ربع التويوتا ولا ربع النيسان !

[محمد حمد]

السلام عليكم .. ابي رايكم ياشباب بين السيارتين والي مجربهم وخاصة من ناحية صرفية البنزين وهل الربع التويوتا فعلاَ يكسر الظهر وتحس بمعاناة القيادة ؟؟ وايهم افضل التويوتا الربع ولا نيسان الربع ...................... تحياتي للجميع وارجوا الافاده وجزاكم الله خير

[هاااوي الضبان]

وعليكم السلام ورحمه الله وبركاته

انا اشوف ان ربع التويوتا افضل لخدمته المعروفه
واكبر دليل تشوفه مع الدوريات والشرطه

والله يوفقك للخير

[ماجد الشمري]

اخوي محمد حمد ...
ما اعرف وش اقول لك لكن بأعطيك العيوب والمميزات ....
ربع النيسان مريح جدا بالنسبة للتويوتا ومواصفاته اعلى وسعره كمستعمل ارخص وقطع غيار اغلى ....وعيبه ان مكينته 4.5 كلبريتر وضعيفة ويصرف بنزين بشكل موب طبيعي ...وفي الامان افضل بكثير من التويوتا ..
التويوتا شكله الخارجي احلى ومن الداخل سئ جدا ومستوى الامان سئ جدا وكذلك الراحة ... ميزته انه قوي ولكن كذلك محركه يستهلك البنزين بشراهه ووزنه ثقيل وقطع غياره رخيص ويمسك سعره زين .....

لك الخيار وان كنت انا مكانك لايمكن اشتري اي وحدة منهم لأنها بنظري بعيده عن الكمال ...






اخوكم ماجد الشمري

[أبو الكيف]

الربع النيسان مكينته 4500بخاخ و ليست كلبريتر وهذا التغير من مديل 2004

[alro3h.comشنب]

وعليكم السلام

كفوووووووووو ابو شنب مايصرف بنزين
النيسان يشفط بنزين لانه 8 سرندل


اجمل منتدى على وجه الارض مكشات شكرنأ لراعي المنتدى

[KEA2003]

انا مع الاخ ماجد
وازيد على كلامه سواقة الربع التويوتا لها احساس رائع ومتعه غريبه ولا اقصد الراحه بذالك
يمكن بسبب شطفة الكبوت لأن الاحساس نفسه موجود عند الرانج لر( الشروكي)

[ماجد الشمري]

اخوي aaallah ...
شكرا للمعلومة .. وانا اشوف وانا توني جاي من البر باترول ربع جديد ماشاء الله طلع طعس كبير بسهولة ... زين انهم خلوه بخاخات ومثبت السرعة في كل الانواع ... اتوقع ان استهلاكه الان اقل بكثير عن اول ...






اخوكم ماجد الشمري

[مراكي الذيب]

النيسان يريحك ويضر نفسه والتويوتا يضرك ويريح نفسه وانت اختار .

اللي يخبر نيسان ربع سلقه 2005 نظيف تراي شراي

[الباترول]

الأخ محمد :
الربع النيسان لا تعداه للمزايا التاليه:
-السعر
-الراحه(اهم شي راحتي انا ولا الموتر بداله موتر بس الضهر مابداله شي)
-2004 وفوق نشيط بخاخ (ما هو مثل التايوتا بس شبيه)
- المرتبه الخلفيه
-الصرفيه علي حسب الدوس(كان معي ربع نيسان يمشي 500-550 السرعه 130-140كم

[صوعان]

انا كنت من الي يمدحون التايوتا على حساب الباترول لاني ماجربته
بس بعد ماجربت الباترول ولفتره طويله ربع موديل 93 دريت اني كنتي ضايع مع ها التيوتا الي من عام 85 وهم ماغيرو شكله يلعبون علينا مره يغيرون الخطوط ومره الشبك
نصيحه لله لا في القياده على الخط ولا في البر ولا في الطرد والملفات او لو سمح الله ضرب عليك كفر وانت مسرع اشياء كثيره الزبده مافيه مقارنه بينهم الباترول يتفوق على التايوتا

[محمد حمد]

