المساعد الشخصي الرقمي

مشاهدة النسخة كاملة : نصائحكم لمن يريد شراء سيارة من الامارات أو قطر


رواق
07/08/2010, 03:58 PM
السلام عليكم

أنوي الذهاب إلى الشارقة لشراء سيارة ، غالبا ستكون فورد اكسبلورر

ماهي أهم النصائح التي يجب علي اتباعها من خلال خبرة المجربين ؟

بعض الأسئلة :

كيف أعرف السيارة خليجية أم أمريكية ؟

كيف أنقل المال ؟ شيكات أم كاش أم عن طريق البنوك ؟

ماهي توقعاتكم لتكاليف اصدار الرخص من الامارات ؟

وتكاليف الجمرك السعودي (السيارة بحدود ٦٠ الف ريال ) ؟

ليكن هذا الموضوع بجهودكم مرجعا لأي راغب في شراء سيارة من خارج المملكة

تحياتي للجميع

new boy
07/08/2010, 04:24 PM
وعليك السلام ورحمه الله وبركاته

أولآ : تروح وترجع بسلامه وترزق ان شاالله بسيارة الى فبالك


أول نصيحه : أنتبه وانا خوك من السعوديين الى موجودين هناك الى مسوين انفسهم شريطيه نصاااابين احذر تشري منهم..

الخليجه تجي الطبلون بالكيلو وليس باالميل وبعدين يبين روح للوكاله هناك ويبلغونك عن طريق رقم الشاصي وهل هي تحت الضمان ام لا لأن اذا كانت خليجه يمشي الضمان حتي عندنا بسعودييه


نقل المال أما شيك سياحي او كاش أوخلهن عند احد من اخوانك بسعوديه واذا شريت هو يحولك عن طريق انجاز او الرجحي

التصدير غالبن يكون على الى مشتري منه على العموم مايتعدي 500 درهم

بس لازم تطلب منهم شيء اسمه مقاصه عشان مايخذو منك السعوديه جمرك ضروري جدآآآآآ

الجمرك السعودي اذا مامعك مقاصه 5% من قيمه السيارة
واذا كان معك مقاصه يخصمو المبلغ الموجود بالمقاصه من تسعيرت الجمرك

اتمني اني قدرت افيدك بشي ينفعك والله ولى التوفيق

باوزير
07/08/2010, 06:45 PM
تأكد من الموديل انه يدخل السعودية

التعـ King ـديل
07/08/2010, 10:12 PM
كيف أعرف السيارة خليجية أم أمريكية ؟
ج / العداد الامريكي يكون بالميل

كيف أنقل المال ؟ شيكات أم كاش أم عن طريق البنوك ؟
ج / بشيك مصدق بااسمك في حال لاسمح الله ماشريت تقدر ترجع المبلغ وسهل التنقل به

ماهي توقعاتكم لتكاليف اصدار الرخص من الامارات ؟
ج / ماعندي علم

وتكاليف الجمرك السعودي (السيارة بحدود ٦٠ الف ريال ) ؟
ج/ لاتنسى ورقه المقاصه وماراح تتكلف واجد

تناهيت
08/08/2010, 09:26 AM
كيف أعرف السيارة خليجية أم أمريكية ؟
1-العداد بالميل والكمبيوتر انجليزي
2-فيه استكر المواصفات الخليجيه على الباب
3- الشماسه (التحذيرات تكون مكتوبه بالعربي )

كيف أنقل المال ؟ شيكات أم كاش أم عن طريق البنوك ؟
شيك مصدق او تحويل عن طريق انجاز لأي مصرف او كااااااااش والـــ100000 سعودي = 97500 درهم الآن لازم تاخذ احتياط

ماهي توقعاتكم لتكاليف اصدار الرخص من الامارات ؟
ما فهمت وش المقصود بالرخص

وتكاليف الجمرك السعودي (السيارة بحدود ٦٠ الف ريال ) ؟
هل موديله 2008 وهل هو خليجي ووش فئته

التكلفه موحده 5 % لمواطني دول الخليج
المقاصه = تاخذها من المعرض او الميناء اللي استوردت عن طريقه السيارة ورسومها 100 درهم
المقاصه لها آليه : لا تعطى المقاصه لأي سيارة جلست في ارض الامارات او اي دولة خليجيه اكثر من سنتين من تاريخ قدومها (هذه معلومه مهمه يجهلها الكثير )
يعني لو السيارة لها 25 شهر في الامارات لا تعطى لها مقاصه
المقاصه لا تعني الاعفاء من الجمرك تماما الا للموديلات 2009 -2010 تدفع 60 ريال رسوم جمركية عليها .

