ما هو أكبر رقم لعداد المسافات لــسيارة مرت عليك - إختبار

[مهندس الكشتات]

السلام عليكم
تناقشنا أنا و أحد الاخوة عن عداد السيارة و ممشاها و أثرة علي نسبة أستهلاكها
و عن أفضل انواع محركات السيارات في قوة التحمل .

تذكرت أول سيارة إشتريتها و كانت كابريس 1991 مستعملة في سنة 1992
حشمتها أول سنة بس ... و بعدين !! (( بر و ديرة ))
و بعتها في 2003 بعد تعرضها لحادث .

و كانت المكينة تعمل بكل كفاءة ..
و خلال استعمالي لها بدلت أشياء أستهلاكية فقط للمحرك لاغير .
((و القير قام مرة واحدة و ذلك سوء إستخدام مني .))


و كانت العداد ماشي أقــل من 600 ألف كيلو بقليل

و للعلم كان عندنا في العائلة سيارتين كابريس غيرها و حدة 91 و الثانية 92
و بعناهم و المكاين مافيها شئ
لكنني ما أذكر كم ماشيات لكن أذكر أنهن مكروفات

ها وش قلتوا هل من مبارز للكابريس !!


سؤالي للاخوة

ما هو أكبر رقم لعداد المسافات لــسيارة مرت عليك .. (( أستخدمتها ))
بدون صيانة (( أستثني الاستهلاكية ))

لا حظوا إني قلت (( مـــــــــرت )) يعني كانت عندك و راحت بعتها او غيرة

لأنني غير مسئول عن إصابة أحدكم بصاروخ (( نـت نـت )) عبر الشبكة العنكبوتية

و ذكر الله طيب

[ملقاط بن جمر]

400 الف وزيادة

هايلكس موديل 2001
بس مدري هل جاها صيانه والا لا

[كم كيلو باقي]

تبي تشوف ارقام فلكية في العدادات ؟

اذا ركبت مع تاكسي أقرا العداد

أو الدينات والتريلات اللي تشتغل بالخطووووط

[العوووام]

انا كان معي سياره مطلعها وكاله يعني اصفاروبعد سنتين بعتها وكان العداد وقت البيع220الف

[مهندس الكشتات]

حي الله الشباب

أنا أقصد سيارة أنت إستعملتها .. طبعا تكون أنت أدري واحد فيها
و أن تكون المكينة ما قامت أو خبطت أو خراب قوي

[الوشاح]

اثنين من اقاربي يملكون ارقام فلكية
الاول ددسن 92 تخطت الـ 600 الف بدون توضيب ( السيارة باسمة )
الثاني في اكس ار 98 تخطى ايضا ال 600 بدون توضيب
اعتقد الوضع عادي وسمعت فيه ناس وصلوا مليوووون كيلو بدون توضيب
..

[التعـ King ـديل]

سجل عندك

باترول 88 وصل لـ 900.000 بمحرك الوكاله وبنظافته لانقص ولا حراره
باترول 92 وصل لـ 550.000 بمحرك الوكاله وبنظافته لانقص ولا حراره
كابرس 89 وصل لـ 700.000 بمحرك الوكاله وبنظافته لانقص ولا حراره
جي اكس 94 وصل 370.000 بعدين وظبناه وبعناه

[الفنطاس]

تويوتا رويال كراون مودبل 1984 وصلت بها 550 الف كيلو مع مكبنة نظيفة وبدي نظيف

[ولد وايل..]

كابرس 86 العداد تعدى 900 الف ووقف وعقبها مشي عليه فوق السنتين ولا قال أح...

مكينه وكالته...

كراون فكتوريا 98 وصل الى الآن 550 وزود ومكينه شد بلاده...


أحرص على غيار الزيت بإنتظام ولا تدلع الموتر وتداعس به على التصنيفه ...وراح يعمر..

