ركبت تانكي ذاخل السيارة وأزعجني صوته ::: هل من حل ؟

[.أبوعبدالرحمن]

بسم الله الرحمن الرحيم


الاخوة الافاضل

ركبت قبل كم شهر تانكي فيبر مثل ما يقولون مسح او التانكي المسدوح بالشنطة وهو افادني

كثير والصراحة مهم في كل سيارة لكن المشكلة إن صوت الماء ازعجني وكل من ركب معي

يقوم يلمس بطنه يحسب ان الصوت من بطنه مع ان صوته يوجع البطن ههههههههههه

علما انه ملبس عازل وتنزاني فأبي حل يروح الصوت أو يخفف الصوت


وللجميع الشكر ،،،

[fof6666]

ما أعتقد له حل
أمس مركب تانكي المنيوم سدح
ولا مشيت بالخط كل شوي أهدي أحسبه ضرب كفر من صوت التانكي

[ابوصالح77]

التانكي المسدوح عيبه صوت الماء مع إن ميزته ما يضيق
الحل : إنك تركب طبق أو تحط فوق التاني خشب ملبس مثل السطحة ، ويمكن يرح الصوت .
أعرضه للبيع عند أحد المحلات وركب تانكي واقف أو مربع
بالتوفيق

[ابوطاقية]

ماله حل الا يقسم بفواصل بداخل التانكي والا بتسمعه تقل تخض لبن
والحل الثاني يا انك تخليه دايم مليان والا فاضي مره

[.أبوعبدالرحمن]

الله يعطيكم العافية

اعتقد على كلام راعيه الاول انه فيه فواصل من الداخل

ومن الصعب اني اخليه مليان وهو اصلا يطلع صوت او اخليه فاضي وش استفدت من التانكي


لكن في انتظار بقية الشباب لعل ان عندهم حل


علما اني فكرت احطه مكان الاستبنة لكن وين اودي الاستنبة وهي ضرورية بالسيارة

[قصر سيف]

نفس المشكلة عندي .
ننتظر الحل بالرغم من اني مركب فواصل داخل الخزان ومع ذلك الصوت موجود ومزعج .

[namsh]

ياشباب فيه تانكي عند السنيدي يركب خلف المرتبة الخلفية .. يمكن يكون أفضل . مع اني ماعرفت نوع سيارتك ، لكن عندهم لكل الجيوب ممكن تستفسر منهم قبل تشتري . أقصد السنيدي اللي في الرياض على الدائرئ الشرقي مخرج 12 وشكرا

[مدور الخيرة]

خله مليان على طول

ومستحيل يتحرك الماء لأنه مليان

[بواسامه]

نصيحتي بعه ولا تكثر عليه التأسفا

وركب واقف خلف المرتبه احسن ظغط واخفض صوت

[عشقي الباترول]

انا عندي تانكي المنيوم واقف خلف المرتبة الثانية
واذ كان فية فوق النص يطلع الصوت ولا حصلت حل
الا اخلية دايم مليان .................!

[.أبوعبدالرحمن]

الله يعطيكم العافية وبيض الله وجيهكم كل(ن) باسمه


اولا : السيارة باثفندر 2003 كما هو واضح بالتوقيع

ثانيا : السنيدي غالي جدا واسعاره خيالية

ثالثا : مما يبدو ان التانكي الواقف افضل من المسدوح حسب بعض الردود لكن المشكلة انه ما راح استفيد من الشنطة اذا بغيت

اسدح المرتبة الخلفية ...


انا سبق وسمعت ان فيه ماده قريبة من مادة القار تصبغ به التانكي يخلي الصوت يخف تقريبا بنسبة 60 في المية

اذا فيه أحد يعرف عن ذا المادة شيء لا يبخل علينا بشيء

[عسجد1]

السلام عليكم ورحمة الله وبركاته

ابقول لكم تجربتي لعلها تفيد

عندي تانكي ارتفاعه25 سم *30سم *120 تقريباً يعني بعرض الموتر

(( يعني لا هو واقف مع الواقفين ولا هو منسدح مع المنبطحين ))

المراد

تجيه ايام يطلع منه اصوات وازعاج و يضيق الصدر

ومرات يصير ولد محترم ولافيه ازعاج ......................(( توقعت انه اذا نقص الماء بدا يطلع اصوات ))

لكن توقعي طلع غير صحيح لأني مره عبيته ليييين فاض وسكرته وطلع الصوت

ضيق صدري .............. وكنت اهوجس بتبديله

ومن فضل الله وتوفيقه

كنت جاي من مشوار طويل عريض ومطبات ((( كاشتين )))

ويوم نزلت آخذ غرض حاطه على التانكي شفت فيه اثر بلل حول غطا التانكي

قلت ياولد مابدهاش يبيله تك .............. واجيب التيب حق السباكه (( الأبيض الخفيف )) والف على الغطاء عليه ليين قال خلاص ابموت

واتك امه تك بالكماشه في التانكي علشان لا يصير فيه تنسيم ولا تهريب ولا تنديه

وبعدها ماعاد سمعت صوت للمويه ولله الحمد والمنه وصار التانكي صديقي ودايم يخاويني في الطلعات لأنه تعدل وصار رجال

والحين حاط في السياره التيب الكبير ابو 3 ريال لها الشغله

وانتهت المشكله بفضل الله سبحانه

والأذان قرب وان شاء الله انكم استفدتو ولا تنسوني من دعواتكم

والله يوفقنا واياكم لما يحب ويرضى

[لشفر عنوان]

افتح التانكي وركب له شرايح اربع

[عاشق السيل]

الحل وأنا أخوك لا تحرك السيارة ولا يطلع الصوت <<<< ههههههه أمزح معك !!

