سعودي يغير زيت للسيارات وبسعر رخيص جدا‎

[جيبي جايزلي]

سعودي يغير زيت للسيارات وبسعر رخيص جدا‎

تصدقون حركته حلوه يشتري جمله من المصانع وجالس يكسر سوق ابو يمن والبنقال


أنا كلمته والموضوع صحيح والرجال أخلاق ويتمنى أنه نمر عليه وأسعاره صحيحة 100%


بسم الله الرحمن الرحيم

يا جماعة الخير أردت في أحد الأيام تغيير زيت محرك سيارتي


واتجهت وكالعادة إلى محل راعي الزيت في المحطه وطبعاً (مثل ما تعرفون)وبعدين بدأت الحسبة


خمس علب زيت *15 =75ريال

السيفون =25 ريال

أجر التغيير = 15ريال

المجموع = 115


طبعاً بالأخير تروح ومثل ما تعرفون يضحك عليك يقول سعودي مليان فلوس ولا همه اي حاجه والله قهر صح

وانت تضحك وفرحان إنك غيرت الزيت

خذ المفاجأة القوية

وجدت بالمصادفة محل في حي الروابي شارع عبدالله بن أمية متفرع من شارع عبدالله بن عباس

وهذا المحل متخصص لبيع جميع زيوت السيارات وجميع السيفونات الخاصة بالكثير من انواع السيارات


فوقفت عنده ووجدت شاب سعودي مهذب اسمه (ابو علي)ونعم بهذا الشاب ووجدته يشرف على محله ويعمل فيه وتفاجأت عندما عرفت الأسعار التي يخفيها علينا أصحاب البناشر والمزايت في المحطات والجشع والطمع الذي يعمي عيونهم في بيع الزيوت


قمت بحساب نفس اسعار الزيت الذي قمت بتغييره مع السيفون عند (مثل ما تعرفون) الجشع والطماع وانظر الفرق


خمس علب زيت *11ريال=55ريال


السيفون =15ريال


أجر التغيير = 5ريال


المجموع = 75ريال يا بلاش


يعني كسبان 40 ريال


يا جماعة الخير انا ما ني جالس اصلح دعاية لكن حرام الغش والخداع واللعب علينا والاستغفال

طبعاً بتقولون حتى هذا غالي لو اخذنا الزيت والسيفون من الجملة كان ارخص علينا لكن يا جماعة الخير هذا على الأقل افضل الموجود ولا بعد من ابن الوطن السعودي، ودعم ابن الوطن وجعل أموالنا في ديارنا أفضل من دعم الأجنبي وترحيل أموالنا إلى الخارج

يا كثر ما غيرنا زيوت وراحت فلوسنا هدر وعندنا بديل ولا بعد سعودي



من ايميلي

[ابو العز بلس]

موضوع مكرر قبل يومين تقريبا
على العموم الله يعطيك العافيه

[ولد وايل..]

وين مكانه ... بالضبط...

وهل يغير زيت وسيفون فقط بدون ما اشتري منه ؟؟

وكم ياخذ ؟؟

[بن جعيثن]

جزاك الله خير

[جيبي جايزلي]

حسب ما قريت انه في حي الروابي شارع عبدالله بن اميه متفرع من شارع عبدالله بن عباس اسم راعي المحل ابو علي

ملاحظه انا ما رحت له قريت الموضوع ونقلته للفائده وبالتوفيق للجميع

[الخِيال]

مشكور على هالمعلومه

والله يرزق كل تاعب

[لاتكب البيالة]

غير صحيح
المحل رحت لمه يبيع زيوت ب 11 والسفون ب 15 ولا يغير لك
طبعا ما شفت بالمحل سعودي شفت هندي فقط

[كاشت وحداني]

بحاول الخميس والجمعه امره ونشوف

[عاشق السيل]

يوم جاني هالكلام بالإيميل قبل شهرين تقريبا رحت ركض للمحل وتفاجأت بوجود هندي وعنده أنواع الزيوت لكنه يبيع فقط وما عنده حفرة أصلا للتغيير لأنه عبارة عن محل عادي ،،

أما الأسعار صحيح إنها أقل من المشاحم لكن لو شريتها بالجملة طلعت أرخص بكثير بس مطلوب منك تدور أحد يغير لك أو دبر نفسك بحفرة !!!

ونقول الله يرزق صاحب المحل بواسع فضله ....

[ا لطرقي]

جزاك الله خير

[واطي الجمرة]

ذكرت ان اجرة التغيير 15 والسعودي 5؟؟؟؟
الي اعرفه اني اغير الزيت واعطيهم قيمة العلب فقط بدون شغل يد؟؟
صح انهم يويدون في العلب

[التعـ King ـديل]

اول مره اسمع عن شي اسمه اجره تغير

المعروف انه ياخذ قيمه العلب والسيفون

[بو خالد77]

اخبر البنشري اذا جبت له الزيت والسيفون من برة ياخذ عليك اجرة تغيير...........

