افيدونا ياهل الترهيم

[قناص الرمله]

بسم الله الرحمن الرحيم
السلام عليكم ورحمة الله وبركاته
مساكم الله بالخير الجميع
اخواني اريد ان احكي لكم معانتي مع سيارتي في البر والديره وياليت القى لي حل معها لانها بصراحه تعبتني
سيارتي هايلوكس موديل1999دفرنشين على يدي من الوكاله
راح اسلسل المشاكل لكم
1-السياره تصرف البنزين صرف الهبل خلال 200كيلو تصرف تانكي كامل
2-عزمها ردي بالحيل على الزفلت ماتتعدىسرعة 150مع العلم ان هذا حد دواسة البنزين
3-الكلبليتر مغيره قبل 6شهور من الوكاله
4-الكفرات بالون 900
5-في الطعوس والرباضات مافيها قوة جر ابدآابدآ مع العلم ان الهوا 10فقط
6-كثرة الدخان الاسود يعني ماتحرق البنزين وهذا بلى ابوك ياعقاب :mad:



لكن نصحوني بعض الشباب وقالو لي ركب مكينه 6سلندر عاد حبيت اسئل وش افضل المكاين ال6 سلندر الامريكي ولا الياباني وهي بتركب ولا لا

والقير اغيره ولا على ماهو عليه

افيدوني جزاكم الله خير قبل ماأحرق هالعله اللي نشبت بحلقي

__________
اخوكم قناص الرمله

[ع.ف.الدرويش]

السلام عليكم ورحمة الله وبركاته
.
.
أخوي كيف حالك..؟ ومن قلب كان الله بعونك على معاناتك..
تعليق بسيط.. تقول كفرات 900 ما تلاحظ إنهن كبار بالحيل على الموتر.. طيب هن كبار بطبيعة الحال يضيع عزم الموتر معهن فيصير سيء بالممشى والمراقى حتى..!
غير كذا تقدر تحصـــل بديل بالسوق فيه بالون بأحجام كثيرة وأصغر 800 حتى الـ 700 موجود.. وفيه إللي يركبن على الشاص كفرات شد البلد رمليات وحليلات.. وأعتقد إنها بتكون نافعة أو حتى غير ضارة بموترك..
لاحظ.. أنا معاي باترول ربع.. طبعاً 6 سلندر ركبت الـ900 ماعاد صار يمشي ممشى سنع حتى الـ200 ما يجيبها بالحسر 170 وبعد أنواع الترصيص..
ومن جد ناوي أبدلهن..
وأرجع كفرات شد البلد الصغيرات.. لأنهن سنعات
.
.
الأمر الآخر.. أنا بصراحة ماني ذاك الزود في الترهيم.. لكن الكلبليتر.. تقدر تستبدله بآخر من نوع رياضي.. أعتقد إسمه هوللي
بالإضافة إلى تركيب بواجي ( سبلت فير أو من الأنواع المتوفرة ) + أسلاك بواجي + هيدر مع نظام قزوز كامل ( هذا يكون وارد الإمارات والتركيب والتفصيل بالصناعية وإن بغيت أدلك على الورشة بعد دليتك ) + بالإضافة إلى المراوح الكهرباء يعني تلغي مراوح الوكالة وتركب غيرهن حقات سوبارو أو شيروكي على حسب اللي تجي عليها ويشبكهن لك ويشغلهن وإن شاء الله بيسرك العزم بعد كل هذا ( نفس الشئ إن احتجت أدلك على واحد شغله إن شاء الله حلو دليتك ) + وأخيراً تقدر تضيف على كل هذا النوز.. وهذا لحاله إجرام مع إنه مكلف وبزيادة.. والأمر وأولا وأخيرا راجع لك يالطيب..
.
.
أما مسألة مكينة 6 سلندر فهذه وبجد مشورع طيب بالحيـــل وبتكون نتيجته رائعة.. بس الله الله بالورش والشغـــل الزين.. وتذكر إنها نوعاً ما بتكلفك.. لأن هذا هو الترهيم..
.
.
أخوي.. هذا إللي أنا أعرفــــه وأتمنى من قلبي إني أكون أفتدك لو بالشئ القليل
وعلى قولتهم بإنتظـــــار البقية..
دمت بخير..
عبدالرحمـــن
ملاحظة.. إن كان لك أي تساؤل عن الورش أو أصحاب المحلات وانت بالرياض أرسلي على الخاص وأنا أبرسل لك كل اللي عندي.. وما لك إلا طيبة الخاطر..

