اللي ما عنده باب بايكه وين يوقف موتر يا شرطة الرياض

[أبو أسامة]

السلام عليكم ورحمة الله وبركاته

متى تتطور الشرطه بالرياض ما أقول إلا إنا لله وإنا إليه راجعون

بالأمس في الصباح الباكر وقبل ذهابي للعمل على الساعة التاسعة والنصف صباحاً ليوم الأثنين الموافق 13 رمضان .... وبعد ما ركبت موتر إلا وأطالع على الموترالباترول2010 للوالد الله يحفظه إلا والقزاز الأمامي الجانبي للسائق والراكب متكسر وأنزل وأطالع الموتر إلا والأستبنه مسروقه والطبلون مكسر المهم إتصلت بالشرطة وبعد أكثر من نصف ساعة حضرة الدورية وقالي العسكري إستمارة السيارة قلت يعني لازم أصحي الشايب وأزعجه شف شغلك والباقي يحله الحلال قال كيف أتأكد أنك ولد صاحب السيارة ( يعني إبي أبلغ عن نفسي ) !!!!!!!!!!!!!!!!!!!!!!!!!!!!! وبعد ما صحيت الوالد الله يحفظه طبعاً الهوشه جت على راسي هههههههههههه وبعد أخذ ورد مع العسكري بقوله ليش ما دخلتوا الموتر بالحوش واللي ما عنده ويش راح يكون عليه قال يعني تبون تسون بلاغ تشكون بأحد...... قلنا خذ بصمات قال الموتر عليه غبار لا حول ولا قوة إلا بالله آخر شيء قال روحو للمركز وأخذو ورقة للتأمين دام التأمين شامل وبعد مارحنا للمركز رفضوا يعطونا ورقة بطباعة رسمية وختم بل ( عطونا ورقة بكتابة خط اليد وتوقيع (عنه) لأن المدير في أجازة وبدون ختم ) طبعاً يعني عشان إذا صار شيء مع شركة التأمين يلقون لهم عذر إن الورقة ماهي رسمية يخافون من شكاوى شركات التأمين .....المهم اليوم إن شاء الله راح أروح لشركة التأمين وأخاف يقولون مثل العسكري التأمين ما يشمل الموتر اللي واقف بالشارع اللي عنده خبره راح أستفيد من روحتي لشركة التأمين وإلا نصلح موترنا على حسابنا أحسن ...

والله يجعلكم ما تشوفون مكروه .......

[الدبل الثقيل]

وعليكم السلام ورحمة الله وبركاته
الله يعوضكم
أقترح للي عنده سياره غاليه يركب كميرا مخفيه في جدار حوشه عساها بعد الله تجيب صورة الحرامي وسيارته ولوحتها

[حطاب الرويضه]

الله يعوضك

[مطنوخ قطر]

لاحول ولاقوة الابالله... التامين ماراح يصلح الموتر كذا من الباب للطاقه, لازم الشرطه تعمل تحقيق وهذا هو الاجراء اللازم بناءً على البلاغ....اطلب تحقيق رسمي وهذا من حقك وبعد كذا توجه الى شركة التامين,,,,, اذا الشرطه مافتحوا تحقيق رسمي , هددهم انك بتوكل محامي....ترى مراكز الشرطه من يسمعون بطاري المحامي تطير عقولهم اذا غلطانين,,, ولا قل ترى بروح اشتكي عند المدعي العام وهو اللي بياخذ حقي .. قل كذا بس... موفق

[ABO-RASHID]

شوف انت حاول يكون شغلك رسمي من ناحية الاوراق وتأكد ان التأمين يشمل السرقات


وخل معك صور لكل الاوراق وصور السيارة من كل الجهات

واذا التأمين ما اعطاك حقك او اعطاك ايها ناقص ريال واحد روح اشتك عليهم بمؤسسة النقد المسأله راح تطول شوي لك بيجيك حقك

انا قد صارت معي لكن كان حادث وبعدها حوسه التأمين عطاني فلوسي ناقصه 900 ريال يقول ان الوكاله تعطي خصم على القطع ومن ذا الكلام رحت اشتكيت عليهم بمؤسسة النقد وجاني حقي كامل مكمل

هذي نصيحتي لك والله يعوضك ( لا تتوانى عن اخذ حقك )

[ابو العز بلس]

وعليكم السلام ورحمة الله وبركاته


الله يكون في عونكم

الله المستعان وبس

[بعيد الهقاوي6]

لاحول ولاقوة الا بالله

الله يعوض عليك خير وان شاء الله الامور تساهيل

دامك بلغت وفتحت محضر التامين مجبر يدفع لك قيمة التكاليف كامله

[يكفيني نظرة]

حسبي الله ونعم الوكيل ..
الله يعوضكم خير..