[N أبورغد N]

يازين الي يدور الكسب المعقول
الله يبارك له ويرزقه

[السفاري]

انا طريقتي اشري زيت من محلات بيع الزيوت اللي بطريق على بن ابي طالب بالرياض ارخص ولو تشري لك كرتون اوفر لك بعد والسيفون من الصناعية حق الوكالة واغير عند المشحمة اللي عند البيت اجرة اليد 15 ريال والسيارة جيب يعني اشري ثمان علب عشان كذا تفرق معي

[NOYEB]

الله يرزقه

[* ابو باسل *]

لااحد يسمعك تقول اجرة تغيير بعدين يطبقونها اسكت تكفا ترى ماحنا ناقصين بعد زيادة اسعار واول مره اسمع اجرة تغيير هو زارفك زارفك وبعد تبيه ياخذ اجرة تغيير .

[tihami2003]

أنا أختلف عنكم كثيراً أشتري كرتون زيت من موزعي الزيوت بالصناعية القديمة أو من الغرابي بسعر خيالي وكل ما حل وقت تغيير الزيت والسيفون طلعت خارج النطاق العمراني للرياض ورفعت السيارة على صخرتين وفكيت الزيت والسيفون وغيرتها بنفسي في 10 دقائق وخل اللي يدفع لمثل هالنصابين يتحمل العواقب (سنن الصره مبوزه ولا مركب سنة السيفون غلط ولا مغير لك زيت الله أعلم عن مصدره
وعلى فكره بالنسبة لتنظيف الفلتر حق السيارة إذا رجعت للبيت إنفخه بمنفاخ الهواء اللي يستعملونه حقين معارض السيارات لإزالة الغبار من على السيارات .
لي حتى الآن أكثر من 5 سنوات أغير زيتي وسيفوني بنفسي وكرتوني معي بشنطة السيارة كل 4000كم أغير الزيت حتى وأنا ماسك خط
جربوها ما تخسرون .
ملاحظة (بالنسبة لمكينة فك السيفون تلقونها في الصناعية القديمة في محلات قطع الغيار

[عبدالرحمن السالم]

والله ياجماعه مايبي له شى تغير الزيت وحتى السيفون ، لو تجيب لك طشت بالبيت او بالاستراحه او مزرعه او اى حفره وتغيره بنفسك ، تفك الصره وتخليه لين ينزل وتفك السيفون وتحط بداله وتربط عليه ،
والله اتمني لو الشباب إلى ماعنده شغل او عاطل ان يشوف له بنشري ويشتغل والله يكسب وعنده صندوق المئوية تدعمه

شاكر لك على هذا الموضوع

[mnahi]

ممكن تفيدونا وين المحل اللي يبيع الزيت وكم سعره بالرياض

[عبدالرحمن السالم]

ممكن تفيدونا وين المحل اللي يبيع الزيت وكم سعره بالرياض


شف إلى بالصناعية القديمة إلى عند محلات القزاز والكفرات وقطع الغيار به محلات للزيوت
بس قريب يعني ما ادري ، لكن شف خوينا إلى بحي الروابي شارع عبدالله بن أمية متفرع من شارع عبدالله بن عباس

[راعي الطلعات]

ماشاءالله تبارك الله عليه

الله يكثر من امثاله ويرزقه ويزيده

الف شكر لك

[درباس فرناس]

أنا أختلف عنكم كثيراً أشتري كرتون زيت من موزعي الزيوت بالصناعية القديمة أو من الغرابي بسعر خيالي وكل ما حل وقت تغيير الزيت والسيفون طلعت خارج النطاق العمراني للرياض ورفعت السيارة على صخرتين وفكيت الزيت والسيفون وغيرتها بنفسي في 10 دقائق وخل اللي يدفع لمثل هالنصابين يتحمل العواقب (سنن الصره مبوزه ولا مركب سنة السيفون غلط ولا مغير لك زيت الله أعلم عن مصدره
وعلى فكره بالنسبة لتنظيف الفلتر حق السيارة إذا رجعت للبيت إنفخه بمنفاخ الهواء اللي يستعملونه حقين معارض السيارات لإزالة الغبار من على السيارات .
لي حتى الآن أكثر من 5 سنوات أغير زيتي وسيفوني بنفسي وكرتوني معي بشنطة السيارة كل 4000كم أغير الزيت حتى وأنا ماسك خط
جربوها ما تخسرون .
ملاحظة (بالنسبة لمكينة فك السيفون تلقونها في الصناعية القديمة في محلات قطع الغيار

يا أخوي ترى طريقتك هذي تلويث للبيئة
كيف تفك صرة موتر السيارة والزيت ينتثر في الأرض
هذا افساد للأرض وقتل للنبات والحيوانات
لعلك تغير طريقتك هذي بأي طريقة تجمع فيها الزيت علما أن الزيت المكرر في ورش تغير الزيت هناك شركات تقوم بشرائه وتكريره للاستعمال مرة أخرى