انتبه انتبه خاصه من الأكسبلورر المستورد 99% منها مصدومه وشارينها من شركات تأمين امريكيه ولا يسمح استخدامها في اراضي الامارات وتصدر بتذكره عبور الى بلدنا الحبيب للأسف
لا تجيب الا 3 مراتب وفئة استاندر اذا كنت بتترزق الله

تناهيت
08/08/2010, 09:38 AM
هذي الفروقات بين الأمريكي والخليجي خاصه بالأكسبلورر ( كتبتها في رد سابق )

وهذي هي الفروقات مره اخرى بالأضافه الى ما ذكرت .
1- الخليجي يكفي انك تعرف مصدرة لا غرقان ولا صاير عليه حوادث ولا مصدي ولا ممشاه مغير بحكم بحث دام 4 اشهر في المعارض الخليجيه والسعودية قبل شرائي الأكسبلورر (شفت العجب العجاب من تلاعب الصالات والشريطيه ).
2- انوار الخليجي ما تشتغل ليل نهار مثل أغلب الأمريكي .
3- التحكم بالطبلون يجي عربي انجلش مو مثل الامريكي .
4- يجي معه ريموت شد بلد ولا حاجه للترهيم ولعب الغرابي .
5-الراديو مبرمج جاهز ولا يتعبك و يجي ست سيدي .\
6-ممشى الخليجي دائما قليل وخاصة الاماراتي .
7-كلها يجي عليها شبك علوي لاكن الأمريكي نارد .
8- احسن ما في الوارد الأمريكي انه يجي 8 سلندر فقط لا غير .
9- صيانة الوارد الأمريكي مكلفه لنهم لا يهتمون في الصيانه في بلدهم (مثلا الزيت ما يقتنعون بتغييره ابد للعلم )اخوي شرى وارد باقل سعر من موتري بــ6000 ريال وصينه بــ5000 ريال جلد عكوس رمان غير هوبات وحساس قير ومساعدات امامي ووو الخ وانا شريت خليجي نفس الموديل غيرت زيت قير ومكينه فقط بــ400 ريال .
10 - الخليجي يجي مكيف خلفي على جميع صفوف المراتب الثنتين الخلفيه مع تحكم مستقل ...........<تكفي هالميزة على جونا الحلو
11- الوطيات الخليجي يجي فيه شد بلد الأمركي لا يوجد .
12- الكشافات اللي في الصدام موجوده في الخليجي بجميع فئاته

فهووودي 7991
08/08/2010, 12:30 PM
اخوي رواق

فيه مشكله عندهم اذا عرفو انك سعودي لزخوك بأسعار مثل الي عندنا وتذكر كلمتي هاذي

انا انصحك تاخذ الفلوس كاش لا قدر الله ومافيه نصيب ماراح تخسر مبلغ التحويل

فيه صرافه في معارض الشارقة ابو شغاره واكتشفت انه هو اقل واحد ياخذ نسبه لتحويل مبلغ

اشرط على المعرض اذا شريت السياره تاخذ المقاصه والمقاصه هي جمرك سياره تجيك 3 اوراق اذكر واحد لونه ابيض واخضر واحمر (((( اهم شي عليها ختم انه دفع جمرك سياره ختم كبير على الورقه لالالالالالاتنسى هاذا الشي انا مره لعب علي معرض الأوراق وكنت جاهل وهو قالي خلاص دفعت عنك الجمارك لأني دفعت زياده على قيمت سياره وشرطت عليه يسويها لي وسوى المعرض تصدير من عمان الى الأمارات على حسابي لأن السياره جايه من عمان وتوهقت في جمارك حسبي الله عليه الله لايوفقه لادنيا ولا آخره ودفعت جمارك)))