[قناص الرمله]

وعليكم السلام ورحمة الله وبركاته





اخوي ع0 ف الدرويش(عبد الرحمن) بيض الله وجهك ورحم الله والديك مليااااااااار واكثر على الشرح المفصل وأفدتني أفاده مابعدها سؤال :good:


لكن اقول لك ليش مركب البالون؟؟؟
لأني دايم اروح للرمله (الربع الخالي) سواء في الشتاء ولا الصيف وهي تنفعني في الرباضات اول شيئ عريضه وثاني شيئ رفيعه ماتخلي الموتر يعلق بسرعه وانت عاد اخبر بالرباضات في الصيف والموتر ماهوب نشيط لذيك الدرجه :no2:



أما سالفة الترهيم اناخايف منها اشد الخوف :j لأن الترهيم اذاسواه غشيم والعياذ بالله يودي للجحيم :mad: الهدرز على حسب علمي أنه يزيد الصرفيه ومع طول الزمن يتعب المكينه :rolleyes: والNOS أخاف يطير الموتر عن القاع ولا ينفجر في البر ويقولون أرامكو طلعت عين غاز طبيعي :D هههههههههههههههههههههههههههههههههههههههههههههه

لكن تبي الصراحه انا مقتنع بالترهيم على قولتهم ( أما غناة الذيب ولافقره) :good:

لكن لا تزعل ترى مز وح تجي وتروح :p

لكن أولآ وآخرآ بيض الله وجهك على المداخله الحلوه والشرح المفصل ورحم الله والديك مليااااااااااااااااااااااااااااااااااار واكثر

____________
اخوك قناص الرمله

[داب الرمث]

ركب مكينة برادو 99 قوتها 3400 قوية حيل دور استخدام ياباني

[escape_man]

شف وانا اخوك وهذي نصيحتي لك لاني ارهم مواتري بس على خفيف واحصل نتيجه مو سهله
بس الفرق اني راعي نفود ولا ابعد يعني الموتر مايضره شي باذن الله لكن اذا كنت راعي طواريق
وروحات بعيده نصيحتي لك لاتسوي شي بالمكينه
غير بس الي اقولك وبتشوف فرق مو بسيط:
اول شي حاول ان عادم السياره يطلع باكبر شكل ممكن لذلك ركب هدرز وتلقاه بحول 700 ريال ودبه رياضيه ب 300
بيفرق معك الموتر اكيد
ثاني شي تحاول توازن خروج العادم والي زاد عندك بتركيب فلتر رياضي من الانواع الجيده وانتبه لانه بالسوق شي واجد
لايهمك.
جنوطك اذا كانك حاط جنوط ثقيله ومزودها بهالكفرات الي ماشاء الله عليك شلون متحملها حاول تغيرها بجنوط صناعتها المنيوم
وحافظ على تغيير فلتر البنزين والهوا بشكل دوري.

