زيت ( موبيل 1 ) وش رايكم فيه ؟؟؟

[منتعش]

السلام عليكم ورحمة الله وبركاته
حي الله الأخوان الشقردية والنشامى

كنت بالأمس أتكلم مع رفيق دربي أخوي ( مشغول ) حول أستعمال زيت الماكينة ( موبيل ون ) اللي ما تغيرها إلى إذا مشى الموتر ( 25.000 ألف ) .
وأخوي : مشغول يمدحه ويقول أنا مجربه .

ومن باب الحرص والخوف على سيارتي أتصلت بأحد الأخوان اللي يستخدمه ، وحذرني منه وقال أنا أستخدمه ولقيت ان الزيت ينقص وأنا ما مشيت عليه إلا ( 10.000 آلاف ) .

وأنا أحترت وقلت مالي إلا أحبابي في مكشات يفيدوني بذلك .

والله يحفظكم ويرعاكم .

[الآباتشي]

السلام عليكم ورحمة الله وبركاته
مرحبا أخوي ( منتعش ) أستعمل زيت ( سوبر جتي ) أنا جربته كثير ولا ينقص أنا صاحب ورشه و أعرف الزيت مضبوط و أنا و الله ناصحلك جرب وأحكم , لون العلبه أو الجالون ( أسود بذهبي ) ;)

مع أطيب تحياتي ,,,,

[منتعش]

حياك الله أخوي : الآباتشي
يقولون هذا أقتصادي وممتاز .
مريت أحد المحلات التي تبيع زيت موبيل 1 ( ولا يوجد إلا محل واحد وفي الصناعية ) حسب علمي وقال :
هذا الزيت ممتاز ، وقال في واحد شرائه منه وجلس سنة ما غير زيته - الشخص ما يسافر بس داخل الرياض فقط -
وسألته ليش ما يباع في محلات تغير الزيت فقال :
الزيت غالي عليهم وسعر العلبة ( 25 ريال ) بالجملة .


وأشكرك شكراً جزيلاً أخوي : الآباتشي على المعلومات القيمة .
وننتظر مشاركة الجميع .

[منتعش]

هايالنشامى
تراني أحتريكم ما بعد غيرت الزيت .
فتكفون لا تخربون موتري وتأخروني على التغيير .

[عاشق الجبل]

الأخ منتعش

بالنسبة للزيت موبيل 1 ( حسب الصورة ) فنصيحتي لك أن لاتمشي عليه أكثر من 7000 كيلو لأن هذا حده حسب تجربتي

طبعآ هذا في الصيف .

http://www.sportwheel.com/Parts%20Images/mobil%201%202cycle.jpg



والزيت الأفضل منه والذي يستخدم في سباق السيارت هو زيت motor up ولكنه غالي حيث يوضع أقل علبة صغيرة

مع الزيت العادي وتمشي عليه 10000 كيلو أو لمدة ستة أشهر أيهما ينتهي أول .

حيث يباع بكرتون صغير فيه هذا الزيت + منظف للبخاخ + سائل فك الصواميل المجيمه بقيمة 150 ريال تقريبآ


http://www.as-on-tv24.com/images/motor_upxtreme.jpg

[ماجد الشمري]

اخوي منتعش ...
لا تتعب نفسك اخوي خذ موبيل 1 اللي علبته فضية وسعره بالمحلات 35 ريال وبالجملة 22 ريال ...
حطه وغيره كل 1000 كيلو اذا انت ما تكرف السيارة ولا تسافر به ... اما اذا سيارتك تكرفها ويابانية غيرها كل 7 الاف ..







اخوكم ماجد الشمري

[منتعش]

حي الله أخوي : عاشق الجبل
وأشكرك على معلوماتك القيمة جداً .، والعلبة اللي شفتها لونها رصاصي ، وإن شاء الله بصورها وأنزلها عشان تشوفها وتحكم عليها .
وأشكرك شكراً جزيلاً وجزاك الله خير .