واكتشفت اغلب سياراتهم يعني اقدر اقولك نسبه 75 جايها صدمه قليل تلقى النظيف وخصوصا في الشارقه هاذي ملاحظتي انا

تبي النظيف بتلقاها في العوير سيارات فخمه ومديلات حديثه

لاكن فيه مشكله عندهم فحص البدي سيء جداً ماعندهم خبره في فحص البدي

وانبه ان دوام الجمارك في منفذ البطحا من الساعه 8صباح الى 2 ظهر ومن 6 المغرب الى 12 ليل هاذا بنسبه للأفراد اما الشركات والي معه سجل من ساعه 8صباح الى 2 ظهر فليل مايستقبل

حيدون
08/08/2010, 12:41 PM
وعليكم السلام
اهم شيء لاتنسى تصلي استخارة

رواق
25/08/2010, 02:54 AM
جميع الاخوان اللي هنا كلن باسمه .. الف الف شكر لكم وجزاكم الله الف خير

فعلا افدتوني والحين اروح وانا مطمئن إن شاء الله

رحلتي يوم الجمعة بعد المغرب ، وبالليل إن سهلها الله اكون في معارض الشارقة

ناوي اكسبلورر ٢٠٠٨ اماراتي

وابغا اسأل واسمحوا لي لو ثقلت عليكم :

١- كان تخبرون شقق مفروشة حلوة ونظيفة قريبة من المعارض تنصحوني فيها

٢- فهمت ان المقاصة للمستورد فقط ، هل يعني ذلك اني ما اطلب أوراق مقاصة بما ان الموتر اللي ناويه اماراتي ؟

٣- ماذا عن إجراءات نقل ملكية السيارة من عند المرور ؟ هل هناك أي معلومات مفيدة بهذا الخصوص ؟ وين أروح ومتى الوقت المناسب وماهي الأوراق المطلوبة ؟

تناهيت
25/08/2010, 12:05 PM
[QUOTE=رواق;5115474]جميع الاخوان اللي هنا كلن باسمه .. الف الف شكر لكم وجزاكم الله الف خير

فعلا افدتوني والحين اروح وانا مطمئن إن شاء الله

رحلتي يوم الجمعة بعد المغرب ، وبالليل إن سهلها الله اكون في معارض الشارقة

ناوي اكسبلورر ٢٠٠٨ اماراتي

وابغا اسأل واسمحوا لي لو ثقلت عليكم :

١- كان تخبرون شقق مفروشة حلوة ونظيفة قريبة من المعارض تنصحوني فيها
الشارقة ارخص وانظف واهداء كنك في الرياض فيه شقق واجد على البحر واسعارها بلاااش خاصة في رمضان بتحصل بمية درهم وأقل شقة مفروشه او فندق حلو

٢- فهمت ان المقاصة للمستورد فقط ، هل يعني ذلك اني ما اطلب أوراق مقاصة بما ان الموتر اللي ناويه اماراتي ؟
لا ونا خووك ..... المقاصة للخليجي ايضا شرط ان لا تزيد مدة بقاءة في ارض الامارات عن سنتين ..(يعني نفرض انه وصل الميناء في تاريخ 9-2008 احسب سنتين من هذا التاريخ ) صايم ما فيني من حسب ;)

ايه تطلبها في كل الحالات .......والخليجي بيتعبك مقاصته لأنها تكون في الوكالة او الميناء نفسه تروح تاخذها اذا ما فيه معقب او معرض سيارات شريت عن طريقة وقيمتها 100 درهم من الميناء .

٣- ماذا عن إجراءات نقل ملكية السيارة من عند المرور ؟ هل هناك أي معلومات مفيدة بهذا الخصوص ؟ وين أروح ومتى الوقت المناسب وماهي الأوراق المطلوبة ؟

احلى مرور في الدنيا مرورهم .......بيعطونك موكا ببلااااااااش .....<اتحدااك مرورنا يعطيك موية ببلااااااش يا رجا ل خلهم يعاملونا بدون واسطات ومحسوبية خل عنك الموكا :mad:

