عيب كبير في تصميم الشاص 2007 ومافوق [الأرشيف]

أبو مشقاص

02/08/2010, 12:06 AM

السلام عليكم

كيف الحال طيبين

يأخوان في كل مرة و أنا امشي في الخط يتعدى من جنبي شاص 2007
الين يصير قدامي بالظبط و اشوفه كأنه مشتول او يمشي عن جنب
وأكثر من شاص من النوع الجديد من 2007 إلى 2010
لاكن موديل 2006 وأنت نازل مشاء الله مثل الساعه

شوفو وتأكدو.

الدوسري دت كم

02/08/2010, 12:14 AM

ياخوي ولامشتول ولاشي , مقاس الدفرنس الامامي اعرض من الخلفي عشان الثبات في المنعطفات ,,,
الي يشوف عنوان الموضوع يقول هذا احد الخبراء اليابانين . الله يهدي الجميع لمايحب ويرضى ,,,

ساري 111

02/08/2010, 12:19 AM

اجل عيب شفته قبل يشوفونه اللي صنعوه ؟؟

رح قلهم يمكن يعطونك جائزه على هالأكتشاف العبقري

يااخي الكريم مقاس الدفرنس الأمامي اعرض من الخلفي عشان يكون الموتر اكثر ثبات من الموديل السابق بالمنعطفات

مثله مثل الجمس مقاس 2500

أبو مشقاص

02/08/2010, 12:22 AM

انا مأقصد مقاس الدفرنس
أنا اقصد جسم السيارة بكبره مشتول يوم يمشي
يأخوان أتنو شوفو مارح تخسرون

ابو العز بلس

02/08/2010, 12:26 AM

وعليكم السلام ورحمة الله وبركاته

يمكن اللي تشوفها مصدومة ومتاثر الشاص حقها عشان كذا قلت او انك تشوفه في منعطف

أبو مشقاص

02/08/2010, 12:29 AM

لا يأخوي الي أشوفه في الخط السريع

3bdelm7sn

02/08/2010, 12:31 AM

انا معك اخوي لاحظتها في كم سيارة وعلى فكرة ترى كان عندنا هايلكس 2007 وكان مايل شاصه وطقاق مع الوكالة ولا بدلوه لنا والله بعناه بخسارة 20 الف ولا شافوة اللي صنعوة وعادي كل سيارة يجي فيها عيوب مصنع

ساري 111

02/08/2010, 01:45 AM

ولد وايل..

02/08/2010, 02:03 AM

كلامك صحيح ...

وأنا كذا مرة أشوف ها الشي وخااااصه في الشاص الإستاندر...

أخوي ساري ...كلامك صحيح لكن لا تأك على شي أنت ما ألممت عليه ...

أنا ملاحظ ها الشي ومرة كنت مع واحد من العيال له بالمعارض وسألته قال الظاهر إنه مصدوم ويوم قربنا منه الا البدي سليم وكذا مرة شفت كذا...ويكون من الجهة اليسار أوضح

ساري 111

02/08/2010, 02:08 AM

يااخوان انا ماااتكلم من فراغ اتكلم من تجربه

اللي يبي يتأكد من صحه كلامي وعنده شاص اويعرف احد عنده شاص يقوله يركب تبريزه للكفرات الخلفيه وتزوال هالمشكله اللي تشوفونه

وهذا دليل قطعي يثبت ان ان اصل المشكله اللي تشوفونه بسبب فرق المقاس بين الدفرنسات

ابو تمام

02/08/2010, 02:10 AM

كلام صحيح انا لاحظته في الشاص 2007

ذيب عالية نجد

02/08/2010, 02:10 AM

ياجماعه الخير المشكله اللي تشوفونه بالموتر بسبب عرض الدفرنس الامامي
والشي الثاني فيه رفرف خفيف طالع شوي وهو اللي يخلي الواحد يتوهم ان السياره تحذف شوي

دققو شوي وراح تعرفون صحه كلامي

دمتم
أخوي ساري من وين جبت لنا معلومة أن الدفرنس الأمامي أعرض من الخلفي
ثانيا من اللي قاللك أن عرض الدفرنس يساعد في الثبات اللي أعرفه أن اللي يساعد على الثبات هو عمود التوازن والمساعدات ونظام التعليق

نفود حائل

02/08/2010, 02:10 AM

نعم متفق معك تماما

ولتاكيد كلامك شف اثره بالنفود وراح تستغرب

بس تعريض الدفرنس الامامي له مميزات اهمها رساوه بالخطوط البرية

وعيبه ان الدفرنس يميل بعد اي مطب قاسي

ولد وايل..