[s3ed]

لاند كروزر 2000 تقريبا 500 الف بعتة والي الان ماشاء الله علية


واحد من الربع عندة موستبيشي يخبرني عن سيارتة يقول مشيتها 900 الف وعيني على المليون
يقول اخر شي طلعتها من المغسلة وفجاة احترقت يقول اضني انها اانتحرت من كثر المشي خخخخخخخ

[azd]

السلام عليكم
وكالة نيسان البابطين فى الكويت
عملت مسابقه لاكبر مسافه مقطوعه على جيبات بترول
النتيجه الاولى موديل 88 نظيف جدا قطع 1200 مليون ومائتان كيلو متر
الثانى 89 قطع 900 الف

[((ابوملاك))]

فورد 1996 اف 150 حاليا موجود

ماشئ فوق الـ400.000 بواجد بس بكم مدري

[مهندس الكشتات]

ماشاء الله
أنتم يا الربع تلاحظون أن أغلب السيارات القديمة مكاينها جبارة

بعكس الجديد
علي الرغم من التطور الكبير و أسعارها المبالغ فيها بشكل كبير

إلا أنها ما تعيش كثر القديم

[محب النياق]

فكتوريا 2000 ماشي 800.000 وعليها شوي وشارينها وكاله

[برقاوي 666]

سجل عندك كراسيد 92 ستة سرندل 750 كيلومتر

ولها فتره تطير الزيت وما اشوفه

[الدوسي الاصيل]

جيب ربع تويوتا 98 ماشي 460000كم ولله الحمد

[يوسف 206]

ماشاء الله ارقام خيالية
عز الله هذولا الي يحللون الموتر صح ودكم تعطيهم سيارات جدد
اما انا بالنسبة لي ماكد مر علي رقم خيالي اكثر سيارة مرت على ذمتي باترول ٢٠٠٥ شريته ماشي ١٩٠٠٠ وبعته
ماشي ٢٠٠٠٠٠

[ابوطاقية]

كرسيدا 91 مشت 650 الف وخبطت
كامري 95 v6 مشت 800 الف وخبطت بسبب حراره

[صوت الجزر]

السلام عليكم ورحمة الله وبركاته

كورولا 94 لبا قلبها شريتها ماشيه 10 الاف وبعتها ماشيه 470 الف

باترول 2001 ماشي 465 الف قابله للزياده ما شاء الله تبارك الرحمن

[عاشق المقناص6]

سيارتي هايلكس 92 ماشيه
700000 الف وزياده ولي 4 شهور فااصل العداد

[ابوحمزة 2009]

هههههههههههههههه

عندي جيب 84 ماااشي 5 مليوووون العداد خربان ويمشي بالمتر طبعا مهووو عداد الزيت

[مmhد]

عندي لندكروزر 2006ماشي 75000 وترا يعتبرونة كثثثثثثثثثثثير في البحرين لاني رحت معرض وقالي ممشاة اكثر من عمرة لان عندنا في البحرين يحسبون 10000 لكل سنة :mad::mad::mad:

[mdw]

تويوتا 225 الف

[.أبوعبدالرحمن]

لاندكروزر 2001 جي اكس ار 310 الف كم

وموجود إلى الان ولا فيه أمل نبيعه

[بيق مان]

عندي لندكروزر 2006ماشي 75000 وترا يعتبرونة كثثثثثثثثثثثير في البحرين لاني رحت معرض وقالي ممشاة اكثر من عمرة لان عندنا في البحرين يحسبون 10000 لكل سنة :mad::mad::mad:
اجل ياطيب الشراء من عندكم والبيع في السعودية :good2:

[هوى نسري]

فكس ار خليجي موديل 2000 اشتريته جديد وبعته قبل سنه ماشي 470 الف

[Bader-M]

كامري 2000 م

تجاوزت 510 الف كم لم اقم بتوضيب المحرك خلال فترة استخدامي لها التي امتدت عشر سنوات وزيادة

تقبل مروري

[خيال البوادي]

فورد كراون فكتوريا 89 عندنا وكالة ماشية الى الأن 700000 ماشكت من شي مهم غير توضيب قير بسبب سوء استخدام الله يتمم عليها

[الشهابة]

سيارات استخدمتها شخصياً ..

1 . كابرس 91 شارينه جديد و اخذته من الوالد مشى معه حدود 100,000 كلم و مشى معي 420,000 كلم و بعته ما فيه شي و لله الحمد ..

2 . كابرس 95 شريته انا جديد و بعته ماشي بحدود 300,000 كلم و لا فيه شي و لله الحمد ..

3 . ددسن 98 شريتها جديده اول ما طلعت ( ابو برطم ) و بعتها ماشيه حدود 300,000 كلم و شبه بوشت و بدت مكينتها تنقص ..

اما باقي السيارات اكون قد بعتها ما تعدت 200,000 كلم و لا لاحظت على مكاينها شي من نقص او تبويش او غيره ..

