محتار بين الفتك سوبر وبين الشاص التايوتا فل كامل

[أبو أسامة]

السلام عليكم ورحمة الله وبركاته

الشهر عليكم مبارك ........

ياشباب مكشات أخوكم يوم جد العلم أحتار بين فتك سوبر سفاري سعره بحدود 115000 بس المشكله موديله 2007 أو شاص تايوتا فل كامل 2010 بنفس السعر ... رغم أعجابي الشديد بالباترول لكن المشكلة ما أقدر أشتري جديد قلت في نفسي دام فلوسي تجيب شاص فل كامل تايوتا عز الطلب بسبب الأعجاب به أيضاً لكن المكشله وين أودي العايله (زوجه وولدين ) ...... لا يجيني أحد يقول باث أو فور تشنر أو حتى لاند أو أكس بلورر أو تاهو ...... لأني إذا ما شريت باترول أو شاص تايوتا ما راح أحس أني شاري موتر بر ....... والله يقسم الخيره ..... آآآه لو يجي الشاص غماره ونص أو يرخص الباترول الـ 2009 ......

والله يرزق الجميع بما يحبون ......

[GS5]

وعليكم السلام ورحمة الله وبركاته
لوهو انا كان السوبر نضيف ما اشاااااااااااااور ابد اخذه واتوكل على الله و ادعي ربي بالخيره :)
و ماشاء الله قلت عندك عائله الله يحفظهم و يخليهم و يستر عليهم الشاص مايصلح ابد , لأنه يبي يكسر ضهوركم :d
ولو تقدر تزوده الظاهر به للحين سفاريات جديده بالمعارض :)

[smsa]

وعليكم السلام ورحمة الله وبركاته
شهر مبارك علينا وعليك يا ابو اسامة

الله يعينك الحقيقه الحين الواحد يحتار في السيارات لكن الله يوفقك لما فيه الخير ولاتنسى الإستخارة قبل اي شي
الصراحة لو كنت انا في مكانك وعلى حسب ضروفك الحالية اخذت الباترول او اي سيارة صالون
مع اني املك ولله الحمد شاص 2005 وكذالك فورد 97 وعزوبي :d
وكذالك لاتنسى ان تكميل وتجهيزالشاص يبي له ميزانية خاصة
والبر والوناسة وسعة الصدر ماهي مرتبطة بنوع محدد من السيارات
استخر وفكر وشاور واذا تقدر تجرب او تستعير او تستأجر باترول او شاص لمدة يوم وتشوف انت ترتاح للسيارة او لا وبالذات للشاص اذا كنت ماجربته
موفق خير يا ابو اسامة وعقبال مانشوف الموتر بتقارير الكشتات

[اهل الردات]

شاص وبس اخوي تر نيسان مايصبر معك وعزمه يقل بسرعه وخرباته كثير
اما تويوتا حكي ثاني انا توي مشتري gx-rوالله شي ثاني ولا تقرب لنيسان المصخره

[ابن صقيه]

الفتك وأنت مغمض

إلا إذا تبي عيالك يجيهم شد عضلي بالظهر من كثر المقامز فخذ الشاص

[عااشق نفود]

فتك مع اني من عشاااااااااق الشاص
الله يووفقك ان شاء الله بالنضيف يارب
^^^^^^^^^
تراها من القلب هههه

[مقلع الرمث]

مافيه وجه مقارنه

الشاص سياره بر وخاص بالتحميل واهل الابل

والباترول سياره بر ويحمل ركاب اكثر

انت على حسب استخدامك كانك والله راعي تحميل وتنزيل وشيل وحط عليك بالشاص

وكانك ماانت راعي تحميل وعفش خفيف خلك على الباترول

بالتوفيق لنا ولك بالدارين

[NissaN 1990]

فتك وأنت مغمض يكفيك المواصفات والراحه والرساوه اللي فيه على قيمته وأنت متزوج أكيد هو الأنسب ،،،
بس بصراحه مزاجك غريب
لأنك قارنت شاص وفتك لو قلت شاص وgmc حوض أو شاص نيسان يمكن يحق لك تحتار
لو قلت فتك وفكسار أو جكسار يمكن يحق لك تحتار بس شاص وفتك بسراحه مافيه مقارنه ولا يبي لها حيره
وبعدين الفتك ينشد فيه الظهر وقوي ويتحمل سفريات وخطوط وبر وداخل المدينه بصراحه موتر عز ،،،


الله يعطيك خيره و يكفيك شره مقدماً ولا تنسانا من صور الموتر إذا شريته ،،،

[ساري 111]

بصراحه مااقدر اعطيك راي المقارنه بينهم صعبه ..