02/08/2010, 02:18 AM

ياليت الموضوع ما يأخذ منحنى تعصب ولا محاباة لاي سيارة أو شركة...

المسألة ومافيها شي واضح ومتأكد بالعين المجرده يا بعدي....

أنا مهوب واحد ولا إثنين ويختلف واحد عن الثاني يعني يختلف دفرنس هذا عن هذا ؟

وليه ما يصير في أبو 11 ريشه ؟؟

وليه ما يصير في الفل اللي مرفرف ؟؟

غالبا ما تصير في الإستاندر...أقل نوع....

وياليت أحد حاس بها المشكلة ومجرب يفيدنا بقياساات للموتر...

أنس بن فهد

02/08/2010, 02:18 AM

عادي كل سيارة يجي فيها عيوب مصنع الرجال يقول كل الشواص الجديدة بهن نفس المشكلة .. يعني معقولة خظأ مصنعي بكل المديلات الجديدة :)

أخوي ساري ...كلامك صحيح لكن لا تأك على شي أنت ما ألممت عليه ... يا عزيزي .. المسألة ماتبي ألمام :)
إذا كان الدفرنس الأمامي أعرض من الخلفي معناته أنه بيكون الكفرات الامامية بارزات شوي لذلك عرضوا الرفارف الأمامية .. وبالتالي بيكون الرفرف الامامي بارز و الرفرف الخلفي مستقيم عدال الصندوق و هنا يتوهم اللي يشوف الموتر من خلف يحسبه مايل أو يحذف .

و أكبر دليل لو ركبا رفارف خلفية للشاص العادي اللي يجي بدون رفارف راح تبين لكم و بيستقيمن الرفارف الامامية مع الرفارف الخلفيه اللي حنا ركبناهن و يكونن مستقيمات مع بعض هنا يتبين أن الموتر مافيه مشكلة بتاتاً . :)

ساري 111

02/08/2010, 02:24 AM

أخوي ساري من وين جبت لنا معلومة أن الدفرنس الأمامي أعرض من الخلفي

الإجابة من الأخ الكريم نفود حايل

ولتاكيد كلامك شف اثره بالنفود وراح تستغرب

عموماً مهب اول سياره يجي بهالشكل الجمس الدفرنسين بموديلات التسعين يجي بهالشكل

وبعد موديل لـ 2000 صار الجمس مقاس 2500كله يجي بهذا الشكل سوا دفرنس او دفرنسين

ذيب عالية نجد

02/08/2010, 02:31 AM

الإجابة من الأخ الكريم نفود حايل

عموماً مهب اول سياره يجي بهالشكل الجمس الدفرنسين بموديلات التسعين يجي بهالشكل

وبعد موديل لـ 2000 صار الجمس مقاس 2500كله يجي بهذا الشكل سوا دفرنس او دفرنسين
ياأخي انا لا أعتمد على كلام الناس لكن أعتمد على الكلام المنطقي من خلال كاتلوج السيارة
أما بخصوص الجمس من موديل 91 وهو فليور للدبل ويختلف إختلاف كلي عن الدفرنس ولا تقارن ببعض من ناحية الصناعة والشكل

ساري 111

02/08/2010, 02:51 AM

ياأخي انا لا أعتمد على كلام الناس لكن أعتمد على الكلام المنطقي من خلال كاتلوج السيارة
أما بخصوص الجمس من موديل 91 وهو فليور للدبل ويختلف إختلاف كلي عن الدفرنس ولا تقارن ببعض من ناحية الصناعة والشكل

ياسبحان الله
طيب اذا هالكلام مهب مقنعك بأمكانك تاخذ شاص من أحد وتروح اقرب ميزان وتقوله طلع لي الفرق بين الدفرنس الخلفي والأمامي ويطلعه لك
او تختصر السالفه تروح لمحلات الكفرات بعضهم عندهم خلفيه عن الموضوع

وبالنسبه لفكره زياده عرض المحور الأمامي فهي لغرض زياده الرساوه سوا كان فليور او دفرنس

لو لاحظت في الجموس 1500 الكفرات الاماميه والخلفيه متساويه وهذا يرجع ان مستواه اقرب الى الأرض وتعليقه الخلفي ياي
اما الجمس 2500 يلاحظ بروز الكفرات الاماميه عشان ارتفاعه عن الأرض وتعليقه الخلفي سست فهو بحاجه الى شي يزيد من رساوته فطبفو هالفكره عليه والا وش حاجتهم يشوهون الشكل لو مااحتاجو له ؟؟؟