ملاحظه .. سلم لي على الكابرس و انا اشهد إلى يوم الدين بأن الكابرس موديلات 91 و 92 و 93 مكينه 350 مراوح عاديه ماهي كهرباء سياره ينشد فيها الظهر و الله ..

[ttt104]

انا اعمل في امن الطرق ومرت علي تريلة نقل محروقات من ينبع للقصيم ماشية 950000موديلها 2005

[Lover gmc]

ماتلاحظون ان مكاين الامريكي هي اكثر شي تمشيك كيلوات كثيره بدون توضيب [ اذا احسنت معاملتها طبعا ]

ويقولون الامريكي موب زين ولا هو اعتمادي

عموما انا شفت جمس حوض 78 مع شايب فاكه على يده وكاله

ماشي 800 الف والمكينه والقير شد بلد ماشاء الله تبارك الله

وارجوكم ذكر الله .. ترا حتى انا اخاف عليه : )

ومرت علي فورد فكتوريا ماشيه 380 الف الظاهر موديله 96 م والمكينه والقير شد بلد ماشاء الله

وجمس 97 سوبربان ماشي 340 الف والمكينه والقير شد بلد ماشاء الله

وكامري بوقس انكسر راس المكينه وهي ماكملت 200 الف

كيا وصلت 200 الف وفوق والمكينه شد بلد والقير برضه ماشاء الله

شوف عيني : )

[D.luffy]

هايلكس 88 على يد ابوي من الوكاله 700 الف جمس 88مع عمي دفرنسين ماشي مليوووون ثمين بوشة عليه المكينه

[شماريخ]

موتري توه تحت التمرين قلوا ماشاء الله تبارك الله باثفندر موديل 2001 ماشي بس (474.000) اربعمائة واربعة وسبعون الف / اذكر الله يالربع

[ابا الأفلح]

عند واحد من اخواني التما اظنها 90 او 89 ماشيه فوق ال 600 الف واربعه اسلندر وشغاله الحين على اثني سلندر
واعرف واحد انعرض عليه جيب 2010 اظنه vxr بسعر رخيص جدا فستغرب وذهب الي الوكالة عبداللطيف جميل يبي يشوف الجيب ويحصله ما شي 240 الف وكان طايف على وقت نزول ال 2010 مدة 6 شهور بس فستغرب ودار نقاش بينه وبين الموظف فتظح ان راعيه مطلعه منهم نظام التأجير المنتهي بالتمليك ولم يسدد وسحبوه منه ويحاولون يبعونه وبعد عمل عمليه حسابيه بسيطه اتظح ان صاحب السياره يمشي بها كل يوم 800 كيلو حتى يصل الي هذا الرقم ومن خلا لتفحص السياره يقول ان مرتبة السائق ( غايصه) ومهترئه ووجهيت السياره مرمله والدركسون وسخ ويوجد هربده واصوات كثيره

[جي اكس ار2000]

اكبر عداد 2002 هايلوكس ماشي 600 الف وزياده ولم يفك المكينه ماشاء الله

دنا98 ماشي حدود900 الف
اقل عداد داتسون 75 ماشي 10 الاف صالون89 تويوتا ماشي22الف جي اكس ار2003 ماشي 63 الف

ولو اعطال العداد لترون العجب

[Abusliman]

كوريلا 2000 ماشيه 500 الف كيلو وبعناها بدون توضيب
بس ايام ذيك السيارة كانت مع اخوي لو تحترق السيارة ما يوقف اهم شي توصله مهب مشكلة الرديتر معدوم
المكينه فيها شي السيارة خربانه اهم شي تمشي ههههههههه ما قد طبت ورش الظاهر
عاد اخذتها عقبه وكرفتها شهر وما كانت تقول شي شغل وامش :good2:
والحمد لله بعناها بسعر طيب

[AL-OTAIBI]

السلام عليكم
وكالة نيسان البابطين فى الكويت
عملت مسابقه لاكبر مسافه مقطوعه على جيبات بترول
النتيجه الاولى موديل 88 نظيف جدا قطع 1200 مليون ومائتان كيلو متر
الثانى 89 قطع 900 الف

:D الف و ميتين مليووون؟؟؟ او مليون و ميتين؟؟؟

[كاشت وحداني]