لكن اذا انت تبي شاص وتهمك الراحه خذ ابو رفرف تراه مريح بالحيل


موفق اخوي

[almertah]

بصراحه مافيه مقارنه بين الشاص والفتك الشاص مثل ماقالو الاخوان كسر ضهر ومطامر اما الفتك بر وديره وخط مريح

[GS5]

بصراحه مااقدر اعطيك راي المقارنه بينهم صعبه ..

لكن اذا انت تبي شاص وتهمك الراحه خذ ابو رفرف تراه مريح بالحيل


موفق اخوي

اخوي ساري الله لايهينك بس وش الفرق يوم يصير اريح ؟!!

[عاشق HILUX]

اخوي اختيارك مهب لم ديرة مافيه وجة مقارنة بين شاص وفتك يعني بن فتك وهدد ممكن لاكن اخوي احب اعطيك نقطة اذا كنت تبي تشتري شاص لا تشترية الا وانت مجربة اقل شي 3 -4 ايام على الاقل
لان الشاص لناس معينين واغلب العالم تشترية ثم تبيعة لانة غير مريح وكذا وهو اصلا لفئة معينة تقبل وجهة نظري بصدر رحب

[مدمن فتك]

اسمع ياعزيزي:
انا جربت شاص فل كامل بريمي 2006
والان معي سفاري 2 موديل 2009
والشهادة لله الشاص اكثر تحمل من الفتك ويحمل اغراض اكثر هذا اللي فرقته عن الفتك فقط
اما الفتك بصراحه نشيط بالبر وبالديره وشكله روعه وبالنسبه للراحه لاتنشدها بالشاص ابدا وعندك الزوجه والاولاد اريحلهم الفتك من الشاص..
رايي : افحص السوبر وتوكل على الله وبتدعي لنا
ملاحظه: اللي يقولك ان الفتك مايتحمل ولايصبر ويقل عزمه فهو بصراحه اجهل من !!!! اهله لان لي سنة ونصف والموتر معي ولله الحمد ماهنا تضاريس بيئيه الا جربتها فيه وكان لايرضى الا بالمقدمه..موفق

[ساري 111]

اخوي ساري الله لايهينك بس وش الفرق يوم يصير اريح ؟!!


ابو رفرف يجي 6 ريش
واللي بدون رفرف يجي 11 ريشه

[ابو العز بلس]

وعليكم السلام ورحمة الله وبركاته


اسمع يالغالي احسن شيء صل صلاة استخاره

[راكب الشفر]

الفتك والله انه موتر وعز الطلب
والله يكتب لك اللي فيه خير وييسر امرك

[مسير عليهم]

انت قلتها معك عائلة

وشلون تفكر بالشاص

[aljanah]

ههههههه الله يصلحك بس اخوووي الحين انت فتحت موضوع قد قرفنا من دين اهلة بالمقارنة بين التويوتا والنيسان شف اللمطبلين الحين بيجونك واخرتها تطلع محتار ولا زادوك الا حيرة !!!! انا اقولك باختصار كل التويوتا والنيسان الجديد صيني حتي لا نبالغ 80%من القطع صيني وتايلندي وتايوياني واندنوسي ضلمات بعضها فوق بعض فاي واحد منها يمشي الحل معك ولو انا منك اخذ شاص علي الأقل مثل مايقولون المطبلين يمسك سعرة وتحياتي لك

[أبو أسامة]

أشكر الجميع على المشاركة

يا أخوان الظاهر لم يفهمني منكم إلا أربعه وهم جي أس 5 وأس أم أس أي و مدمن فتك وحيدون..........

يا أخوان أنا لا أقارن بينهم أعرف هذا صالون ويصلح للبر50% وديره50% والثاني حوض وإستخدامه للبر 75%وللديره 25%.

لكن أنا أقارن بين شيئان يعجباني وفلوسي ما تجيب جديد إلا الشاص التايوتا فل كامل ولو فلوسي تجيب جديد فتك سوبر سفاري تركت الشاص التايوتا عشان العائلة وهذا هو اللي محيرني يعني يا جديد وأريح راسي وأتعب العايله أو آخذ مستعمل ويطلع لي فيه أنواع المشاكل وأتبهذل أنا والعائلة ..... ( أفكر أضحي بالعائلة )هههه

ملاحظة : يا ساري 111 اللي أعرفه الشاص أبو رفرف الفل السست فيه 7 ريش وليست 6 .....

وبالتوفيق للجميع ....