المطلوب جوازك فقط لا غير وحضور البايع معك طبعا

اوقات الدوام قبل رمضان كانوا يداومون الى 9 او 10 بالليل ........<شفت ان مرورهم بطل والفحص الدوري عندهم وانت تشوف يفحصون لك كل شي طبعا اجباري لا يتم نقل ملكية اي سيارة الا مفحوصة عندهم ويعطونك برنت وتشوف وتقرر تشتري ولالا

للعلم 2008 استاندر دبل 3 مراتب خليجي المفروض ما يتعدى سعرة 68000 ريال

ترى اسعار سوقنا مقاربة لأسعار سوقهم بالنسبة للخليجي الأمريكي .........<لا تتعب عمرك ونا اخوك نصيحة الا اذا فيه علم ثاني ما ندري عنه

تحياتي وموفق خير

تناهيت
25/08/2010, 12:06 PM
لا تنسى تتواصل معنا هنا اذا وصلت بالسلامة

بانتظارك طال عمرك

سليمان بن ربيعان الربيعان
25/08/2010, 12:24 PM
الله يرزقك بالي تبيه

اسير الغضا
25/08/2010, 01:31 PM
اظن لازم يجرى عليه اختبار مواصفات بالرياض

طاش
25/08/2010, 03:48 PM
عندنا في قطر لااتخاف يمكن 1%امريكية والباقي قطرية وارد قطر وفية موقع سيارات اسمة قطر سيل ادخل وحط نوع السيارة وراح اتحصل وفيه في الوكالة مرجعات وماشية مسافة قصيرة جدآآ بس سعرهم اشوي اغلى من السوق واي استفسار ابشر ان شاء الله نقدر انفيدك

hadaj
25/08/2010, 05:36 PM
وعليك السلام ورحمه الله وبركاته


أولآ : تروح وترجع بسلامه وترزق ان شاالله بسيارة الى فبالك


أول نصيحه : أنتبه وانا خوك من السعوديين الى موجودين هناك الى مسوين انفسهم شريطيه نصاااابين احذر تشري منهم..

الخليجه تجي الطبلون بالكيلو وليس باالميل وبعدين يبين روح للوكاله هناك ويبلغونك عن طريق رقم الشاصي وهل هي تحت الضمان ام لا لأن اذا كانت خليجه يمشي الضمان حتي عندنا بسعودييه


نقل المال أما شيك سياحي او كاش أوخلهن عند احد من اخوانك بسعوديه واذا شريت هو يحولك عن طريق انجاز او الرجحي

التصدير غالبن يكون على الى مشتري منه على العموم مايتعدي 500 درهم

بس لازم تطلب منهم شيء اسمه مقاصه عشان مايخذو منك السعوديه جمرك ضروري جدآآآآآ

الجمرك السعودي اذا مامعك مقاصه 5% من قيمه السيارة
واذا كان معك مقاصه يخصمو المبلغ الموجود بالمقاصه من تسعيرت الجمرك


اتمني اني قدرت افيدك بشي ينفعك والله ولى التوفيق



هههههههههه والله غريبه

ملتهي
25/08/2010, 05:51 PM
الاخوان ماقصروا

انا قبل شهر جبت موتر من الامارات

وترى مواترهم زينه واسعارهم ازين لا يهمك كلام الناس

بس يبيلك تنتبه من الغش اللي هناك

وبالنسبه لورقه المقاصه لازم يكون الموتر داخل الامارات اقل من سنتين

ولا ما يعطونك جماركهم مقاصه

ان موتري 2008 ولا عطون مقاصه وجمركته بالمنفذ

وبالنسبه للسكن ادخل هالموقع واحجز ازين لك

www.booking.com

وسلامك

اهل الردات
25/08/2010, 05:55 PM
اصبر يجيك بالسعوديه ورخص اصبر مفتاح الفرج

رواق
26/08/2010, 04:24 AM
الف شكر مرة أخرى

وإن شاء الله أول ما أرجع بالسلامة راح اكتب لكم بالتفصيل وش صار معي ليستفيد الجميع

اخوي ملتهي ... بالتأكيد موقع بوكنج ما استغني عنه , ولذلك سألت عن اسم شقق او فندق قريب من المعارض , حتى أقوم بالحجز من هنا وأريح دماغي ... وأيضا لضمان سعر أفضل

