vx-r ((VS)) vtc

[راعي القطا]

تعالوا ياأهل(( الفتك)) و((الفكسار)) اسمعوني زين سويت ابحاث كثيرة عن هالموترين اللي كلنا نعرفهم زين أبدا بــ:

_ _ _ _ _ _ _ _ _ _ _ _ _ _ _ _ _
(( VTC ))

مميزاته:
1) المكينة تحمل ست اسطوانت يعني V6 وعزمها 4500.

2) خفيف في النفود وعزمه يطربك :good2: والدبل مايغاله كلام :good:

3) ماينزل مع كثر التحميل والعفش عليه :no2:

4) الفتك رفيع ومايحتاج تركب يايات استرالية و.....إلخ



عيوبه:

1) سريع التفكك .

2) غالي القطع وغير متوفرة بعض القطع.

3) لاتتحمل كثر المشاوير والنتف:hot: وهو دايم 24ساعة عند الورشة.

4) وسعره يسقط بسعره يعني تشتريه غالي وتبيعه بثمن بخس.

5) مراتبه غير مريحة وتوجع الظهر على طول الخط.
_________________________________

((VX-R))

مزاياه:

1) قوي التحمل في البر .

2) يمسك سعره ولو يصير فيه اللي يصيرمن نتف وغيره.

3) مريح في الخط :good2: .

4) منظره اكشخ وأجمل ويحتوي على خطوط :good: .

5) القطع لاركبتها انساها.

عيوبه:

1) ثقيل في النفود وذلك لكبر حجم المكينه وتبلغV8

(2ويطلع له صوت عند التعشيق من نمره لــ نمره.

3) يطيح من الخلف عند تحميل العفش.

4) وقيمة القطع غاليه جدا.

_________________________


وأتمنى من الجميع المشاركة في زيادة على ماقلته أو نقده فـ(أنا) أتقبل النقد الهادف.

[راكب الشفر]

أخالفك الرأي
الفتك عند اخوي ومغير لاعن جدفه ومع ذلك ماهنا مشاكل
والنيسان تغير عن أول ويكفيك ان فيه دفرنس امامي وخلفي وهذي ميزة جداً مميزة

واما السعر فما يطيح طيح زي ما انت تتصور
يعني تشتريه فل قريب الـ140ألف 2006 الآن ينباع ب100 ألف
طبعاً هالسعر لما سعرنا موتر اخوي وهو ماشي 220ألف كيلو

[راعي النياسين]

والله ياغالي كل واحد ينوم على الجنب الي يريحه

لكن انا ابوجه لك كم سؤال

1- ليش حكمت على ان الفتك يطيح سعره ؟؟ لا يكون من كلام الناس !!

2- ليش حكمت ان الفتك مايتحمل كثر المشاوير ؟ هل هي من واقع تجربه ؟

[مدمن فتك]

اخالفك فيما يخص الفتك:
بالنسبة للمميزات :
فعزمه 4800 وليس 4500 كما ذكرت
مع كثرة التحميل ينزل وليس كما ذكرت انه لايحتاج الى يايات استراليه فانا مركب يايات لاينزل الموتر اما من لم يركب فالموتر ينزل ..
بالنسبة للعيوب:
فهو ليس سريع التفكك خصوصا من 2005 فما فوق
واما من غلاء قطعه فليست جميع القطع غاليه كما ذكرت والغالب متوفر..
اما انه لايتحمل الكرف والمشاوير فاسمحلي هذا يدل انك لاتعرف ماهو الفتك اصلا !!
ولو لاحظت ان الفتك عند اصحاب الطرد والمقانيص وكفى بذلك امتحاناً للسيارة..
اما انك تشتريه بسعر غالي وتبيعه برخيص فهذا غير صحيح ايضا بل الفتك وخصوصا من 2005 وفوق له شريحه عاليه من الزبائن فسعره ليس بالسهل كما ذكرت..
اما مايخص الفكسار:
منظره اكشخ فهذي تختلف باختلاف الناس ولاضابط لها والفتك يحتوي على خطوط مثل اللاند وليست خصوصية للاند..
اتمنى تزويدنا بالبحوث المذكوره وماهي اساسها والاسس المبنيه عليها وطرق بحثها ومستوى الباحثين وخبرتهم وهدفهم من البحث والنتيجة الموصلة للبحث لتعم الفائده ..
اما ماذكر من الاستفتاء فارى ان الفتك بالبر افضل والفكسار بالخط افضل

