صيد الصافي لأهل الخبره 000000

[مرجان]

السلام عليكم ورحمة الله وبركاته

انا بصراحة من المعجبين جدا جدا بهذا المنتدى القيم وهذي اول مشاركة لي فية انا بتواصل مع اخواني الحداقة

عندي استفسار بخصوص صيد الصافي

كنا مره رايحين راس تنوره وهذا الكلام يمكن من شهر تقريبا حاطين سنانيرنا كل وحده اطول من الثانية ومافي شي سكتة وقرر واحد من الشباب انة يغطس نزل عدة زعانف ومسدس والنظاره غطس وبعد فتره طلع ومعاه هامورين حلوين وكم حبة صافي من الي تحبه قلوبكم سألناه وشلون الوضع قال المكان مليان صافي ولو معاه فلينه كان ترسها

سئوالي ليش الصافي ماضرب عندنا على السنانير علما بأن مياديرنا مقاسات مختلفه وطعومنا مشكله خثاق عجين خاص مصران دجاج انا الي اعرفة انه دائما الصافي ينصاد بشبوك بس في البعض قالو في بعض الطرق ممكن تصيده بالسناره 000000 شلووووو ؟ رقم الميدار ؟ نوع الطعم ؟

ويسلم لي المنتدى ولي قايمين علية والمشاريكين فية :)

[ابو-الوليد]

وعليكم السلام ورحمة الله وبركاته..
اخي الكريم على حسب ما اعرف ان افضل طريقة لصيد الصافي(السيجان) هو باستخدام البوص(القصبة) مع مراعاة ان يكون الطعم خبز او عجين عادي وان يكون معلق فى الماء وطبعاً لازم يكون الطول بين الطوافة والثقل متناسب مع عمق المياه اللي تصطاد فيها.

ممكن اخي الكريم توضح معنى(عجين خاص )
لان كلما كان العجين متماسكاً وصغير الحجم يكون افضل.

هذا اللي اقدر افيدك فيه وان شاء الله الاخوان في المنتدى ما يقصروا معاك واتمنالك صيد جيد في المرة الجاية.

تحياتي..

[riffe]

اخوى تقدر تحط قرقور وتفك عمرك بس تحط فيها عشب بحرى يمكن تحصله برقرب من القرم
وبنسبه للحداق اخذ ميدار اصغر حجم وخيط ضعيف يكون بلعشرين بس اضعف شى وتروح وقت رشه المايه ومثل مااقال اخوى Luminass
استخدم البويه بس لزم تشوف السمجه لما تاكل ولما يكون الميدار فى حلجها تسحبها لنك ماراح تحس فيها لما تاكل
ولزم تشوفيها بس اذا كان صافى كباار يمكن تحس فيهاا

[HADi]

وعليكم السلام...

بنسبه لي انا ...

انا احب اصيد السمك بالفرد الي اهو الغطس الحر...


وطبعا مرات ماروح في الطراد ...

انزل من السيف ... واذا شفت المكان فيه صافي ... اخلي الصافي ماصيده في النهار
وكمل صيد وطلع قبل المغرب ..

وبعد المغرب اذا ظلم الوقت .. ارجع ادخل ومعاي ليت بحر ونيزه ...

و تنفى من الصافي وشل وعلى راحتي ...

لان الصافي في اليل .. تحصله قريب السيف على الحصى ... ولا يتحرك كلش

لين ما تصيده...

على شان كذا انا اشوف افظل طريقه لصافي ... اهي تنزله في اليل


واسمحولي على الاطاله

[Napoleon fish]

كما يجب عليك أن تحذر من شوكة الصافيه لإنها تحرق داخل الجسم كالأسيد.