[xX_أبهاوي_Xx]

معليش سامحني يبو اسامه

العسكري صاااااااااااااااااااااااااااااااادق

المفروض ماتوقف الموتر في الشارع ياخي ... وقفه داخل المجلس والا فوق طاولة الأكل

ياخي والله عجزنا وكل شوي طالعين بهرجه جديدة

الله يعوضكم خير وربك ييسرها ... أشوى الموتر ماراح

الحمد لله

[كلكلي]

لا حول و لا قوة الا بالله

[aziz2727]

الله يعوض عليكم
وتقدر تفتح بلاغ عن مركز الشرطه بالاتصال على الرقم 911 او انه 991
وتسجل بلاغ عن رجل الشرطه وعن المركز وسوء التعامل على الحاله

[عاشق حرير]

حسبي الله ونعم الوكيل
والله يعينكم على شركة التأمين

[سفاري959]

اخوي ابو اسامه الله يعوض عليك موتري مسروق بكبره من سنتين ولا سوولي شي الشرطه بس تبي رأيي لا يردك الا مكتب مدير شرطه منطقه الرياض رح وعلمه بالسالفه وقله عن تعامل العسكري والقسم اللي قدمت بلاغك فيه وباذن الله تسهل امورك لا بيوت ندخل سيارتنا فيها ولا حموا سيارتنا من السرقه ولامسكوا الحراميه وجابوا سيارتنا اللي انسرقت وش السوات

[فهد الميهوبي]

الله يعووضك خيررر
بعض العسكر تلقاه يعرف الحرامي لكن يغطي عنه وممكن هو اللي يراقبله فيه نااااس ما تخااف الله
والكلام ذا ما اقووله عبث
وصااارت معي الله يكفيكم الشررررررررررر

[ملهوي]

السلام عليكم ورحمة الله وبركاته
مساكم الله بالخير جميعاً


الله يعوض علينا وعليك ياأبو أسامه .... (ليه مادخلتو الموتر بالبايكه ) طييب والي مسروق موتره بكبره وقت صلاة التراويح بأكبر مسجد بالبلد على أكبر شارع أربع سايدات
قدام الله وخلقه . وش يسوي ؟؟؟؟
ضنكم يدخل السياره معه جوا المسجد . ولا يربطها بسلسله بالماصوه ولا وين يطير
لا والله إلاكل يسرح يمرح على كيفه حسبنا الله ونعم الوكيل

[سالم11]

يا اخوي يا ليتك ما حطيت الموضوع ضاق صدري أح بس والله يعوض عليكم

زينو بائكه لو تشيلون من نخل الحوش والا الملحق

الله يعوض عليكم يا ابواسامه ويخلف عليكم

[bn_501]

لاحول ولاقوة الا بالله


ضيقت صدري ياأخوي


الله لايوفقه شكله حاقد كسر الطبلون مرهـ وحدهـ الله لايبارك فيه


شف ادخل على اكبارية الشرطه وقله عن تعامل ذا العسكري بدون اخلاق


يالله يارب تعينكم وتوفقكم

[ابوطاقية]

الله يعوض عليكم
ياخي هذا شكله حاقد موب لص لانه كسر السياره

[aooa]

الله يعوض عليكم

واما بالنسبه للشرطه فما عندهم الا تتهم احد والا تشك في احد كن اقاربك واصدقاك كلهم حراميه ...

يا ليتهم يشوفون دبي قريبه عندهم في الجزيره العربيه ويسوون مثلهم ...

وترى ما هو عيب ان الواحد يقلد اللي افضل منه ويحاول يستفيد منه

ولا بد من وجود حوافز طيبه ماليه ومعنويه لرجال الامن في الدوريات والشرطه حتى ترتفع معنوياتهم ويعملوا بجد واجتهاد واخلاص .
والله يستر

[العود الابيض]

لاحول ولا قوة الا بالله

[زوم]

حسبي الله ونعم الوكيل ..
الله يعوضكم خير..

