اعطوني رايكم بسيارة هيونداي العائلية

[wafi4sa]

شهر مبارك على الجميع والله يتقبل منكم صيامكم وقيامكم
اخواني اشتريت اليوم سيارة هيوندا h1 عائلية جديدة
تسعة ركاب هل تصلح لسفريات او بس سيارة داخل الديرة مع السواق
علما بأني مشتريها للسواق والسواق بأجازة قلت ياولد خلنا نستغل
هذة السيارة بهذة السفرية

ابي رايكم ومن جربها يعطينا راية بكل صراحة

[aassem34]

عساك ماخذة جديدة لانه لاراحله سنتين ثلاث تبدا تطلب قطع

[fof6666]

والله الموتر حليل لكن ترفق بالخط ولا تحمله واجد لأن عزمه ضعيف وكفراته صغيرة ماتتحمل

[wafi4sa]

عساك ماخذة جديدة لانه لاراحله سنتين ثلاث تبدا تطلب قطع

الحمد لله اخدها جديدة شكرا على مرورك ولا عدمناكم


والله الموتر حليل لكن ترفق بالخط ولا تحمله واجد لأن عزمه ضعيف وكفراته صغيرة ماتتحمل

شكرا على نصيحتك وانا لاحظت اللي تقولة بارك الله فيك
ولا نعدم من وجودكم

[ابويزيد1]

مبروك مقدماً والله يعطيك خيرة يكفيك وشره .......... اضافه لكلام الخوان بعد

المكيف لك علية خربات الكمبرس واجد وتبريده موب زين وهذا معروف في جميع انواع الفانات بالهونداي
ولا تزعل علينا انت طلبت المشورة اخوي

[wafi4sa]

مبروك مقدماً والله يعطيك خيرة يكفيك وشره .......... اضافه لكلام الخوان بعد

المكيف لك علية خربات الكمبرس واجد وتبريده موب زين وهذا معروف في جميع انواع الفانات بالهونداي
ولا تزعل علينا انت طلبت المشورة اخوي

الله يبارك في عمرك
يالغالي ليش ازعل اجل هي بنتي
إذا ما جازت للي وراها التشليح يالحبيب
بالعكس انت نورتني على اشياء جدا مهمة حتى نداري عليها قدر الأمكان

[ملف علاقي]

تحياتي اخوي والف مبروك وزين ماشريت
الصراحه سياره عائليه روعه مره وفي السفر مافيه انشط منها ولا اريح وتراها فرق عن الأوله بكثير فعلا كلام الأخوان عن مشاكل ظعف العزم وخراب المكيف كان في الموديل السابق اما الجديد الصراحه مومعقول انا مطلع وحده 2009 جديده من الوعلان للسواق وكان عندي 2002 بهذلتني باالصيانه ويوم جربت الجديده الصراحه امبهرت من الرساوه والعزم والسرعه رحت عليها اول ماطلعتها للشام مريحه مره والله اني صرت اسافر عليه افضل من الصالون الجمس وانت راح اجرب وتشوف كلامي اخيرا الله يطعمك خيره ويكفيك شره

[ذهب صافي]

مسافر عليه لسوريا سياحه وللجنوب وبعد استخدام اربع سنوات غدا عله طبعا كله من بركات السواق

[الكيان]

ما انصحك بها

ساعات وهي تقول لك هذا مكاني وانت بالخط

عندك صالون جمس رح عليه افضل لك

السيارات هذي بالديرة وبس

وهذا شوري عليك.

[محب شبة النار ـــ بريدة ـــ]

لو شريت جمس جديد أفضل من الهوانداي

[فهد راعي البر]

مبروك ماشريت والله يعطيك من خيرها ويبعد عنها شرها
ومن وجهه نظري البسيطة بهذة النوعية ومن خبره الزملاء اشوفها
جدا مناسبة
ولا خوف من السفر عليها وفيه احد الأصدقاء ما يسافر الا بها ويمدحها كثير
الله يردك بالسلامة

[ضابط]

لا انصحك ياخي تسافر فيها فهي خطيره باالطرق السريعه وهي عباره عن كرتون
حدها داخل الديره بس الله يعطيك من خيرها ويكفيك شرها:)

[wafi4sa]

اخواني الأعزاء شكرا لكم جميعا
وهذة النتائج بعد التجربة السيارة وممشي 1200 كم
السيارة عزمها متوسط إذا وقفت عند التفتيش تحتاج
الى وقت حتى ترجع لسرعتك السابقة
اما الرساوة ممتازة والتكييف انا اشهد انها من افضل السيارات
ولكن العزم اعتقد ان حجم المكينة اربعة سلندر هو السبب على حجم السيارة
الخلاصة :
السيارة تعتبر ممتازة للسفر الممتع وليس سفر السرعة الفائقة ( سفر الأسعاف )
ما تصلح
ووسعها من الداخل يلغي عيبها البسيط في وجهه نظري ( ضعف العزم )
شكرا لكم
وهذا ما حبيت انا اقولة بدون مبالغة او تحيز