سجل عندك
كامري 2005 العداد 436352 هذا اليوم
طبعا لم توضب ولم تفك مكينته ونقص الزيت حاصل .
الموتر على يدي ولم يستخدمه غيري
جمس سوبربان 91 . تم توضيبه بعد ما طق ال999999 ومشى بعدها 130 الف .
والحين ماشي 800 الف
وقبل سنه بالضبط لقيت رجال راعي في اكس ار 2004 كان ماشي 730 الف كان يبي يستبدله بجديد وعيو اصحاب المعارض ياخذون القديم منه

[SGL]

سجل عندك

باترول 88 وصل لـ 900.000 بمحرك الوكاله وبنظافته لانقص ولا حراره
باترول 92 وصل لـ 550.000 بمحرك الوكاله وبنظافته لانقص ولا حراره
كابرس 89 وصل لـ 700.000 بمحرك الوكاله وبنظافته لانقص ولا حراره
جي اكس 94 وصل 370.000 بعدين وظبناه وبعناه
لاحظوا الفرق هذا اكبر دليل على ان النيســــــــــــــــــــــــان مازال في القـــــمـــــــــة

[بيك اب 4X4]

جمس سوبربان 93 مكينة 454 كان عند الوالد الله يحفضه
مشى حول 600 الف و باعه ما شاء الله و المكينه شد بلد
بس القير موضب
انا اشوف مكاين الامريكي ممتازه بس العيب في القيور
و شفت مقاطع لتوضيب قيور امريكي و كان اللي يوضب ينصح بتغيير بعض
القطع بقطع مشابهه لها بس من شركات متخصصه بالقطع الهفي ديوتي

[volcano]

ميتسوبيشي باجيرو 2004 .. 400 الف كم تقريبا على يدي من الوكالة ولا زال ولله الحمد بحالة جيدة جدا

[قناص عفيف]

سجل عندك كامري98 مشت لين 400 الاف وعليها وبعتها لانقص ولى دخان

[ابوفواز]

جيب لكزز 2004 بايعينة قبل سنة وشوي ماشي 575الف

[محسن اليامي]

باترول 2003 ماشي 260
كابرس 96 ماشي 139 ولا زال عندي
كابرس 93 ماشي 550 وبعته
سوبربان 2011 أصفار

مشكور موضوع جميل

[مسير عليهم]

موتري فكتوريا 97

اعتقد تعدى 450 الف كون العداد توقف شهرين ووقتها كنت امشي باليوم لا يقل عن 300 كيلو

[ادولف هتلر]

ولله الحمد كانت عندي مرسيدس 560 اخذتها من الوالد ماشيه 60000 وبعتها قبل 6 سنوات تقريبا ماشيه 870000 ثمانمئه وسبيعن تقريبا بدون توضيب او نقص زيت وعزم طياره ماشاء الله ولازالت مع تواصل مع الي اشتراها يقول لازالت معي ولم يعمل لها توضيب وان العداد وقف على 930.000 تقريبا واحسبوا السنين وهو مدرس مصري يطلع عليها لمصر


الله ياالدنيا

[بندرالعتيبي]

ددسن 2002 بخاخ ماشي 700000 الف ولازد فكينا فيه مسمار من ناحية القير والمكينه واللحمدلله لايوجد نقص ولادخان

[المنيعي1]

باث فندر 2004 ماشي معي 311000 كلم والممكينة وكاله ولله الحمد

[AL -98RY]

سجل عندك باترول 2005 ماشي 300,000 قابل للزيادة

[جبل نيس]

ونيت هيلكس مديل 93 ممشاه على يدى 450000بدون توضيب ولانقص زيت

[برادو 99]

كابرس صابونه كان معي قبل ثلاث سنوات بعته تشليح عقب ماخبطت مكينته كان يوم شريته عداده موقف وكان ماشي اكثر من800,000 وقعد معي مايقارب ثلاث سنوات كان موديله 92 ياهو بهذلني بهذله

[F34666]

باترول ربع 89باسمي وكالة ماشي مليون ومائة وثلاثون بدون نقص او حرارة بس بغيير الزيت كل 3500 والسيفون بعد ثلاث تغييرات ومازال صامد

[السبيعي 503]

كاامري 2006 لموزين

600000 الف بدون تووضيب الموتر باسمة وكالة

ويغير الزيت كل 1500 وتشوف الموتر من برا ماتقول ذا ماشي

لكن لاطليت في الطبلون قلت ووش لكن التووفيق بيد الله سبحانه وتعالى

[asxz]

كراسيد95 ماشيه 600000
اقل شي
هايلكس90 ماشيه 250000 ولا بعته

[ذيب النجيل]

