ياهل الخبرة في الباثفيندر

[fares15_5]

السلام عليكم ورحمة الله وبركاته,,,
أقول يالنشامى أبي رايكم في هالموضوع؟؟؟؟؟
عندي باثفيندر ومشكلته انك اذا حملت عليه واجد (أقصد عفش ولا خيام يعني أي شي ثقيل)
وكلتلك مطب الله لا يوريك تسمع صوت طقة حديد قي حديد
هل السبب ان الياي لين ولا المساعد (طبعا اقصد الخلفية) ووش الحل؟؟؟ :confused: :confused:

(ادلي بدلوك ولو انه فاضي)

(ما خاب من استخار وما ندم من استشار شرواكم)

[ماجد الشمري]

اخوي فارس ركب air lift في الخلف بما انك راعي تحميل وبترتاح ..
وبتقدر ترفع السيارة متى ماتبي وتنزلها بجهاز تحكم من الامام عندك ...





اخوكم ماجد الشمري

[fares15_5]

أخوي ماجد يعطيك العافية على المشاركة,,,
بس حبيت اسأل عن الـ Air Lift وش صناعته وكيف خراباته وكيف تركيبه وهل انت مجربه ولا لا ووين تحصله؟؟؟
لأني صراحة اول مرة اسمع به
وهل من الممكن أني اغير المساعدات او اليايات الخلفية بأخرى استرالية وتروح المشكلة وخلاص ولا لا ؟؟

(ما خاب من استخار وما ندم من استشار شرواكم )

[pathfinder]

زي ماقالك الاخ ماجد الشمري....ركب Air Lift

والمقصود به هو بالونات الهوا اللي تركب في وسط الياي الخلفي وبترتاح مع التحميل.......

وتقدر تركبه بكمبرسور بحيث انك تقدر تنفخ البالونات من داخل السياره او بدون كمبرسور وتصير تنفخه من عند اي بنشر

وانا معي باثفايندر ومركبهن والحمدلله مرتاح من ناحية التحميل

[المنبسط]

السلام عليكم ورحمة الله وبركاته
مشكور أخوي فارس 5 15 على هالموضوع اللي يحتاجه كل صاحب باث لكن الأخوان ماذكروا كم سعره وأين يباع, وهل هو عملي أوسريع الخراب يعني هل يتحمل البطانيج في البر والشوارع الحلوه اللي عندنا في الرياض خاصة جنوب الرياض

[pathfinder]

المنبسط

انا شريته بـ 1600 ريال مع الكمبرسور.......ادري ان السعر غالي لاني طلبته من امريكا وطلع علي الشحن مكلف نوعا ما.......لكن انا سمعت قبل فتره ان فيه له وكيل بالسعوديه لكن ما ادري وينه

وبالنسبه لاستعماله فهو عملي وما اقدر اعطيك حكم ممتاز عليه لاني ماركبته الا قبل 4 شهور ونص........وبالنسبه لتحمله البطانيج والمطبات......فاقولك اني اطعس به وانا من سكان جده ومافيه اسوء من شوارعنا والحمدلله ماقال شي.......اللهم انه يبيلك تتأكد من الهوا داخل البالون ماينقص ضغطه عن 8

[درنفيس]

تحصلونها في محل فور باي فور بحدود 1000 ريال

[pathfinder]

السعر هذا مع الكمبرسر ولا بدونه؟؟؟

[درنفيس]

والله اني ماسئلت موتري سست :(

لكن اتوقع بدون ..

[fares15_5]

أخوي PATHFINDER ما قلتلي وين ركبته فيه ؟؟
وفيه سؤال ما دام انك مجربة
لما تعبي البالون بالهوى كم المقدار اللي يرتفع به الجيب ولو بشكل تقريبي يعني نقدر نقول بين الـ 5 سم والـ 10 سم؟؟؟

[درنفيس]

لا ما يمكن يكون 10سم
اذا كان الموتر فاضي ما به اغراض ممكن يرفعه لك 2-4 سم بالكثير ..
لكن مع التحميل ما ادري كم يرفع ممك يوصل لهالسي واعتقد انه كبيييير ..

