تكفون ياهل المعرفة اول مرة اشتري سيارة زيرو

[محب طابة]

ياخوان ان شاء الله راح استلم سيارتي الجديد يوكون 2010 من جدة
لكن ياخوان مادري هل اشحنها للمنطقة الى اسكنها والتى تبعد عن جدة حوالي 1000 كيلو
او انا اخذها بنفسي وش الافضل واذا كان ترون اني اخذها ماهي النصائح التى يجب اتخذها
الله يجزى بالخير من يرد سلفاً

[aaasss]

الله يعطيك خيرها ويكفيك شرها ويبارك لك فيها
عادي خذ سيارتك بنفسك وتوكل على الله

[-الساري-]

أخوي :محب طابة
الله يعطيك خيرها ويكفيك شرها ويبارك لك فيها ، من الاحسن أنك تروح بنفسك تستلمها من المعرض أو الوكالة
وتشيك عليها بنفسك ، وتوكل على الله وتسافر عليها ، طبعاً تكون سرعتك على 80 ، وبعد 1000 تكون سرعتك
على 100 لين تخلص 1500 كم....
وإن شاء الله توصل بالسلامة ،،،

[ريان2002]

أولا الله يعطيك خيره ويكفيك شره
وما أزيد على السمن إلا عسل والأخوان ماقصروا الله يعطيهم العافيه
وأنا بدوري أقول إن كنت بتستلمها من الوكيل في ديرتك فأشحنها أريح لك وشبك عليها قبل الإستلام وإن كنت بتطلعها من الوكاله بجده وتشحنها على البسامي وتسافر بالطايره فلا والله سافر على سيارتك أفضل لأن مشاكل النقليات كثيره ومنها يعدم عليك أحد الصدامات أثناء التحميل والتنزيل أو الله لايقدر تطيح من الناقلة ونحو ذلك
صحيح بيصلحونها ولكن حرام سيارة جديده يصير فيها مثل كذا وكل شي بقضاء الله وقدره
فخذلك وأنا أخوك ثلاجة شاهي وخوي سنايدي ولا تزيد سرعتك عن الثمانين أو الميه وتوصل بالسلامه
ملاحظة البعض يقول السيارة ممرنه جاهزة وبأرد عليه وأقول الجربوكس + الدفرنس + العضلات بشكل عام باقي ماتمرنت بالنسبه لتشغيل المكيف ماأقدر أفتيك
أدري طولتها وهي قصيرة ولكن حتى أبري ذمتي وتشوف على وجهه السعد

[عاشق السيل]

ألففففففف مبروووووووك والله يطعمك من خيرها ويكفيك شرها ،،

أخوي ريان ماقصر الله يعطيه العافية ،، ومن ناحية النقل نصيحة لوجه الله ابعد عنهم تراهم بيخربون سيارتك !!

ومن ناحية السرعة عادي لو مشيت إلى مية وبعد ميتين كيلو ممكن توصل إلى 120 لأن الثمانية سلندر مايرتفع ضغطه إلا بعد الـ 160 ،،

وانتبه تحشر نفسك بالحر ،،،، شغل المكيف من الوكالة واستمتع بالطريق وماجاك أنا المسؤول !!!

رحلة موفقة محفوفة بحفظ الله ....

[مكشاتي كوكتيل]

الله يبارك لك في الموتر ويعطيك خيره ويكفيك شرّه .

فيه هنا في المنتدى رابطة ملاك الجمس وراح تلاقي فيه كثير من المعلومات المفيدة .


تمنياتي لك بالتوفيق .

[jeep2008]

الله يبارك لك , أهم شيء شيّك على السيارة قبل الاستلام ,
وانا لومكانك راح امشي عليها لين اوصل للبيت :)
وفقك الله

[محب طابة]

اسأل الله لنا ولكم التوفيق والسداد دنيا واخرة

اخي الكريم // jeep2008

وش الاشياء المهمة ( التى اشيك عليها ) والله ياخوان اني غشيم في السيارات

[ولد وايل..]

الف الف مبروك والله يطعمك من هيرها ويكفيك شرها...


شيك على البدي أهم شي...

وتأكد من ان الموتر أغراضه موجوده كامله...

إذا أعطاك ورقة توقيع السيارة تأكد من كل شي مؤشر عليه موجود وأقعد على راسه ولو قام يتفلسف لا تعطيه فرصه رح للمعرض وتفاهم معهم... ولا توقع...