[N أبورغد N]

جبلي فتك 2008 رخيص تراي شراي
يارجال انا لي شهر وزود ادوج في الحراج والمعارض ماتشده رخيص الا ملعوب فيه
انا كنت مثلك مصدق هالكلام لكن الواقع غير
عموما لو خيرتني اكيد بختار الفتك لسبب بسيط ارخص بكثير الفل كامل تقريبا190 لكن الفكسار بكم؟

[حبل الوريد]

مقارنه ماهي يم سالفه مع احترامي لكاتب الموضوع

ويبدو انه لا يعرف الفتك من بعد 2005

[خيال العلياء]

ياراعي القطاء زعلت هل الفتك وانت كلمك صح من وجهة نظري تقبلو مروري

[خالد777]

من طلعة الباترول والتايوتا والعالم لم يتوصل لنتيجة المقارنة بين الباترول والتايوتا
المسألة سهله جدا هي اختلاف الأذواق و المميزات وعلى ما قال أخوي راعي النياسين كل ينام على الجمب اللي يريحه
والموضوع مافيه زعل أبد مجرد وجهات نظر وآراء نستفيد منها

[مطيعيس]

السلام عليكم ورحمة الله وبركاته:
http://mekshat.com/vb/showthread.php?t=281869

[مدمن فتك]

المشكله ان الخوض في هذه المقارنات يؤجج الاعضاء على بعضهم وينقل هدف المنتدى من تبادل خبرات الى تصفية حسابات واستفزازات نحن في غنى عنها...

[عاشق السيل]

(( VTC))

مميزاته:
1) المكينة تحمل ست اسطوانت يعني V6 وعزمها 4500.
المكينة 4800 !!
2) خفيف في النفود وعزمه يطربك :good2: والدبل مايغاله كلام :good:
كلام صحيح !!
3) ماينزل مع كثر التحميل والعفش عليه :no2:
ينزل لكن شي بسيط جدا !!
4) الفتك رفيع ومايحتاج تركب يايات استرالية و.....إلخ
كلام صحيح !!


عيوبه:

1) سريع التفكك .
من 98 إلى 2009 الباترول متماسك جدا وعن تجربة بجلد الموتر بكل الظروف !!
2) غالي القطع وغير متوفرة بعض القطع.
كلام صحيح بس مو كل القطع غالية !!
3) لاتتحمل كثر المشاوير والنتف:hot: وهو دايم 24ساعة عند الورشة.
هذي أعارضك فيها وبقووووووة !!
4) وسعره يسقط بسعره يعني تشتريه غالي وتبيعه بثمن بخس.
صحيح سعره ينزل بس مهب عاد بثمن بخس !!
5) مراتبه غير مريحة وتوجع الظهر على طول الخط.

ياساااااااااتر استر ،، النيسان أريح من التويوتا والفرق كبير وبشهادة الجميع !!!!!

_________________________________

الفي إكس آر ما أدري عنه لكن الثمانية سلندر قوي بالنفود ،،،،

[~ V T A C ~]

تم التصويت لكنق الصحاري

[طير شلوى نجد]

قطع غيار الفكس بالعكس سعره معقول وثقله بالنفود اشوف انه يشيل عمره وزياده انا معي واحد مابه منغاز الا مشيت به ان شفت عيب فيه الا سعره.

[أبوعمران]

خخخخخخخخخخخخخخ والله يا انت نتفت الفتك تنتيف مابقيت فيه شيء ..