اخوي تناهيت .. الله يبشرك بخصوص المرور .. كنت شايل هم قومة الصبح مع الصيام , بس دام الدعوه دوام ليل أجل سهود ومهود .. حتى لو ما لقينا موكا هههههههههههه

لكن ياليت توضح لي نقطة الفحص .. هل تقصد اني ما احتاج ادور محل كمبيوتر في المعارض ؟ يعني اسوق السيارة وافحصها بنفسي وإذا جزمت عليها اروح بها المرور وافحصها هناك فحص نهائي قبل الشراء ؟

المرشوودي
26/08/2010, 10:03 PM
كانك بغيت سوبربان2005 نظيف 8100
عندي في ابوظبي وسعره زين حياك الله
له عرض في خيمة بيع وشراء السيارات

عبدالرحمن1980
26/08/2010, 11:57 PM
تروح وترجع بالسلامه اخوي قلنا كم اسعار الجيوب هناك لاهنت يالغالي

fares2011
27/08/2010, 12:10 AM
يا بو الحبيب انتبه من الحلا ((الصدأ)) 80% من السيارات مرشوشه من الأسفل بقار أو زيت محروق
والموجودين بالمعارض أغلبهم
لآ شافوك سعودي وتدربي راسك طيروك بكم كلمة وكم يمين وحلف
وخاصة بني أردن وبني عراق !!
والفلوس خلها شيكات طبعا بتروح للراجحي بيقولك حدك 30 ألف ريال للشيك ..
حط عنده شيك ب 30 ألف على مصرف أبو ظبي وشيك عند بنك البلاد ب30 ألف على مصرف المشرق وبالشارقة كلهم بجنب بعض على شارع وآحد ...
والطريقه هذي أسلم من الناحية القانونية والنظآمية ... وآمن على دراهمك ،،، ولآ تنسى خلها تكون باسمك وفقا للجواز ،،،

والله يردك لأهلك سالم غآآنم ... وفالك اللي بخاطرك ..

اسير الغضا
27/08/2010, 11:12 PM
الشيكات خل عندك صوره له

رواق
01/09/2010, 03:20 PM
السلام عليكم

جزاكم الله خيرا ووفقكم الله .. أقولها مرة ثالثة بعد رجوعي غانما سالما إن شاء الله ، حيث اشتريت السيارة ورجعت فيها

الأمور حصل فيها شوي لخبطة لكن بشكل عام كل شي مثل ماوصفتوه لي

- أخدت الفلوس كاش ، والسكن كان في الشارقة فندق اسمه "كريستال بلازا" بينه وبين معارض سيارات "ابوشغارة" شارع تقطعه على رجولك ، الفندق شكله معروف لأني ركبت ليموزين المطار وقلت له أبي فندق عند معارض السيارات ووداني له ، وكل تاكسي اركبه واقول له اني جاي اشري سيارة يقول لي اكيد ساكن في كريستال بلاز !! الفندق نظيف وأسعاره جيدة جدا ٢٠٠ درهم في الليلة .

- وصلنا من المطار الساعة ١٠ ونص مساء وتوقعنا ان المعارض تقفل الساعة ١١ ونص بالكثير قلنا مايمدينا ، فمارحنا لهم ، طبعا طلع توقعنا غلط لأنهم في رمضان يقفلون الساعة ١ ونص

- من بكرا العصر تمشينا في المعارض ، طلع توقعنا غلط ونظامهم غير نظامنا ، كلهم يداومون الصبح إلى الساعة ٣ العصر ويقفلون إلى الساعة ٩ بالليل ، لكن اخذنا جولة وحددنا لنا كم موتر وأخذنا أرقام تلفونات وعملنا استفسارات

- نصحنا راعي تاكسي نروح لمعارض عجمان ، قال ان السيارات هناك أنظف وأرخص ، رحنا هناك مالقينا شي أعجبنا ، لكن الحقيقة ان المعارض هناك مهجورة وشكل الطلب عليهم قليل وأتوقع الأسعار فعلا أرخص

