديل 2005 (لارييت)

2- الدودج رام غمارتين 1500 موديل 2005 (لارامي)

3- الجمس غمارتين 1500 موديل 2005 (سييرا)

ولا تحرمونا من خبراتكم يا اهل التجارب والمعرفة ولا تنسون التصويت اعلاه لاكتمال الفائدة .

[وش احط]

السلام عليكم اخوي الضاحي.......بصراحة موضوع يسيتحق الإهتمام والمنتدى بحاجة له ...وانا اولهم وجزاك الله خير على الموضوع.

[اسيزو 4x4]

الجمس أزين

[الضاحي]

اخوي الغالي ( وش احط )

مرورك على الموضوع شرف ... بس ما عطيتنا رايك

اخوي العزيز اسيزو

ما شاء الله عليك ... دايما حاضر ... بس ليش اخترت الجمس ؟ وهل لك تجارب سابقة ؟

[الضاحي]

يا جماعة الخير وينكم

32 زيارة و3 ردود فقط ؟؟؟

نبي المشاركة يالربع حتى تكون الفائدة اكبر

[راعي الفزعه]

اكثر السيارات شعبية هي الجمس غمارتين 1500 (سييرا) وتعتبر هذه السيارة تطويرا للجمس ابو عبارتين القديم الاحمر (الله واكبر على زمان اول) .

هذا ما اقدر عليه ...










:D :D

[الضاحي]

حياك الله يا راعي الفزعة

الله اكبر على ابو عبارتين .....

[بن نويشر]

الرام الرام ولا شيئ غير الرام ، يا خوي شكله تقول أنه مصنع مخصوص للبران ، قوة ومتانه وهيبه وخاصة غمارتين وحوش (قطع صغير) وضمان سبع سنوات أو 100000كم .

عسى الله يرزقنا الجنة .

[الضاحي]

مكينة الرام وعزمه اعلى من السيارتين الاخريين

[وش احط]

اخوي الضاحي.....الله يرفع قدرك في الدنيا والآخرة.. أنا صوت للجمس...لأني أميل له....ولا عندي خبرة فيه...ولو تلاحظ اني طارح موضوعين كلها كان فيها استفسارات مني عن الجمس.....وموضوعك ساعدني كثير ...وبارك الله فيك

[طشي وامطري]

الجمس
يكفيك إنك تلقى القطع بالبقالة ولو تروح لسباك عرف يصلحه أضف إلى ذلك إنه من فصيلةgm يعني الكوابرس والبيوك والصوالين نفس التقنية يعني معروفه خرباته ومشاكله ومكوناته

[الراعي الرسمي]

انا اقول لازم تجرب قبل ما تشتري شي . يعني الموتر اللي تبي تشتريه جربه قبل في كل مكان . وسلام عليكم ورحمة الله وبركاته :D

[الضاحي]

اخوي وش احط

جزاك الله خير وان شاء الله كلنا نستفيد

اخوي طشي وامطري
اسم مميز ورد مميز ... شكرا لك

اخوي الراعي الرسمي
ودنا نجرب السيارات اللي نبي نشتريها بكل محل بس ما يحصل يالغالي ...

[الضاحي]

يرفع لأخذ رأي باقي النشاما

وينك يا ماجد الشمري

وينك يا سلفر سنايبر

وينك يا الرحال 2003

وينك يا شايب الصمان

وينكم يالربع كل باسمه

ترى الموضوع يهم كثيرين من الناس وخاصة بعد حدوث العديد من التغييرات (الجيدة والسيئة ) على جميع انواع السيارات في السنوات الأخيرة . نبي نطلع من دائرة (يازينها من اول) ودائرة (شوفو موديل 71 و 79 ) .

الموضوع هذا لمقارنة موديلات 2005 .

شكرا لكل من ساهم ولكل من صوت ولكل من سيساهم او يصوت . وسلامتكم .

[الطعس الذهبي]

الدوج ممتاز

[طحنون]

الدوج اقوى منهم كلهم
ويعتبروحش الونيتات
في الماضي والحاضر
وبالنسبه للصيانه لاتخاف ضمان سبع سنوات وبعدين التشييك المستمرللسياره يريح

[ماجد الشمري]

اخوي ةش احط انصحك بإما الفورد اف 150 او الشفر ...
لان الشفر ( 5.3 ) افضلهم بال Towing اي بالسحب وبالتحميل بعد وهو الاقل استهلاك وان كان بفارق بسيط ويستهلك 15 / 19 ميل للجالون بينما الدودج 4.7 و الفورد5.4 فكلها تستهلك14 / 18 ميل للجالون....
الفورد بشكل عام الاحلى والارقى وانا قد شفته من الداخل يجنن ...
على العموم انصحك يا بالفورد اذا كانت استخداماتك تميل للنعومة اكثر من المشقة... وهذا لا يعني انه سئ لكن الشفر يبدواكثر قدرة على التحمل ...
لو كنت مكانك كان اخذت الفورد خصوصا انه الافضل في المساحة الداخلية وخصوصا في الامام ..
من ناحية المحركات نجد ان الفورد افضل انتاج بمحرك 5.4 بقوة 300 حصان و 365 رطل ...
بينما الشفر بمحرك 5.3 بقوة 295 حصان و 335 رطل و الدودج بمحرك 4.7 بقوة 240 حصان و 300 رطل .... لكن ارجو ان تضع معلومات اكثر عن السعر اللي تبي تدفعه وكذلك المحركات المطروحة عشان نعطيك نبذه عن الافضل حسب استعمالك ..






