مصيبة في الباثفايندر (الي عنده باث يخش)

[غضنفر]

السلام عليكم
الأعضاء الكرام عندي باث 2003 ماشي 20000 ماله عندي الا سنة تقريبا ومع ذلك طلعلي فيه مشاكل
واجد رغم ان استخدامي حشمة مرة وادلع السيارة بزيادة

1- دخلت للطعوس مره وقام الموتر يقطع عند الغيار الأول اخذت الموتر للوكالة وفحصوه ولا حصلوا
حاجة خربانة واخذت الموتر وغيرت فلتر الهوا وضبط الموتر الين قبل فترة بدا يقطع على السرعات
العالية ولا يتعدى 160 فهل سبب المشكلة هاذي الخلل المصنعي المعروف في الباث الي هو حساس
الهوا او منظم البخاخ

2-الحرارة الطبيعية للسيارة على الربع لكن من فترة صرت اذا تعديت 120 تبدا الحرارة ترتفع وتوصل
النص فهل هذا طبيعي وارجو من الاخوان الي عندهم باث يردون


3- احيانا مع دعس البنزين يطلع صوت هوا كأنه فيه شق في الكنداسة او الدبة فهل هذا طبيعي

4-الحين جينا للمصيبة الي تخليني افكر ابيع الباث هي اني حصلت فيه تهريب زويت اسفل
السيارة من جهة عمود الدبل والدفرنس الخلفي مع ان السيارة تقريبا جديدة ولا عمرها طبت البر الا 3 مرات وماشية فقط 20 الف كلم فعلا شي غريب ويدل على ردائة نيسان

واخيرا ارجو من الاخوان الي عندهم باث وجربوه في النفود انهم يعلموني كم توصل الحرارة اذا جلدت الموتر هل ترتفع فوق النص .

[العـابر]

بالنسبة لصوت الكنداسة فهذا طبيعي في كل الباثفندر 2003 والوكالة يصلحونه على الضمان وانا صار معي بعد الضمان وصلحته بـ 50 ريال وهو من الدبات اللي تحت السواق والراكب مختومة مع الجهتين ومع الوقت والحرارة ينفتح الختم حقه ويتلحم بسهولة وماعد يرجع ان شاالله .

[pathfinder]

المشكله الاولى اتوقع انه من منظم البخاخ صارت معي يوم مشت السياره 25 الف......لكن عندك مشكله في تشغيل السياره ولا تشتغل بصعوبه؟

الثانيه هذي عاديه في اغلب النيسان وتصييخ وتنظيف رديتر ويرجع احسن من اول انشالله....

الثالثه مادري عنها......اصلا انا فكيت اقزوز الوكاله وركبت واحد تفصيل.......شف طريقة العابر

الرابعه هذي والله غريبه.......لكن هل انت مغير مقاس الكفرات.......لانها ممكن تسبب مشاكل زي هذي.....

والله اعلم

وانا حرارة سيارتي بالنفود مع هالحر اكيد لازم ترقى فوق النص

[غضنفر]

شكرا لكما على سرعة تفاعلكما
بالنسبة للتقطيع ما عندي مشكلة ابدا في تشغيل السيارة لكن لمبة check engine مولعة
وبالنسبة للحرارة السيارة تقريبا جديدة ولا اعتقد ان الاديتر امداه يتوسخ
والكفرات شد بلد

[البرحه]

السلام عليكم


ردائه النيسان

تقصد ردائه الباثفيندر :j

لا تحكم على شركه كامله بسبب ان وحده من سياراتها ما عجبتك :no2: :no2: :no:

ارجو انك ما تحمق علي وبعدين يجدر بك انك تشاورقبل لا تشتري

كان عرفت وش عيوبه قبل لا تشتريه وكل سياره فيها عيوبها :mad: ومميزاتها :)

ارجو انك ماتزعل وكلها اختلاف راي :D

البرحـــــه

[pathfinder]

اها.......اذا لمبة المكينه مولعه هذا غالبا حساس الهوا اللي مسوي التقطيع..........الـ Air mass

وبالنسبه للرديتر حق الباث صدقني ترا هوايته تجميع الوصاخه من الشارع اوراق واكياس وحشرات وتراب واوراق شجر....