[pathfinder]

بالنسيه للباث فهو يرفعه 2 انش ونص على حسب كلام الشركه يعني بحدود 6 سنتي اذا كان فاضي


وبالنسبه للتركيب انا مركبه بجده......اذا انت من جده راسلني واعطيك اسم المحل

[عنتر بن شداد]

اسال مجرب نفس ما جا موتري
لا حملت عليه يطلع به صوت تبي نصيحتي
افحص كرسي المساعد او غير المساعدات

[البرحه]

شف ياخوي المشكله هذي حصلت مع اثنين من الربع

وكلام اخوي عنتر بن شداد هو الصحيح

[المنبسط]

السلام عليكم ورحمة الله وبركاته
هل فيه محلات في الرياض تبيعه يا جماعة الربع , وهل هو أفضل أم تركيب يايات أو مساعدات أستراليه؟
وهل يركب على اللاند كروزر؟

[salehhd]

السلام عليكم

اخبر محل في الدمام مخطط 91 وقيمة 1000 ريال مع التركيب بدون كبرسر وممكن تشتري كمبرسر عادي ب 120 ريال وتعبيه عند البيت
المحل اسمة 4x4

وقبل لاتركبة وانا اخوك اسأل في الوكاله عن الصوت يمكن يكون زي ما قال الاخ عنتر ابن شداد
وتخسر نفسك على الفاضي

[بواسامه]

ركب مساعدات سفاري اقوى وبستمها اعرض ويتحمل اكثر بس يبيلك ترهيم فتحات المرابط بالمخرطه
وركب بالون وريح راسك
وياسفى بعمر مضى بدون بالونات
ولا دبل فوق الياي بكعكات الومنيوم
وكلها الحقيقه جربتهن بس ازين شي مساعدات وبالون وبس

[F34666]

ا
لحمدلله والصلاة والسلام على رسول الله وعلى آله وصحبه أجمعين


الاخ الكريم fares15 5 الحل عندي لك خاصة وللجميع اصحاب الباثفيندر طبعا انا مركبها في سيارتي قبل شهر الحل يكلف 150 ريال فقط

وهو ان تركب للسيارة مساعدات لاندكروزر خلفية من مديل 97 ونازل vxr ويكون سعرها 100 ريال وتركيبها 50 ريال مع وجوب ان تقووم بعمل تعديل للمساعدات بشكل بسيط وهو ان تضع للمساعدات من اعلى حلقة بدل المسمار فقط ثم تركبة بسهولة . لمزيد من الشرح 0555544980 ابو سلمان

[ظلال الشمس]

السلام عليكم ورحمة الله وبركاته
الأخ fares15_5 ولا يهونون الربع
المشكلة عندك هي في اليايات الخلفية وإن كان المساعدات لها دور مهم لكنها ما تحل مشكلة التحميل ونزول الموتر ومن ثم حصول الطقة الي تقول
طبعا انا اتكلم من واقع تجربة في باث فايندرين واحد موديل 2000 والثاني 2004
الأول جربت فيه البالونات بدون مااطور لتكلفته العالية ;)
التجربة كانت ناجحة بكل المقاييس :D
يعني هن ممتازات جدا ومن مميزاتهن ان الموتر ما ينزل مهما حملته :good:
يعني حملته مرة خيمة صباحية عمودين حديد +200 لتر موية بالإضافة لبعض العفش وأربعة رجاجيل وافين الموتر على ارتفاع شد البلد ما نزل بالعكس يقول هات زود :D
لكن فيه عيب واحد وهو انها يبي لها واحد ما ينسى ضغط الهواء منخفض ويحمل عفشه ثم يمشي لأن الياي يبي يقرص البالون وهذا الشي الي حصل معي مليت التانكي 100 لتر وحملت العفش وطبعا اخوك نسي يعبي البالونات كان ضغطهن 10 psi
ما اطول عليكم السالفة قرص الياي على واحد من البالونات كان هذا بعد استخدام أربع سنوات وشوي
يعني انهن ما يصلحن للي مثلي نسيانه واجد ;)
ركبت عقبهن يايات استراليه ممتازة بس مهيب مثل البالونات في قوة التحمل وأيضا مع الزمن تندق من كثر التحميل