فياااااض

02/08/2010, 07:10 AM

لو تشوف الموتر من الجهه اليمنى راح تلاحظ انه يحذف يسار
ولو تشوف الموتر من الجهه اليسرا راح تشوف الموتر يحذف يمين وهذا اكبر دليل ان الدفرنس الامامي اعرض من الخلفي
والنتيجه انه لا يوجد خلل في الموتر
لانه لو فيه حذفه راح تكون من جهه وحده يعني مهب معقول انه يحذف ع الجهتين صح
ولو تلاحظون بعد من مديل 2006 وتحت انه نفس الشي لاكن بشكل خفيف غير ملحوظ الا للي يدقق
والله اعلم

الرياضي1111

02/08/2010, 07:24 AM

عطارد

02/08/2010, 08:33 AM

شف السوابر القديمه من موديل 94 الدفرنشين بتلاحظ نفس المشكله إذا مشيت وراه

كيبك كبك

02/08/2010, 08:51 AM

هو صحيح انه مشتول او مايل شاصي الموتر بس هو بسبب الدفرنس الامامي ليس عيب مصنعي

كذالك نفس الطريقه في الاندكروزر

ابوسفرجل

02/08/2010, 09:13 AM

انا فعلاً لاحضت الشيىء الي يقول عليه اخونا ابو مشقاص :eek:وكنت اعتقد ان السيارة نفسها سبق وصار عليها حادث وتحتاج لتعديل لشاص :(بس بعد ما شفت ردود الاخوان استفدت وعرفت وش المشكلة والحقيقة موضوع شيق وافادنا كثير ونشكر الاخوان للتوضيح :D

سوبر VTC

02/08/2010, 09:40 AM

كد جلست مع شيبان قبل 3سنين وكانوا يتناقشون حول هذه الملاحظة
ان الموتر كانه يشتل يجنح

عاشق الطرمبه

02/08/2010, 09:48 AM

كلامك صحيح ياصاحب الموضوووووووووع

السليطين

02/08/2010, 10:40 AM

ياخوي ولامشتول ولاشي , مقاس الدفرنس الامامي اعرض من الخلفي عشان الثبات في المنعطفات ,,,
الي يشوف عنوان الموضوع يقول هذا احد الخبراء اليابانين . الله يهدي الجميع لمايحب ويرضى ,,,

وهذا مهوب عيب !!!! الاعيب وشق جيب ... اجل عشان الثبات ؟؟؟ وراهم ماعرضوا الدفرنس الخلفي بعد .؟؟
والله لو ذا العيب بشركة ثانيه كان خلوه اكبر عيب ..

تبي الصدق ..... تويوتا من جفره لدحديره ...

ابويارا1001

02/08/2010, 11:11 AM

طيب خذ لك 2006

وخلك من العيب المصنعي اللي تقول عنه

او خذ 2007 وركب له دفرنس 2006

وتكون صلحت الخلل اللي تسبب فيه مصمم الشاص في طوكيو

شقران نجد

02/08/2010, 11:18 AM

حي الله الجميع ..وحي الله اخوي ابو مشقاص

اخوي انا جربت هالموديلات حوالي خمس سيارات ولله الحمد ما بين الفل والأستاندر على قولتهم سيارات روعه ولكن بالنسبه للشكل فهي ترجع للذوق العام ...

سافرت عليها رحت وجيت ما صدفت اي مشاكل منها الا المطامر فقط:d

ولكن ما يلاحظونه الناس ان مقاس الدفرنس الامامي اعرض من الخلفي وتكون الكفرات الأماميه بارزه ويفكرونه عيب وهو على العكس تماماً

تقبل تحياتي

هماليل سدير

02/08/2010, 11:33 AM

غير الدفرنس ...
كان لقب الجيب الشاص الى 2006 يقولون اذا شافو وجه الجيب وجه ذيب
اما الجديد وجه فيل !!!
ياناس وجهه كبير وقفاه صغير وهذا احد الأسباب ...