يعطيكم العافيه جميعا ً على هذا الطرح
والله لا يحرمنا منكم
اخوي ماجد الشمري بوجهة نظرك ماهي السيارة التي فيها مميزات الكمال والكامل وجه الله ؟
والكمال من ناحية القيادة في المدينة وفي البر والتي تتمتع بقيادتها ولا ودك تنزل من المرتبة ؟؟؟؟؟؟
وشكرا

[Khalid AlGhamdi]

ربع التويوتا اقوى مكينة لكنه اكثر صرف بنزين وعن تجربه

غير انه يكسر الظهر وغير آمن ادنى بنشر يقلبك لاقدر الله

اما الباترول سلم لي عليه عز الله انه موتر راحة ويبرد قلبك ، اقول مالقيتوا لي باترول ربع ابشتريييييييييييييييه :)

[ملاعب الريح]

السلام عليكم ورحمة الله وبركاته
طع شوري أبعد عن النيسان ما يمسك سعره وعزمه مهوب اللي أنت تبي
والتويوتا يمسك سعره (شــــــيك) وعزمه على كيف كيفك
طبعاً كل النوعين تصرف
هذي وجهت نظري

تحياتي (بو سيف)

[محمد حمد]

يعطيكم العافيه جميعا ً
بو سيف عطنا تجربه حسيت فيها ان التويوتا افضل من النيسان ؟ وتجاهله من ناحية ( شيك )

[حرباش]

بسم الله الرحمن الرحيم
احب ازيد بعض المعلومات ان الربع نزل منه مكينه الفتك في الموديل 2005 ولكنه مقتصر لأستخدام جهه معينه ، ولكن من عنده واسطه في الحمراني او الجبر ماتوقع تعوق معه خخخخخخخخخ .
اما من ناحيه الإستخدام فأنا لي وجهه نظري الخاصه وهي ( من لديه موتر اخر لإستدام الديره فياخذ ربع تويوتا ، اما من ليس لديه موتر آخر فياخذ ربع نيسان)

وتقبلو تحياتي
اخوكم حرباش

[عنبري تمير]

اقووول ربع النيسان مهوب4500 لا الجديد 4800 و 6 سرندل ونشيط بلا حدود وقامي رايح على ربع تويوتا كلهم موديل2004
وبعدين صحيح موديلا 90 - 99 يمكن التويوتا اقوى لاكن يوم نزل النيسان البخاخ وخلاه 4800 اطووور

[ماجد الشمري]

يا جماعة الخير ...
الباترول الربع ما يجي 4800 ولاحتى موديل 2005 .. الا اذا كان للاستعمالات العسكرية فالله اعلم ... ولو نزل بهالمكينة مع الجير التيبترونيك ويجي سوبر سفاري فبيكون سيارة شبه كامله ....


اخوي محمد حمد ...
السيارة الاقرب الى نظري للكمال فهي البرادو من تويوتا الفل كامل ... مواصفاته حلوه ومكينته ال 6 سلندر بسعة 4 لتر ممتازة بقوة 245 حصان / 282 رطل وصرفيتها للبنزين ممتازة اذكر انها 16 / 20 ميل للجالون او اكثر ... محرك قوي وعزمه عالي ونسبة انضغاط ممتازة جدا وجير 5 سرعات اوتو بنسب قصيره وشكل حلو وعصري وواسع من الداخل والوانه مريحه كذلك وبنفس الوقت قطع غيار رخيصة وسعر عند البيع عالي ، وانا ممكن اقول انه سياره نيسان بمميزات تويوتا بعد البيع .... وانا شفته بالبر عزمه جيد جدا وقريب من الباثفايندر وانت تعرف ان الباثفايندر من اقوى السيارات بالبر ان لم يكن الاقوى ... ولاينافس هالسيارة الا الباثفايندر الجديد ولكنه ما نزل عندنا بالسعودية ....
لكن نصيحة اذا نويت تشتريه لاتاخذ الا المكينة ال 4 لتر واعلى نوعية لأن فيها مثبت السرعة وال Abs ...





اخوكم ماجد الشمري

[محمد حمد]

يعطيك العافيه اخوي ماجد
هل البرادو جيد ومناسب للصحراء باستمرار والردميات ويتحمل أقصد يتحملني لأني مهمل شوي بس !!
وهل موديل 2003 - 2004 مناسب ... الله لا يحرمنا منك اخوي ماجد ومعودنا على ارائك الحلوه
وتحياتي لك اخوي ماجد .......