ياخوك النيسان معروف من يوم طلع ومشكلة التفكك كانت في الموديلات القديمه من 89 الى 97 .. اما الموديلات الجديدة مافيها من هالكلام الي تقوله وانا جربت 2002 و2005 و2007 .. مافيه احسن منها ماشاء الله تبارك الله .. :)

وثانيا تقول 24 ساعه بالورشه والله وبالله اذا شريت باترول سنع وقسم بالله تنسى شيء اسمه ورشه .. تعرف شلون تنسى ؟

والباترول الكل يعشقه لقوته وتفوقه على الاند بالعزم وبالشكل .. ^_^


لك كل التحية .. واتمنا ياخوي اذا سويت مقارنه مره ثانيه انك تعدل بارك الله فيك

[راعي القطا]

راح اقول كم حاجة :

انا اخطيت كنت ابغى أكتب 4800ولكن كتبت 4500لأن فكري راح نحو الباترول وليس الفتك.

وأنا قصدي من ناحية التفكك للموديلات القديمة .

وكان عندي باترول 2007 ويوم بغيت أبيعه طاح من قيمته الكثير وسألت كم واحد معه باترول وقالي هذا كلام صحيح الباترول يطيح قيمته .

[خالدالقنص]

الفتك وبس .

[سالم11]

وين يطيح النيسان يا ابو 2003 مسيوم 77 الف ولا باع راعيه


والفكسار قطع غياره ممتازه والتويوتا عامه قطعه معقوله جدا مقارنه بالنيسان والامريكي

الفتك ما يتحمل النتق يا رجل حقين الطيور والهد والقنوص اكثرهم سفاريات

[غواص وقناص]

انا من وجهت نظري ما أفضل من اللاند الا الفتك ولا افضل من الفتك الا اللاند
والله يا ناس كلها مواتر الله يرزقنا الجنة بس

[راعي جيوب]

مع أحترامي لعشاق النيسان لو أنه على كلامكم أنه أحسن من الفكسار كان شفتوا التجار والشريطية يستوردونه من الخليج ومن أمريكا والدليل شف المعارض أكثر اللي يستورد من الخليج ما يجيب ألا تايوتا (وكل له رأية ورغبته)

[راعي القطا]

أرجو من رئيس الخيمة إقفال الموضوع لأنني لم أعلم أنه كان سوف يجعل الأعضاء تزداد بينهم المشاحنة واااااااااسف ماكان قصدي ولاتوقعت الموضوع راح يكون كذا

[- النشمي -]

بصراحه ظلمت الفتك ياخوي


اكثر سياره تحملت الجور والكرف مني هو الفتك

[ولد الغلباء]

التحمل والصبر والقوه في النفود الفكسار والفتك طيب بعد وله عشاقه والمثل يقول لولا اختلاف الاذواق لبارت السلع

[برق الحيا900]

كلها سيارات لكن النيسان اسعاره معقولةوالتويوتا فيه مهايط في السعر غالي

[سراب الوقت]

بالنسبه لي التويوتا زييييييييين لكن سعره غاااااااااااااالي

[Hwer]

اسمع الكلام الي يجمد على الشارب
لو انا بمكانك اختار لاند وانا مغمض ولايبيلها سؤال لعدة اسباب
اولا الباترول الفتك بينقطع انتاجه عام 2011 يعني بعد سنه ونص من الان يعني اذا طلعت جديد مايمدي تتهنا فيه الا منقطع واضف على ذلك ان الوكيل سيء بتوفير قطع الغيار اذا الفتك مازال يصنع ولايوجد له قطع غيار فمابالك اذا وقف انتاجه
واذا ماتصدق ادخل على قسم الصيانه بالمنتدي وشف بنفسك وفيه واحد مسكين ينقل سلف فتك على كتفه له اسبوع الاجاه ملع بكتفه يدور بين الوكاله والموردين يدور سلف
خذلك عطي الله الاند الدارج مع الناس ومتوفره قطع غياره بكل مكان ولافيه مشاكل كهرب ولامشاكل مسامير ثلاجه
يقول المثل الموت مع الجماعه رحمه

[fg2011]

راح اتكلم من واقع تجربه السفاري والفكسار
(كلهم قير عادي )
كان معي فكسار والحين سفاري

بصراحه الفكسار ياناس غير والله
بالبر وبالنفود يعني مابه مقارنه
مع السفاري السفاري حساس
وماتقدر تكرفه مثل الفكسار ابد
بصراحه ودي ابيع السفاري واشتري فكسار
وانا معي موديل 2008 ومتفكك وهو ماشي اقل من
خمسين الف
الفكسار كان ماشي اربع مية الف ولاتفكك مثله