[ابن علوان]

شاص وبس اخوي تر نيسان مايصبر معك وعزمه يقل بسرعه وخرباته كثير
اما تويوتا حكي ثاني انا توي مشتري gx-rوالله شي ثاني ولا تقرب لنيسان المصخره
سبحان الله بعض الناس يمدح السياره في موضوع
ويسفل فيها نفسها بموضوع ثاني ويقول خراباتها كثير وانها مسخره وهو نفسه منزل موضوع استفتاء مابين النيسان وسياره ثانيه يقول محتار بينهن
والحين يقول انه شرا جي اكس ار مبروك ولكن خل كلامك موزون وفيه مصداقيه
ترا الكل يقرأ ردودك ومواضيعك لاتفشل بنفسك

[ALBDRANE]

عيش ســــــــــــــــــــــــــــفاري

عن تجربة خذلك فتك ..... ومال الدروب الا راعيها وبتعرف كلامي الى شريته ووفقك الله في موتر نظيف
وبعدين الشاص موتر بس ما يصلح الا نفرين ولا راعي أبل يرصه من العلف والشعير لين تطرق السست


موفق خير ،،،،،،،

[ولد وايل..]

الله يوفقك...

بس الصدق ...

إن قلنا لك الجديد يستاهل بس يبي ييكسر ظهرك...

والسفاري يخدمك لكن له الآن 4 سنوات والجيوب يخاف من إستعماله...

إن كان تبي تاخذه بسعر حلو ونظيف ((تاخذه من واحد تعرفه او مخبور لك)) ولا خلك ع الأضمن...

ولو تشوف لك فتك جي ال << مش متأكد من اسمه بس فتك رفارف سود أزين لك...

[حطاب الرويضه]

السلام عليكم تبي شوري استخر الله سبحانه وتعالى ثم جرب وانت الحكم ولاتنسى تشاور خاصة ان الفتك قيمته غالي والله اعلم

[سفاري959]

سبحان الله بعض الناس يمدح السياره في موضوع
ويسفل فيها نفسها بموضوع ثاني ويقول خراباتها كثير وانها مسخره وهو نفسه منزل موضوع استفتاء مابين النيسان وسياره ثانيه يقول محتار بينهن
والحين يقول انه شرا جي اكس ار مبروك ولكن خل كلامك موزون وفيه مصداقيه
ترا الكل يقرأ ردودك ومواضيعك لاتفشل بنفسك

هههههههههههههههههههه اكفشه هذولا حقين الراليات وهم ابخص مني ومنك هههههههههههههههههه وسع صدرك وانا اخوك تعيش وتشوف تسلم على الكفشه المعتبره

[ابوطاقية]

النفس وماتهوى
انت تبي شاص بس مشكلة العايله ماترتاح بسيطه
خذا شاص وسياره صغيره وبما انك من متعصبين النيسان خذ صني
واذا جزمت واخذت سوبر سفاري انتبه تاخذ عيالك وتبعد عن القار خلك قريب والا خل معك موتر ثاني

[الروض]

الشاص عز وفخر لكنه حق تحميل
وحق بران
ومع فائق احترامي لك أنت حسمت الموضوع
عندما ذكرت إن عندك عائلة وهذا
يرجح الباترول سوبر سفاري
أو خذ التويوتا واشتر فورد كراون فكتوريا
مكدود كد حشمة
العايلة الله يخليهم لك تحتاج سيارة لائقة بها

[~ V T A C ~]

والان معي سفاري 2 موديل 2009
والشهادة لله الشاص اكثر تحمل من الفتك ويحمل اغراض اكثر هذا اللي فرقته عن الفتك فقط
اما الفتك بصراحه نشيط بالبر وبالديره وشكله روعه وبالنسبه للراحه لاتنشدها بالشاص ابدا وعندك الزوجه والاولاد اريحلهم الفتك من الشاص..
رايي : افحص السوبر وتوكل على الله وبتدعي لنا
ملاحظه: اللي يقولك ان الفتك مايتحمل ولايصبر ويقل عزمه فهو بصراحه اجهل من !!!! اهله لان لي سنة ونصف والموتر معي ولله الحمد ماهنا تضاريس بيئيه الا جربتها فيه وكان لايرضى الا بالمقدمه..موفق



:good2::good2::good2::good2::good2:

[التعـ King ـديل]

الفتك موتر البر الاول بنظري ومريح يشيل 7 ركاب بالراحه والحمدلله انتم 4 يعني يكفيكم وزود

[العاذر]

اكيد عندك عايله لازم تاخذ الباترول ولاتشاور:)


الشاص يصلح للعزوبي وللي دراهمه واجد ولد نعمه:) بالعربي تلقا عنده سيارتين;)

شاص وباترول او شاص ولاند:good2:

او راعي ابل وغنم :)

مايحتاج تفكر :)
:)
لاكن عندي حل اشترهن كلهن ورتح:D

[bn_501]

شف اخوي


دامك متزوج وش لك بالغثاء الشاص مهنا راحه ومايشيل الا ثلاثه


خذ لك فتك

[sa3d]

انا كان معي سفاري وبعته وشريت شاص والصراحه فرق كبير حسيت بقيمه الشاص موتر ينغزابه لو لحالك لكن انت عندك عائله الشاص ماينفع لك الى في حاله انك تشتري موتر ثاني واذا ماتقدرعليه عليك بسفاري وعسى الله يرزقك...