[SilverSniper]

أخوي قناص الرملة...
اذا تبي تغير المكينة إلى 6 سلندر لازم تغير كراسي المكينة وتغير القير والراديتر وتوزيع الحساسات والمكيف ووووووو :(... واذا اخترت مكينة بخاخ يلزم تغير الظفيرة كاملة وطرمبة البنزين وصفاي البنزين.. و و و و و.. :(.. مشروع مزعج.. وما يجيب همه..
لكن يبدولي من مشكلة مكينتك ان عندك بلف نار معلق.. شيك على البلوف والراس ولا تغير مكينة..واذا حسيت انك تبغى قوة زيادة.. لا تتعدى كلام أخوي escape_man..
..
أخوي الدريويش.. كاربريترات الهولي والايدلبروك ما تركب على 4 سلندر ولا 6 سلندر.. تركب فقط على مكاين 8 سلندر الأمريكية مثل 454 و 350... وما تركب بدون ما تغير الثلاجة... وبيكب بنزين ويدخن إذا ما غيرت عمود كام يفتح على صفر أو 1500 ويقفل على 6500أو 5500 أر بي إم.... وهذا يسمى تلغيم (تعديل) المكاين... ويختلف عن الترهيم....:)

[المربد]

وانا اضم صوتي للاخ القناص الفضي
((يبدولي من مشكلة مكينتك ان عندك بلف نار معلق.. شيك على البلوف والراس ولا تغير مكينة))

البلوف !! هي الحل الاول

[عاشق الجبل]

ماقصروا الربع

نصيحتي لك أن تغير الكفرات أول شي لأنها ثقيلة مرة

وركب وأنا أخوك تيربو من الأمارات أو أطلبه من أمريكا ( وتدعي لي )

شاهدت مقاومة سيارة هايلوكس 2700 غمارتين دفرنسين مع ماكسيما ماطلعت عليه الماكسيما إلا بعد الــ 180

طلع الدراهم وأنا أخوك وطرب رأسك :)

[ع.ف.الدرويش]

أخوي الدريويش.. كاربريترات الهولي والايدلبروك ما تركب على 4 سلندر ولا 6 سلندر.. تركب فقط على مكاين 8 سلندر الأمريكية مثل 454 و 350... وما تركب بدون ما تغير الثلاجة... وبيكب بنزين ويدخن إذا ما غيرت عمود كام يفتح على صفر أو 1500 ويقفل على 6500أو 5500 أر بي إم.... وهذا يسمى تلغيم (تعديل) المكاين... ويختلف عن الترهيم....:)
:D
السلام عليكم ورحمة الله وبركاته
القناص الفضي.. مرحبـــاً
كبداية.. تصحيح للإسم وهو الدرويش.. وإلا ترانا كلنا من ديرة واحده..:p
يليه.. بالنسبة للكلبليتر الرياضي فما كنت اعلمه سابقاً بأنه متوفر لفئة ستة سلندر وكذلك اربعة سلندر.. وارجوك اعذرني فانا لست بذلك الخبير.. وكل ما اردته هنا هو تزويده بما لدي من معلومات إلى أن يأتي أهل الإختصاص برد وتجاوب.. هذا واسمحي بان اطلب منك وقتاً لاتثبت من كلامي بسؤال زميل لي له الخبرة في هذا المجال..( وشكراً )
اما بالنسبة.. لكلمتي تلغيم وترهيم.. فالشكر لك على التوضيح.. شكراً لك شكراً لا تليق إلا بك..;)
.
.
هذا مالدي.. ودمتم بود جميعـــاً
عبدالرحمن..

[قناص الرمله]

السلام عليكم ورحمة الله وبركاته

يامرحبآ بكم ترحيبةالبدوبالسيل___--___ مزن تحدرمن جنوب وشمالي

بالنسبه لموضوع الموتر اللي هي الهلي :( راحت بلا عوده يعني بعتها تشليح وبأخس قيمه بعتها ب7500 ريال في تشاليح الدمام والسبب اني مسافر للدمام ويوم بقى 40 كيلو على الدمام طاح الكفر اللي قدام يمين وانا بصراحه مسرع امشي حول 145 ولادريت الا الموتر منسدح على جنبه ويروح يزحف ويتقلب 3 قلبات والقلبه ال4 وقف الموتر على التنده واطلع من الموتر واللحمدلله انا سالم وما كان معي احد ولكن بقيت العله اللي هي الهايلكس تدور في عقلي حتى اليوم وهذا سبب تاخيري في الرد ولكن الحمدلله عوضني ربي احسن منها وهو عطي الله جنيفان الشاص موديل 2005 وارد البريمي دوس ولا عليك :good:

