بخصوص الشبك فوق السيارة من يفيدنا ؟

[ولد الديرة]

السلام عليكم ورحمة الله وبركاته

أرغب في تركيب شبك فوق السيارة ولكن أختلفنا في التصميم ...

واحد يقول حط الشبك بقلاوه من أوله لأخره

والثاني يقول لو بغيت تحط عفش شوي معناها أنك بتمد حبل من أول الشبك لأخره

وأختلفوا في المحلات أيها أحسن وأفضل سعر !!

فقلنا ما لها إلا المكشاتين هم أهل البر والسفر وأخبر بهالعلوم ....

السيارة باتفندر فتحه ....

عطونا رأيكم و مشورتكم الله يبارك فيكم .

[الشقردي]

حط من هالشبوك المشهورة على اللاند ويسمونها شد الرس وتركب على موترك بس لا تحطه شبك بقلاوة لأنه
1 بتتقشر بويته بسرعة
2 اذا طاح شئ بين الشبك استخراجة صعب
نصيحتي خلها شرايح (تيوبات) أزين لك

[الطعس الذهبي]

أشتر قلص وإذا كنت ملزم على الشبك ركب حقت اللاندكروزر

[الراعي الرسمي]

ايذ كان الموتر بنزيم الله يعينك على الصرفيه الشبك لحاله ينقص من البنزيم تقريبا 150 كلم ايذ كنت مسافر
وشلون عاد ايذ كنت محمله . عليك بالقاطره اللي تسحب احسن بواجد لصرت مضطر . :)

[ظلال الشمس]

الشبك ما مثله شئ
وأحسن شئ مثل الي يركبونه أهل اللاندكروزر مثل ما قال أخوي شقردي ولا يهون الطعس الذهبي
تراه مناسب وزين
وأسعاره في أوقات الذروة :d ( في الشتاء )
حلوة أوقات الذروة صرنا شركة الاتصالات على غفلة :)
ما بين 550 و 600 ريال
ومن الورش عندك المواهب شغلهم ممتاز
والمميز وغيرهم

بس هذا الي أنا أعرف في الرياض

أتمنى إني أجبت عن تساؤلك

[ظلال الشمس]

على فكرة تراي شايفه على باث فايندر شكله جميل جدا ولا شوه الموتر بالعكس
وخصوصا إنه داخل شوي في المجرى حق السلة شد البلد

[الشقردي]

وكلام الراعي الرسمي على متمه
فعلا الشبك فوق السيارة يزيد من استهلاك البنزين لمواجهته للهواء ولكنه في اعتقادي الحل الامثل للكشتات لأنك بتقابل شعبان ونفود وطرق وعرة وكل هذي المعوقات تتعبك في حال ركبت سلة خلفية أو قلص واللي بيتعبك في الرجوع ورا والمديور .

أما اذا تبي حل اقتصادي ومريح في التحميل والتنزيل واستخدامك فقط في الخطوط السريعة خذ لك سلة خلفية

[بن نويشر]

خذ مني هالنصيحة ..

إذا كان الشبك للكشتات البرية فالشبك ما مثله .

أما إن كنت ناوي للسفر والرحلات الطويلة فطع شوري خذلك قلص من عند ساكو خفيف ويفي بالغرض وزيادة ، وتراه أريح للموتر .

وتقبل سلامي ..

[ولد الديرة]

المعذرة على لاتأخر وعدم المتابعة أولا بأول لطروف العمل ...

الأخوة :
الشقردي
الطعس الذهبي
الراعي الرسمي
ظلال الشمس
سنيدي

ماقصرتوا ووفيتوا

وأعذرونا على القصور ...

وبالنسبة لشبك اللاند هل له شكل معين وإلا كل وفنه

وهل من الممكن صور ...

طماع وطاح فر كريمين !

[الذيب سرحان]

انا مركب شبك من عند الضويان بالرس وطلعت به يم الشرقية ولا صوت ولا شىء لأنهم مركبون تيوبات في مقدمة السلة ، وحقيقه انها حلوه جداً ولايقه عى اللاند ، وبالنسبة للصرفية مالاحظت اي شىء ، وزينة السله ايام الربيع وبتحللها صح ، طيعوا شوري 0

[ظلال الشمس]

آسف جدا على التأخير

لكن راجع هالرابط وبتلقى طلبك انشاء الله

http://mekshat.com/vb/showthread.php?t=20538

[الشقردي]

الاخ الذيب سرحان ولا يهونون الربع

تقول ما يطلع معك هواء أنا مركب واحد في الرياض عند المميز على Vxr98 والصراحة اذا تعديت 120 بديت أسمع صوت الهواء هذا وانا ما حملت الشبك !!!!
مع العلم اني ما حطيت الربل اللي في مقدمة الشبك ولا اللي في المؤخرة؟ رايكم وش تكون المشكلة بالضبط؟

ولاحظة :شكل الشبك نفس اللي في الرابط اللي حاطه أخونا ظلال الشمس

[جوكر]

فيه شبك حلو وما أدري هو بيعجبك وإلا...لا.

يصلحه أبو خالد اللي في المواهب اللي يتركب فيه خيمه في جنب الشبك ومسنده الخيمة على السيارة وتقدر تفكها
وتنزلها من الشبك وتحطها في كيس خاص لها ...

وعلى فكره الخيمة ضد المطر...وشكل الشبك حلو مقبول..

ومركبه أبوخالد صاحب ورشة المواهب في سيارته...







.....

[سفير الجزيرة]

السلام عليكم ورحمة الله وبركاته
معلومات مفيدة ، وعندي سؤال بسيط .
وش أحسن وأفضل الورش في تركيب الشبك أو التوانكي في منطقة القصيم ؟

ومشكورين

[جوكر]

يقولون في الرس ورشة اسمها الضويان بس ماأدري عن شغلها هو زين والا لا....!!!!




...

[ناصح]

يا اخوان ليتكم تضعون صور للسلال التي ركبتوها على الاند لأنه مهما وصفت لا تصل الفكرة

وانا محتاج اركب سلة لكن بعد ما اتأكد إي نوع افضل شكلا وعملي

[مريقب العيفار]

للي سأل عن السلة حقت الضويان

انا مركبها لي مدة

والصراحة مسكته بالحيل

ولا تسمع لها صوت مع الهواء

وشغلها شغل مضبوط

[الذيب سرحان]

اخوي الشقردي : اعتذر عن تأخر الرد
بالنسبة للصوت اللي ذكرته في سيارتك بسبب عدم وجود الربل ويسمى ( جلبه ) والربل مهم جداً لأن احد الأخوان ركب الشبك
بدون الربل وسمع الصوت وبعد تركيب الربل راح الصوت 0
اخوي سفيرالجزيرة :
بالنسبة للشبوك تلقاه عند الضويان وهو افضل من يركبها ويتفنن فيها ، وعنده تركيب التوانكي بعد 0

[الذيب سرحان]

الاخ/ جوكر ولا يهون الربع
انا من تاهل الخبر واتعنى اروح لورشة ششغل نظيف ورايق ، لولا الغلا شوي .