على كلام صديق لي يقول عند جارهم

ربع تويوتا موديل 2002 ماشي 700 ألف ماقد فكة مكينته ولا ينقص ولا يدخن

[sgl2002]

جي اكس 93 مع الوالد ويبطي احد يسوقه غير حتى الآن 450الف وبودي وكاله وماخلى عليه ديره في المملكة ودول الخليج
ماعمره عداه 130
وكل شي فيه وكالة ماشا الله

[الاسطورة351]

سيارتي كامري موديل 2001 ماشية الان 78000
طبعا كانت فوق ال900000
ورجعت صفرت من جديد
طبعا شريتها وكاااالة ومشاويرها: اداوم يوميا الدمام الجبيل رايح جاي
دول الخليج في الشهر مرة وخصوصا الامارات
مصر اربع مرات
سوريا مرتين والاردن خمس مرات
اما في حدود المملكة فعد واغلط كل اسبوع ماسك خط من الدمام الى جده والعكس
او من الدمام الى حائل-القريات
غير سفرات الجنوب
واحيانا ذهاب وعودة في نفس اليوم

[ذئب اليل]

لموزين كامري 2000 رجع العداد وعد من جديد كنة توه طالعة من الوكالة ونا طالع علية مشوار لعرعر ومقد فكيات مكينته لا كن قدار الله ومشاء فعل صار علية حادث وبعتة تشليح

[اتجاه السحاب]

باترول 2002 ماشي 35000 الف

[طرربان]

ميتسوبيشي جالنت فكيته وكاله بعته وهي تقريبا350000 وماشاء الله كنه جديده موديل 98 الله ياذيك السياره يعلمني واحد شراه قريب له انه باليمن ...
السياره الثانيه فورد جراند ماركيز استخدام موديل2002 كان ماشي حدود 95 الف يوم شريته خلال عام طق 280 الف ههههههه دمرته
كورولا 2006 مستعمله عداده 94000 خلال أقل من عام والعداد يفرالى 140 الف

[شحرور الدهنا]

لكزس 400 اتوقع موديله يا 94 او 95 مصفر الطبلون يعني ماشي مليون كيلو وزياده ولا صوت ولا حراره ولا نقص

[شنطة عده]

نسيبي معه كامري اجره موديلها 2001 ثبت العداد على 999999 يعني العداد وقف على المليون
والله العالم انها ماشيه الحين مليون و250000 قابله للزياده
تويوتا ولا يصغر النيسان ;)

[عبادي464]

ددسن 98 ماشية 600000 قابله لزياده من دون توظيب

[الوسمي44]

جمس دينالي 2001 مشى 440 الف كيلو قطع استهلاكيه وسير المكينة

[عبدالله حماد]

هايلوكس موديل 92
العداد / 1200000 ،،،، مليون وميتين الف ( ولم تفك المكينه ، مع العلم إنها مافيه طعس بحايل إلا وطلعته )

[ابو ذياب444]

كامري تاكسي2008 في دبي ماشي اكثر من 660000 الف :eek:
استغربت منها واستفسرت من السواق طلعت السياره ماتوقف 12 ساعه*12ساعه سلم واستلم

[fj43 الفيصل]

:looney:كرفان ما ادري كم موديلة ولا سعرة لكن اتذكر العداد 999999 تسعاااات

[- النشمي -]

جمس كداد للحج والعمره موديل 82 يقول راعيه ماشي اكثر 2000.000 كلم

[ابونبيل]

كابرس 89 ماشاشاء الله مليون و400الف حق واجد من الشباب ماخذه من ابوه وابوه محافض يوم خذه خويي بدا يكربن ووضبه بس بعد مامشا مليون واربع ميه الف الصراحه الكوابرس القديمه جوده عاليه جدا جدا

[المرتهي]

الوالد الله يحفظه

عنده كامري 99 شراها بعام 2000

تاكسي طبعا من شمت الطريق

الان واقف العداد على 99999

واقف من تقريبا ثلاث سنوات

بس على 3 مكاين
و انواع واشكال التوظيب: )

نرفق صور للعداد بأذن الله


حتى محد يقول صاروخ نت نت : )

تقبلوا تحياتي

[فنجال شاهي]

سيارة اخوي الله يرحمها تحللت في التشليح الحين
هونداي سوناتا 1998 مشت 900 الف

[ابو عزام الشمالي]

هااايلكس 2007
ماشي 170 الف

[مواسي الطعوس]

_ معي فتك مشيت عليه اكثر من 300 الف وبعته على واحد مشاه 420 الف والماكينه تمام .