بالنسبة للمساعدات الخلفية فيه نوع انا مركبه يقولون انه امريكي تصنيع اوروبي ( يخفّون بنا يعني ) بس انه ممتاز
ما يخلي المطب وعر وأقوى من حق الوكالة له 10 شهور زي الحلاوة تلقاه مشهور عند حقين قطع الغيار في الصناعية

أتمنى إني أكون أفدتكم وأدليت بدلوي بس ما هوب فاضي :D

أخوكم ظلال الشمس

[F34666]

لحمدلله والصلاة والسلام على رسول الله وعلى آله وصحبه أجمعين


الاخ الكريم fares15 5 الحل عندي لك خاصة وللجميع اصحاب الباثفيندر طبعا انا مركبها في سيارتي قبل شهر الحل يكلف 150 ريال فقط

وهو ان تركب للسيارة مساعدات لاندكروزر خلفية من مديل 97 ونازل vxr ويكون سعرها 100 ريال وتركيبها 50 ريال مع وجوب ان تقووم بعمل تعديل للمساعدات بشكل بسيط وهو ان تضع للمساعدات من اعلى حلقة بدل المسمار فقط ثم تركبة بسهولة . لمزيد من الشرح 0555544980 ابو سلمان

[salehhd]

صراحة مشاراكات رائعة انستفد منها كثير خاصة ان عندي باث بس الحمد الى الحين ما واجهت مشكلة

لاكن نصايحكم بتنفعني في المستقبل ان شاء رب العباد

[F34666]

الحمدلله والصلاة والسلام على رسول الله وعلى آله وصحبه أجمعين



ركب مساعدات خلفية حقت لاندكروزر 97

[المنتفش]

سلام عليكم ورحمة الله وبركاته مسيكم الله بالخير ياشباب انا مركب بموتري اير لفت اللي هي البالونات والصراحه انصحبه اهل الباث فايندر ممتازه جدا وبالنسبه لسعره فهو 900 ريال هذا اذا ركبتهن بحيث انك تعبيهن انت هوا من البنشري اما الكمبروسر مادري عنه لكن تراهن ممتازات وصبورات وكذلك هن مصنعات على اساس التحمل فانا احد الجربين ولله الحمد مافيه مشكله بالبر وبالنسبه لك اخوي المنبسط نعم يوجد عندكم بالرياض اظنه عند الغرابي لكن مادري هل يوجد للفكس ار ولالا لكن اتوقع موجود اكييد فيه عندنا بالقصيم ببريده اسمه (4*4 ) اربعه في اربعه تلقونهن يالربع عندهم وبالسبه للإرتفاع والله اذا مليتهن هوا يعني تشوف الموتر يرتفع بشكل واضح لكن بالضبط كم سانتي مادري انت الى نفختهن لو تملى الموتر الى راسه مانزل الا شي بسيط .....
هذا ماوددت اضافته وعذرا على الاطاله واي استفسار انا بالخدمه,,,,,

[البـدر]

زي ماقالك الاخ ماجد الشمري....ركب Air Lift

والمقصود به هو بالونات الهوا اللي تركب في وسط الياي الخلفي وبترتاح مع التحميل.......

وتقدر تركبه بكمبرسور بحيث انك تقدر تنفخ البالونات من داخل السياره او بدون كمبرسور وتصير تنفخه من عند اي بنشر

وانا معي باثفايندر ومركبهن والحمدلله مرتاح من ناحية التحميل

ممكن توضح كيف طريقة عمل الكمبرسور يعني تنفخ البالون والسيارة تمشي مثلا تعرف ضغط الهواء وأنت ماشي وغير ذلك بارك الله فيك .

[ولد الشايب]

بالنسبة لليايات كلفتني 150 ريال يايات ( رنج روفر ) مستعمل ممتازه جداً مع التحميل وركبت مساعدات باترول 100 ريال وخربت وبعدين فكيتها وركبت مساعدات الباث شد بلد وطلعت ممتازه مع اليايات والموتر مرفوع شوي من وراء ومعطي شكل للسيارة .