ساري 111

02/08/2010, 12:04 PM

وراهم ماعرضوا الدفرنس الخلفي بعد .؟؟

اولاً هم مااحطو هالتصميم الا بعد تجارب ولامهب خسرين شي لو عرضوا الدفرنس الخلفي او قللو عرض الدفرنس الامامي

لكن يبدو انهم طلعوا بنتايج افضل اذا كان الدفرنس الخلفي اقل عرض من الأمامي

الأمر الأخر كل مازاد عرض الدفرنس زادت احتماليه انطعاجه لو ضرب مطب والموتر عليه حمل كبير

فهم ضاربين اسواء الأحتمالات

مرووووق

02/08/2010, 12:31 PM

نعم تمت مشاهدة اكثر من مره وانا في البدايه احسب الموتر جايته ضربه بس تكرار المشهد في الطرق بيين ان هناك عيب

عبدالرحمن السالم

02/08/2010, 12:48 PM

صحيح ، حتى ملاحظ بالربوع فيها ميلان بسيط جداً
عكس المديلات القديمه ؟!
او مالاحظتو هذا الشى

باثفندر

02/08/2010, 12:55 PM

اذكر اول مانزلت الموديلات الجديده

لاحظت انه مشصي !!! انهبلت وقلت مو معقول

كنت على اليسار خففت وجاوزت من اليمين لاحظت انه صار مشصي من الجهه الثانية ،، تأكدت ان الدفرنش الامامي اكبر من الخلفي

ومافيه اي مشكله ،،

بس كثير يقولون ان الشاص الجديد فيه حذفه يمين شي بسيط
بس ما اظن لها اي علاقه بحجم الدفرنش ،،

بر الوالدين

02/08/2010, 12:56 PM

إجمع الجميع بإن لا يوجد شتله ولا ميلان

الواضح إنه فروقات بالطول على شان كذا يظهر مشتول

منفلوط

02/08/2010, 01:00 PM

كلام صحيح انا لاحظت هذا من زمان

بن سليمان

02/08/2010, 01:13 PM

الشاص والربع فيهم ميلان وكأن البدي ما طبقوه على الشاص صح
وايضا وين الثبات اللي في الشاص الثبات فيه معدوم وأول ما تترك الدركسون وما يمديك تمشي شي الا على طول يحذف

مواطن مدني

02/08/2010, 01:35 PM

الله يعطيكم اللعافية جميعاً

حيرتوني بالدفرنش الامامي انه اكبر من الخلفي مع اني ماميزت الفرق بينها
هذي كم صورة لشاص 2010 انا فاكه من الوكالة

بعطيكم الصور من الجنبين بس الموتر واقف : )

http://www.mekshat.com/pix/upload04/images173/mk41568_img_0985.jpg

http://www.mekshat.com/pix/upload04/images173/mk41568_img_0983.jpg

نجي للدفرنشات

هذا الامامي

http://www.mekshat.com/pix/upload04/images173/mk41568_img_1025.jpg

وهذا الخلفي

http://www.mekshat.com/pix/upload04/images173/mk41568_img_0990.jpg

وهذي مدري وش لزومها .. زيادة

http://www.mekshat.com/pix/upload04/images173/mk41568_img_0988.jpg

العيوب اللي لاحظتها من أول ماطلعت الموتر من الوكالة هي ملاحظتين

1- العزل خرابيط والله ياجماعة كأني فاتح الدريشه
2- الدركسون لاف يسار شوي اذا حاولت اعدله لف الموتر لجهة اليمين واذا خليته على حاله مافيه مشكلة بس يضل الدركسون مو مستقيم

اول سيرفس عند الوكالة عطيتهم الملاحظات وقلت صلحوها وقالو ابشر هههه
واستلمت الموتر مثل ماسلمته وماصلحو شي ابد ..
وهذ هو على حالته وكل ما سألت الشايب شلون الموتر
يقول ياسلام زين جعل يزين حالك : )
===============

طيب ياجماعة وش الملاحظات الطيبه اللي لاحظتها فيه
للامانه وما اكون مبالغ السيارة فيها راحة موبعيده من سيارات الصالون
وهالكلام يمكن مايصدقني إلا شخص معه شاص 2010
والله ماكنت متوقع يكون الشاص مريح إلا بعد ماجربته
ولأني خابر عندنا واحد موديل 2003 ديزل يالعنبو ذاك الموتر
11ريشه يكسر الظهر ...
وسلامتكم ..