_ مع واحد اعرفه تويوتا بالتسعينات مشى حول 900 الف .

_ ددسن 94 مشت 450 الف وسنتين ونصف والعداد واقف .....وماكينتها تمام .

[سكاكا]

ياخي حبيت الموضوع هذا وحبيت الردود من الأعضاء
والتجاوب وأستغربت من التاريخ في 2011 يعني قبل
سنتين وقلت أرفعه (ولو أني عارف إن الإدارة بتزعل)
لكن جميل ان نجد موضوع فيه حماس بعيد عن المشاكل


وشكرا :)

[XRAY MAN]

هايلكس 90 قد قلب عدادها وبدت أصفار من جديد عند واحد من الربع بإسمه وكاله

بس يقول بعد ماقلبت حجر العداد هههههههههههه

[KhALeD A]

صراحة وبالفعل رغم قدم الموضوع الا انه شيق

وبالنسبه لي سبحان الله اذا شفت السياره قربت من ال200 الف انخرش وابيع على طول

[sgl2002]

سيارتي باترول 98

400 الف والمكينه و القير شد بلد

[abo naser 1]

السلام عليكم

تجاربي ربع تويوتا 96 وكالة مشى 650 الف بواجي وزيت وسيفون فقططططط

دينا مستبيشي مليييييون وعلية قطع استهلاكية فقط

التحفة صالون 78 فاكينة وكالة مكينة 350 يعلم الله ان محركات وكلتشة وكراسي مكينة وقير وعضلاته مساعدته كلها وكالة لم يجرى له اي صيانه في حياته ومرو علية العائلة كلها بالوراثة دلة عبر الزمن
تم تغيير رديتر وكلبريتر فقط قبل ثلاث سنوات لانه تم تحويلة الى بقي بعد حادث قبل ثلاث سنوات والأن شغال مع المرهمات وفيه حيل وكلتشة ضعيف قبل عشر سنوات والا الأن لم يتم التغيير

باترول 95 مشى 400 الف وزود خلال 3 سنوات ماخذه مستخدم ممشى بدون رحمة بر بحر فضاء لم يتم تغيير سوى قطع استهلاكية

[GMC 111]

جمس يوكن 2001

وصل لـ 650 الف بدون توضيب ومازال تحت الاستخدام

[الحيسوني-]

ددسن غمارتين ٩٩ مشت اكثر من ٦٠٠ الف كانت مع اخوي وبعها قبل ٣ سنوات



ومع واحد من العيال جي اكس أر ثمانية سلندر ٢٠١٠ ماشي اكثر من ٤٠٠الف يدخن ابيض وهو اللي فاكة وكالة

[رحال الجنوب 7]

برادو 2008 فاكه وكاله 62000 وان شاء الله يطق المليون معي

[الحازمي com]

سوبربان 99 استخدام امريكي
ماشي 450 الف مكينه و قير شد بلد

[دحيم 2000]

هونداي تراجيت 2005 وكالة على يد الوالد قاطع اكثر من 350 الف والعداد مفصول له اكثر من 3 شهور والصيانة كلها قطع استهلاكية ولله الحمد

[joblak]

هذي صورة مبروك طير شلوى جي اكس ار 99




http://www.mekshat.com/vb/[img]http://www.mekshat.com/pix/upload06/images/2013/06/mk160265_222222232.jpghttp://www.mekshat.com/pix/upload05/images253/mk160265_2222422232.jpg

[الندى]

فكسار 1998 مشى1000000 مليون وخبط

[فياض الربيع]

واحد من الشباب معه هايلكس 2002 موديلها شاريها وكاله ماشيه 750 الف كلم
ومكينتها وكاله مانفكت بس يقول بدأت تنقص يقول لين طقت مكينتها غيرها او وظبتها
مكاين السيارات القديمه تكد اكثر من الجديد الهايلكس من موديل 2005 وتحت جوده
اكثر من الجديد بمراحل والدليل شوفوا اسعار الهايلكس النظيف من 2005 وتحت
بعضها يصل لقيمه موديلات 2019 اذا هو مخزن وممشاه قليل جدا

[ابومشعل3]

معي فورد اكسبدشن 2008 شاريه وكاله ماشي 375 الف ..وبعته