احتاج معلومات ضرورية عن النيسان الحــوض

[شمســـان]

السلام عليكم ورحمة الله وبركاته
ايه الأخوة ارجو ممن لدية معلومات عن الباترول الحوض. من حيث القوة والراحة وكذالك الأسعار وهل هناك فئات منه. وذلك من موديل 2001 فما فوق.
وهل يستطيع أحد من الأخوة مساعدتي في الشراء خصوصا أهل الرياض لأنني اقيم خارجها,,,
وجزاكم الله خيرا

[البرحه]

والله شف بقولك

موديل 99 اقسم بالله ياليه قوه ميب طبيعيه ويمشي ممشى لانه خفييييف ومكينته قويه

وصبر وقوه لكن,,, صرفيه يبلع بلع

ويقولون ان البخاخ نفس الصرفيه ؟ بس مدري

اما 2001 مدري والله

البرحــــــــــه

[ابن بدران]

وعليكم السلام ورحمة الله وبركاته

أخوي الباجيرو ولا يهون أخوي البرحة

محاكيك مجرب الشاص النيسان 99 وبنفس الوقت كان واحد من الاخوان معه شاص تويوتا 99

الفرق بينهم وانا اخوك /

النيسان / مريح كأنه مركوب ددسن خاصة بعد تركيب توانكي الماء
الغمارة أوسع شوي لأن عصا الدبل يسار
ممشارة بالنفود ممتاز مع إني مقتنع أن النفود كفراااات وبس .

فيه عيب قطع غياره غالي هالكلام من أيام الـ 99 وكالة والحين رخص شوي
وفيه صوت بالفرامل كأنه فرامل تريله ، تلقاها بكثير من النياسين ، ودخلته الوكالة
حوالي 15 مرة والله يشهد علي وهوش أنا وياهم وشكاوي ويوم خلص الضمان قالوا :
توكل على الله أنت اللي مخرب الفرامل مع إن من أول 1000 كيلو و10000 كيلو
أنا جايبه عندهم ولكن صراحة أسوأ وكالة شفتها وعاملتها وكالة النيسان وخاصة اللي بشارع
خريص بالرياض ...............المهم لقيت حل لصوت الفرامل سهل ملة ولكنه يخوف
كثير من الناس رح لم اقرب حفرة زيت وخذ معك مزيته ودخلها مع فتحتة وزن القماشات
اللي خلف الهوب وعطه ضغطتين مع كل جهة ، أول ما تمشي يبي يكون الفرامل خفيف مايمسك
زين وبعدين خلاص يصير عادي مرة ...

التويوتا / مطبة أقشر ، قطع غياره أرخص ، يمسك سعره أزين من النيسان ، ما فيه أمل تلحقه
بالخط بالنيسان -مجرب كم مرة - .........

بالنسبة لمصرف البنزين جربت أنا ورفيقي طبعا مواترنا وكالة شاص نيسان وتويوتا 99 رحنا
للساحل ولكل مكان نفس المصرف ما فيه فرق يذكر ....

المعذرة على القصورة والكلام الطويل

[طــــويـــق]

ابعد عن النيسان يرزقك الله والله مافيه اخس من وكالتة وكاله ( غلاء في اسعار القطع + عدم توفر

القطع ) . اما السيارة بعينها والله جميلة من حيث الاستخدام . لكن تتبهذل اذا بغيت تسوي صيانه . روح

شف الناس تصيح عند الوكيل . الله يعينهم . عليك بالتويوتا ماسك سعره وتوفر قطع غيار ورخصها .

لايغرك رخص سعر السيارة . انظر بعد ماتشتري السيارة وش رايح تسوي . ( تدل على الخيول

اثمانها )

[ع.ف.الدرويش]

السلام عليكم ورحمة الله وبركاته

كبداية النيسان باترول .. سيارة أكتفي بقولي بأن لها سجل طويل وحافل بالإنجازات والتغييرات.. وبالفعل كل من جربها يقول........ (( ونعم السيارة هي )).. فخلوا عنكم دعايات التويوتا يا شباب :D
بالنسبة لقطع الغيار بطبيعة الحال هي إستهلاكية لذلك توقع بأنك ستغيرها عاجلاً أم آجلاً أما سرعة التغيير فتتوقف عليك أيها المستخدم.. وإن كنت تريد تغييرها فأمامك أحد خيارين الاول صناعية الثاني وكالة.. الوكالة بطبيعة الحال وضعها مزري ومبكي.. وكل وكيل ينطبق عليه هذا القول.. فجميع الوكالات لديها من البلاوي ما يكفي
أخي باجيرو.. حسب ما لدي من معلومات فإن فئة الشاص من النيسان.. نوعين.. بنزين وديزل.. البنزين فئتين الأولى عدد (1) تانكي.. الثانية عدد (2) تانكي.. اما الديزل فلا اعلم هل فيها فئتين او لا..
وما اعلمه ايضاً بأن الشاص من موديل 2003 بخاخ .. فهل الموديلات السابقة بخاخ أم كربريتر..!( الله اعلم )
بالنسبة للصرفيه.. فتوقع إنها تصرف لأنها دفع رباعي.. غير كذا 6سلندر.. ( أنا معاي ربع 2004 وبصراحة يصرف :p )
بالنسبة للسعر.. فالجديد بالوكالة سعره 83000 ريال لفئة التانكيين
أما التانكي الواحد فأقل بقليل.. ربما ألف ريال وربما أكثر
أما المستعمل فسعره محكوم بنفس السوق ( بائع / شاري ) ونفس السلعة المعروضة.. وهذه أمثلة على ذلك
.. زميل لي إشتري شاص نيسان موديل 99 مستعمل ونظيف جداً ومجهز كان سعره بحدود الـ45 ألف ريال.. ربما يكون السعر مبالغ فيه وربما لا ( الله أعلم )..
.. زميل آخر إشتري شاص نيسان نفس الموديل مستعمل ونظيف ومجهز أيضاً بحدود الـ53 ألف ريال..
اما الفارق الزمني بينهما كان تقريباًَ 10 أيام فقط..
لذلك قبل ان تشتري ينبغي لك بأن تكون مقتنع إقتناع تام بنفس السيارة..
وعليك بالاستخارة..
وفقك الله لكل خير..
.
.
هذا مالدي.. واعتذر على الاطالة
ودمت بخير
عبدالرحمن

[شمســـان]

السلام عليكم ورحمة الله وبركاته
جزاكم الله خيرا..... ماقصرتوا