[أبو أسامة]

أشكر الجميع على المشاركة


النفس وماتهوى
انت تبي شاص بس مشكلة العايله ماترتاح بسيطه
خذا شاص وسياره صغيره وبما انك من متعصبين النيسان خذ صني
واذا جزمت واخذت سوبر سفاري انتبه تاخذ عيالك وتبعد عن القار خلك قريب والا خل معك موتر ثاني


أبو طاقية التوكل على الله قبل كل شيء لكن عندي لك سؤال هل الشايب اللي مات الله يرحمه قبل العام بالدهناء يوم غرز الفكس آر موتره بترول أم تايوتا والعايلة اللي ماتو الله يرحمهم قبل 4 سنوات بالنفود الكبير بالشمال على جكسار وإلا بترول ليتك مافتحت الموضوع وصدقني ما أثق بالتايوتا كله إلا الشاص والباقي ما أثق فيه ........ ومن كان بيته من زجاج كمل المثل .....

[قناص الشرقيه1]

ابو أسامه خذلك من الخليج أفضل مواصفات وأقل سعر...ماخذ من الخليج سفاري 2005 أبيض +فتحه+مكيف لمس+مثبت سرعه ماشي 50000كم واصل السعوديه67000ريال من البحرين
هذا رابط يساعدكhttp://www.qatarsale.com/ArMain.aspx

[كودو]

أشكر الجميع على المشاركة




أبو طاقية التوكل على الله قبل كل شيء لكن عندي لك سؤال هل الشايب اللي مات الله يرحمه قبل العام بالدهناء يوم غرز الفكس آر موتره بترول أم تايوتا والعايلة اللي ماتو الله يرحمهم قبل 4 سنوات بالنفود الكبير بالشمال على جكسار وإلا بترول ليتك مافتحت الموضوع وصدقني ما أثق بالتايوتا كله إلا الشاص والباقي ما أثق فيه ........ ومن كان بيته من زجاج كمل المثل .....

بحكم معرفتك بسليمان وبالنفود مالذي تتوقع أنه حدث لهذه العائلة ؟
أولاً ماهي أول مرة يفقد سليمان في النفود في شهر 3 تقريباً فقد مع زوجته ووجد بعد أربعة ايام من الشرطة لأنه تم التبليغ عنه ، وكان موقعه تقريباً 14 كيلو عن الرادمية ( كان قاطع قطوع ) مشكلته أنه لا يرى جيداً ، وتغريزته الأخيرة كانت ماهي صعبة ، لو كتب الله له كان ممكن يطلع ( بالريوس ) وهو حتى لم يستخدم الدبل الثقيل ، لأنه كان يستخدم الدبل بالزر فقط ولم يكن يعلم انه فيه دبل ثقيل . وحدثني العسكري الذي جاب السيارة أنه جابها بالدبل الخفيف ايضاً ، وقال لي العسكري أن البطارية كانت شغاله ايضاً وانه بمجرد ان شبك اصابع البطارية اشتغلت السيارة لأنها كانت مفصولة يمكن سليمان فصل البطارية حتى لا يعبث أحد بالسيارة، علما ان السيارة فيها بطاريتين ، كما ان السيارة كان فيها جهاز اتصال لا سلكي وكان فيه اريل ، وفي السيارة ماطور هواء ، السيارة كانت جاهزة لمثل هذه الظروف وفيها تناكيين للبنزين ، وقد اخبرت سليمان وفهمته كيف يحول من هذا التانكي إلى الآخر .

هذا كلام صاحب السياره ( بداح السهلي )
يعني السياره ما تعطلت

[قناص الشرقيه1]

2009 في الامارات115000 حاول تنزل من سعر
هذا الرابطhttp://www.uaeec.com/vb/t209163.html

[مسستر أي]

حبيبي انا اقول طق لك تآهو او يكون وارتآآح والله يعوضك بموتر بر

[راعي النياسين]

مافيه غير الفتك وانا اخوك واذا جربت السوبر بأذن الله انك تبي تدعي لي

الله يوفقك يارب

[الشنه]

اخوي

اذا انت انت راعي تحميل خفيف
خذ الباترول

اما اذا تبي سياره بر ديره نفود صخر الشاص للمهمات الصعبه