نصيحه للقوانيص 0

[هاوي مقناص]

السلام عليكم

يالربع ابي انصحكم ، للمقناص الجاي ان شاء الله ، اللى بي يقنص منكم ،لازم معه خوي ،لاني انابمقناص العام،قنصت لوحدي ، وصارلى موقف ،مهو بهين ،طال عمركم ،طيرتلى نقل (باشق) ويومنه ارتفع ، الا وهذاك الصوت اللى يحبه قلبكم ، شيهانه (بشه)اصغر من الباشق ، ويومنه اضربت النقل على طول تعلقتبه،ويوم حركت موتري ابروح للصيده ،وانا فرحان ،ويافرحة ماتمت،جونى اربع شباب على ددسن طايرين
الله يهديهم ،والا واحد منهم طلع الشوزن ورمي الصيده ،وجيت ابلحقهم ،الاوراعي غنم،يناديني ،شايب اطال الله بعمره وبعمركم ،اللهم امين ،وقالى ،ياوليدي ،ترا اللى بالددسن (سكاري )وشلون مامعك خوي ،ولا سلاح ،تحميبه نفسك ،وقلتله ،تري الدنيا الحمد لله بخير ،قالى انا معك ياوليدي ، باللى قلته،بس بالمقناص خذ
حذرك 0

ودمتم غانمين سالمين

اخوكم هاوي مقناص 0

[مكشات]

وعليكم السلام أخوي هاوي مقناص
قريت قصتك وضاق صدري ، لكن إن شاء الله إن الله يعوضك بحر يحبه قلبك .
خير ماسويت يوم سمعت نصيحة هالشايب وماطردت وراهم ، والحمد لله على السلامة .
لأنه وانا اخوك ماتدري وش يصير ، يمكن يتهور واحد منهم ويسوي مصيبة أعظم .
.....
ومسابق الناس على الصيد او القنص زاد عن حده بهالسنين التالية ، كثروا الشباب والسيارات بوجود هالأجهزة الحديثة ، ودخلوا على هالهواية عرض قبل مايتعلمون الأدب والأخلاق، وقبل مايصيرون رجال .
.....
وانا صار لي أكثر من قصة بالصيد ، ويعلم الله إني تركت لهم الأرض يوم شفت الدعوى مسابق .
وحده منهن :
وقفت عند شجرة أبرمي على قميرية ، وشافني راعي ددسن وانا واقف وصار ينتظر ، أنا قلت هالرجال كله أخلاق مايحب يطيرها علي ، ويوم رميتها وطاحت على بعد 30 متر تقريبا ، وقبل ما احرك أجيبها ويحرك قبلي ويرميها وهي ميتة على الأرض وينزل وياخذها ويمشي ولا كأني موجود :D
جلست أضحك وانا مقهور :mad:
والمرة الثانية :
كنت بطرف شعيب وشفت لي 4 صفار بطلحة ، ورحت لهن أبرمي عليهن ، وكان فيه واحد وراي يمكن بـ 100 متر . ويمشي شوي شوي .
المهم رميت عليهن من مسافة بعيدة ، وطارن للشجرة الأخيرة ، حركت وراهن ، ومادريت الا ذاك الرجال يدوس على موتره ويسبقني عليهن ، ولأن نيته ماهيب زينة طار الصفار وتركه قبل مايرميهن .
....
يوم شفت الدعوى مسابق وانا أخلي لهم الشعيب وامشي :D

[السرحان]

والله قصه حزينه ومؤثره وأهم شيء أنك ما كملت وراهم لانه سوف تكون العواقب وخيمه حتما خصوصا أنك أنت أدرى مني بمن رأيت وكيف كانوا...... وزد على ذلك سكرى والعياذ بالله
وللاسف أصبحوا هؤلاء مثل المافيه وتجدهم في كل محل وما يردهم ألا الكثره والعدد أما اذا شافوك لحالك عزى الله أنك اذا نفذت بجلدك فأنت سالم.....
أخوانــــــــــي هوايتنا هوايه متعه اذا لنجعلها ممتعه بحق بدل من البهدله والخوف والرجى فالصحبه الصحبه والركاده واخذ الامور بالهينه والذكر والصلاه يازينه الوناسه أذا جت على أصولها ويازين الدنيا مع الدين والموضوع تراه متكامل ماهو مقناص بحت والله ان الواحد يشوف الصيده ساعات ويتركها لامر ما ! فالطلعه والشباب والقرب والاجهزه والتجهيز والترخيص ان وجد تراه زين بالحيل وقبل هذا رضى الوالدين والمعزبه مو مثل بعض الشباب الله يهديهم ما يهمه ألا نفسه ما ان يسمع بالنزل راح وما درى عن هله وعياله وهتك دقاق جوال عليه وعليهم ّ!!! وكان الطير بطير ..... ما هكذا تورد الابل أبدا اذا ما زينة كل شيء العمل ترخص منه والاهل جدعتهم بيت أهلهم وسلمت على الوالد والوالده الله يطول بعمرهم ودعولك ....يا سلام
والله يا شباب رحنه وجينه كثير. وروحات نكون مقصرين فيها مع من ذكر والله الواحد ما ينبسط لو انه أيش ما صاد ! واذا طلع وزبط كل شيء لو ما يصيد ينشرح صدره وينبسط وأظنكم كلكم مجربين هالشيء على العموم طولة عليكم والظاهر اني طلعت عن الموضوع لكن الشيء بالشيء يذكر وآسف على الاطاله
وحتى موعد لقائنا ....... لكم مني تحيه عطره