مواطن مدني

02/08/2010, 01:44 PM

وين الثبات اللي في الشاص الثبات فيه معدوم وأول ما تترك الدركسون وما يمديك تمشي شي الا على طول يحذفمن ناحية الثبات ممتاز مع العلم ان الدركسون عندي مو مضبوط بس بالطريق موتر ماعلية كلام
ولايحذف ولا شي .. بعدين اخوي لاتترك الدركسون حتى لو كنت على مرسيدس !

_دربيل_999

02/08/2010, 01:52 PM

أخي الكريم,,
معظم السيارات الطويلة قليلا كالشاص والدينا وغيرها أثناء سيرها على الخطوط الطويلة تميل قليلا عندما يكون الهواء قوي من الجوانب..
فدفع الهواء أو قوة التيار يسوي إمالة للسيارة على أحد الجوانب وعند النظر اليها بتمعن تضن بأنها مشتولة وذلك بسبب الهواء الجانبي القوي..وعندنا ماشاء الله العجاج مستمر...

خالص تقديري لك..

الروقي

salehhd

02/08/2010, 02:12 PM

السلام عليكم

هذا رابط موقع تويوتا وفيه ابعاد الشاصي ومثل ماهو مكتوب ان المسافة بين الكفرين الاماميين اكبر منها في الخلفيين واعتقد هذا يوضع ان الدفرنش الامامي فعلاً اعرض من الخلفي

http://toyota.com.sa/specs.asp?model_id=18

ابوطاقية

02/08/2010, 08:49 PM

نعم اطوال الدفرناست تختلف مثل ماتفضل الاخ سارى وبعض الاخوان وهذي صور تبين الابعاد حسب الموديل

http://www.mekshat.com/pix/upload04/images174/mk32668_masse_hzj79_2001.jpg

http://www.mekshat.com/pix/upload04/images174/mk32668_hzj79_clearance.jpg

الخنفه

02/08/2010, 09:19 PM

أخوي ساري من وين جبت لنا معلومة أن الدفرنس الأمامي أعرض من الخلفي
ثانيا من اللي قاللك أن عرض الدفرنس يساعد في الثبات اللي أعرفه أن اللي يساعد على الثبات هو عمود التوازن والمساعدات ونظام التعليق

أرحم يامستشار اليابان أنت

كلام الاخ ساري 100% الدفرنس الامامي أعرض من الخلفي وبعدين وشدخل عمود التوازن بالثبات مع الخطوط ونضام التعليق من وين جايبه اصلا الشاص مافيه نضام تعليق .

ساري 111

03/08/2010, 09:03 AM

اخوي salehhd واخوي ابوطاقيه بيض الله وجهيكم

والمسأله مهب محتاجه شي يثبتها لانه شي ظاهر لصحاب الخبره والصنف في عالم السيارات

لكن بعض الناس العناد فيه مركب ولا له إلا اللي براسه .. هذا خله على جهله ومايحتاج تعلمه

بن سليمان

03/08/2010, 10:13 PM

فيه كثير من السيارات يكون فيها المحور الامامي أطول من الخلفي ولا شفنا البدي مايل عن الشاص مثل اللي حاصل بالجيب الشاص والربع

http://www.ukma.org.uk/images/car_citreon_c5_dimensions.gif
http://www.the-blueprints.com/blueprints-depot-restricted/cars/nissan/nissan_almera_tino-00701.jpg

http://www.motiontrends.com/2007/m12/vw/audi_a3_cabrio_dimensions_350.jpg
http://www.nissanclub.cz/graphics/owners/full/15477_1718_rozmery-1997nissanprimerab.gif
http://www.chevroletreviewsandprices.co.uk/chevrolet-captiva%20dimensions.gif
http://www.automobilesreview.com/gallery/toyota-auris/slides/toyota-auris-dimensions.jpg (http://www.automobilesreview.com/gallery/toyota-auris/toyota-auris-dimensions.jpg)

مواسي الطعوس

03/08/2010, 10:36 PM

الطول هو السبب ؟؟؟؟؟؟؟

** ايهم اطول الشاص والا الددسن والهايلكس الغمارتين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

أبو مشقاص

03/08/2010, 10:49 PM

طيب ليش مالحظناها من موديلات 2003 او 2002 أو 97

الجندي2005

04/08/2010, 12:21 AM

نشوف ونتأكد ،،،،،،،،،،،،،،،،،،،،،،،،،،،،،،،،،،،،،،

ابوطاقية

04/08/2010, 02:51 AM

اكيد مارايح يبين الفرق لان الابعاد قليله جدا
لاحظ الابعاد بالسيارات الي انت حاطها تحصل الفرق 10مم وهي شيء قليل جدا للملاحظه