- رجعنا ابوشغارة ، و بعد اختيار السيارة وانتهاء المفاوضات وفحص السيارة كمبيوتر ، أعطيت صاحب المعرض الفلوس وخلصت منه حول الساعة ١ بالليل ، وأخذت منه إيصال ( اعطاني اياه بدون ختم ولما قلت له اختمه قال راعي المعرض اللي معه الختم مو فيه ! الحيت عليه الحاحا ، راح داخل ورجع بالورقة مختومة ، شكله كان ناوي يزرفني !! ) واعدته من بكرا على الساعة ١١ الصبح لقيت سيارتي جاهزة للتصدير

- اضطريت أمر جمرك دبي في ميناء راشد عشان آخذ ورقة المقاصة لأن راعي المعرض قال مانقدم هالخدمة في معرضنا

- الجمرك قالوا لي ان دوامهم خلص الساعة ١ الظهر لكن أكدوا علي لازم أجيب البيان الجمركي من الوكالة ، وماقصرت موظفة الجمرك طقت الكمبيوتر وأعطتني رقم البيان وتاريخه واسمه بالانجليزي ، وأيضا أعطتني رقم الوكالة عشان اكلمهم واخذ الوصف ( لو انه أحد موظفينا كان قال لك راجعنا بكرا ومعك البيان ولايكثر ، هذا إذا لقيت الموظف أصلا )

- رحت الوكالة أخذت البيان الجمركي و رجعت سكنت في فندق قريب من الجمرك عشان أصبحهم ، وفعلا من بكرا الساعة ٨ الصبح كنا عندهم وخلصنا في ربع ساعة ومسكنا الطريق إلى منفذ الغويفات/البطحاء

- جتني معلومة وانا هناك ان دوام ربعنا في المنفذ في الصبح من ٩ - ٣ عصر ا ، وفي الليل من ٩ - ١٢ ، وقالوا لي انك لو وصلت ٢ يمكن ماتخلص شغلك وتضطر تقعد إلى الليل ، فكرت ارتاح وامشي العصر بحيث اني اصلهم الليل وخلص وامشي على طول ، لكن مانصحوني بذلك لأن الليل يصير فيه زحمة أكثر لسببين :


١- أكثر الناس مايمشون الا بعد العصر وياصلون في الليل

٢- أي واحد معه سيارة تصدير زي حالاتي ما امداه على الصبح يبي يوقف ويمسك سرا إلى الليل

- مشينا الساعة ٩ صباحا من جمرك دبي وصلنا المنفذ الساعة ١ الظهر تقريبا . في الامارات تدخل مكتب الجمرك ، يحولك على مكتب تخليص جمركي ، تروح لهم وتعطيهم أوراقك وتتكي عندهم والموظف يسوي كل شي من تصوير أوراق وجواز ومراجعة للجمرك مرة ثانية ، وأيضا مراجعة الشرطة عشان يختمون لك بالنسبة للمخالفات ( الحمدلله جت سليمة ) ثم يعطيك بقية أوراقك ومعها م نبينها ورقة لونها أخضر وهي ورقة الخروج من الامارات والدخول للسعودية ، وأيضا ورقة البيان الجمركي والمقاصة ، كل هذا بـ ٢٠٠ درهم

- في السعودية الله يعينك على الغثا والمسخرة وقلة الترتيب والحوسة ، أول شي مغطت لين وصلت الجوازات ، ختم جوازاتي وقال لي ارجع مع طريقك !! عشان ادخل مع الشاحنات للتخليص الجمركي

- تروح أول شي للتخليص الجمركي في بركس كأنه بركس شعير ، ست فتحات كل فتحة قدامها سرا من هنا لهناك كلهم عمال وأجانب ، لكن الحمدللة امورنا تيسرت لأني رحت للموظف وأشرت له بالجواز وسألته ان كان فيه مكان خاص للسعوديين ، وماقصر أخذ أوراقي وطبع لي برنت .