يتوصخ بسرعه خطيره..... انت جرب يوم من الايام اقعد تحت الرديتر وطلع كل الاوراق والوصاخه اللي فيه بعدين رح لمغسلة السيارات وكلمه بس يرش الرديتر مويه ويكون ضغطها قوي......كانه ينظف مكيف وجرب........هذا ارخص واسهل الحلول جربه واذا مانفع نشوف حل ثاني


واذا كنت موجود بجده اقدر اعطيك ورشه تروحلهم ويحطون السياره على الكمبيوتر عشان تعرف ليش اللمبه مولعه......مع اني اجزم انه حساس الهوا

[الربذي]

اخي الله يعينك
لاصرت محافظ على السياره ومع ذلك كل شوي طالع خراب فهذا يجعلك تكرة السياره وتحط حرتك فيها
بالنسبة للمبه جط انجاين
او افحص المحرك قد ولعت معي مرتين قبل كذا مره من البواجي لانه انفقعن اثنين تفقعن من جوى بسبب السرعه وايضا شكلهن حقات صغيره مو جيب تخبر ورشنا وفكيت اصبع البطاريه وتركتة فتره ورجعته ومانفع الا انه في احد المرات نفع وطفت اللمبة
والمره الثانيه مطر وناسه وولعت بدون سبب وشطف وبعد فتره طفت من كيفه بس اعتقد بعد ان تم تنظيف اللتر يوم غيرت الزيت
اما الحراره فهي غير طبيعية ابدا الا اذا استعمال غير سعودي لان الي اعرفه الربع او الثلث اذا ارتفعت مررره 0000 الي معي استعمال امريكي وعلى طووووووووووووولالنص برد حر شتاء صيف احيانا تحت الصفر الحراره وهابه وشماليه وناطحن الهواء والناس اغلبهم ياقف يحط كراتين من شده البروده لكن رفيقك النص00 شيك على الاديتر يمكن فيه حاجه قصدي ورق شجر ويمكن عش عصافير صارت مع واحد اما صوت الكنداسه فبهذلبي بس تلحيم في تلحيم واللحين صوت من عند القزوز
الي يخبر حل يقول لنا والكنداسة غاليه مره ودي اغير كل الكنداستين
محبك

[عطيب الشوق]

-
-
-
-
-
-
-

أخي الكريم الباث الاسود

السلام عليكم ورحمة الله وبركاته .. والله يعينك على ما ابتلاك ويعجل بفرجك

يعلم الله إني مادخلت لأجلّ عليك مصيبتك ولكن أنا ما أدري وش اللي بالي الناس بالباث فندر مدري بندر مدري منصور .. تدري والله إنها غلطة نيسان اللي ما تغفر .. أردى ما رأت عيني والله يا واحد من الشباب معاه واحد إنه مغير له المكينه ثلاث مرات والقير أربع مرات وللأمانه من المديلات القديمه .. نزل المديل والشكل الجديد وأستبشرنا خير .. وطلع ما يسوى للأسف .. مديرنا ماخذ له واحد الظاهر انه 2004 او مثل مديل موترك يعلم الله انه مايمدحه .... على العموم أنا ما أبي أزيد همك هم لكن صدقني لو تبيعه وتزيد على قيمته شوي تاخذ لك فتك مديل 2002 او 2003 فل أبشن بتلقاه بحدود السبعين وعلى كيف كيفك فل ابشن وتكفيك مكينته vtc 4800 أشهد بالله مووووتر على الكيف
على العموم حبيت ابدي النصيحه بدال ما تعنا على غير مصلوووووح

تحياتي

أبوسعد

[غضنفر]

عطيب الشوق مشكور على النصيحة وانا افكر فيها وخصوصا الباترول ربع

[المنبسط]

