بالربع ابنشدكم.....وش اعراض مرض ...........علي كبر

[خشم الحصان]

الاخوه الغالين
علي قلبي
الصقاره
السلام عليكم
اخواني انا ودي ابنشدكم ولكن مستحي وانتم ربعي وهلي
وش مارية او اعراض حب الصقور وخاصه علي كبر مثلي حيث اني احس او يجيلي اعراض مهيب طبعيه
عاد قلت مالي الا الاخوان الله يغفر لنا ولهم امين
عاد انتم الله يثيبكم وش تنصحوني به هو انا اتعوذ واروح يم واحد يقرا علي كود انه بعد الله يبعد عني هالفتنه
لي جت علي كبر
المهم علمونا وش الاعراض الله يثيبكم
اخوكم
خشم الحصان
....................
انا قايلك لا تكثر الروحه يم هالخيمه خلك بمشرقك ............بس ما طعت(ن)
ولا كل يوم عيالك هجوله في هالبر يدورونك ولا منسفي لك في احد هالدركيل
اقول تذكر المثل لي يقول(طار الغراب .........وحط علي الوكر غرنوق)

[ميراج]

السلام عليكم ورحمة الله وبركاته

حياالله ابو محمد اسفرة ونورت وش ذا الساعه المباركه

أعرض الولع بالصقور والصقاره تنقسم إلى قسمين

القسم الأول الصقاره بالأكتساب وهى انك تخاوى صقار محترف وتشوف الصقار وهو يدعى طيره ويصقره

ويهده على الحمام وقت التدريب علشان الياقه ويمكن انك تخاويه وتلقا انت وياه حبارى وتقصون الجره ويطالع

عليها الطير يعنى يشوفها قبلكم وتهدون الطير وبعدين يتجه إلى جهه غير اللى انتم تدورون فيها وبعد كيلو ونتم

تسوقون ورا الطير تشوفونها تكوبر قدامكم فى الحزم تبى تزبن لها شغيه ولا أمداها ثم يصيح الصقار اللى انت راكب

معه ابشر بها يا خشم الحصان ثم توقفون قدامها والطير ينش الحبارى ويعقرب وأنت تقول ارميها يا خويى وهو يقول

وش فيك انت مهبول ما تشوف الطير وتقول انت اخاف تروح وفى ها الحظه تطير الحبارى وهو يشهر وتخالفه

وتروح قدامكم طيار ثم تصيح انت انا قايل لك خل ارميها الطير يوم شافها طارت اطلب لها وانتم سقتو وراها ولحقها

الطير وقام يرددها فوق روسكم وانتم واقفين تفرجون يخمها ويخطيها ثم فى احد محاولاته يعلق الطير الحبارى

برقبتها ويجيك يتقلب هو وياها وراع الطير يقول مشاء الله مشاء الله وتحولون عند الطير وهوماسك الحبارى

وتحللون ها تحته وتنسرونه منها 0

إن كان فى الليل جك الأعراض التاليه فنت رحت فى عينها ومن بكره وانت فى السوق تفرج على الطيور

1 - ونت نايم فى الليل تزول لك جرت الحبارى

2 - تزولك وهى تكوبر

3 - تزولك والطير يرددها

4 - تصيح وانت نايم وتقول شفها شفها

5 - الصبح ترسم جرة الحبارى بصبعك وهى تحبرى

6 - تقول لخويك إذا طلعت الأسبوع الجاى لاتخلينى

7 - تعد ايام الأسبوع وتقول الأيام ما تمشى

هذى اعراض القسم الأول اللى تدل انك مولع فى الصقاره

القسم الثانى إلا تغديت علمتك به

تحياتى

القسم الثانى من اعراض الولع بالطيور هو الهوايه بالفطره

وهو انك من الصغر وانت إلى شفت صورة طير تشدك ولا عاد تقدر تغضى عنها

ودائم تحب الأسئله عن الصقور

وعندما يدور حديث الكبار عن الصقور تصغى وتنصت لمعرفة بعض الشىء عنها

وعندما كبرت وصرت شباب إذا شفت ونيت عليه شبه عليها طيور من غير شعور تتبع السياره من غير شعور وتخلى الجهه اللى انت رايح لمها

ودايم أحسن مكان تروح تمشى فيه سوق الطيور

هذه الأعراض إذا صاحبها شر طير معاد يفك الصقاره لين يموت

أظنك ياابو محمد من النوع الأول

تحياتى

[سرهيد1]

ههههههههههههههههههههههههههههههههههه الله يجزاك خير ياميراج والله أنك عطيته العلم وافي

والله أني استلقيت من الضحك على وصفك للاعراض 1و2و3 هههههههههههههه

أقضب العلم ياخشم الحصان ترى الطير غالي والحباري قليلة

[طيرحوران]

والله أن ميراج ماخلى شيء ياخشم الحصان .
لكن عطنا مواصفاتك ياخشم الحصان.
العمر
مقاسك
لونك
وزنك
علومك
وبعد هالمواصفات نعلمك هل أنت تصلح صقار ولا لاء وكانك تصلح قلنالك اركب وبس معنا كل شيء من طيور وزهاب وسيارات لا ونعطيك طير تستاهل .
بس أهم شيء المرحله الأخيره وشلون الشوف عندك كن الربع مامدحوك بالشوف.وكان الشوف الله أنه تكفى خلك عند عييلك ابركلك مغير نبي نبلش وين الطير وين الحبارى .
لا وكانك تبي تدعي وتنش على الملواح وفكو الطير ونت تصيح للطير وماتشوفه وهو مطلب للملواح ثمين خمك على أنك أنت الملواح إللي حولك كلهم تبي تلقاهم ماسكين بطونهم ومتسدحين .
المعذره ياخشم الحصان على بعض التعليق بسبب عدم معرفتي لك وأبشر بالحق .تحياتي