[ابوطاقية]

هذا الرابط يوضحلك اكثر (http://mekshat.com/vb/showthread.php?t=317604)

[ساري الدياجي]

يازين الفتك زيناه

بس ارتفع سعره الماخوذ

[حطاب الرويضه]

الحق ينقال اللي مجرب الفتك واللي مجرب الفكسار هو اللي يحكم والغالب ان الفكسار هو افضل لعدة اسباب منها ان الماكينه 8سلندر وانه شيك ماينزل من قيمته الا القليل وتقبل مروري

[جب هآت ود عط]

معليش يا راعي الموضوع شكلك منزل الاستفتاء وانت ما تدري وشو الفتك, والفكسار موتر صح ما قلنا شي بس قلي وين يوقف الفكسار هالايام ..؟ ( قدآم القصر ) ولا (جوا البآيكه )واذا مشا ما تعدا اللزفلت للاسف الي ياخذونه الحين مغير مهايط فيه
بس الفتك .؟ لا تعليق اذا تبي تشوفه على الطبيعه خلك حول الشعبان هالايام ذي وأن شاء الله تقتنع

[ابن علوان]

الموضوع برمته غير منصف ومتحيز وماراح اسمي السيارتين ولكن العاقل بيعرف كلامي

اذا اردت ان تقارن فلا تقارن 6 سلندر مع 8 سلندر ومع ذلك تفوق ال6 سلندر وبجداره والبراري تشهد

يغش الانسان نفسه بشراء سياره هو يعلم ان الوكيل يقوم بتجميع العديد من قطعها داخل مقر الشركه في ورش الاكسسوارات ومع ذلك تلك القطع مغشوشة ومصنوعة في الصين وتايلاند وتايوان ومع هذا نجد السعر عالي جدا ونجد المهايطين يتفاخرون بشرائها واقتنائها

قطع الغيار التي تباع لدى الوكيل بعضها ليست الاصليه والدليل بالقياس على القطع الاستهلاكيه كاقمشة الفرامل مثلا وليس حصرا تجد ان اقمشة المصنع تتحمل ولا يتم تغييرها بسرعة ولكن اذا بدلتها فهي لاتخدم بقدر ماخدمت القماشات المركبه معها من المصنع

[ابونبيل]

لبا اللند يكفيك انه تيوتا

والفتك فيه حقه

بس لو انه يتحمل الي يتحمله التيوتا كان الد\وريات ما تركوه وخذو ربع تيوتا ولند تيوتا

ولو تلاحظ ان الدوريات الحين كامري..مو التيما ولا شي ثاني

النيسان له عشاقه ولاكن التيوتا افضل ..

الجيوب انواع والقلب يغدي..
.................واحسن الأنواع هو جيب الهدد

[بدر الشويلعي]

انا مع ال فكس ار

ولاني قايل ان النيسان شين اكون اخطيت

لاكن هيبه الاند كروزر وركاته تطغى على النيسان

[ساري 111]

فرق كبير بين السيارتين لصالح الفاكس ار ولافيه امل مقارنه بينهم ومقارنه الفكس ار بالفتك ظالمه

لامن ناحيه المتانه ولاالقوه ولاالمركب ولاالراحه والاالشكل ولاالرزه ولا الوجاهه ولا الجوده ولاقله الأعطال ولاالمشاكل ولاصرف البنزين كله لصالح الفكس ار


عيب الفكس ار قيمته وميزه الفتك سعره ارخص

اللي يطول الفكس ار لايتردد واللي مايطوله ياخذ فتك تراه يقضي اللزوم ومهب بطال

[ساري الدياجي]

يا أخوان تراها سيارات وكومة حديد .. صنعوها هالفنس اليابانيين بعقولهم وكفاحكهم.. وخلونا نتهاوش عليها (هذا أحسن وذاك أحسن).. مع أننا ما نقدر نصنع بوجي مازدا

[راعي النياسين]

فرق كبير بين السيارتين لصالح الفاكس ار ولافيه امل مقارنه بينهم ومقارنه الفكس ار بالفتك ظالمه