فيه كثير من السيارات يكون فيها المحور الامامي أطول من الخلفي ولا شفنا البدي مايل عن الشاص مثل اللي حاصل بالجيب الشاص والربع

http://www.ukma.org.uk/images/car_citreon_c5_dimensions.gif
http://www.the-blueprints.com/blueprints-depot-restricted/cars/nissan/nissan_almera_tino-00701.jpg

http://www.motiontrends.com/2007/m12/vw/audi_a3_cabrio_dimensions_350.jpg
http://www.nissanclub.cz/graphics/owners/full/15477_1718_rozmery-1997nissanprimerab.gif
http://www.chevroletreviewsandprices.co.uk/chevrolet-captiva%20dimensions.gif
http://www.automobilesreview.com/gallery/toyota-auris/slides/toyota-auris-dimensions.jpg (http://www.automobilesreview.com/gallery/toyota-auris/toyota-auris-dimensions.jpg)

ماشفتها بالموديلات القديمه لان ابعاد الدفرنس الامامي عن الخلفي قليل
الدفرنس الخلفي 1420 مم والدفرنس الامامي 1435 الفرق 15 مم وهي قليله جدا
اما الموديلات من 2007 وفوق
الدفرنس الخلفي 1420 مم والامامي 1515 الفرق 95 مم وهي ملاحظه وواضحه

طيب ليش مالحظناها من موديلات 2003 او 2002 أو 97

ثورة الشك

04/08/2010, 03:13 AM

كلام صحيح انا لاحظت هذا من زمان حتى على الارباع

ابوصالح77

07/08/2010, 01:53 PM

كلام صحيح انا لاحظت هذا من زمان حتى على الارباع
أضم صوتي لصوتك لاحضته على بعض الشاص الستاندر والأرباع إذا ركب جنوط هلل.
وبعض السيارات يبرز دفرنسه مع جهه بسبب مطب قوي أو هوية قوية
فالأمر طبيعي ويصلح بسحب شوي وخلاص
كان معي موتر بارز دفرنسه مع جهة اليسار وديته لورشة متخصصة وسحبه بـ 150

الإخوان مفورين:f الله يدفع البلاء
الدعوى نقاش وتبادل الخبرات ووجهات النظر:D
وليس مبارزات وملاسنات .:mad:
الله لايجيب الزعل .:)

ماجد28

08/08/2010, 05:13 AM

لاحضتها ولاكن قلت يمكن مصدوم

عاشق الدهنا

08/08/2010, 08:39 AM

اخواني السالفه ومافيها ان الرفارف الاماميه بارزه عن الابواب والصندوق هذا اللي يخلينا نشوفه يجنح.
اخوي ساري كلامك صحيح 100%

عقربان البرق

08/08/2010, 02:23 PM

اولا انه اكيد عيب مصنعي من الوكالة وانا شفت كذا جيب يمشي عن جنب بس مدري اي موديل قلت يمكن مصدومه بس الان تاكدت انها فيها عيب مصنعي تكفون خربو سمعت عبداللطيف مشكورين

بيكال فيبر

08/08/2010, 02:27 PM

كلامك صحيح اخوي وهذي بعد في الفورتشنر 2009 و2010

أبو مشقاص

08/08/2010, 11:11 PM

طيب أنا الي أشوفه ان الشاص يشتل على اليسار وأما اليمين عادي

المنيعي1

09/08/2010, 02:12 AM

يا ابو مشقاص أذا تبي تتأكد 100% انه طبيعي مثل ماتشوفه مايل من جهة اليمين حاول تقرب منه وهو يمشي وشوفه من جهة اليسار تلقاه نفس الشي مايل لليسار يعني النتيجه النهائية ان وجه الشاص والربع الجديد ودفرنسه أعرض من خلفيته.