السلام عليكم ورحمة الله وبركاته
أسأل الله أن يرزقك سيارة تبهج خاطرك وتريحك ,أنا جربت الباث 2002 وجربت 2003 أما 2002 فمافيه حصاة ماوطاها ورحنا عليه لصلالة وفي الربيع ما قصر روحات للصمان وغيره ومع هذا بدون أي خرابات غير تغيير الفحمات وفلتر القير لأنه اوتووالبواجي , لكن انتبه وهذا مايقع لكثير من الناس من زود الحرص وهو أنه يغير فلتر الهواء من صاحب غيار الزيت والمفترض تشتريه من الوكالة فقط بمعنى لا تشتري من وكيل معتمد وخلافه من النصابين اللي يلعب على الناس ويقول أنه أصلي وهذي نصيحة من ميكانيكي شرواكم, وأما 2003 فله معي فترة ومن أحسن ما يكون من ناحية الرساوة فلا يعلى عليه ومن ناحية قوة الفزة (يبرد كبدك) وهذا قد يكون خلل عندك في السيارة , واحد من الربع مطلع هايلكس 2005 وغير القير وهو مامشى 20000 فهذا شاذ ولا يأخذ حكم العموم لأننا نعرف قوة الهايلوكس
حبيت أشاركك في الموضوع أخوي بلاك باث وأتمنى اني أفدتك بشيء ولو بالسواليف.

[غضنفر]

الأخوان الكرام ابشركم الموتر طلع من الوكالة وتهريب الزيت طلع بسبب لي مفقوع(ولا ادري وش الي فقعه)وغيروه
والصوت الي مع الدعس يقلون طبيعي وفي كل الباثات واللمبة صلحوها ولا شفت في الموتر تقطيع ويقولون انهم ما غيروا
الحساس لأنه مهب خربان وبالنسبة للحرارة يقولون ان السبب ان الاديتر كان فيه هوا ونسموه لكني يوم خذت الموتر تبينلي
انه ما فاد في شيء لأن الحرارة ما زالت ترتفع اذا تعديت 120 وكلما زدت السرعة زادت الحرارة وشكلي برجعه لهم بكرة
والله يعين على التكاسي

[* ولد الديمن *]

السلام عليكم ورحمة الله وبركاته

أخوي black path ابحاول افيدك على قدر ما استطيع

للعلم أني معي باث 2004...
___________________________________________




2-الحرارة الطبيعية للسيارة على الربع لكن من فترة صرت اذا تعديت 120 تبدا الحرارة ترتفع وتوصل
النص فهل هذا طبيعي وارجو من الاخوان الي عندهم باث يردون

من نا حية الحراره واحد اعرفة زين معة 2003 ترتفع الحراره الى النص بنظري الامر طبيعي خاصة في الصيف لا زم تلاحظ هذا الشي.....

__________________________________________________ _______


3- احيانا مع دعس البنزين يطلع صوت هوا كأنه فيه شق في الكنداسة او الدبة فهل هذا طبيعي

نفس الرجال الي قلتلك صار معه نفس الي صارلك راح للوكالة وصلحوها على الضمان يعني لا تخاف....
__________________________________________________ _____



4-الحين جينا للمصيبة الي تخليني افكر ابيع الباث هي اني حصلت فيه تهريب زويت اسفل
السيارة من جهة عمود الدبل والدفرنس الخلفي مع ان السيارة تقريبا جديدة ولا عمرها طبت البر الا 3 مرات وماشية فقط 20 الف كلم فعلا شي غريب ويدل على ردائة نيسان

لا تفكر تبيع ولا شي هذا الشي صار لي أنا شخصياًً مع أني معي 2004 في الحقيقة أنا فكرت مثل تفكيرك أني ابيع الموتر لأن الدفرنس خرابه خطير ، وطاحة السيارة من عيني لكن ترا حلها بسيط، قبل ما قولك حلها اعرف سبب المشكله هو أنه يوجد هواء داخل الدفرنس فيدفع الزيت الى الخارج ، طبعاً أنا في الرياض والمشكلة صارت لي وأنا في أبها خفت ورحت لورشة غير لي الزيت يوم فك صرة الدفرنس طلع صوت تنسيم (خروج هواء) ، يوم رجعت لرياض رحت للوكاله وغيرو الزيت وضبطوا الوضع وقالولي انه كان فيه هواء والى الحين ما هنا خلاف كلش زين.....


طبعاً أنا ما قول ان نيسان زينه من ناحية الصيانة كلها سرق في سرق... :j

للمعلوميه: ما فيه سيارة في العالم ما فيها مشاكل.... ومعلومة ثانيه:لكل مشكلة حل..

