المساعد الشخصي الرقمي

مشاهدة النسخة كاملة : الباث فاندر أو الجيب الربع نيسان !


محمد حمد
26/06/2005, 11:38 AM
السلام عليكم اعضاء مكشات
محتار بين سيارتين الباث فاندر ويقولون توجد فيه مشكله الحساس وهو عيب مصنعي ويتأثر بالرمال وترددت في شراءه ارجوا منكم افادتي بشكل اكبر للي مجربين السيارة من موديل2003 وطالع ومشاكلها الي تحدث غالبا ً
والربع النيسان ارجوا افادتي بمعلومات عنه ولكم جزيل الشكر والتقدير وجزاكم الله خير

ماجد الشمري
26/06/2005, 01:24 PM
والله كلها تشرب بنزين كثير ...
بس انصحك بالباثفايندر ... مشكلة الحساس نادرا تطلع وتجي للمركبين فلتر رياضي عادة ومعدلين بالسيارة ..
الباثفايندر اقل صرف بنزين واقوى واكثر شبابيةى ...





اخوكم ماجد الشمري

محمد حمد
27/06/2005, 10:00 AM
يعطيك العافيه اخوي ماجد ومعودنا على آرائك الحلوه الله لا يحرمنا منك
تحياتي لك اخوي ماجد ..........

نمر بن حثلين
27/06/2005, 11:22 AM
حسب استخدامك اخوي وشهو

انت راعي طلعات طويله للبر خذ باترول
او راعي طلعات خفيفه خذ باث

وللعلم مشكله الحساس تصيب كثير من الباثفايندرات ومهب مثل ما ذكر الاخ ماجد ما تجي الا اسيارات المعدله
انا سيارتي ماسويت فيها شي ومع ذلك خرب الحساس وبعد 4000 كيلو خرب منظم البخاخ !

محب الشمال
27/06/2005, 12:05 PM
اخوي هذا حسب طلعاتك اذا نت تطلع براري بعيده وتجلس بالايام عليكم بالباترول
واذا قصد بر عادي الباثفندر زين واوسع وزين للعائلة وللمشاوير يعني عام اكثر من الربع

راعي الفزعه
27/06/2005, 12:36 PM
عليك بالباترول هو ملك الصحراء بلا منازع
وقوي وله شعبية كبيرة بين الشباب
وصيانته متوفرة وسهلة .



وهذا رأيي في الموضوع ....

المنتفش
27/06/2005, 06:25 PM
بسم الله الرحمن الرحيم
السلام عليكم ورحمة الله وبركاته
خوي محمد حمد انت محتار بين السفاري والباث فايندر وكل الموترين حلوات لكن انت ماذكرت وش متطلباتك لكن انكنت عزوبي وراعي طلعات بعيده ومطاريش معروف ان السفاري اولى لكن ان كنت راعي طلعات يعني مهب مثل طلعات السفاري فالبليث فايندر اولى لان البايث فايندر ممتاز وقوي بالبر وكذلك ممتاز بالديره فضلا عن انه من افضل المواتر بالخطوط ...... ونصيحتي لك خذ بايث فايندر ....... واي معلومات تبيهن عنه انا حاضر خصوصا ان معي بايث فايندر ...... وحبيت انبه على احد الاخوة اللي يقول ان السفاري والباث فايندر كلهن يصرفن اقوله ان السفري البخاخ الجديد اقل صرف من اللي قبله لكن مااقدر اقول انه مايصرف,,,,,, اما البايث فايندر اذا كان تماتيك فهو يزيد صرفه بشكل كبير عن العادي علما ان العادي صرفه ممتاز جدا جدا وغير طبيعي ...... وبالنسبه لخراب حساس البخاخ تراه قليل ويكاد يكون منعدم ولا يشكلك مشكله لا نه ولله الحمد قليل مره.

pathfinder
27/06/2005, 08:12 PM
انا انصحك بالباثفايندر.......مع ان فيه مشكلة الحساس فعلا وخرب علي بعد ما كملت السياره 23 وغيروه على الضمان....واعرف 2 غيري صارت لهم نفس المشكله...

