ابي تفسير للحركه ذي اللي يوسونه لاغرزت الموتر

[اسير الغضا]

السلام عليكم ورحمة الله وبركاته

اعزائي اعضاء مكشات

منذ ان عرفت السواقه بالبر وانا اعرف اذا غرزت الموتر خل الدركسون عدال ولا تلفلف علشان يمشي الموتر مظبوط وحصلتلي مواقف كثير ومع القاعده ذي اموري تمام

لاكن استغرب من البعض بمقاطع الفديو يلفلف الدركسون يمين ويسار واذا صار معه الدف لوك يبتل داعس والكفر يدور بمشاه وانا بحكم معرفتي وتجربتي لازم مايدور الكفر اكثر من وقت تجربك هل يمديك تطلع الموتر ولا لا يعني ماتقعد كل الوقت والكفر ماغير يدور والموتر غاطس

فحقيقة استغرب لا شفت المقاطع واقول بنفسي يابن الحلال انزل برح للموتر واشبك الثقيل وزين جاده
للموتر بحيث انك تمشي قدام اكبر استطاعه ويمكن يحفر خفيف وتزين ممشى طيب

واذا حسيت انه يحفر ومب ماشي ارجع على ورا وزين جاده وهكذا قدام ورا((لااحد يفهم انه ترقيص الترقيص للدفع الثنائي انا اتكلم عن الجيوب)) وتحصل بلحظة تزيين الجاده حفر مايأثر

واطلع وياسلام سلم اما تقعد تلفلف الدركسون وتحوس الجاده وترد الموتر وش الكلام ذا

اعلم ان التغريز مواضيعه طولية عريضه لاكن انا ودي افهم وش تفسير الخبراء فقط للحركه ذي
مع اني ارى انه غلط



وتراي من القهر اللي بي اخذت موتر الوالد الباث وخليته يغرز غصب واقد اسوي حركتهم ذي وزادت الطين بله ومير قلت ياولد خل عنك خرابيطهم وحط الدركسون عدال ويطلع الموتر بلحظه


تعمدت مااحط مقطع فديو علشان مايجاوبون الاهل العرف مب يجي واحد الله يعطيه العافيه يشوف المقطع ثمن يتفلسف :d


تحياتي

[على قد الحال]

هذا سلمك الله تلف يمين و يسار حتى تمهد الطريق للكفر، يعني مثل ما تمهد بيدك، تقعد تمهد بالكفر، و سلامتكم

[بوجندل]

التلفلف يمين ويسار والموتر يمكن سرعته 5 او 10


مثل ماذكر الاخ على قد الحال : يبرح للموتر


بس لازم الموتر يكون فورويل


وكل ناس لهم طرقهم بالخروج من التغاريز


وخصوصا بعض الاجانب الرحالة والمغامرين


لهم طرق صراحة شي مش طبيعي


ومعاهم معدات تقول رايحين حرب مهب كشته


احنا اهم شي في الكشته عندنا العيشه

[kellahd]

يا اخوي هذولا خذوا العلم على عمها و يحسبون انهم صح

اللفلفة كان الشيبان القدام يستعملونها عشان دركسوناتهم فيها فضاوة لازم يلفلف حتى يمشي الموتر عدل (( سيده ))

الصح طريقتك سر عليها و لا تعلم بها الا من تحب

[اسير الغضا]

هذا سلمك الله تلف يمين و يسار حتى تمهد الطريق للكفر، يعني مثل ما تمهد بيدك، تقعد تمهد بالكفر، و سلامتكم

طيب يالغالي التمهيد((التبريح)) للكفر من الامام والخلف اهم من التمهيد من الجنب كماان لف الدركسون يرد الموتر
فيه قاعده تقول حاول قدر الاستطاعه ان الدركسون يكون عدال
وصدق ابو جندل كلن له طريقته



الله يعطيك العافيه

[GMC79]

اذا شابك الدبل الثقيل وانت برباضة والكفرات تحفر بمكانها حرك الدركسون يمين ويسار يتحرك باذن الله

[اسير الغضا]