وشكراًُ

[المنتفش]

بسم الله الرحمن الرحيم
السلام عليكم جميعا
اخوي بلاك باث لاتنقهر ولاتتنرفز هذي المواتر كلهن كذا لازم كل 10000 سياره لازم يصير فيه وحده ولاثنتين فيهن خطا مصنعي انت ماشفت الجميح كل فتره مسوي اعلان استدعاء لاحد موديلاته وحبيت اضيف هذي الاضافه بعض الناس وخاصة ملاك ومحبي التويوتا يشنون الحملات ويظهرون الاشاعات على منافستهم نيسان مع ان نيسان اثبتت جدارتها في كثير من سياراتها وخير دليل الباث فايندر الذي عجزت تو يوتا ان تظهر له المثيل وقد فشلت في جميع محاولاتها حاولوا بالبرادو وغيره لكن فشلوا والان الباث فايندر تقريبا يعتر من السيارات العشر الاوائل في المملكه خصوصا في سرعة انتشاره
وهذا ردي للمشككين في جودة نيسان .... الواحد الى صار معه تويوتا يحسب ماهنا الا هي هذاك منول ... نحن لا نشكك في جوده تويوتا ولكن واقع نيسان فرض نفسه . عذرا على الاطاله بالنسبه لموترك اخوي بلاك باث المفروض بعد الخرابات اللي صارت رحت للوكاله وعلمتهم عن الخرابات وهذا اللي سويته ولكن المفروض انك قلت لهم يفحصونه تماما وبالنسبه لخراب حساس البخاخ اشوفه سوى جدل كبير مع ان القليل اللي يحصلهم ,,, وحبيت انبه على نقطه بما اني احد ملاك الباث فايندر
ارى ان اللي معهم تماتيك مواترهم اكثر حساسيه من العادي وهذي اصلا قاعده بكل المواتر خصوصا ان اللي معي قير عادي
يعني فيه فرق بينه وبين التماتيك من ناحية الخرابات وانا لاحظت ويمكن لو تسأ ل اصحاب الباث فايندرات قير عادي وتماتيك تجد ان خراب حساس البخاخ بالتماتيك فقط ومن ناحية الصرفيه التماتيك اكثر صرف من العادي.

[غضنفر]

المنتفش الموتر الحمد لله ضبط بس الحرارة ما زالت ترتفع اذا تعديت 120 ترتفع فوق الربع بس ما توصل النص لكن اذا
ما اسرعت تكون الحرارة طبيعية على الربع فهل هذا يصير معكم يا ملاك الباثفندر

[غضنفر]

المنتفش الموتر الحمد لله ضبط بس الحرارة ما زالت ترتفع اذا تعديت 120 ترتفع فوق الربع بس ما توصل النص لكن اذا
ما اسرعت تكون الحرارة طبيعية على الربع والوكالة يقولون انه طبيعي فهل هذا يصير معكم يا ملاك الباث

[الاحداثي]

كان الله في عونك أخي العزيز !! والصيف مثلك عارف يبين العيوب الموجودة في السيارة والحقيقة أن الباثفايندر رائع وعملي ونشيط وجربناه ( موديل 2002 ) في مواقع شديدة الوعورة في الدهناء والصمان وما شفنا منه الا كل خير !!
وبسيطة وان شاءالله ما تشوف شر انت وسيارتك .

[المنبسط]

السلام عليكم ورحمة الله وبركاته
أخوي بلاك باث أنا معي 2003 وتوصل الحرارة إلى تقريباً الثلث في الظهر أو إذا أسرعت وهذا طبيعي جداً ريح راسك .
المنبسط

[غضنفر]