[عاشق بترول]

الحمد ربك انت سرقو موترك من عند الباب البيت ولكن انا.......سرقو موتري من دخل البيت لا وبعد مقفل الموتر وانا نوجود في البيت

[عاشق بترول]

الحمد ربك انت سرقو موترك من عند الباب البيت ولكن انا.......سرقو موتري من دخل البيت لا وبعد مقفل الموتر وانا نوجود في البيت

[هويدي]

حسبي الله ونعم الوكيل والله يخلف عليكم

[ام صتمه 87]

الله يعوضك ..

أعوذ بالله هالحاقد ماجا يسرق جاي يكسر الطبلون ..

[عشقي دحروج]

وعليكم السلام ورحمة الله وبركاته

العوض على الله

[التعـ King ـديل]

حسبي الله ونعم الوكيل في كل من اوكل له عمل وتقاعس عن عمله

[شاص99]

هذا شخص متخلف او مجنون؟؟؟؟


شكله يبي باترول 2010 وقال له ابوه الكرسيدا احسن لك وجا يمشي بالشارع ويصيح يوم لقا الموتر قام وكسر الطبلون وجا يبي يرجع تذكر ان الستبنة الكرسيدا متسحلة اخذ الستبنة وباعة وشرا ستبنه للكرسيدا

[ابو نايف التميمي]

لاحول ولا قوة الا بالله

الله يعوض عليك.. وتصرف الشرطه يثبت فشلهم الذريع.. سرقات السيارات بالهبل والسبب انهم عارفين ان الشرطه ماحولك احد..اجل ليه مادخلت السيارة بالبيت..هههههههههههه شر البلية مايضحك ..

[ابوصالح77]

شر البلية ما يضحك
الله يعوضكم خير منها
وش هالعالم اللي ما تخاف الله ولاعندها مروة ولاكرامة

[ابن القريات]

الله يعوض عليك
الظاهر قصدك ان الحرامي كسر درج الطبلون

[جبل عبلان]

عليكم السلام

الله يعوضكم ويعينكم

مافيه مواطن الا وقد سرقله سياره او اصطوانه الى اخره

والاسباب كثيره ومعروفه التي تسبب السرقات ولكن الله يعين ؟؟؟

منها ضعف خبرة رجال الدوريات يدورون في ها الشوارع والاحيا ولا هم دارين وش يصير

برود.. ولا فطنه .. اكل سندوتشات وقراءة جرايد في الدوريه . والحراميه يصولون ويجولون من

المتخلفين .

الله يكون في عونا و في عون كل مسلم .

[فهد القصيم]

حسبي الله ونعم الوكيل ..

[مستر جمس]

حسبنا الله ونعم الوكيل

[مدور الخيرة]

الله يعوض عليكم

المفروض تسمع كلام الشرطة

واذا دخلت البيت حط سيارتك بجيبك مثل الجوال <<< أتوقع لو مطول مع الشرطة قالولك كذا هههههه

وعسى ربي يقطع هالبلد من أهل السرقات , نبي عقاب صارم إذا مسكوهم , ونبي جلد لهم قدام المساجد مثل أول

عشان غيرهم يخاف ويعتبر , الله لا يبارك بحقوق الإنسان

ديننا هو اللي حافظ حقوقنا قبلكم

[الملك ابوخرش]