اخوكم ماجد الشمري

[الضاحي]

بس يا اخوي ماجد الدودج مكينته 5.8 هيمي قوتها 345 حصان وعزمه 375 رطل . بس انا افضل الفورد بسبب قوة الشاسيه والهيكل مقارنة بأي سيارة امريكية اخرى ماعدا الشفر سلفيرادو 1500 Hd .

وش رايك يالخبير

[صوعان]

انا اشوف ان الدوج رام 1500 احسن شي من ناحيه الشكل والقوه (العزم)
بعدين غمارته وسيعه والغماره ونص احسن بعد شوي ورفيع يعني موتر بر

[الضاحي]

والله يا اخوي صوعان ما الومك في الدودج ... شكل مهيب وقوة جبارة

شكرا على مرورك الكريم

[a.الخثلان]

السلام عليكم
أحببت أدخل بمجالي من واقع التجربة كان عندي فورد غمارة ونصف وفي الحقيقة سيارة ممتازة أشاد به من ركب معي وخاواني للبر ويمتاز الفورد بأن قير الدبل يدوي مو كهربائي زي الجي أم سي وأتوقع أنه راح يكون أكثر تحمل وهو الأكيد دبلات الجي أم سي الكهربائية معقدة وحساسة

بالنسبة للصرفية عبيت فول من محطة دوار التنهاة أنا وراعي جيب جكس وتمشينا في الصمان ألين قلنا بس وطلعنا على أم رقيبة بقي عندي الربع وبقي عنده الربع لكني عبيت بي 65 ريال والجيب عبى بي 75 ريال ولا يعتبر مقارنة أكيدة

تفلل التانكي تقريبا 75 ريال ولاحظ فرق التعبية بالنسبة لجميع السيارات
بالنسبة للنفود ممتاز وقوي جدا وتحديت شاص على أحد طعوس التحدي ضحكوا الناس مندون مبالغة على الشاص
عند الصعود يديور من بعيد وأديور من قريب
وعند تحميل الموتر في البر كنك راكب على كدلك وما عاد تحتاج الدبل في النفود بكثرة
على الخط تمشي 150 ما تحس والسيارة تفصل بعد هذي السرعة وتحديت قومة مع vxr ما طلع علي ألين 140
موديلات 98 محافظة على أسعارها منذ ثلاث سنوات فهي تتراوح في قيمة 30000 ريال
السيارة سترتاح لها عند التعامل معها بعد فترة وتعرف كيف تقودها في تضاريس البر
في الوكالة يتم بيع بعض الموديلات المتوفرة والمستعملة قليل تحت الضمان وبنصف سعر الجديد يعني الآن خرج موديل 2006 تآخذ موديل 2005 بنصف سعر الجديد وتحت الضمان لمدة ستة أشهر وماشي تقريبا 12000 كيلو

السيارة كرفتها ألين قلت بس وكانت ماشية فوق 200000 ومستخدمة بعد أرامكو ومع ذلك ما خالف معي
بالنسبة للصيانة أتوقع انها أفضل من الدوج والجي أم سي أفضل منهما

[a.الخثلان]

هدية صورة لفورد f150 على اعلى قمة نفود موجود بالخرارة وشاهد مياه السيول بزاوية الصورة
http://www.mekshat.com/pix/upload/images9/mk15823_f150.jpg

[الضاحي]

اخوي الغالي الزينون

اشكرك على مرورك الكريم وانا ما الومك في الفورد لأنه فعلا سيارة قوية بمعنى الكلمة. وانا شخصيا افضل الفورد 150 على الجمس وعلى الدودج سواء من حيث القدرة او التحمل او الفخامة الداخلية .

تحياتي.