والباترول الربع يكون افضل لو ينزل بخاخ ......لكن مشكلته انه كربريتر وعزمه مب ذاك الزود ويرفع ضغطك شوي.......وفوق هذا كله صرفيته شينه.........لو ينزلونه 4800 كان صار شي ثاني

المخـــاوي
27/06/2005, 09:58 PM
يااخوان وش قصت الحساس الي يخرب في الباث فاندر ايت حساس تقصدون في السياره وبكم يصلحونه الوكاله وايذاً منظم البخاخ وش قصته انا معي باث فاندر ونيي نعرف قبل لا يخرب لا سمح الله .

ابوأنس
27/06/2005, 10:48 PM
من رايي اذا كنت راعي نفود لاتفكر بغير الربع (( تويوتا ))
واذا كنت راعي بر وديره خذ بافندر ولاتفكر بربع نيسان مب زين .................................................. ..........................

محمد حمد
29/06/2005, 01:40 PM
يعطيكم العافيه اخواني على الافاده الجمه التي حضينا بها وعلى تقبلكم للمشكلتي
اخوي المنتفش شكرا لك ولا يهونون اخواني الباقين
لكن انا دوامي في الصحراء وكان معي ددسن ومليت منه صراحه وابي موتر فيه دبل وافكر في الموترين الي ذكرت
وش تنصحني بأي موديل للباث 2003 - 2004 وارغب في العادي ليس فل كامل وهل المشكله تصير في الفل كامل او العادي المواصفات ؟ هل يتحمل المكده والبران والخطوط علما ً اننني مهمل شوي للسيارة وليس بدرجة كبيرة لاكن احيانا اطنش السيارة وما يهمني المطاب والخوض في مياه الشعبان !!!! يتحملني ولا وش رايك
وانا عزوبي ووقتي كله في البر
اخوي باث فاندر وش حل مشكلة الحساس يعني بعد الاصلاح هل تستمر المشكله او تنقطع ؟؟؟
وهل انت مرتاح مع السيارة فعلا ً ؟؟ ولاتحس انها مضيقة صدرك احيانا ً
تحياتي للجمع وارجوا انكم تتحملوني شوي

ابن الوادي
29/06/2005, 06:54 PM
عفوا اخوي / الباث فايندر حلو وممتاز وانيق بس انت مايصلح لك للأسباب التي انت ذكرت وهي
1- دوامك بالصحراء (( يبي يتفكك بأول شهر ))
2-انه لايتحمل المكده والبران بكثرة
3-انك مهمل شوي للسيارة
4- انك عزوبي ووقتك كله في البر
ونصيحتي لك انك تأخذ لك ربع نضيف تويوتا
ومعليش ردي متأخر
وسلامتكم

الباترول
30/06/2005, 07:59 AM
الأخ محمد السلام وبعد :
انا ممن جرب الباترول الربع والصراحه مافيه كلام من ناحية الراحه (اهم شي) خاصه اذا كنت راعي جلد وطرقه
الصرفيه مثله مثل الجيوب (كل الجيوب تصرف) خا صه اني عملت مقارنات
فيه عيب الضيق (وعلى شان كذا بعته) مع العلم انى عزوبي لكن اذا جاء احد يركب وراء اللي قدام لازم ينزل اذا جاء احدينزل مثل بس بعض الشباب شال المراتب الخلفيه وريح علي شان مايركب ولا ينزل احد
الربع التايوتا ما فيه كلام من ناحيةالقوه لكن الله من قولة انكسر ضهري (غير مريح)ويبين هذا في البر المسافات الطويله
اما الباث فهو والله جايز لي وانا مفكر اشري واحد لتوفرالراحه -الوساع (مقارنة باالربع)سياره للمدينة والبر والشي الأخير هو خفة الموتر

لطام سلطان
30/06/2005, 09:21 AM
السلام عليكم اخواني القناصين انصحكم اخواني اخذ الاحتياط اللازم على الاقليه وايت او سكس افضل اذا كنتو حمله تحياتي لطام

الراعي الرسمي
30/06/2005, 10:11 AM
نصيحه خذلك سلقه بخاخ متحسف ابد
ويذا كنت راعي دوران خذلك فندره :D

محمد حمد
30/06/2005, 09:25 PM
يعطيكم العافيه ياشباب ..... وهل السلقة البخاخ احسن من الربع التويوتا ؟؟؟ وايهم يصرف بنزين اكثر