التلفلف يمين ويسار والموتر يمكن سرعته 5 او 10


مثل ماذكر الاخ على قد الحال : يبرح للموتر


بس لازم الموتر يكون فورويل


وكل ناس لهم طرقهم بالخروج من التغاريز


وخصوصا بعض الاجانب الرحالة والمغامرين


لهم طرق صراحة شي مش طبيعي


ومعاهم معدات تقول رايحين حرب مهب كشته


احنا اهم شي في الكشته عندنا العيشه

يمكن على حسب نوعية الرمل والله اعلم لانه اذا صارتالارض اقرب ماله انه طينيه ولفلفت الكفر
يدف روحه مع الطين لانه متلاصق بس مع ذالك مازلت ارى انه يرد الموتر


وشولون فورويل يالغالي

[اسير الغضا]

يا اخوي هذولا خذوا العلم على عمها و يحسبون انهم صح

اللفلفة كان الشيبان القدام يستعملونها عشان دركسوناتهم فيها فضاوة لازم يلفلف حتى يمشي الموتر عدل (( سيده ))

الصح طريقتك سر عليها و لا تعلم بها الا من تحب

خخخخ ياحليلك ياحليك

والله التجربه خير برهان انا مايظبط معي الا الدركسون عدال اسوي طريقتهم بالملي متر ويزيد الطين بله

يمكن ماطبقته زين او طريقتهم فاشله او الارض تلعب دور


انا اببتل على طريقتي مامثله

يعطيك العافيه

[اسير الغضا]

اذا شابك الدبل الثقيل وانت برباضة والكفرات تحفر بمكانها حرك الدركسون يمين ويسار يتحرك باذن الله

الرباضه كلام ثاني يابعدي اصلن اكثر الربضات ماينفع الا المسحات او بيدك تمهد او تسوي اللي ذكرت بردي الاول
ناظر الخرابيط والكلام الفاضي(بنظري) وش يسوي لو انا مكانه كان سويت ماقلت بالموضوع
واجزم انه بيعطي نتائج افضل
الحين
شف كل ماترك اللفلفه يمين يسار كل مامشى الموتربشكل افضل (مافي مشكله لو يلف لجهه وحده بشكل بسيط من غير مايلف يمين يسار يعني يثبت على لفه معينه وتصير خفيفه))مع العلم ان موتره مجهز بدفلوك خلفي شد بلد ودفلوك امامي من شركه ار بي

المقطع من اليوتيوب
http://www.youtube.com/watch?v=Gv6JWp5Z_r0&feature=related


الدفلوك مفيد جدا بس مب معنا انك تبتل داعس والموترماتحرك من مكانه يعني يدور بمكانه على الفاضي ولابه ولا ذرة حركه
ماتخلي الدعسه سالكه الا اذا صار يتحرك لو بسيط غيره فك رجلك
او تسوي الجاده كما ذكرت بالرد الاول
يعني تمشي قدام لو مساافه بسيطه اذا مشى هد ثممن ارجع ورا وهكذا لمان تزين درب
اذا مامشى ارجع على ورا وهكذا
اذا ماظبط نهائي وحاولت كذا مره انز برح للموتر من قدام ومن ورا على كل الكفرات

[اسير الغضا]

اقولكم ياجماعة الخير اصعب شي هو الفهم الخاطئ بيننا انا صراحه اشرح بصعوبه ودي اوصل الموضوع بالملي متر
لاكن الفهم الخاطئ وارد وان شاء الله مايصير به اي فهم خاطئ ((يقولون 60 % من مشاكل العالم بسبب الفهم الخاطئ

[m200m]

مبارك عليك الشهر
والحركه هاذي اساعد السياره في تغير مكانه شىء بسيط
وهاذي الله يسلمك مع الدبل الثقيل وبعد ماتغير المكان تخلي
السكان سيده وريوس قدام لين تضهر سيارتك وهاذا ماعندي

[اسير الغضا]

مبارك عليك الشهر
والحركه هاذي اساعد السياره في تغير مكانه شىء بسيط
وهاذي الله يسلمك مع الدبل الثقيل وبعد ماتغير المكان تخلي
السكان سيده وريوس قدام لين تضهر سيارتك وهاذا ماعندي

يعني قصدك انه يحرك الموتر بشكل خفيف ثمن عقب يعدل الدركسون

يعطيك العافيه

[سراب الوقت]

