مزانيتي 40.000

[xGHx]

السلام عليكم ورحمه الله وبركاته
يا اخواني ابيكم تعاونوني

ابي سياره زينه جيب للبر

ولا سياره كبيره بس يكون وكاله

والمزانيه 40.000

[اسير الغضا]

طيب تبي للديره والبر ولا بس للبر

لحالك ولا لاهلك حوض ولا كبسوله

لاتشري الموتر الا بالصيف ارخص

[xGHx]

والله يا اخوي للبر ولديره

[عالي الكيف]

اذا الميزانيه بحدود 40000

الله يعينك على الونيتات او الصوالين الامريكيه

[طفران بس بطران]

نفس طلبك ابا اجيبوا على استفسارة

[ابونبيل]

شف خذلك باث فندر


ولا وانيت جمس دبل لاكن انتبه انتبه اهم شي نضيف ولا بيعذبك

والله يارزقك

[fof6666]

ماتجي وكالة و 40000؟؟؟؟
لاكن شف الاسوزو دبل تراه حليل ورخيص

[الكونترولCONTROL]

أرشح باترول

[xGHx]

الله يعطيكم العافيه

طيب وش انواع الجموس الزين والموديلات

[اسير الغضا]

الباجيروا مواصفات قوه تحمل سعر رائع بس وكيله دمار

[عاشق السيل]

إذا أنت عزوبي أو عائلتك صغيرة خذ باث موديل 2001 أو 2002 واحرص على النظيف ،،

وإذا عائلتك كبيرة خذ باترول 98 أو 99 برضو احرص على النظيف ،،

وتراي مبطي عن الحراج يمكن الأسعار تغيرت !!!

والله يوفقك للي فيه الخير ....

[مقلع الرمث]

شف تبي موتر يكد ويمد

خذلك باترول 98 او 99 نظيف حيل صالون 4 ابواب لان الربع ضيق وهذا يشيل عزبك ويشيل اهلك وربعك

وتحمل اللي تبي وتانكيين

لكن دور النظيف ياصل الى 44 الف النظيف ويطوف الى 46 الف

بالتوفيق لنا ولك بالدرين

[You Like Me]

انا مع اخوي مقلع الرمث
لكن في حال يوجد لديك سياره ثانية
واللي تدور عليها اكثر شي بتخصصها للبر
انصحك بالربع
الصالون غثيث شوي وثقيل الاكانك بتعدل وبتحوس عشان يطربك
وحسب كلامك ميزانيتك محدوده فالصالون اذا كان مالك حاجه فيه
اقصد استخدام شخصي والاهل وراعي عفوش عليك بالربع وبتلاقي النظيف بهالحدود
وبالتوفيق لنا ولك يارب

[xGHx]

لا هنتم
والله يا اخوان الاسعار ناااار:f

طيب وش تنصحوني
بسياره لديره فقط
مثلا كيا

[شبل حرب]

الباجيروا مواصفات قوه تحمل سعر رائع بس وكيله دمار

عليك بالباجيرو تراه يكد بس مدري عن سعر قطعه :good:

وللأمانه ماجربته بس ناوي على باجيرو 2008 الى 2006 ربع فل الي عنده من الشباب لا يقصر :D

الله يوفقك

[سامي900]

احرص على التيويوتا وأنا أخوك كامري 2005 اسعارها مناسبه لميزانيتك

[MjNo0oN]

40 جديد مالك الا اكسنت او افيو او كيا الجديده

وانا اخوك ربك راحمنا بالمواتر المستعمله وشوري عليك المواتر الصغار تبي صبر تحمل علىك بالكورولا هاذي عندي وحده 2002 من رجل حاره لرجل احر خراباتها طفيفه ومعروفه الي هي شداد السير و راس العكس الايمن فقط لاغير ((مخلينها موتر البيت سبير))

وعندك الكوامري مع اني ما انصح في الجديده لانها معي ومعذبتني وناوي ابيعها انشاء الله

