مقبل على الشراء ياجماعة الخير ... ايش تنصحونا ford والا jeep

[مفخرة فورد]

السلام عليكم ورحمة الله وبركاته
نويت ان شاء رب العزة والجلال أني آخذ سيارة جديدة
لكن تعرفوا الحيرة في باديء الأمر تفرض نفسها خاصة اذا الواحد غشيم في بعض المواتر !
محسوبكم محتار بين الاكسبلورر وسيارات jeep - كان للباثفندر خاطر لكن مالقيت بدبل !

وأضع لكم التكلفة الاجمالية والقسط اللي عطوني :
الاكسبلورر المطور = المبلغ الاجمالي 138905 القسط 1997
القراند شيروكي ستاندر = المبلغ الاجمالي 132000 القسط 1944
الباتريوت = المبلغ الاجمالي 95800 القسط 1422

وللعلم = فورد لديها عرض صيانة مجاناً لمدة 3 سنوات او 60000 كلم
JEEP قالوا لي فيه ضمان 3 سنوات أو 60000 لكن الصيانة الدورية علي !

وماودي أتورط في الشراء قبل سماع رأيكم ونصحكم خاصة في سيارات JEEP بارك الله فيكم

ونسأل الله التوفيق لنا ولكم

[لاتكب البيالة]

الاكسبلورر المطور :good2::good2::good2::good2:
يكفيك كثرته بالشوارع يعني عند البيع يمشي ولا سمعنا عن مشاكل واجد

[سليمان 10]

انت تشاور ابعد عن الامريكي 0عليك بتويوتا وابعد عن فراخة تويوتا وعليك بالجي اكس آر والفي اكس آر ويبقى الخيار لك 000

[راكب الشفر]

االفورد ازين بس شكله بيتغير السنة الجاية
يعني انتظر وشف وش يصير

اما jeep والله ما ينفع
لاوكيل زي الناس وقطع غير متوفره وكثيرة اعطاله

[غالي]

والله ابنصحك حسبة اخوي او نفسي

هين الفورد أفضل من جيب لو ان شاء الله كان كله خربات

على الاقل ارخص قطع غيار وافضل وكاله

لكن نصيحتي لك ابعد عن الثنين

نروح بران ونجلس في طعوس تحدي عمرنا ماشفنا اكثر من سيارة فورد او شيروكي

معليش هالقيمه ان كنت تبي ومصر على الامريكي لاتتعدى ((التاهو)) لو كان ماشي شيء بسيط جدا ويمسك سعره اكثر من هالثنين
والسيارات المستعمله بالانترنت او المعارض تشهد
ادخل وسعر اقيامها لموديل 2008 وشف كم طاح كل موتر

نصيحتي لك

[سيف الذهب]

عليك باللاند كروزر ( جي إكس أر - في إكس أر - جي إكس )
فعلا تحس إنك راكب موتر

[تناهيت]

اشتر اي نوع تبي لاكن ابتعد عن القراند شروكي بقدر الأمكان


تاهو أو يوكن دبل خيار مناسب جدا .........شيخ في جميع الظروف
والأكسبلورر ايضا لا يعلى عليه مجرب ويمدحونة


بالتوفيق

[ذيب زلفاوي]

الاكسبلور.....

[GS5]

باثفندر بدون دبل !!!
والله شي غريب ؟؟
من بين اللي حطيت انصحك بالإكسبلورر ماشفت احد يذمه للحين ماشاء الله تبارك الله :)
والشروكي يقولون زينوه عقب 2006 ؟؟
لكن الوكيل على ماسمعت و قول الناس دمااااار

واخوي مافكرت بالإكستيرا ؟

[الفااهم]