هذي سلمك الله عشان يتحرك الرمل ويدخل تحت الكفر وبعدين يطلع الموتر

لانك اذا مشيت قدام والموتر يحفر بيغطس

اما اذا حركت يمين ويسار فانت تخلخل الرمل عشان يروح تحت الكقر

[اسير الغضا]

هذي سلمك الله عشان يتحرك الرمل ويدخل تحت الكفر وبعدين يطلع الموتر

لانك اذا مشيت قدام والموتر يحفر بيغطس

اما اذا حركت يمين ويسار فانت تخلخل الرمل عشان يروح تحت الكقر

ماظنتي ياخوي ان الحركه ذي تدخل الرمل تحت الكفر بالعكس تزح الرمل يمين ويسار بعيد عن الكفر

[asdali]

الحركة هذي خطأ كبير ونادر جدا انها تنفع , اللف المفروض يكون ببطأ شديد لتغيير الاتجاه فقط مش يمين ويسار بشكل مستمر وسبق ناقشت صاحب المقطع راعي الفورتشنر الخل الوفي وقال يسوي الحركة هذي فقط اذا كان الدف لوك الامامي مشبوك . وللعلم جربت الطريقة هذي ولقيت نتايجها ضعيفة جدا .. الافضل تغيير الاتجاه مثل المقطع هذا

[فتى الوادي]

السلام عليكم ورحمة الله وبركاته
شد أنتباهي الدعاية في موضوع السائل .. ووظهر عندي صورة تحمل عنوان ( الزواج والله ) وهو موقع أعتقد انه نصراني يدعو للمسيحية !!!
ولا أدري هل ظهر لديك هذه الصورة أو لا !!!!

[asdali]

حاولت انزل المقطع لكن ما جا معي

[اسير الغضا]

الحركة هذي خطأ كبير ونادر جدا انها تنفع , اللف المفروض يكون ببطأ شديد لتغيير الاتجاه فقط مش يمين ويسار بشكل مستمر وسبق ناقشت صاحب المقطع راعي الفورتشنر الخل الوفي وقال يسوي الحركة هذي فقط اذا كان الدف لوك الامامي مشبوك . وللعلم جربت الطريقة هذي ولقيت نتايجها ضعيفة جدا .. الافضل تغيير الاتجاه مثل المقطع هذا
كلامك مقبول جدا جدا
لاكن اشوف الكثير يلفلف الدركسون على عمى

يعني الافضل انك تجنبه

[اسير الغضا]

السلام عليكم ورحمة الله وبركاته
شد أنتباهي الدعاية في موضوع السائل .. ووظهر عندي صورة تحمل عنوان ( الزواج والله ) وهو موقع أعتقد انه نصراني يدعو للمسيحية !!!
ولا أدري هل ظهر لديك هذه الصورة أو لا !!!!

كلم الاداره بقسم الاقتراحات والملاحظات او ارسل رساله للمشرف ناصح

[مهاوي براري]

لا زم تحفر شوي يعني انزل من السياره وساعدها تساعدك اما تظل دايس تبي تطلع الما وما تط لع

[اسير الغضا]

حاولت انزل المقطع لكن ما جا معي

اذا كان يوتيوب انسخ الرابط ثمن حطه بالخيار ذا بالابقونه فوق رhttp://www.mekshat.com/vb/images/editor/createlink.gif

[اسير الغضا]

لا زم تحفر شوي يعني انزل من السياره وساعدها تساعدك اما تظل دايس تبي تطلع الما وما تط لع

حياك الله


المشكله ليست بس انهم يظغطون الدعسه والموتر غاطس والكفر يدور بوش بممشاه

المشكله الكبرى بلفلفة الدركسون

[asdali]

في هالمقطع السايق لف جهة وحدة وببطء شديد لو سو مثل البعض يمين ويسار كان الموتر نام محله

http://www.youtube.com/user/dakar222#p/u/17/vNWF-DaacFE

[asdali]

فيه مشكلة بمكشات بسبب الاعلانات

[اسير الغضا]

في هالمقطع السايق لف جهة وحدة وببطء شديد لو سو مثل البعض يمين ويسار كان الموتر نام محله



http://www.youtube.com/user/dakar222#p/u/17/vnwf-daacfe

هاذا لو هو كاسر لم النزله كان طلع علطول او يكسر لم فوق ويدق ريوسومب شرط يكسرالدركسون لم فوق ريوس علطول ويطلع والدبل يعاون