والله اخوي لوني محلك لاادق على الشرطه ولاشي ادع ليل ونهار وصلح سيارتك والله يعوضك لانك بتضيع اقل شي اسبوع ورا الشرطه ويجيك الضغط واللسكر ومن غرفه لغرفه والله كانك تشحذهم وبعدين تروح تراجع شركت التامين وخذلك مرمطه لا وحاطين سعودي في الوجه مسكين راتبه الفين ريال والاجانب متكين ورا في المكاتب لما تسال السعودي يقولك راجعنا بعد 3 اسابيع علشان شيكك يجهز ولا تصلح السياره علشان يمكن يطلبونها الشركه مو مكفيهم التصوير ولما ترجعله يقولك توا ماخلص ولما تساله يقول والله مادري مدري من الي يدري قلت اخوي مابغا اغلط عليك وين المدير ويدق على سكرتير المدير وهو خايف يقول مشغول قلت قله هو هينا علشان يخدمنا قله اني بدخل واقول ميد السعودي وين مكتب المدير لحط الحره فيك المهم وياشر على السيب وامشي معه ويطلعلي واحد اردني وش فيك اخي سلامات وانفخ عليه قلت وين المدير قال انا المسول شو فيه قلت له السالفه وقلت ترا سيارتي جيب وانا ابو عائله كبيره ومستاجر سياره صغيره لي شهر ودافع 2500 لو استاجر جمس تتحملون التكلفه قلت ها تكلم قلت تعطيني الحين الجواب عن الشيك ولامافي طلعه الين تجي الشرطه خلاص طفح الكيل قال لا مش انا المدير قلت طيب وينه وين مكتبه قال اخر مكتب وادخل عليه الا مصري حاط اربع جولات ومسوي فيها قال لي وش المشكله واقصله السالفه وقلت ان تاخروت تدفعلي قيمة الايجار قال وشلون طيب عطني شيكي قال مهوب من هنا لانه اكثر من 7000 كلم فرع جده هم يفدونك واخذه رقمهم واتمرمط مكالمات اسبوعين زياده الين جا الشيك قيمة 19 واكلم راعي الورشه تقول مبشر وتجلس السياره شهر علشان تخلص ابو جميل كل ماراحوله علشان قطع اجلس 3 ايام علشان تجي من جده مسكين ابوجميل مايقدر يحطله هنا مستودع مديون لا واسال راعي الورشه عن لكزس مصدومه قال راعيها له اربع اشهور ماخذ فلوسه من التامين احمد ربك قلت والله لو المبلغ بسط والله ماراجعه اهم شي على الواحد صحته..................... اسف عللى الاطاله لاتلومني من القهر الي شفته

[الجندلي]

السلام عليكم
قبل 15 سنه انسرقت سيارتي...(كرسيدا ..على عزه)
وبعد ثلاثة ايام لقتها الدوريات وسلمتها لشرطة الملز ...
رحنا لشرطة الملز ..قالوا ما استلمنا شي ...
رجعنا للدوريات قالوا هذا سند الاستلام ...
رجعنا للشرطة وكان نفس الضابط المستلم ويوم وريناه السند ..رفع ديكور مكتبه وطلع صورة السند :D..وقال والله استلمناه ولكن للاسف انسرقت من حجز الشرطة :good2:
كيف ووشلون وين العسكري المستلم ...
السيارة مسلم معها حدث ...ومطلعته الشرطه ................:D
الطاسه .....ضايعه :)

[ابو البر]

خلك وتستاهل انت وراعي السياره اللي هو ( الوالد)

وش هو له تشترون سياره اصلا قبل ما تسألون الحكومه هو مسموح للحراميه يسرقون او غير مسموح.

صحيح انك ماخذ مقلب في هالشرطه .

صلحو السياره وابلعو العافيه

لاتزعلني من مستواك الفهمي .


تحياتي يا خوي

تراني مقهور بالمره من هالمواضيع .

[ابوغزاي]

من امن العقوبة اساء الادب 00 الامور كلهاضايعة

[قدر مكتوب]

اخوي نصيحة اخو اعمل التالي وتوكل على الله والله ثم والله مايضيع حق وراه مطالب:
1- صور الموتر بكاميرا واضحة من كل الجهات وياليت لو تحط مع التصوير الوقت والتاريخ على الصوره, وصور كل شي بدقة متناهية ومن كل جههوبدقة عاليه
2- روح للشرطة وابداء من لااسفل الى الاعلى , اكتب شكواك بورقة رسمية ووقع عليها مع التاريخ وكل من جيت له اشرح له الموضوع وعطه الورقة فيها كل شي والمطلوب من الشرطه وقله استلم الورقه (لانه كل شي بورق وتوقيع ينخاف منه , لانه اثبات ولااحد يقدر يثبت شي على نفسة ) راح توصل لمدير الفرع وراح يستلم غصب عنه ويوقع او راح يكتب لك محضر بالواقعه ويفتح للواقعه ملف , انت هاللحظة خذ صوره من المحضر اذا تقدر (والعلم عند الله مااحد راح يعيطيك صوره الا اذا لك واسطة) المهم خذ رقم المحضر يكفي , وتابع مع الشرطة لين تاخذ اللي تبي منهم , اما موضوع التامين فيه قرار صادر من الداخلية بضروره توفير العوض في 15 يوم فقط كحد اقصى وممكن تشكي يالغالي وصدقني لو اشتغلت كل شي بورق مااحد يقدر يماطل معاك لانك تمتلك وثائق والكل يخاف من الشكوى .