[القرناس المهاجر]

السلام عليكم ورحمة الله وبركاته

اخوي هاوي مقناص 000 احسنت صنعا 00 وماخــاب من اسـتشـار !!!

000 لن ازيد على ماقاله معلمنا الفهيـم 00 ابو ياسر ...... وكـذلك اخي الســـــرحان

000 ولكن مهما وعض الواعضون 00 فلن يتعض المغـفـلون ............. وصدق الشـاعر حين قال......

لقـد اسـمعت لو ناديت حــياً ............... ولكن لاحــــــــــيات لمن تنــادي

شكرا اخوي هاوي مقناص على هالمشـاركة الجميلة ..................

وشكرا لتفاعل الجميع........... اخوكم القرناس المهــاجر

[الشيخ]

مساكم الله بالخير
والله يا الربع هوايتنا هواية بهذلة وتعب وشقا بس المهم الواحد يطلع موسع صدره
صاد ولا ما صاد هو مستانس من طلعته للبر بس مرات الواحد يشوف اشكال اللهم يا كافي
يسدونها بوجهك وين ماتروح تبي تتعوذ من ابليس وتصد عنهم تلقاهم بوجهك طبعا مر علي الكثير من هالمواقف
لكن اسعموا هالموقف الي ابد ما انساه وهو وان كان الشباب يذكرون الموسم بالكويت باول الربيع الماضي
وبعيد الاضحى بالتحديد كثرت علينا الطيور الصغيرة بشكل عجيب لدرجة لا غابت الشمس ادوسهن بالسيارة
من كثرهن وجا نا واحد الصبح يرميهن عند خيمتنا لين طب ذاك الطير عسا الله لا يرده على راس الخيمة
وقم يا المقرود وارمه ويوم حس بالغلط نحش وابد الله ما يهمل الظالم وطاح بحفرة (لان البر الي حنا فيه
كانت توها خالصه مناورات الجيش فيه وما دفنوا الخنادق ) وتعلق جيبه لي ثاني يوم العصر جوه ربعه وطلعوه

يعني هذا وش اسوي فيه اذبحه؟؟
يرمي الطير فوق راس الخيمة وحنا فيها ويشوفنا والدنيا الضحى وسياراتنا حول الخيمة ويشوفنا ندخل ونطلع
ويرميه فوقنا يعني الواحد منا لا ظرب درب بعيد ومنطقة مقطوعة ماحد يلومه من البلاوي الي يشوفها
من هالناس الله يكافيكم شرهم

[عمود الحره]

اليوم وانا أخوك الواحد لازم ياخذ خذره السلاح مثل الماء والخوي مثل الهواء اليوم صارت الناس للاسف تقنص بعضها لكن طولة البال زينه اسمع هالقصه...... مره جالسين في مخيمنا في وقت مقناص الطيور بارض الحماد نتعلل والله شفنا ضو سياره جايه من بعيد وتوقعنا انه جاي علينا زينا الشاي والقهوه ايبله ومثلك عارف جانا الرجال ومعه ولد ن له وفنجال وعلوم رجال قال الشايب ترى عندنا طير ونيكم تعاونونا عليه الصبح قلنا خير الله يرزق الجميع قنصنا الصبح كل في اتجاه والله انا وخويي ما لقينا شي رجعنا للخيام وجا السليب ووالده هااه وش الا خبار قال والله لقيناه ويوم طردنا خطم قدامنا راع ددسن وتسفل الطير لما قلعه قلت والله ما تطرحه وبالفعل راح الطير الشاهد في القصه ان الولد راد يطرد راع الد د سن وقال ورفض الشايب وقال يا وليدي انا لهد يت فعلت اما انا ما اهوش هوش حريم ليه سويت وليه فعلت هذا وسلا متك والحمد لله على السلامه مره ثانيه ياستاد انا بوادي وشرحك بوادي والله لو تكتب دروسك على اللوح انا يتخيلي عريض الثنا دي اشقر طويل عاتقه تو مطروح اتعب طواريح الشمال العتادي توافقوا عنده ثلا ثين طاروح