يعطيك العافيه



ياخوان لف الدركسون لثلاث حالات

اذا كانت الجهه اللي تبي تلف به نزله علشان النزله تعاون
او اذا كان قدامك شي يردشجره ولا شي انت مظطر تلف
او اذا كانت الارض اللي تبي تلف لمه مب هيار او اقل غراز من انك تخليه عدال

[asdali]

هاذا لو هو كاسر لم النزله كان طلع علطول او يكسر لم فوق ويدق ريوسومب شرط يكسرالدركسون لم فوق ريوس علطول ويطلع والدبل يعاون

يعطيك العافيه



ياخوان لف الدركسون لثلاث حالات

اذا كانت الجهه اللي تبي تلف به نزله علشان النزله تعاون
او اذا كان قدامك شي يردشجره ولا شي انت مظطر تلف
او اذا كانت الارض اللي تبي تلف لمه مب هيار او اقل غراز من انك تخليه عدال


كلامك سليم:good: بس ترا المقطع كان صاحبه مسويه لشرح حركة معينة في الرمال

[اسير الغضا]

كلامك سليم:good: بس ترا المقطع كان صاحبه مسويه لشرح حركة معينة في الرمال

ماعليه ماشاء الله مشى الموتر بس الواحد يدور السهل

[Riyadh City]

أخوي شكلك متعود تطعس على مواتر مافيها دبل مثل الددسن وغيره لذلك أنرسم في بالك مثل ماهو حاصل معنا كلنا بأن الدركسون لازم يكون عدال وهذي أقوال مأثوره هع

قبل تسأل هالسؤال جرب هالحركة وأنت معك شيروكي وشابك الدبل وهو مغرز لف الدركسون يمين شمال بتلقاه يمشي مثل الغزال ولا أحلى منه

تحياتي

[اسير الغضا]

أخوي شكلك متعود تطعس على مواتر مافيها دبل مثل الددسن وغيره لذلك أنرسم في بالك مثل ماهو حاصل معنا كلنا بأن الدركسون لازم يكون عدال وهذي أقوال مأثوره هع

قبل تسأل هالسؤال جرب هالحركة وأنت معك شيروكي وشابك الدبل وهو مغرز لف الدركسون يمين شمال بتلقاه يمشي مثل الغزال ولا أحلى منه

تحياتي

حياك الله طال عمرك بداياتي بربع عشه ثمن ددسن الى يومك

لاكن دايم اخذ موتر الوالد الباث ومجرب الشي ذا وذكرت الحالات اللي لازم انك تلف الدركسون فيها
وهي
ياخوان لف الدركسون لثلاث حالات

اذا كانت الجهه اللي تبي تلف به نزله علشان النزله تعاون
او اذا كان قدامك شي يردشجره ولا شي انت مظطر تلف
او اذا كانت الارض اللي تبي تلف لمه مب هيار او اقل غراز من انك تخليه عدال



وابي تفسير منطقي انا مجربه وماجابت الا البلا وقلته بالرد الاول

تحياتي

[wafi4sa]

القيادة بالنفود لا يجيدها الكثير
وهي فن انا اعرف واحد يدخل النفود بمازداء حوض قديمة
بس يلين الكفرات شوي
ومرة قلت له علمني على الجيب حقي والله ثم والله
انه يسوقة كأنه على ِارض صلبة
ياخذ السيارة يمن لأمأكان العزاز ثم تاخد السيارة عزمها من جديد وهكذا
ِِ

[اسير الغضا]

القيادة بالنفود لا يجيدها الكثير
وهي فن انا اعرف واحد يدخل النفود بمازداء حوض قديمة
بس يلين الكفرات شوي
ومرة قلت له علمني على الجيب حقي والله ثم والله
انه يسوقة كأنه على ِارض صلبة
ياخذ السيارة يمن لأمأكان العزاز ثم تاخد السيارة عزمها من جديد وهكذا
ِِ

فعلا فيه ناس سواقه


واهم نقطه بالسواقه انك تعرف تازن الدعسه

والاحظه كثير عند السواقين مايدوس بشكل مفاجئ الا للظروره ولا يترك الدعسه بشكل مفاجئ
ولا يدعس كل الدعسه الا ماندر ودعسته متوسطه غالبا