- تاخد البرنت وتروح للحفرة يركبون لك لوحات سعودية ويفتشون السيارة ، ثم تروح للتخليص الجمركي والتسعيرة ، هناك يسوون مثل الامرات بس بطريقة متخلفة ومافيها أي احترام للادمي ، طبعا أقصد الخدمات أما الموظفين والمخلصين فهم محترمين ، مثلا في الامارات موظف الجمرك في صالة مكيفة تدخل عليه وتعطيه أوراقك ويحولك للمخلص الجمركي ، في السعودية موظف الجمرك في مكتب مكيف له دريشة تطل منها على الموظف وانت واقف في الحر ! ثم هو يحولك إلى أحد المخلصين الجمركيين الموجوديين يسنع أوراقك ويحطها في ملف علاقي ( العلاقي ميزة خاصة بالسعودية طبعا ) ثم يسعرون السيارة ويقولون لك كم تدفع جمرك ، طبعا انا معي البيان الجمركي والمقاصة ولله الحمد ، فصار الجمرك ٦٠ ريال فقط + ١٥٠ ريال للمخلص الجمركي ، لكن المشكلة وين ؟

- المشكلة في تسديد هالستين ريال !! لازم تروح بالسيارة إلى أن تصل إلى آخر بوابة اللي بعدها تدخل السعودية رسمي ، تبعد عن مكان التسعيرة تقريبا ٢ كيلو ، هناك توقف السيارة وتتجاوز البوابة مشي على رجولك مسافة ٤٠٠ متر تقريبا عشان تسدد في البنك وترجع لسيارتك ثم تركبها وتروح عند مكتب التسعيرة للمخلص الجمركي توريه التسديد وتعطيه فلوسه

- يعطيك المخلص الجمركي ورقة للمواصفات المقاييس السعودية في المدينة اللي انت فيها ، وقال لي ان المطلوب اروح لهم اخذ منهم بطاقة جمركية ، عشان اروح بعدها للمرور اطلع استمارة للسيارة ، وأتوقع لازم فيها فحص وتأمين قبل تروح المرور .

- المكان الخاص بالشاحنات والتخليص مكان فوضى ومليان شاحنات على مسافة ٣ كيلو تقريبا طول بعرض موقفين بغير ترتيب إلى درجة اني وانا رايح وراجع بسيارتي ( كأني في طاش ماطاش ) كنت ابلش كثير في الطريق واقعد ازورق بين الشاحنات واحيانا امشي مسافة ثم القا شاحنة مقفلة الطريق اضطر ارجع كل اللي مشيته عشان ازرق مع مكان ثاني !

- جلسنا في الحدود ٣ ساعات ، تحديدا وصلنا ١ إلا ربع الظهر وطلعنا ٤ إلا ربع العصر

- رشينا وجه الموتر ، وعبينا بنزين ، وصلينا الظهر والعصر ، وطقينا لنا باورهورس عشان نزيل آثار قلة النوم والتعب والإرهاق ، ودعسنا مع طريق حرض الساعة ٤ بالضبط

- وصلنا الخرج الساعة ٧ وصادفتنا مطرة حلوة هناك ، لكن بعد ماطقنا سافي وعج مهوب حلو أبد :(

- ضربنا على المندي في الخرج ، ووصلنا الرياض الساعة ٨ وربع :)

متفرقات :

- الحمدلله وماشاء الله ولاحول ولاقوة إلا بالله

- ساعدنا كثيرا جهاز النوفي

- أعتذر من الاخوان اللي طلبوا مني اسأل عن سيارات لأن وقت البحث كان العصر وكلهم مقفلين ، وفي الليل جينا ونصينا المعرض اللي لقينا عنده طلبنا و على بال ما خلصنا معه حول الساعة ١ كانت المعارض مقفلة .

- كلام اخوي ملتهي صحيح ، فعلا الأسعار هناك أفضل ، لكن التجربة متعبة جدا إن كان الواحد ناوي يتاجر ماله إلا يشوف له طريقة مع شركات أو مكاتب خدمات يستلمون منه السيارة في الشارقة أو دبي ويوصلونها للرياض خالصة مخلصة ، حتى لو تنازل عن بعض أرباحه وأعطاهم مبلغ بس يريح دماغه . أما إن كان الواحد ناوي يستخدم فأنصحه يروح يشتري من هناك وماراح يندم إن شاء الله .