[MANSOUR]

السلام عليكم ورحمة الله وبركاته
أخوي الكريم الضاحي
بالنسبه للشفر ممتاز لكن عيبه شكله ولايقارن بجمال الفورد أو الدوج




وبالنسبه للدوج ممتاز ولا يعلى عليه وهو أقوى السيارات من ناحية قوة المحرك لكن قطع الغيار




وبالنسبه للفورد ممتاز جداً ,ومن ناحية الراحه في الخط أو البر فهو رائع ومن ناحية الصرفيه فهو ممتاز جداً عندي الآن فورد F-350 أمشي من الشرقيه إلى الرياض وآصل الرياض ويكون باقي في تانكي البنزين تحت النصف بقليل علماً بأني أمشي بسرعة 120 كم, وترا مايفرق بين الـF150 والـF-350 قدرة الجر وقدرة التحميل وهو قوي بالبر وماكينته قويه حتى أني تقاومت فيه مع ونيت شفر ورحت عليه وتعديلاً على كلام أخي الفاضل الزينون الفورد من موديل 2001 فما فوق يكون الدبل كهربائي .

[عاشق الجبل]

الأخ : الضاحي

بدون تردد ( جمس سييرا 1500 )

[الضاحي]

اخوي منصور

مشكوووووور على مرورك الكريم ورأيك. ما قلت لي: الفورد اللي معك وش موديله ووش مآخذك عليه؟

[MANSOUR]

الفورد اللي معي موديله 2001 ,والله مريت وكالة فورد بالدمام ولقيت عندهم وانيتات مستعمله من استعمال أرامكو وبعضها نظيف وبعضها لا ولقيت F-350 غمارتين وصحنه قصير ونظيف ومرتفع ,أخذته بـ40 ألف.


نبيك تبشرنا بعدين وش أخذت.................

[شاص]

الدوج مكينته قويه لكن مشاكله كثيرة وقطعه غالية إضافة إلى أنه يبي لك تشيل معك مكينة بنزين من كثر صرفه وهذا كله كلام ناس جربوه ..
الجمس السييرا الجديد ممتاز ومريح وعندك خيارات لقوة المحرك ..

[بو خليفه]

الأفضل الدوج لأن الدفرنش الخلفي قافل و الثاني الفورد و الأقل سعر فيهم
أما الجمس فالوكالة للأسف لا تأمن القطع و الصيانة غالية و لا يوجد خدمات و المكيف جداً سئ لا يعطى البرودة المطلوبة والجديد كثير الخراب خاصة عند زر الدفع الرباعي دائماً تتعطل

[الصمـــــان]

السلام عليكم مشكور اخوي الضاحي وانا بقولك شوري الموتر الي يستحق التصويت هو الجمس سيبراويعطيك الف عافية وياليت لو تحط تصويت بين الددسن غمارتين وهايلكس غمارتين ويعطيك الف عافية

[الضاحي]

اخوي منصور

مشكور على الإجابة والله يعطيك خيره ويكفيك شره وان شاء الله اذا شريت ابعلمك واعزمك بعد :D

أخوي شاص

شكرا على مشاركتك القيمة واتفق معك بالنسبة للدودج

أخوي بو خليفة

صدقت في الجمس وانا شخصيا افضل الفورد لأنه اقلها خرابات غذا الله فكة من المخابط الشين والعين :no: ;)

[الضاحي]

السلام عليكم مشكور اخوي الضاحي وانا بقولك شوري الموتر الي يستحق التصويت هو الجمس سيبراويعطيك الف عافية وياليت لو تحط تصويت بين الددسن غمارتين وهايلكس غمارتين ويعطيك الف عافية

مشكور يا اخوي الصمان على رأيك وبالنسبة لطلبك فقد سبق ان طرح هذا الموضوع ولكن بدون تصويت وابشر بسعدك ان شاء الله ابحط التصويت المطلوب ... لعيناك يالصمان :p

[جندل]

]يا مكشاتية يا كرام
عليكم من الله السلام
انا عند ج :j مس سيرا 2005 Hdغمارتين يعني 4ابواب المكينه 6000 لتر يعني 330 حصان
ممتاز جدا والمشتره من الامارات دبي
صلى الله عليه وسلم[/color]

[الضاحي]

اخوي جندل

شكرا على مشاركتك والجمس اللي تقول عليه اقوى من السيارات المحطوطة في هذا الموضوع والمفروض يقارن بمثيلاته من نفس الفئة .

تحياتي

[بن محارب]

انا اقول غذا منت شاري تويوتا
خذ الجمس .. شيء نعرفه على الأقل
اما القوة والله ياخوك انا ما اعتقد يوم ابركب جديد مثل هذا .. والله الرازق
تحاياي

[الضاحي]

جزاك الله خير يا بن محارب وشكرا على رأيك ومشاركتك .

[عاشق الأشهب]

لأ تدعدى اليباني
أفضل بكثير من الأمريكي

[جو الصمان]

الجمس بدون منافس من خلال تجربه

[كان]

طبعا f-150 انا املك هذه السياره الرائعة ماجربت سياره مثلها ابدا توكل على الله

[البيـرق]

السلام عليكم ورحمة الله وبركاته
اول شي جمس سييرا
ثم الفوردf150
وابعد عن الدوج شوفة عيني ذاك اليوم
يطعس ويوم كتم الدعسة انفقعت صره الزيت.........