كما ان وزنة الدعسه عالم ثاني تحتاج للممارسه وللخبره الكلام مايكفي

فيه بعض المواضع لازم تدعس ولا تغطس وفيه مواضع اذا دعست غرزت وفيه مواضع لازم تدبل الدعسه وهكذا يختلف من موتر الموتر
وترى التغريز وارد من اطلق طاره لابد تزل وزنيك من غير المعقول ان تكون مكمل كلن له عذاريبه
لو تلاحظ عند الكثير اول الشتاء وزنيته منحاسه ثمن عقب يظبط واذا قضا الشتاء ثمن رجع تحوس الوزنه معه

[TNT 11]

خير الكلام ماقل ودل
اسال مجرب ولا تسال طبيب
انا من اهل الرمله
وتعلم مابها من تغاريز وكم تعلمت من شيباننا
الحكمه من اللفلفه اظهار وجه الموتروعدم تخالف الكفرات (لان السيار ات الاوله مافيها دفلوك)
وهذا شي اذا اردت ان اقنعك اسبقني للنفود:d
بس يختلف عن اللي بالمقطع الفورتشنر هذا شوي معميها بس سيارته مشته لان فيها دفلوك
1 داعس زياده عن اللزوم
2 اللفه مطولها
3 يستحسن ان هناك اشخاص يدفعون عشان تخفف الحمل على القير وخاصه التوماتيك
4 لاتنسى الكفرات نسمها

اهم شي قبل كل شي ان الموتر تلاحظ فيه انه يطلع ماهو مكانه اذامكانه برح شوي وكملها
جربها تراها بطله
والله الموفق

[ولد وايل..]

اذا السيارة واقفه الطاره خلها عدااال...

أما إذا ما وقف الموتر ويمشي دون 15 تلف يمين يسار بسيييييط ع شان ترفع الموتر شويات...

وارض لأرض تختلف..

[مفخرة فورد]

أنا صراحة ماني مقتنع بطريقة السواق اللي في المقطع
تحس انه شاد عالموتر كثير وبعدين ايش اللي طالع من جنب الكبوت ؟
http://www.alhnuf.com/up/pics-gif/upload/uploads/thumbs/alhnufbdfb203290.jpg (http://www.alhnuf.com/up/pics-gif/upload/view_h.php?file=bdfb203290)http://alhnuf.com/images/zomup.gif (http://www.alhnuf.com/up/pics-gif/upload/view_h.php?file=bdfb203290)

ياليت اللي عنده خبرة ومطعطس درجة أولى يشرح لنا أفضل طريقة للخروج من الغراز بدون اضافات للموتر
يعني سيارة فيها دبل خفيف وثقيل وبدون تنسيم للكفرات !
وله الشكر

[أبوعمر1]

حياك أخوي

بالنسبة للحركة اللفلفة يمين ويسار حسب علمي أنها تنهض الموتر شوي ولو تجرب وأنت على الأسفلت وأنت واقف تلف يمين ويسار تشوف السيارة ترتفع شوي وفي النفود تساعد حسب تجربتي والكل له طريقة .

تقبل مروري

[اسير الغضا]

خير الكلام ماقل ودل
اسال مجرب ولا تسال طبيب
انا من اهل الرمله
وتعلم مابها من تغاريز وكم تعلمت من شيباننا
الحكمه من اللفلفه اظهار وجه الموتروعدم تخالف الكفرات (لان السيار ات الاوله مافيها دفلوك)
وهذا شي اذا اردت ان اقنعك اسبقني للنفود:d
بس يختلف عن اللي بالمقطع الفورتشنر هذا شوي معميها بس سيارته مشته لان فيها دفلوك
1 داعس زياده عن اللزوم
2 اللفه مطولها
3 يستحسن ان هناك اشخاص يدفعون عشان تخفف الحمل على القير وخاصه التوماتيك
4 لاتنسى الكفرات نسمها

اهم شي قبل كل شي ان الموتر تلاحظ فيه انه يطلع ماهو مكانه اذامكانه برح شوي وكملها
جربها تراها بطله
والله الموفق