[الراعي الرسمي]

بعض الشباب يعتقد ايذكان الزيت سعره غالي خلص معناته زين ...... :mad:
سوبر جتي أو سوبر جي وبس لو يكون بريال . ومتشكرين :D

[الذرب جسار]

المنتعش ولا يهونون الربع ..
جربت من قبل ومن بعد زيت جي تي إكس وقبله حدث ولا حرج من انواع الزيوت على حسب انواع المشورات ولم أجد افضل منه وانا جاي فيه من الجنوب ومسيته للخرج خمس مرات وللإمارت وجيت ولي إسبوع مكسف بالموتر للمشاوير وزود أيام وإلى الحين ماغيرته وفي بطني بطيخه صيفي ورجليني بالما ومالي إيدي منه وواثق بإذن الله إنه سوف يمتن علاقته معي ......

[عاشق الجبل]

هذا هو المقصود يالمنتعش


http://www.cbxman.com/Images/Mobil-1.jpg


والزيت الغالي ماصار غالي عبث ومن يقول أنه غير فعال وهو مايدري عليه أنه يقارن بينه وبين الزيت العادي عند صبه في

المكينة والفرق واضح باللون واللزوجة وثقل الزيت حيث تجد الزيت أو 8 أو 10 ريال مثل الماء بعكس ( موتو آب ) الثقيل

وأنا أتكلم من واقع تجربه وليس من هرج مجالس :)

[منتعش]

هلا وغلا بأخوي : الراعي الرسمي
معليش أخوي أنا ضد رأيك في غلا الشي ورخصه . وقارن بين المنتجات الأصلية والتقليد في جميع الأشياء ، الأجهزة والسيارات وغيرها .
وأشكرك على مرورك الطيب .

[منتعش]

حي الله أخوي : الذرب جسار
وأشكرك على معلومات القيمة .
والله يرعاك .

[منتعش]

ياهلا ومرحب ومقربا : بأخوي : عاشق الجبل
والله إني شقيتبك وأتعبتك معي .
وإن شاء الله بروح أشتريه وأصبه في الجيب ، عشان كلامك وتجربتك .
تسلم أخوي ، والله ما قصرت وفيت وكفيت .
والله يحرم وجهك على النار ومن يقول ومن يقراء

[القناص]

والله يا خوي الزيت
موبيل 1
زيت صناعي
وممتاز
معتمد من قبل شركات السيارات الالمانيه
لكن يغير كل 10كم مع فلتر الزيت
نظرا للحراره الشديده في الخليج
اما نقص الزيت فهو طبيعي ضمن حدود علبه لكل الفين كم
بالتوفيق
زيت مجرب وممتاز

[منتعش]

هلا وغلا بأخوي : القناص
الله يعطيك العافية على المعلومات القيمة ، وماقصرت .
الله يبيض وجهك ويوفقك لكل خير .

[2majed]

رابط مرتبط ربطا بموضوع موبيل 1..
ادخل الرابط : http://mekshat.com/vb/showthread.php?t=31900

[منتعش]

الله يبيض وجهك أخوي الغالي والمحب : 2majed
والله أستفت أستفادة كبيرة .
الله يبيض وجهك ويحرم وجهك على النار .

[محب الشمال]

حسب معلوماتي ان موبيل 1 كويس وزين وسعر العلبية بـ 35
واخر مره غيرت زين سيارتي جمس قالي البنشري امش عليه عشرة الآف كيلو متر وبعدين غيره مع السيفون طبعاً
والله يحفظك

[قناص الحبارى]

السلام عليكم ورحمة الله وبركاته


أخواني الأعزاء ......... مساكم الله بالخير...

من باب النصيحه والتجربه....

شركة ترايستار,,, الأمريكيه مدحولي زيت موبيل 1... بس قالوا لي تبدله كل 10000 كيلو متر..

طبعا جربته وممتاز جداااااا لكنه ينقص بعد 5000 ... يعني أنتبه وتأكد من المعيار كل فتره..

وحاول تبدل الزيت والفلتر سوى لأنه بعد 8000 كليو تكون الرواسب كثيره بالفلتر...(( السيفون )))

هذا من تجربتي الشخصيه وللعلم سيارتي أمريكيه 8 سلندر...


والله أعلم ..



أخوكم // قناص الحبارى

[منتعش]

ياهلا وغلا بأخوي المحب : محب الشمال
أشكرك على المعلومات القيمة .
وأشكرك على مرورك الطيب

[منتعش]

مراحب أخوي : قناص الحبارى
والله معلومة قيمة ومفيدة تشكر عليها .
وأشكرك على مرورك المبارك .
ودمتم في رعاية الله .