- الفضل يعود لله ثم لكم ونصايحكم فشكرا للجميع

قراند ماركيز
01/09/2010, 06:06 PM
الله يوفقك

رواق
13/09/2010, 04:35 PM
تسلم ياماركيز وأعتذر عن التأخير في الرد

مغلي
19/09/2010, 05:47 PM
موضوع يستحق التثبيت

رواق
22/09/2010, 10:30 PM
تسلم يامغلي

ن م ر
23/09/2010, 12:06 AM
الحمد لله على السلامة وعلى البركه الموتر والله يعطيك من خيره ويكفيك شره

وموضوع رائع يستحق التثبيت ويعتبر مرجع لكل من أراد الاستيراد من الخليج

You Like Me
23/09/2010, 03:23 AM
ما شاء الله تبارك الله
الحمد لله على السلامه والله يعطيك خيرها ويكفيك شرها .

مادري اخوي بالنسبة لأسعار الوكيل
هل تفرق عن أسعارنا ونفس الإكسسوارات والمواصفات ؟ او مافي فرق يذكر
وهل تستاهل اني اروح وآخذه من الإمارات جديد طبعاً ؟
يليت اذا تعرف او احد الاخوان يفيدني مشكور
تحياتي للجميع

رواق
23/09/2010, 10:42 AM
الحمد لله على السلامة وعلى البركه الموتر والله يعطيك من خيره ويكفيك شره

وموضوع رائع يستحق التثبيت ويعتبر مرجع لكل من أراد الاستيراد من الخليج

الله يسلمك يانمر ويبارك فيك ويرزقك موترن أحسن منه

رواق
23/09/2010, 10:45 AM
ما شاء الله تبارك الله
الحمد لله على السلامه والله يعطيك خيرها ويكفيك شرها .

مادري اخوي بالنسبة لأسعار الوكيل
هل تفرق عن أسعارنا ونفس الإكسسوارات والمواصفات ؟ او مافي فرق يذكر
وهل تستاهل اني اروح وآخذه من الإمارات جديد طبعاً ؟
يليت اذا تعرف او احد الاخوان يفيدني مشكور
تحياتي للجميع


الله يسلمك ياYou Like Me ويبارك فيك ويرزقك موترن أحسن منه

وبالنسبة لاستفسارات للأسف ما أعرف اجاباتها ، لكنها فعلا هامة .. وكان ودي اني أقعد في دبي يوم أو يومين أمر الوكالة هناك واسأل عن كل شي واعمل فحص للموتر ، لأنه في كل الحالات هناك أرخص من عندنا .. فنحن شعب ملعوب عليه .. وبلدنا مكان جميل للتجار يسرحون فيه ويمرحون :)

حتى فلتر الهواء ( بحكم اني اكتشفت لما وصلت الرياض انه مشيول من الموتر ) يقول لي المهندس ياخي يوم انك في الامارات كان تقضيت من هناك ( قصده فلاتر وزيوت وسيفونات ) أرخص لك هههه

You Like Me
01/10/2010, 11:45 PM
والله انك صادق
الشكوى لله يخوك والله ماعاد ندري منين نلاقيها
صرنا من يد نشيط لأنشط منه خيطي بيطي لا حسيب ولا رقيب
الله المستعان بس والحمد لله على كل حال
شكلها لا بد من زرقة لدولة الإمارات والتأكد من الفروقات بالاسعار والاكسسوارات
وإن شاء الله قبل الزرقة يدخل احد مسير عليهم ويفيدنا قبل التعب والعنوه
مشكور اخوي رواق
بارك الله لك وفيك
لا عدمناك

رواق
05/10/2010, 01:38 PM
قبل ماتروح لازم تطلع على السوق كامل ، انا رحت للنسيم والشفا وبحثت في مشكات والانترنت بشكل عام عن أسعار السيارات في السعودية ، مارحت هناك إلا عندي تصور كامل

والعفو يالغالي وبالتوفيق

أبوعسكر
05/10/2010, 02:31 PM
اخوي لوبغيت قطع مثلاًمن قطر او لامارات كيف اطلبها الله يبارك فيك

رواق
05/10/2010, 03:16 PM
ماعندي علم يابوعسكر ... أتوقع مالك إلا توصي لك أحد سواقين البسامي بشكل شخصي وتعطيه حق تعبه