تاهو أو يوكن دبل خيار مناسب جدا .........شيخ في جميع الظروف
صدق من اشار عليك بالسيارتين هذولي ولو لي فيك معرفه خليتك تاخذ تاهو دبل
غصب عليك من غير ماتفكر خل التويوتا الي ماينزل سعره خرطي الجديد
شف ياغالي التاهو بعد الواسطه تاخه من الوكاله 139 الى 137 تقريبا
وفي السوق الي ماشي عشرين او 10 كيلو وفيه مخوش بالبدي 132 الى 130
يعني والله لا يجي تويوتا ولا غير خذ تاهو من 2007 الى 2010 كلهن واحد
واكان احد يقول مو صحيح انه مايمسك سعره جبه لي ونا اوريه المعارض
والوكاله ووريه الاسعار وبكم شرينا وبكم معروض في النسيم
تاهو افضل خيار وسيع مريح يمسك قيمته افضل من اي سياره بالسعوديه
مميزات حلوه كمره في المرايه جنوط داخل بيج دبل تشغيل عن بعد التحكم بالتكيف
راحه تفوق الرنج
والله يوفقك ياغالي ويباركلك في مشتراك

[اهل الردات]

تويوتا وبس طقلك جيب جي اكس ار او في اكس ار

[aljanah]

الأكسلبلورر لا تعداة اتركك من كلام بعض المهايطية المطبلين لعبدالطيف جميل واشكالة والله التويوتا المديلات الجديد مافيها الا انها غالية والناس للأسف ماتبغي تقتنع ان تويوتا تغيرت مو مثل اول تويوتا الأن صيني بحت لا تصدق خراطهم واضف ان تويوتا اسعارها فلكية يعني قيمة جي اكس ار بثلاث سيارات اكسبلورر ماقولك ان فورد والله مافية مثلها فيها كل عيوب زي غيرها بس علي الأقل وكيلها مقبول نوعا ما وسعرها معقول لغالبية الناس المساكين امثالنا اما اللي فلوسة زايدة فالله لا يهينة يعطيها ابو جميل

واقولك شي ثاني التاهو الجديد والجمس بشكل عام المديلات الجديده والله يذمونها ومشاكل كهرباء وعيوب بالهوبات ومشاكل بالدبل حقها هذا ماسمعت ولم اجرب

[عبدالرحمن1980]

اذا كانت فلوسك زايده حطها في تويوتا واذا كنت على قد حالك خذ اكسبيدشن ونصيحه ابعد عن الجيب ومشاكل الجيب

[ابوصالح77]

هلا بك أخوي مادامك تستشير بها الثلاث سيارات
فأشير عليك بالفورد الإكسبلورر الستاندر وخل عنك الاكسبلورر المطور لأنه غالي ويفرق واجد معك
أكثر الناس تأخذ الإستاندر( كويس وإرخيص )
والفورد أثبت جدارته
وإنت رجّالٍ تتدين خل عنك خشاش المتحدة لو إن جيب ودودج سيارات عريقة لكن الوكيل ماعندك أحد .
ولا تنسى صلاة الإستخارة
بالتوفيق .
وهذا رابط تقرير لأحد الإخوان عن الجديد
http://www.mekshat.com/vb/showthread.php?t=322951

[الإستراتيجي]

تبي نصحية من خبرة ولا تأخذ كلامي محمل الجد ...

الأمريكي كله خرابات وما تفوق منه إلا الفورد نوعا ما ,,,

فخذ فورد إكسبلورر وترى سعره 101 وهذا واحد من ربعي أنا وإياه مطلعينه من الوكالة راسلني خاص إن كنت تبي أكثر في هالموتر ...

علما أني أحب الأمريكي في أمور أهمها الراحة فهو مريح جدا ,,, السعة فهو واسع جدا ,,,

صرفية البنزين الأمريكي تفوق على الياباني في الصرفية ,,, قوة الماكينة والعزم والأحصنة ترى تحتاجها في الخطوط الطويلة وفي الرقيات لو كنت تدخل بر أو ترقى في جبال مثلا ...