وشكرآ لكم أولآ وآخرآ على الردود التي تنم عن فزعتكم وطيب اصلكم جميعآ :good:

__________
أخوكم قناص الرمله

[قناص الرمله]

بيض الله وجهك ياداب الرمث

[قناص الرمله]

بيض الله وجهك ياescape man

[قناص الرمله]

بيض الله وجهك يا silver sniper

[قناص الرمله]

بيض الله وجهك ياالمربد

[قناص الرمله]

بيض الله وجهك ياعاشق الجبل

[قناص الرمله]

بيض الله وجهك يا ع0ف0الدرويش

[المهنـدس]

سلام عليكم
تبي نصيحتي وانا اخوك؟؟
بما انك راعي مكاشيت بعيده (يعني منتب حول ديره لو تعطل تبي تغث ربعك وبس) سيبك من التعديل والترهيم هذا مع احترامي لاراء الشباب اللي علقو على الموضوع كلهم لاكن خلك واقعي ... تتوقع انت ولا انا او اي واحد من الشباب افهم من الشركه اللي صنعت السياره والاشياء اللي تحتاج لها؟؟؟ مع العلم انها كلها نتيجه دراسة سنوات طويله (ما جت بين يوم وليله) هذا شي الشي الثاني انا متأكد ان خسارتك بالاشياء اللي بتسويها بتغطي وزياده قيمه مكينه هايلكس جديده او شبه جديده.
اذا تبي نصيحه اخوك اترك شغل الترهيم والتلفيق لانه ما يعيش ولا ينفع بالديره والبر مده طويله :no2: بتتعب معه.
هذا نصيحة اخوك المهندس (مع العلم اني جربت ذا الاشياء ولا هونت عنها الا يوم ادركت انها تشدك ما دامت جديده وبعدها تغثك بالتعب والخساير).
نصيحة مجرب
تحياتي

[قناص الرمله]

السلام عليكم ورحمة الله وبركاته

يامرحبآ بكم ترحيبةالبدوبالسيل___--___ مزن تحدرمن جنوب وشمالي

بالنسبه لموضوع الموتر اللي هي الهلي :( راحت بلا عوده يعني بعتها تشليح وبأخس قيمه بعتها ب7500 ريال في تشاليح الدمام والسبب اني مسافر للدمام ويوم بقى 40 كيلو على الدمام طاح الكفر اللي قدام يمين وانا بصراحه مسرع امشي حول 145 ولادريت الا الموتر منسدح على جنبه ويروح يزحف ويتقلب 3 قلبات والقلبه ال4 وقف الموتر على التنده واطلع من الموتر واللحمدلله انا سالم وما كان معي احد ولكن بقيت العله اللي هي الهايلكس تدور في عقلي حتى اليوم وهذا سبب تاخيري في الرد ولكن الحمدلله عوضني ربي احسن منها وهو عطي الله جنيفان الشاص موديل 2005 وارد البريمي دوس ولا عليك :good:

وشكرآ لكم أولآ وآخرآ على الردود التي تنم عن فزعتكم وطيب اصلكم جميعآ :good:

__________
أخوكم قناص الرمله

مشكور اخوي المهندس على مرورك ومشاركتك لي تعتبر تاج على راسي :good:

لكن مثل ماقلت عوضني الله موتر اخير واسنع من الهايلكس وهو الشبح 2005

[القناص]

حمداً لله على سلامتك
ودام معك الشاص ادعوا لك بطول السلامه

[قناص الرمله]

الله يسلمك اخوي القناص


__________
اخوك قناص الرمله