المنبسط الله يريحك مثل ما ريحتني الحين نقدر نقول ان الموتر صار :good:
وابشرك بعد ما خذت الموتر من الوكالة قلت لازم اتاكد ان التقطيع راح وتقاومة مع لومينا وبليزر مرتبتين
وكلهم 6 سلندر والبليزر مكينته 4200 وعدد احصنته 275 حصان والحمد لله الباث راح عليهما قومة
وخط وهذا يثبت ان مكينة الباث جبارة وبالمناسبة تم اختيار مكينة الباث VQ3.5L DOHC V-6
عام 2005 للمره الحاديه عشر ه على التوالي بجائزة واحد من احسن عشرة محركات في العالم وللعلم هذا الأنجاز ليس له مثيل فلم يسبق لأي محرك ان فاز بهذه الجائزه 11 مره متتاليه وكذلك صنف هذا المحرك بأنه افضل محرك 6 سلندر في العالم واليكم الدليل :
اضغط هنا (http://subscribers.wardsauto.com/microsites/Newsarticle.asp?newsarticleid=2737201&srid=10088&instanceid=55175&pageid=9608&magazineid=1004&siteid=26)
وهذي كم صورة هدية لكل من شارك ورد وتفاعل مع موضوعي
http://www.nissan-arabia.com/vb/attachment.php?attachmentid=10251&stc=1
http://www.nissan-arabia.com/vb/attachment.php?attachmentid=10252&stc=1
http://www.nissan-arabia.com/vb/attachment.php?attachmentid=10253&stc=1
http://www.nissan-arabia.com/vb/attachment.php?attachmentid=10254&stc=1
http://www.nissan-arabia.com/vb/attachment.php?attachmentid=10255&stc=1
http://www.nissan-arabia.com/vb/attachment.php?attachmentid=10256&stc=1
http://www.nissan-arabia.com/vb/attachment.php?attachmentid=10257&stc=1
http://www.nissan-arabia.com/vb/attachment.php?attachmentid=10258&stc=1
واخيرا هذي هي التغريزة الي ما ينفع معها الا السحب















http://www.nissan-arabia.com/vb/attachment.php?attachmentid=10261&stc=1

[العـابر]

اخوي تعقيب بسيط على موضوعك كما ذكرت لك سابقا عن الصوت اللى في الدبات ماله علاقة بالكنداسة والورشة اللي صلحت فيها سيارتي ولحمو لى الدبات قال لي اذا رجع الصوت افكهن لك واحط ماصورة بدالهن لان مالهن علاقة الا انهن فيهن كربون للتخفيف من العادم وحماية البيئة . (على كلامة )
الثاني سمعت وانا ماادري ( انفض شليلي ) يقولون ان حرارة الاوتو ماتيك اعلى من العادي بسبب وجود اديتر خاص لتبريد القير
وسلامتكم وماتشوفون مع الباثفيندر الاكل خير ولا يهمونك حقين التويوتا انا جربت vxr 2002 ثمانية سلندر حق واحد من الربع ولا شفت هالي يقولون من قوة وعزم صراحة اقل من عادي هي الشغلة سمعة ( لا احد يزعل من حقين التويوتا كل واحد يقول اللي يبي من دون زعل )

[غضنفر]

العـابر مشكور على ها المشاركة وعلى فكرة موتري قير عادي فل كامل والكامل الله

[المنتفش]

ايه نعم شي طبيعي اخوي بلاك باث ارتفاع الحراره بالسرعات القصوى ياخي بعدين ترا جونا حار يعني قدر شوي الموتر بالعكس ولله الحمد هذا معدل ممتاز بالنسبه للسيارات الثانيه بس لايضيق صدرك هذا شي طبيعي.

[شاص]

أعرف واحد من الزملاء معه 2004 عنده مشكله بالحرارة قالوا له الوكاله أن به خلل مصنعي وغيروا له الأديتر كامل وضبط معه

[غضنفر]

المنتفش

شاس

شكرا لكما

[ولد الشايب]

أخي black path :

بالنسبة للمشاكل اللي في الباث اللي ذكرتها

1- للمشكلة الحساس نصيحة للجميع الإخوان اللي يبون يغيرون فلتر هواء لا تغير إلا من الوكالة

لأن الحساس حق الفلتر سريع الخراب مع الفلاتر التجارية ويسبب تقطيع بالموتر وقلت السرعة ويغير كل 25-30 ألف ونصيحة للشباب اللي معهم باثفايندر أنهم ينظفون الفلتر بين فتره وفتره لأنه يمتلىء غبار بسرعة خاصة مع النفود .

واحد من الربع مطلع ماكسيما 2004 يوم جاء يغير فلتر حط حق البناشر ما أمداه يطلع من المحطة إلا تفتفت عليه ويكلم الوكالة وقالوله إنفصل الحساس وتعال بأسرع وقت ودفع 600 ريال وهو يضحك


2- بالنسبة للإرتفاع الحرارة هذا شيء طبيعي في الباثفايندر والسيارات بشكل عام أنا أول ما ارتفعت الحرارة ضاق صدري وإذا رحت البر خاصة آخر الأيام في درجات الحرارة العالية من 40 وفوق وأنا مشغل المكيف في عز الظهر وبعض الأحيان مشغل الدبل يوصل إلى النصف مع العلم أن القير تماتيك وقمت أسأل وأشوف راعين الباثفيندرات والنيسان بشكل عام الباترول مع أنه ثلاث مراوح إلى أنه يرتفع إلى النصف أيضاً المكسيما إلى النصف في السرعات العالية من 160 ورايح على درجات حرارة من 40-45 فهذا الشيء طبيعي حتى أنا سقت لاندكروز وماشيء 150 ارتفعت إلى النصف في درجة حرارة أكثر من 50 كذلك الباثفيندر نفس الشيء .