لكن يعيبها أنها تحتاج صيانه فأقول أن الفورد أفضل في الصيانة من الشيروكي ثم قطع الغيار متوفرة بكثرة ثم الأهم حرارته ما ترتفع مثل الجيب الخايس ,,,


أما اليوكن فلا تأخذ منه نصيحة لأني في فترة كنت داخل عندهم حصلت واحد فاك الموتر 2010 أول ما طلع وشاب موتره بعدها بأسبوع إلتماس كهربائي ...

وقاعد يفحط عندهم ....


يعني لازم تشوف لك موتر يستاهل صحيح ...

أما من ناحية تويوتا (( فتراها دقه قديمة )) بالذات إذا قال لك شيك مسجل ,,,

قل بله وأشرب مويته بعد الإفطار هماه ,,,

سرق عيني عينك من الإجرامي عبداللطيف جميل ويبيعك قطع مقلده نوع ثاني ويخليها أنها الأصلية ولا يقول لك بعد ,,,

علما أن قطع غيار السيارة ذات المواصفات العالية تكون غالية (( هو يبيعك النوع الخاص بمنخفض التكلفة - معروف هذا عند الوكلاء لكنهم ما يتكلمون - ويبيعك إياه على أنه الأصلي الغالي ))

علما أن سيارات عبد اللطيف جميل تجمع بالسعودية فقطع الغيار للمسجل و الإكسسوارات الداخليه و الخارجية من أنوار وجنوط وغيرها كثير يأتي بها من السوق الصيني وبعضها طلبيات من دول أخرى

فرجاااء ابعد عن سياراته وخله يبيع فصفص

ثم ان سياراته غاليه جدا ثم أنها مافيها مواصفات تصور أنك تسوق بعض الجيوب كأنها هايلوكس ما ينزل الدركسون ولا يرتفع ...

يعني موتر شكل خارجي فقط ...

أما من ناحية الجودة في التويوتا فهي ضعيفة مقارنه بالتسعينات والألفين ...

2010 لا تقرب نيسان ولا تويوتا نصيحة والأمريكي أحذر منه وشوف نظام التعليق قبل ما تأخذه هناك سيارات نظام التعليق فيها بلاستيك أو بعض القطع وهذه مصيبه وكارثة بالذات أننا منطقة حاره ويلزمها حديد يتحمل الحرارة والبلاستك مع الحرارة ينكسر ...

فأقول خذ لك فورد لكن ناظر نظام التعليق فيه وش مصنوع منه لا تسأل المبيعات رح شف لك واحد تعرفه وانزل تحت الموتر أو أدخل النت وشف القطع ولا تنسى المواقع الغربية ترى تجاربهم أقوى من تجاربنا خذ لك لفه في اليوتيوب ثم مواقع السيارات المشهورة لديهم ترى الكلام سهل لكن التجربة والسنوات تبين الخافي ...

...................

[بن سليمان]

باختصار الفورد اثبت جودته ووجوده وصار مطلوب ومرغوب ويمسك سعره


هناك سيارات نظام التعليق فيها بلاستيك
انت متاكد من المعلومة هذه ؟
نظام التعليق الضغط عليه كله فكيف يكون بلاستيك ؟

[مفخرة فورد]

وفقكم الله جميع كل باسمه
نصائح من ذهب الله يعطيكم العافية
لكن فيه شيء ثاني !!
هالتأجير والله قمت آخذ واعطي فيه ,
مرة أقول ياولد انت ماعندك كاش وهذا اللي متوفر بالسوق طقها تأجير من الوكالة مردها تكون انت اول من يستخدم السيارة
ومرة أقول ترى الموتر ماهو باسمك وان تعثرت في السداد لاسمح الله يمكن يسحبوها منك وتروح فلوسك تأجير !!! وهذا من غير الصيانة الدورية المكلفة في بعض الوكالات
لكن نسأل الله الهداية والتوفيق وأن يسهل أمرنا وأمركم
شكراً للجميع