وإذا أخذتها توكل على الله وتأكد من عيار الزيت وعب بنزين وشغل المكيف ولا عليك مشاكل...


وتوكل على الله...
بس انتبه من كذا نقطه...

لا تشغل المثبت..بتوصيه من الكتيب الخاص للسيارة..

لا تتحدد على سرعه وحده يعني من 80 الى 100 ارقى واأنزل...

أنتبه من أنك ترش تغبيره ع الموتر إذا كان فيه تغبيره الوكاله خلها والا لا تحط شي لأنك منت مسرع...

لأنوار يفضل ترش عليها رشه مانع الترميل ولا أمسح عليها مسحه رقيقه من شاموا عبايات ع شان ماترمل وهي جديده...

ولا تضرب فرامل قويه يعني بالتدريج...

الله يوفقك

[ابو العز بلس]

مبرووووووووووووووووووكـ


الله يعيطك من خيرها ويكفيك شرها

والعقبال لنا يارب

[كاشت وحداني]

الله يعطيك خيره ويكفيك شره
واجازة سعيده تقضونها في ربوع البلاد على المبروك
نصيحتي كانك وسيع بال
رح استلم موترك بنفسك وشيك عليه وعلى زيته واترسه بنزين
ثم اضبط ترمس الشاهي وان حصل واحد تعزه يخاويك ماهي بشينه .
ثم توكل على الله وانطلق
ووزع سرعاتك اول 200 كيلو خلك على 80 زودها شوي ونقصه شوي لا تعلق على 80 علشان ما يتعب القير .
عقب ال200 زود الى 120 وخذلك عليها مسافه 200 كيلوا تقريبا ونفس الشي لاتبقى ثابت عليها انزل الى 110 وارجع الى 120
واذا كملت ال 400 كيلو عطه اللي ربي يقدرك عليه وانتبه ربي يحفظك من مخاطر الطريق .

[مقلع الرمث]

مبروك مقدما والشباب افادوك

لكن اانا لا شريت سياره جديده

اطق المكيف

السرعه اللي ابي عادي امشي 140 160 مافيش مشاكل حتى بعد ااالاستخدام

وعلى ماسمعت ان السياره يعمل لها تدريب قبل البيع

بالتوفيق

[راكب الشفر]

ان كانك تبي نصيحة وراح تطلعها من الوكالة فخله يوصلها لين ديرتك
وش لك بالمشاوير والتعب
وترى 1000 كيلو مهب هينه ولا تضمن الطريق وخصوصاً ان كفرات الوكالة بالعادة ماتكون ممتازة مرات محجرة
ولاتبين إلا مع المشي
وان كانك لازم تسافر بها
فلاتعدي 120 علشان الجير والمساعدات وباقي الشغلات ما تمرنت
ولاتثبت السرعة على طول الطريق وتمسه مره وحده
زيد وانقص ووقف وارتح وهكذا

[اذاني]

الف مبروك

ولا حد يذبح نفسه بلحر شغل المكيف وتوكل علي الله

هاد الموتر لين يمشي 100 وبعدين حط رجلك .......

واعرف ان موترك جديد وليس موضب مكينه .......فيه فرق

والف مبروك والله يكفيك شر العين

[عبد الله 99]

الف مبروك اخوي تكسره بالعافيه

انصحك لوجه الله لو تمشي مشي و تشيل الموتر بيدك ولا تحطه عند النقليات

و انا مطلع يوكن للسواق اول ما تطلعه شغل المكيف ما عندك مشكله بس ما تتعدى قوت المروحه 4 و اول 100 ك لا تتعدى الميه و بعدها مس بالخط مسه وحده و ان شاء الله موب ضاره شي لاكن الضمان بيتعبك شوي من ناحية المراجعه ولا تضبط وضعك مع الفرع القريب من ديرتك

اكرر لا تلزم نفسك الخط كله بالــ80 اذا تعديت الثمانين امش على راحتك انت موب على راحت الموتر

طولت شوي تقبل مروري

[محب طابة]

اول مشاركة لي
لكن يعلم الله ان ردودكم اثلجت صدري
الله يبارك فيكم ويكتب لكم الاجر والمثوبة
ويبارك لكم في شعبان ويبلغكم رمضان وانتم في اتم صحة وعافية