وأخيراً شريت مروحة مدسيدس قديم أصلي ( 280c ) وهي مشهوره بالفرة السريعة ومكونه من عشر ريش وركبتها جنب مروحة المكيف والحمد لله خفت كثير خاصة مع النفود وأنا مسكر المكيف .

بالنسبة للمروحة المكيف الأصلية في حالة أنك مسكر المكيف ما تشتغل إلا في حالة واحده وهي إذا ارتفعت الحرارة إلى النصف فمن غير المعقول أن وكالة عريقة مثل نيسان تخلي السيارة ترتفع إلى النصف وبعدين تشتغل المروحة حقت المكيف . فهذا شيء طبيعي جداً ونصيحة إقرأ كتلوج السيارة وتلقى كلامي صحيح رغم أن الكتلوج يقول من نهاية الربع الأول إلى بداية الربع الأخير كله في نطاق الدرجة الطبيعي وعموماً إذا مشيت 120 في الخط لا ترتفع عن الثلث في أي ظرف من الظروف .

3- في شيء مضايقني في أوقات الظهر مع ارتفاع درجة الحرارة تطلع حنه تشبه حنه vxr ومع الحنه ينقص عزم المكينة بشكل ملاحظ جداً وسألت واحد من الربع معه باترول قال نعم صحيح وحله تشيل مروحة السير الكبيرة وتضع مروحة أكبر منها ولها سيور خاصة بها وقال أن واحد مجربها ولا طلعت هذي الحنه ويركبنها بالرياض والقصيم .

وإن شاء الله إني بركبها إذا وجتها لأني أحس أن الحنه تنهش وتقلل عمر المكينه .

أخيراً الباثفيندر هي السيارة الأفضل من بين قرائنها في الخليج هنا وهي تتزايد بشكل كبير ومبيعاتها كثيرة جداً في الخليج وهذا طبيعي لأنها من كل النواحي ممتازه السعر أولاً ( شراء أو بيع ) التحمل العزم وكثير من الأشياء
وأنا مشيت على السيارة أكثر من 80 ألف ولم أجد فيها أي عيب سوى موضوع الحرارة والحنه ولكل مشكلة حل
وماشاء الله ماني مقصر فيها هذا الموسم الثاني اللي أطلع فيه للصمان والشمال ومركب تانكي ورا وسلة والحمد لله ماشية معي .


كثرت عليكم الكلام ولكني شخص تفصيلي في الكلام حتى أوضح الصورة للجميع .

الإضافات على سيارتي :
1- دعامية
2- تانكي ماء 90 لتر
3- يايات رنج روفر ( بسبب نزوله مع التحميل )
4- سله

[المجد]

السلام عليكم
هلا اخوي الباث الاسود .. للأسف اخوي حنا شعب لايقرأ .. الكاتلوج حق الباث يقول بالنسبة للحرارة ان ارتفاعه للنص طبيعي خاصة في مثل اجوئنا الحارة .. بس اذا تعدا النص وقف على طول لأنه فيه مشكلة ..
انا معي باث 2004 فل اتوماتك ماشي ممكن 18000 _ وكان معي اول باث موديل 2000 ..
اللي قاهرني بالباث انه يلهط بنزين اعبيه جوا الديرة ب 60 ريال وتولع اللمبة حقت البنزين بعد 350 كيلو بس .. للأسف ماهو اقتصادي ابدا . ودمت سالما .

[السا في]

انا شخصيا معي باث ماشي 120000ومزبوط ومشكله الحراره والله اعلم ان البلف حق الفندر يقفل يعني يسكر وبهذي الحاله يبغاله تنسيم عشان يفتح للمويه وهذي صارت مع راعي 2003وصلحها عند فني ب20ريال