لكن المشكله ماهي هذي المشكله اني اكثر من مرة لاحظة على الـ gx-r الـ 2008 ونا ماشي بلخط تجاوزني وكان فيه ارتجاج خلفيت الموتر غير طبيعية يرتج من اليمين الى اليسار وكان قائد الموتر شاب قلت يمكن يلعب في الموتر بس بعد كم يوم تجاوزني نفس الموديل وكان رجل كبير ومعه عائلة وكذلك نفس الأهتزاز يعني عادتاً الموتر اذا ضرب مطب خفيف يهتز من الأسفل الى الأعلى ولكن هذا يهتز من اليمين الى اليسار وأهتزاز غير طبيعي كأنه حركه مقصوده من السائق . فهل لاحظتو هذا ام لا؟

فهد الميهوبي

09/08/2010, 06:07 AM

ياااااااااااااا زين سيارات اوول اكسبوهااا الشيييييييييييبان ولا حنااا اكلناا هواااااا بكل شي
الله المستعااان

ماجد القرشي

09/08/2010, 06:17 PM

مستحيل يكون عيب لسبب واحد لأنه في أكثر من موديل
وما سوو الشيء هذا إلا له ميزة وما يعرف الفرق إلا شخص تمرس على قيادة موديلين مختلفين

سفاري959

09/08/2010, 10:18 PM

انا اتفق مع الاخ ساري وباقي الشباب ان الدفرنس الامامي اعرض بس فيه عيب يا جماعه المفروض اذا الدفرنس الامامي اعرض من المفترض يكون التنفيخ في البدي من الخلف عشان يكون الموتر متساوي اذا صار يمشي قدامك مجرد ملاحظه قد اكون اصبت وقد اكون مخطي تقبلوا تحياتي

سراب الوقت

09/08/2010, 10:26 PM

صااااااااااااااااااااااااااااااادق والله

ومره اعلم واحد من الشباب ويقول مستحيل

لكن واضح انه يمشي على جنب

kellahd

09/08/2010, 10:55 PM

اختلاف النظر هي السبب

كل الشباب متفقين ان الذي صنع الشاص جعل مقاسات الدفرنس الامامي و البدي اعرض من الخلفي
و لهذا السبب حدثت الشتلة التي لا يرضاها كل صاحب شاص لشاصه

نخلص من هذا النقاش ان العيب مصنعي بجعلهم الدفرنس الامامي اعرض من الخلفي فبهذا اي مطب كبير في البر يعرض الموتر للانحراف
و خاصة ان الامامي ياي و ثبات الياي مع الشاصيه غير قوي بخلاف السست فتحملها قوي

و نظرية ميكانيكية غفلوا عنها ان الفرق الكبير بين مقاسات المحورين الامامي و الخلفي تجعل السيارة حساسة في التوازن فبمجرد انحراف بسيط تتغير جلسة السيارة

وفقكم الله

نقاش رائع و مفيد

عشق الريادة

12/08/2010, 12:09 AM

السيارة لامايلة مدري شاتلة ولا شيء
والدليل ان تجي من وراء ويمين السيارة تلقاه كان به ميول على اليمين
بالمقابل امش ورا الشاص او حتى الربع من وراء يسار
تجدها تمشي مايلة على اليسار
=======
واللي يقول عيب مصنعي :
الامريكان كم لهم يصنعون الجمس قطع 25 دفرنسين
من ايام 93 و94 وهو به شتلة على قولة صاحبنا العبقري
الله يديم هالذهانة
كان الموضوع شيق الى حد اني تحمست على موضوع احس انه مضيعة وقت

وتشكراتي للجميع

kellahd

13/08/2010, 10:51 AM

آسف البعض يراها ميزة
اما اذا جيت للرمال ما اتوقع تقول انها ميزة لآن الكفر الخلفي يستفيد من رص الكفر الامامي للرمل

و خاصة الرباض (( الرمل جديد التراكم ))

و كذلك في الطرق الصحراوية حيث ان السير في مسار السيارة السابقة يخفف السير بالسيارة
و عند محاولة تحميل الكفر الى احدى جانبي الحفرة الناتجة من اثر السير السابق تجد السيارة تتحمل و تثقل

فكل كفر من الامام و الخلف يسير في مسار لوحده مقداره 5 سنتمتر

اما بالنسبة للرساوة التي تحصل بسبب عرض الدفرنس الامامي فهي خاصة بالاسفلت

AUDIO

13/08/2010, 01:24 PM

السلام عليكم /

انا اقول انه ليش الشاص عند وضع الدفرنس اعرض من الخلفي من اجل الثبات فرطو في وضعية شكل السياره في السير وكأنها تجنح وشكلها مزري وهي امامك كأنها ساقطه من جبل هذه الظاهره لم نراها في السيارات الأخرى كالأمريكي ولألماني وغيره , معقوله, مع انها اشد ثباتاً من الشاص ومع انه قد عدل في الدفرنس (اعرض من السابق) هل هذا هو الحل برأيكم من اجل ثبات السياره هل تقطعت السبل .

ودمتم سالمين .