يعني قصدك اللفلفه توزع العزم على الكفرات (يعني يصير كانه دفلك) اذا كان كذا فيه طريقه سهله انك تشد الجلنط شوي وخل الكفرات عدال اسهل للخروج
يحيث يدورن الكفرين اللي ورا

وشلون اظهار وجه الموتر يعني قصدك ينتهض ويدفن الرمل تحت الكفر بحيث انه يرتفع

هذا اشوفه غلط لان الكفرات تزح الرمل الزايد على الجنب
او قصدك يلف وجه الموتر شوي اذا كان كان كذا الافضل انك تثبت على لفه خفيفه

وبالنسبه للنقاط الاربع معك حق

[اسير الغضا]

اذا السيارة واقفه الطاره خلها عدااال...

أما إذا ما وقف الموتر ويمشي دون 15 تلف يمين يسار بسيييييط ع شان ترفع الموتر شويات...

وارض لأرض تختلف..

كلامك مقبول نوعا ما

صحيح انه مايصير انك تلفلف والموتر بمكانه غاطس والكفر يدور بوش على الفاضي كذا مافيه فايده

يمكن اذا صار به مشي لو خفيف تلف على خفيف هاذي مقبوله
بس مب فايدته انك ترفع الموتر فايدته انك تبرح على الجنب علشان اذا جيت ترجع مره ثانيه تصير الارض متساويه اما اذا كنت مانتب راجع ماله داعي

[اسير الغضا]

أنا صراحة ماني مقتنع بطريقة السواق اللي في المقطع
تحس انه شاد عالموتر كثير وبعدين ايش اللي طالع من جنب الكبوت ؟
http://www.alhnuf.com/up/pics-gif/upload/uploads/thumbs/alhnufbdfb203290.jpg (http://www.alhnuf.com/up/pics-gif/upload/view_h.php?file=bdfb203290)http://alhnuf.com/images/zomup.gif (http://www.alhnuf.com/up/pics-gif/upload/view_h.php?file=bdfb203290)

ياليت اللي عنده خبرة ومطعطس درجة أولى يشرح لنا أفضل طريقة للخروج من الغراز بدون اضافات للموتر
يعني سيارة فيها دبل خفيف وثقيل وبدون تنسيم للكفرات !
وله الشكر

هاذا سلمك الله نسيت اسمه لاكنه شكمان ((عادم)بدال مايطلع غازات المكينه من تت يطلعه من فوق مثل التريلات علشان اذا دخل شعيب مايطفى الموتر
ويفيدونك هل الخبره ان شاء الله

[اسير الغضا]

حياك أخوي

بالنسبة للحركة اللفلفة يمين ويسار حسب علمي أنها تنهض الموتر شوي ولو تجرب وأنت على الأسفلت وأنت واقف تلف يمين ويسار تشوف السيارة ترتفع شوي وفي النفود تساعد حسب تجربتي والكل له طريقة .

تقبل مروري

حياك الله يالغالي

[بعيد الهقاوي9]

اللفلفه تعيق من تحرك الموتر هاذا اللي عندي

[بعيد الهقاوي6]

كسر الطاره يمين ويسار لها وقتها يالغالي اذا شفت الموتر متعلق من الامام وصار الكفر الامامي يدور بوش تكسر الطاره يمين او يسار لين يمسك الكفر بالرمل وتسايسه شوي شوي الين يطلع

اما حركة الدركسون سيده فهذي افضل حركه في طلوع الموتر بسهوله لكن قبل لايتعلق الموتر من الامام لانها ماراح تنفع اذا صار الكفر الامامي متعلق



تحياتي

[اسير الغضا]

كسر الطاره يمين ويسار لها وقتها يالغالي اذا شفت الموتر متعلق من الامام وصار الكفر الامامي يدور بوش تكسر الطاره يمين او يسار لين يمسك الكفر بالرمل وتسايسه شوي شوي الين يطلع

اما حركة الدركسون سيده فهذي افضل حركه في طلوع الموتر بسهوله لكن قبل لايتعلق الموتر من الامام لانها ماراح تنفع اذا صار الكفر الامامي متعلق



تحياتي

مااظن الطريقه اللي ذكرته صحيحه يابعدي:d
كلن له طريقته اللي مرتاح له

ا