لامن ناحيه المتانه ولاالقوه ولاالمركب ولاالراحه والاالشكل ولاالرزه ولا الوجاهه ولا الجوده ولاقله الأعطال ولاالمشاكل ولاصرف البنزين كله لصالح الفكس ار


عيب الفكس ار قيمته وميزه الفتك سعره ارخص

اللي يطول الفكس ار لايتردد واللي مايطوله ياخذ فتك تراه يقضي اللزوم ومهب بطال

اجل الفتك مهوب بطااال :D ياحبي لك بس اقول ورى ماتجيب الفكسار ونعلمك وشهو الفتك ;)

وعدنا راس الطعس :D

الا اقول ولد عمتى توه شاري فكسار من اول طلعه لنا للبر انفقع واحد من المساعد

وبيبانه تصرصر مع ادنى بطناج الموتر موديله 2005 لو تركبه تسمع الاصوات الي فيه قلت هذا موديله 99 او 2000


بس حلوه الفتك مش بطال :D

[bader56]

السلام عليكم


طيب وبعدين والنهايه يا اخوان الفتك احسن من الفكس او الفكس احسن من الفتك


وش النتيجه الي راح توصلون لها والله لا نتيجه ولا فائده غير كلمات ما تنقال للاخوان


ولكن هل يعقل ان الانسان الصاحي والعاقل بيخذ بكلامكم لا والف لا الكل بيمدح سلعته


يا اخوان والكل ينام على الجنب الي يريحه ولا تدخلون في امور والله ان المنتدى اولا والاعضاء ثانيا في غنى عنها


كرما وليسى امرا اتركوا عنكم المواضيع الي تثير الشحنى والبغضى وتخلي بالنفوس ما يعلم به الا الله سبحانه وتعالى


وشكرا

[السليطين]

فرق كبير بين السيارتين لصالح الفاكس ار ولافيه امل مقارنه بينهم ومقارنه الفكس ار بالفتك ظالمه

لامن ناحيه المتانه ولاالقوه ولاالمركب ولاالراحه والاالشكل ولاالرزه ولا الوجاهه ولا الجوده ولاقله الأعطال ولاالمشاكل ولاصرف البنزين كله لصالح الفكس ار


عيب الفكس ار قيمته وميزه الفتك سعره ارخص

اللي يطول الفكس ار لايتردد واللي مايطوله ياخذ فتك تراه يقضي اللزوم ومهب بطال


2002 فتك ماشئ اكثر من 230000 كم وكله قنض ونفوود . والله العضيم انه اخو الجديد . ماشاء الله .

لكن لاتفتي للرجال وانت ماجربت .

[ستار سات]

الحقيقة إذا قريت مثل هالمواضيع . . أحس إني بحصة انتظار عند ثالث ابتدائي !! مع احترامي للجميع وفي مقدمتهم الإخوان اللي يشوفون الموضوع بعين المستهلك فقط . ودمتم في إخاء

[بدوي جنوبي]

السلام عليكم


تم اغلاق الموضوع
والسبب أقرأ الردود في هذا الموضوع
تحذير الرجاء الدخول لاهنتم (http://www.mekshat.com/vb/showthread.php?t=281869)
الكثير عارضنى على منع مواضيع المقارنه
والنتيجه كما ترونه من ردود في هذا الموضوع .


تعمدت ترك الموضوع فترة من الزمن
لأثبت لكم ان مثل هذه المواضيع تسبب الكثير من المشاكل وليست لها فائده كبيره


اللاند والفتك او الفتك واللاند كلها سيارات عريقه وقويه
غنيه عن التعريف لا تحتاج الى شهادة من احد .






القسم ملك للجميع اكتب فيه ما شئت واسئل عن ما تريد




دون اهمال الشروط المقرره بالقسم
نحاول نحن المشرفين اعطاء مجال اكبر للاعضاء لطرح
اى موضوع يتعلق بالسيارات مثل
التجهيز او الاصلاحات او الاستفسارات اوغيرها .


لكن تجاوزات بعض الاعضاء هدانا الله واياهم
اجبرتنا على منع مواضيع المقارنه خاصة






يالتوفيق للجميع



ملاحظه
تم اخفاء الردود المخالفه