[Dr.M]

أشكر كاتب الموضوع ولا يهونون الشباب كلهم

عندي اقتراح يا شباب :

أولا : اللي جرب البالونات (air lift) يا ليت يعطينا هالمعلومات :
(1) ماركة البالونات ( الاسم التجاري )
(2) مكان الصنع
(3) عنوان المحل اللي ركبهن عنده سواء بالرياض أو أي منطقة
(4) السعر

ثانيا : اللي جرب المساعدات يا ليت يعطينا هالمعلومات :
(1) نوع المساعدات ( لاندكروزر .. رنجروفر .. الخ )
(2) عنوان المحل اللي ركبهن عنده سواء بالرياض أو أي منطقة
(3) السعر


تحياتي للجميـــــــــع

[ولد الشايب]

نوع المساعدات رنجروفر

العنوان الشارقة شارع الملك فيصل - أي محل عنده يايات ومساعدات - لأني ما أذكر بالضبط

السعر 150 مع التركيب

[ابوقاسم]

يا جماعة الخير ..............
السلام عليكم اولا.............
وشكرا على اطرح الموضوع ثانيا............
وثالثا وهو بالنسبة للصوت هل هو من اليايات او شي ثاني ...............
لاني ما اعتقد انه من اليايات لانه يطلع معي حتى بدون تحميل ................
افيدونا جزاكم الله خير................
وهل يمكن تركيب هيدروليك لرفع السيارة على الباثفايندر ..........ووين الاقيه......
مع الشكر.........

[pathfinder]

ممكن توضح كيف طريقة عمل الكمبرسور يعني تنفخ البالون والسيارة تمشي مثلا تعرف ضغط الهواء وأنت ماشي وغير ذلك بارك الله فيك .


ايه اكيد تقدر تعرف ضغط الهواء وتنفخ وتنسم وانت تمشي....


شف الصوره

http://www.mekshat.com/pix/upload/images9/mk10851_airlift.jpg

عداد ضغط والزر اللي فوق ينفخ واللي تحت ينسم........

[ابوقاسم]

ممكن تعطينا تفصيلات اكثراخوي باثفايندر

[الباث الأسود]

السلام عليكم

بالنسبه لبالونات الهوا اللي تركب في وسط الياي الخلفي air lift فانا اذكر انك تطلبه من عند السماعيل اللي بالغرابي وهو يجبه ويركبه لك هذا على حد علمي

[البـدر]

ايه اكيد تقدر تعرف ضغط الهواء وتنفخ وتنسم وانت تمشي....


عداد ضغط والزر اللي فوق ينفخ واللي تحت ينسم........


بارك الله فيك أخوي لكن عندي بعض الاستفسارات وسامحني لأني ثقلت عليك وأنت ما قصرت شرحت وبالصور الله يجزاك خير .
أسئلتي هي :
هل تستطيع التحكم بكل بالون على حدة، وأين مكان الكمبروسر وإذا كان في الكبوت مثلا فهل يعني أني أحتاج إلى تمديد أسلاك له من البطارية ولي واحد أو ليين هواء إلى البالونين، وهل تحتاج له إلى كتاوت، وهل أجده وحده بدون البالونات لأنها عندي مركبة، وكم قيمة الكمبروسر إذا،أعانك الله علي وعلى أسئلتي .
أرجو التوضيح

[pathfinder]

ماتقدر تتحكم في كل بالون على حده....لكن اذا تبي اتوقع انه لازم تركب كمبرسرين....

وبالنسبه لمكان الكمبرسر تركبه بالمكان اللي يريحك .....انا عشان مافيه مكان عندي بالكبوت مركبه تحت السياره......والكمبرسر يجي معه كل القطع اللازمه لتركيبه.....وتحتاج تمدد اسلاك للبطاريه لكن اللي ركبت عنده طلع فاهم شغله وسواها بطريقه ماعرفت وشلون......وتحتاج تمدد ليين من الكمبرسر واحد لجهاز التحكم داخل السياره....والثاني يروح للبالونين وتجيك قطعه على شكل حرف T تقسم للبالونين.....

والكمبرسر ينباع لحاله وسعره بحدود 1000 ريال

[البـدر]

أخوي pathfinder عز الله إنك ما قصرت مشكور أخوي على هذه المعلومات القيمة الي استفدنا منها فجزاك الله خيرا