بكل صراحة انا اعرف شخص حصلت له مثل واقعتك سرق جيبة وبلغ وبعد كم يوم اتصلو عليه وقالو له تعال الموتر عقله الله , راح للمركز ووجهوه لمكان الموتر (وحسب ماقالو له ان الموتر سليم 100% )وكان عند الموتر دوريتان اول ماوصل , طبعا الطامه ان الموتر منقلب ووصوله كان على وقت العشاء والموتر مقلوووب من العصر , وصل العسكر وقالو له عدل موترك وخذه عن الشارع , بعد طلاب ومشاكل جاء راعي موتر وقال له ان شفت بزرين على الموتر وكان هناك اثر دم بالارض وداخل السياره (يعني كان حادث وفيه اصابات ) وقالهم روحو للمستشفيات وشووفو من سرق موتري (الحين فيه دم وفصيلة دم وعينات و مصاب وسالفه) رفضو بحجة ان هذا ليس تخصصهم وحتى صرفو مووضوع الصغار , بعد ماعدل سيارته وراح يقول كنت احس ان العسكر يعرفون من سرق سيارتي بس يحاولو يخفو الموضوع , دخل على الضابط وكلمه وقال له العسكري وش نسوي ؟؟؟؟؟ مانقدر نجبرهم على الكلام , ولا نقدر نفتش المستشفيات

اخذ موتره وصلحة بملغ كبير وديون , وخسر خساره ربي اعلم فيها (الله يعوضه ويهدى هالشباب)

وبعدين ياجماعه الرياض كثيف جدا ويحتاج الى كاميرات مراقبة كثيره وعسكر كثير , في بريطانيا ماتشوف العسكري لان كل شي مراقب باللكميرات فمايحتاج عسكر , اعرف شخص يقول نشبت هوشة بين سكاري بلندن وقلت الحين وش يبي يفكهم يقووول والله ماادري كيف بلحظات جت الشرطة تقول طلعو من تحت الارض , كل شي مراقب , وعلى آخر احصائية ان كل 4 مواطنين في بريطانيا له كاميرا واحد فتصور الامن

اخوي طالب بحقك عشان حلالك يرد لك وعشان يوصل صوتك , اليوم سرق موتر الوالد , باكر يتطور الموضوع ويسرق موترك وبيتك وكل شي

السرقات بالرياض صارت تخوووف الله يكفينا الشر, الله يعوض الوالد خير , ويهدى هالشباب ويفكنا من شرهم

[برق الشمال A]

الله يعوضك خير قل ااااااااامين

[غالي]

انا قد انكسر قزاز موتري شيروكي وما سرقوا الا شماغي فقط

ومفتحين كل شيء حتى الانوار الداخليه وخلصت البطاريه

رحت لمركز الشرطه في السليمانيه وقدمت بلاغ من القهر

وقالي الضابط شف :

تبي يطلعون معك حقين التحري مدري وشو ؟
قلت ايه :

قال قل منسرق جهاز جوال فيه او مسجل او اي شيء ويطلعون معك

فعلا استغفر الله قلت فيه جوال ومنسرق رحت للبيت نص ساعه تقريبا جو في كابريس 80

جو وملوا موتري حبر مدري وشو هالماده ويحطون على الابواب والمراتب ويدورون

اخر شيء قالوا مافيه في موترك سطح ناعم علشان تطلع بصمات !!!!!!!!!!!

قلت قل ق بس

وقالوا بندور ونشوف

الان فوق 7 سنوات ماحولك احد

الله يعوض علينا وعليكم

[الحركساب]

حسبي الله ونعم الوكيل الله يخلف عليكم

[اخو سعود]

لا تخلي حقك مهما كان

[هواوي صيد]

الله يعوض عليك

تبي تبدا رحلة معاناة مع المراجعات والمماطلات


لعل بعد توجيه سمو وزير الداخلية بقطع يد السارق ان يرتدع مثل هؤالاء

[المارد1400]

يا بلادي واصلي والله معاكي:p

[((ابوملاك))]

حلوه ليه مادخلتها بالبيت وانتم شغلتكم بالشوارع نحط سياراتنا وعلى ذمتكم صرنا نحسب حساب للحرامي طال عمره يعني لا وقفته برا صار حلال عليه السرقه