[ABO AKASH]

والله زمان العجايب ياخشم الحصان

هو أنت هالحين وش اللي يصلح فيك على شان تصير صقار

هذا اللي نشوفه ونعرفه عنك هنيا ولا انا ياخوك تراني ذمتي بريه منك مقدر أظلم حضي لين أشوفك على

الطبيعه -أمحق من طبيعه- هكالحين اقدر اقرر هو انت باقي فيك ربح ولا وليت :D


أولا - يقولون إنك شايب - وهذا خراب السفينه يعني الدقمه تحن ;)

ثنين- إنك كثير الحكحكه - وهذي طامة كبرى بتصير لقطة غليص على الصقور وتجفلها :j

ويمكن تعديها

ثلاث-إن أصابعك سبيره - وهذي بتسد عين الطير :D

اربع - حار بالحيل والطير يبيله واحدن بارد وصبور -وأنت يالله السلامه

خمس - كانك مثل اللي بالتوقيع عزالله رحات الصقور بيدها
لأن هذا عباره عن ( تولع متأخر ) يتسبب بجعل خلايا الأصابع تفرز مادة عرقيه أكثر من اللازم
وتصير سبيره
وخلايا الكراعين تفرز حشاريف جلديه تزيد الحكحكه
وخلايا العيون تسبب رمد وغمص يسد العيون ويسحب الشوف

وهذه يابو خشم الحصان ماتصلح عند الصقارين - لايبونك تخاويهم ولا تقربهم

ولكن يمكن إن ميراج صادز وإنك متحلم بالملحق ولا بالسطح

إلا لاتكون نايم بالسطح وشايف لك طير ترا نوم السطح يزيد في عمى الألوان :eek:

والزبده يابو خشم الحصان

لاتصدق ميراج وتوهق نفسك ولا تصدق نفسك وتوهق عمرك

خلك عند عييلك بالهحروره أزيلك

وهذا يثبت بأن لديك - تولع متأخر - لأنه مايولع إلا متأخر عن موسم الطيور

هذي نصيحتي وتشريحي لك ولشخصك الكريم

يعني خل الصقارها لأهلها وأنا أعتقد الطير من يوم يشوفك ينتحر وذمتي بريه :j

والسلام ختام

طبيب المقالب --abo akash kyal al aoja

[ريف النشاما]

السلام عليكم ورحمة الله

هلا بالغالي ابو محمد ويامرحبا

أخوي أنا قبل فتره جاني اللي جاك ودهاني مادهاك :D

وذهبت إلى محل الصقارين اريد أن اسوم وعلى الأرانب والرسوم نطير كالصقر أو العصفور

واكتشفت بأن هذا مجرد - حالات تسمى حلم اليقظه

وعلاج - رح للعطار وخذ صبره + حلتيته+ شوي يانسون + مع حبه كراع الذيب

وخلكهن على شوي عنزروت ونقعهن يالين يصبحن بطاسة معدن

همن الصبح صفهن وحطهن ببريق غراش لونه أخضر ولاهبته نار

وصبهن وأطبخهن على نار هاديه وقبل أن يغلي حط عليهن شوي سكر نبات

هم تقهوى عليهن ثلاث صباحات كل كاسه لحقها كسرة قرفه وان شاء الله ماتشوف إلا العافيه

وغن كانك مارقدت قبل كسرة الفيه ----تراك صقار ملبد يعني شف لك طير منا ولا منا

والله الله لاتمرح إلا بالربع الخالي ترا الصيد هاليومين واجد

وخلك من كلام الربع اللي فوق

:j

[ابو عايد]

السلام عليكم ورحمة الله وبركاته

هلا والله وغلا بابو محمد

مشرفنا ابو طارق .. عطاك العلم الوكاد

تقبل خالص تحياتي // العاشق الولهان

[صبر]

الله يهديكم

طقيتم على الرجال ما له ريغه


صراحتا ماعندكم حكمه في جذب الغير ترا بعض الرجال مثل الصقر لزم تسايسونه

ماهوب تطقون عليه


لكن ياخشم الحصان خلك من الصقاره وقتها راح مع أهلها هالحين مغير مفاخره والصيد مافيه

إلا كانك تبي تمسي بأفريقيا وتصبح بالصين وتمسي بروسيا وتصبح في بقعا

فأنا أقول توكل على الله وشف لك طير gx


شكرا لكم

[المري]

مرحبا ومسهلا بخشم الحصان..

تراك مكسب للصقاقير ان الله اطرحك في شبكتهم...

اخوي فيه شي واحد هو مارية ذلك .. وهــو اشياقك لشوف الطير في كل حزة .. حتى يصير حبه يعادل حب ورعانك..

هذا مالدي..

ِأخوك / المري

[وضاح الرقعي]

اخي خشم الحصان

الصيد ولعة لاتجارة ولا فود ... يدري مجرب واكثر الناس غادي


رغم كلام اخوني كله...صحيح ولع بس رائع .....ولكن ان كان بتجرب خذ طير هالسنة مع صقاقير وياللة جرب
ترى قليل اللي يصمل ...............

ابونوف