واذا بغيت موتر رفيع شوي

خذلك ددسن عز الطلب وقطع غيار في البقلات على 2 ريالين وعلى ثلاثة ريال بتلقى موديل 2004 او 2005 ويمكن 2006 نضيف وبحدود ال40 الف

[ولد الجيران]

الله يسهل امورك

[GS5]

وعليكم السلام ورحمة الله و بركاته

نيسان صالون 97 و حوله كربريتر , تلقا النضيف إن شاء الله

وتبي للديره بس , إكسنت قير تماتيك وكاله بأقل من 40

[كم كيلو باقي]

الباجيرو معي واحد .. ممتآآآز وعملي و صبور

لكن قطع غيآآره نآآآآآآر .. بس ركب القطعة وانسها

[xGHx]

الله يعطيكم العافيه وبي الله وجيهكم والله يفتحها بوجيهكم قولوا
اميــــن

[الشقردي 999]

ارشح باترول موديل 99 ولا 2000

[xGHx]

ارشح باترول موديل 99 ولا 2000


ما قصرت تعبتكم معاي

[ابوصالح77]

هلا بك أخوي
ركز على إحتياجاتك وش الموتر اللي يناسبك ؟ تبي جديد أو مستخدم ؟
والميزانية اللي معك لا تعطيك إلا خيارات محدودة سواءٍ نوع السيارة أو موديلها
والناس قناعات ، والسيارة اللي يعتنى فيها تدوم لو هي صينية
من خلال الردود أحس إنك منجم(محتاس)
الله يرزقك من واسع فضله

[xGHx]

هلا بك أخوي
ركز على إحتياجاتك وش الموتر اللي يناسبك ؟ تبي جديد أو مستخدم ؟
والله يرزقك من واسع فضله


والله يا اخوي ما قصرت ولكن انا ابي جديده بافتك من رح صلح. غير عكوس غير سير
غير...
وانت فاهم
وابيها لمشاوير الديره
والديره الي انا فيها صغيره

[عاشق السيل]

والله يا اخوي ما قصرت ولكن انا ابي جديده بافتك من رح صلح. غير عكوس غير سير

غير...
وانت فاهم
وابيها لمشاوير الديره

والديره الي انا فيها صغيره


أجل لا تتعدى الهيونداي أو المازدا أو الميتسوبيشي ،، أما الكيا والأفيو اننننننننننننننننحش !!!

[مهاوي براري]

تايوتا وبس

[الإستراتيجي]

أخوي كأن كلامك تغير في البداية تبيها موتر بر ثم بر ومدينة ثم الأخير قلبتها شوي مدينة


على كل حال شف عرض نيسان

خذ سيارة بنصف القيمة ولا تدفع الباقي إلا بعد ثلاث سنوات


بصراحة عرض خرافي للي يبي موتر يطلع به ويكده كد ويتمشى به ويستانس عليه ثم ينطله عندهم بعد ثلاث سنوات

يعني تستفيد كثير من الموتر وتصور موتر بسعر 80 ألف أدفع 40 ووسع صدرك ثلاث سنوات

لكن إن كانك ما أقتنعت بالعرض وأنا معك لأنك ممكن تشري موتر وتكده وتبيعه بحول السعر على حسب الحال

فأقول لك الله ييسر أمرك ولو تزيد السعر شوي ممكن تحصل مواتر حلوة جدا

[السالمي]

والله وانا اخوك من حكم تجربه في القراند شيروكي من حوالي 8 سنوات


اقولك عليك فيه والله ثم والله ماشفت منه الا كل خير وانا راعي طلعات للبر


قوه + راحه + صرفيه حلوه = لاجيب الا جيب


وهو الوحيد اللي اضمن لك انك راح تلقى بحدود 40 الف موديل 2006 او 5


وعليك في 6 سلندر والله موتر ولاعليك من اشاعات الناس اسأل مجرب له


واذا تبي اي استفسار عنه انا حاضر

[ابن عكاش]

دراهمك تجيب يارس تويوتا جديده اواكسنت جديده