أنا أقولك الحل لأن عندي نفس المشكلة :

أنا فصلت فرشة من فوق تنزاني ومن تحت قماش عادي وبالنص أسفنج وفرشتها فوق الطبق والتانكي تحت الطبق والحمد لله راح 80% من الصوت وإذا حملت عفش حتى لو قليل يروح الصوت 100% ،، ممكن تسوي نفس الطريقة أو تجيب أي فرشة متينة وتفرشها فوق التانكي ،،

والحل الثاني خل التانكي فيه أقل من الربع وبكذا مايطلع صوت وتقدر تستفيد من الماء بأي وقت ،، وإذا بغيت تكشت إملئ التانكي إلين يغص وما فيه أمل ينفس !!

بالتوفيق أخوي وتقبل مروري ومشاركتي يالغالي .....

[اسير الغضا]

ازين يابن الحلال الماء اذا ركد يدود خله يشعلل وتعود على صوته

[.أبوعبدالرحمن]

أخوي عاشق السيل ههههههههههههههههههههه شكلي بحطه مكان المكينة واشوف هو بيروح الصوت والا لا هههههههههههههههه


الله يعطيكم العافية

والظاهر اني بسوي حركة واقولكم النتائج


ولكن ما استغني عن باقي اراء الشباب

[قراند ماركيز]

كم سعر التانكي المسدوح للباثفندر

[.أبوعبدالرحمن]

عني شاريه مستعمل بـ 250 ريال

قبل تقريبا سنة وزود

[تسعه وتسعين]

انا ابي اسأل وين الإدارة عن هالموضوع!!!؟؟؟؟

[تسعه وتسعين]

لاتفهمن غلط باللي فوق والله يابو عبدالرحمن انه ذبحن بطني من الضحك بسبب ردود الاخوان وردودك عليهم للي يقول خل التنك فاضي واللي يقول وقف الموتر واللي يقول خله يشعلل لايركد واللي يقول لاهو واقف ولاهو منبطح واخوياك اللي معك يحسبونه من بطونهم ....الخ
لكن انا اتمنى اني افيدك خذ ---->حط بلف هواء بالغطى وانفخه ان شاء الله انه راح يروح الصوت علماً بأني مركب فيبر الواقف خلف المرتبه وصوته بسيط مايذكر والظاهر ان ردي راح يروح مع الموضوع الى خيمة الطرائف
وهذ قصدي ان الاداره تنقله
تقبل مروري اخي ابو عبدالرحمن

[.أبوعبدالرحمن]

هههههههههههههههههههههههههههههههههههههههههه

خلنا نستفيد ونضحك ههههههههههه


فيه بلف مركبه اللي كان قبلي وبجرب الحركة اللي قلت بشوف وان شاء الله تضبط

[قرناس مطير]

ماله حل الا يقسم بفواصل بداخل التانكي والا بتسمعه تقل تخض لبن
والحل الثاني يا انك تخليه دايم مليان والا فاضي مره


هذا هو حله ركب الشرايح داخل نص فوق ونص تحت ويخف الصوت وامله ماء وزيد هواء مع البلف خلاص تروح الصوت ويصير دفعه قوي

[راشد الجريبة]

جرب البلف وأتمنى لك التوفيق أو ما لك إلا حل تجمده

[ابراهيم المري]

حياك الله يخوي الحال انك تفضيه مرة او تمله مرررة ومتسمع حس ان شاء الله

[تسعه وتسعين]

بالتوفيق يابو حمني ان شالله ينفع واذا مانفع شف خوينا اللي تكه بالتيب حق السباكه وانت سوها ان لقحت وإلا ماضرها الجمل

[.أبوعبدالرحمن]

الله يعطيكم العافية وشاكر لكم الاهتمام

[واطي الجمرة]

الي اعرفه انهم يقطعونه بقواطع من داخل عشان ما يطلع صوت

[path_poth]

كنت مركبه ع باثفايندر ، وفيه ٤ فواصل
ومع ذلك مانفع فيه
واللي يقول خله مليان دايم ، تراه يضر المحركات ويلعب بالهوبات ، بدليل لاصار مليان إربط فرامل وشف أداء الموتر
أعتقد النوع الواقف يمكن يكون أهون شوي ونسبه حركة الماء أقل بواجد

تحية

[.أبوعبدالرحمن]

اخوي واطي جمرة صادق واتوقع ان اللي عندي مقطع لكن ما فيه فايدة


الاخ باث صدقت حتى صار يؤثر على اداء السيارة وشكلها حتى انها تكون نازلة من ورا بشكل واضح

الفرامل مثل ما تفضلت تتغير الى الاسوء لكن انا ابي اعبيه للنص بدون ما يطلع صوت