وش بيصير لسياره من مقلب حصلي اليوم ؟ الله يكفينا شره

[بليزر]

السلام عليكم ورحمة الله وبركاته
القصه يا إخواني اني جبت لي بنقالي يمسح لي السيارة وهالبنقالي فيه من اللكاعه
واللقافه الشي الكثير بعضها زين وبعضها يرفع الضغط ومن اللي يرفع الضغط
امس العصر يوم السبت فتحت له داخل السيارة يمسح داخلها ومدري وش اللي صار
معاه حتى يخليه يحرك الدبل للخفيف ويوم قمت من النوم رايح للعمل وانا اشغل الموتر وامشي
على طريق الملك فهد وبسرعة لاتقل عن 90كلم الحقيقه ما حسيت بشي إلا لما جيت
الف الموتر للمواقف ان الدركسون ثقيل واطالع إلا الدبل لمبته والعه الحقيقه ان راسي
بغى ينفجر من الضغط .
وش ظنكم بيصير للموتر يالربع ؟

[المترو]

السلام عليكم ورحمة الله وبركاته
اخي بليزر صبحك الله بالخير

اذكر الله ومافيه شيء ان شالله ياما حصلت هالاخطاء او الغفلات يا خيي ولم يحصل الا كل خير ولم تحدث اعطال للسياره بالنسبه للدبل وخاصة اذا ما تعديت 120 كلم والكلام هذ عن الجيوب انا مجرب هالامور


قصه حقيقيه الموسم اللي فات
احد الشباب ذهب للشمال قناص وانفرطت الكرونه للدفرنس الخلفي الموتر جيب لاند ومشى من الشمال الى القصيم بالدبل حول المتر دفع امامي وسلامات ما حصل للدبل شيء لكن بسرعه لم تتعدى 70 لكم

اخوك الرحال2003

[SilverSniper]

اذا كان الدبل الخفيف فما عليك الا العافية.. وسع صدرك

[الجيب الربع]

وعليكم السلام ورحمة الله وبركاته

أخي بليزر

اول شيء ماشي 90 مع طريق الملك فهد بالصبح, هو غير طريق الملك فهد اللي نعرفه؟ :confused:

الدبل الخفيف مامنه أي ضرر زي ماقال ابوناصر حتى لو سرعة 120 فحط في بطنك بطيخه صيفي زي ماقالوا الصينيين

وبعدين ركب فرارات حتى لو تعشق الدبل ماتحس ويضيق صدرك

اجمل تحية

[بليزر]

الله يطمنكم ويريح بالكم
الشكر موصول لكم جميعا
الأخ جيب الربع
الطريق هو طريق الملك فهد ما غيره لكن الساعه 6 صباحا وإعتبر نفسي متأخر
والعاده اوقع في دفتر الدوام الساعة 5 صباحا هالأيام

[aziz2727]

انا والله دايم اذا وديت السيارة للمغسله اول ما اركب السيارة وقبل ما اشغرها اشوف لمبت الدبل شغاله والا لا وثاني شي اشوف محرك المسحات احيانن اذا مسح الطبلون يفر محرك المساحات والا الاشاره وطبعا" زي من عارف شغل اي كلام عند المغاسل . وبنصحك بخصوص المغسلين المبنقالية تراهم يمسحمون السيارة والكفرات والدعامات والقزاز بنفس الخرقة وطبعا" هذا الشي يعدم البدي ويروح لمعته .
اما للاخ الجيب الربع
اود ان اسأله اذا في الامكان تركيب فرارات على جيوب الاند كروزر الجديده وخاصه من مديل 2000 وطالع ؟؟ انا ما شفت احد مركبه . هي عاده تجي شد بلد لان حسب علمي صعب تركيبها لان فيه امور فنيه مرتبطه بالكهرباء !!! مادري اذا في احد مركبها ؟؟؟

[الجيب الربع]

أخي aziz2727

سؤالك وضعته في موضوع مستقل في نفس الخيمه وبانتظار ردود اخواننا المكشاتيين

هل تركب الفرارات لللاندكروزر الموديلات من 2000 وفوق؟ سؤال (http://www.mekshat.com/vb/showthread.php?p=243288#post243288)

اسف لاني ما سبق شفت احد مركبه للاند الجديد ولكنه حسب معرفتي يركب لكل الجيوب ماعدا اللي تكون شابك الدبل الخفيف على طول ويسمونها Allwheeldrive

تحياتي

[ماجلان]

بسم الله الرحمن الرحيم
أخوي بليزر
أكثر الضرر يكون على الكفرات الأماميه وبامكانك فحصها والتأكد مما اذا كان قد حصل ضرر أم لا مع أنني أستيعد ذلك