[مرجان]

اخواني الف الف شكر وماقصرتو وما ننحرم انشاالله من هلفزعات الطيبة وانا بحاول واذا صار معاي شي بخبركم

اخوي لوميناز العجين الي اتكلم عنة هي عجينة عادية اسويها في البيت بس الخاص فيها اني اضيف عليها شوي جبن اصفر مبشور من اي نوع وخليها شوي في الفرن لين تسيح واطلعها واعجنها بديني ثانية واحفضها في الفريز واثناء الصيد تكون ميه ميه ماذوب في الماء بسهوله

تسلموووووو شباب ;)

[ali20002ila]

thank you v.match

[ابو مشك]

اخي مرجان مثل ما قالك الاخ هادي وهي افظل طريقه تنزل في الليل و معك الكشاف البحري وصيد على كيفك والحجم الي تبيه ولا لعف ولا سنانير هذا بالنسبه للسيجان ( الصافي)

[مرجان]

تسلم ابومشك بحاول 00000000 ;)

[النوخذة]

السلام عليكم ورحمة الله وبركاته
ماشاء الله الشباب ماقصرو جابو كل الطرق الممكنة لصيد الصافي
انا ماراح اجيب طريقة جديدة لكن شوية اضافة على كلام الاخ luminass_2002 انا جربت احدق للصافي وكان صيدي قليل مرة مع اني كنت جنب فلبيني محترف هالشغلة هو كان ينثر طحين على سطح الموية علشان يجمع السمك ويستخدم خيط نحيف مرة زي ماذكر لك الاخ riffe والميدار لازم يكوم صغير مرة لان فم الصافي جدا صغير ولا يفتح واجد
اما تشكيل الطعم فما اظن انه راح يزيد الصيد لان الصافي مرعاه دائما عشب على شوية طحالب ونادر انك تصيده بطعم فيه لحم (خثاق,ربيان,مصارين,.....إلخ) يعني العجين ازين طعم لصيده بالسنارة
اما ان كنت تبغى تصيده بالطريقة اللي ذكرها هادي فأنا اضم صوتي لصوته واقول راح تعين خير
ارجو لكم الفائدة

[gulfhunter]

السلام عليكم ورحمة الله وبركاته

حياك الله اخوي مرجان في منتديات مكشات وبالأخص الخيمه البحريه وان شاء تلاقي اللي يسرك ويرضيك........ ودي اضيف شي لكن ماشاء الله الشباب ماقصرو ماخلو شي الأ وذكروه...... انا اشوف مثل ماقالو الشباب فك نفسك وحط قرقور او غزل وخذ اللي موجود كله ......

[مرجان]

تسلموووووووووووووووووووو حبايبي والله انكم ماقصرتو

الكل بدووووووون استثناء ;)

[سالم حسن]

:) :j اخواني الاعزاء انا ماجربت ولا مرة اصيد صافي بالعجين ومن خلال حديثكم يتبين ان الحداق ليست الطريقة المثلى لصيد الصافي وان الطريقة التالية تعتبر مفيدة وهي اخذ مجموعة من سرطان البحر القباقب وتكسيره امام شبكة الصيد المناسبة والتي اتكون عادة من النيلون فيتم باذن الله صيد كمية وفيرة منه ومن اسماك اخرى خلال فترة وجيزة. مع تمنياتي لكم بصيد وافرا . :no2: اخوكم سالم

[Alhzzen]

اتوقع الشباب كفوو ووفوووو يعطيك العافيه


شكرا

[عبّار]

مثل ما قال اخوي هادي افضل طريقة للصافي انك تنزل البحر بالليل ومعاك الليت والنيزة لأنه مايحترك بالليل...اما بالنسبة للصافي فهو خواف جدا وما يحب الاصوات العالية و افضل طعم له هو العجين و لاااااااااااااااازم البلد يكون صغيييييير

[النقرش]

أخوي السلام عليكم ورحمة الله وبركاته أخوي أفضل شي للصافي خيط 35 وميدار 12 وبلد متوسط والطعم المفضل للصافي العجين وأكثر شي تلاقي وبسهوله تصيدة بالميناء وينصاد بالقرقور بكميات كبيرة وإذا كان المكان صخري حط طواشة وميدار واحد والصافي توجد فوق راسه مباشرة شوكة تكون بعكس الأشواك وهي سامة ولا كن يزول بعد فترة قصيرة