عبرود طويق

13/08/2010, 08:27 PM

يا اخوان لا نطلع عن أدبيات الحوار والنقاش...................وتقبلوا تحياتي............

وبنجلد هالمواتر الين ناخذ حقنا من البر .... وسلامتكم.............

فهد الخليفة

06/04/2012, 01:39 PM

ياعمي السياره كلها على بعضها من اسخف مايكون قسم بالله ما اتشريها لو على رقبتي
وانا شايفها بعيني شاص جديد بقراطيس الوكاله توه طالع من ابو جميل ومايل
وهذا عيب مصنعي في شركة الام والظاهر ابو جميل تبرع كالعاده انه ياخذ السيارات المعطوبه من الشركه ب ارخص الاسعار
ويجيبها هنا عشان يلعب على الدقون وهذا الي حصل بعدين من الي قال ان الدفرنس يسبب رساوه وكلام فاضي من الي جايب هالمعلومه ولاعب عليكم فيها وحتى لو كان كبير وش دخل ابو الدفرنس في ميلان الشاص كله

الزبده و بـ اختصار ابو جميل لعب عليكم العاده يا سعاده ههههههههههه
والله اني ارحم كل من يشتري سيارات تويوتا سلم لي على الشفرررر وسلم على الدودج يالبيييه
طرب + راحه + رساوه + ثبات + منظر + قوهـ + هيبه تخشاها جميع السيارات

مجنون عسل

06/04/2012, 03:01 PM

هذا سلمك الله اثناء تركيبه هنا عندنا ما يربط البدي با اتزان ولاكن شوف الفرق بينه وبين البريمي وراح تلاحظ الفرق باذن الله
وكذا واحد حصلت له نفس المشكه وطلع الكلام اللي سطرته لك في الاعلى وشكرا

waleed.m.f

06/04/2012, 03:40 PM

كلامك صحيح وانا اخوك وحتى لو كان المقصد منه الثبات وش هالثبات الي يخلي الموتر مايل الا هذا غباء مو ثبات

تميم2222

07/04/2012, 11:50 AM

من خبرت الشاص وهو مايل صندوقه عن غمارته هو من اسمه شاص لتحميل وكذا يعني لا تدقق العيب المستحدث في الشاص الجديد وحسب ما قرات عنه بالمنتديات ... هو مكره المكينه .. تهرب زيت ؟؟...

albdawh

07/04/2012, 09:34 PM

انا معك اخوي ابو مشقاص وترى حتى الجيب الربع ومن جهت نظري ولاهانو الاخوان أتوقع أنه من تكملة الرفرالامامي وبروز زوايا الغمارة من عن الحوض . لن في السابق كنا ننظر للجيب النيسان الشاص على شكلة ان الدفرنس الامامي اعرض وتقول مشتول وعند ظهور الجيب 2007 ليا منك صرت متقفية تقول مسنتر .

قناص2000

07/04/2012, 10:28 PM

شيء غريب انا شفت هذي الملاحظه بس احس انها مقصوده من الشركة اللي بدت تخربط بالمنتجات المصدرة لنا وحنا (يله وين لكيت يله شريت) هذا شعار الشباب الان للاسف .
يوجد ميلان او انها خذف بسبطة او وجود الرفرف او كبر الدفرنس كلها اسباب .اللي متضرر يوقف على اقرب ورشة وشيك سيارته .
لكن يجي عضو من الاعضاء؟ يتهزء بالاخر(اللي يشوف الموضوع بانه احد الخبراء اليابانيون- والا رح علمهم عشان تاخذ جائزة- الاخر.....) قمت التريقه . ياخي اذا ماعندك علم خل غيرك يوضح له ما شافه من ملاحظه وخلو عنكم الامور التافهه ذي .المنتدى ما انحط اللى للمعرفه وحل الاشكاليات بين الشباب في قل الامور . ان قل خيرا والا فاصمت .
وتقبل مروري اخي العضو ابو مشقاص.

كعمور

07/04/2012, 11:57 PM

الاخ سارى اشوفك معصب كان اللى صنعة انت
شكل معاك جيب شاص وماتبي احد يعرف ذا العيب
فعلا كلام الرجل صحيح 100%

sgl2002

08/04/2012, 01:33 AM

الشاصات الجديدة كلها كذا والسبب الرفارف حقت القديم مغطيه العيب
ولو تفك رفارف القديم بتشوفه زيه

الأسير

08/04/2012, 02:35 PM