سؤال عن المد والجزر ... والقمر ... و ... المهم شاركونا برايكم

[Keynes]

السلام عليكم ورحمة الله وبركاته

بالنسبة للحداق من السيف .. متى افضل الاوقات حق الصيد
1. اعلى مد
2. بداية السقي (بعد ادنى جزر)
3. لما يكون القمر عمودي على البحر ( فوقك) ((يقولوا السمك في هذا الوقت يبحث عن الطعام))

اتمنى من الاعضاء المشاركة .. واذا في اي نصايح .. افيدونا

[نوخذة]

وعليكم السلام ورحمة الله

اخوي keynes بالنسبة للحداق على السيف يختلف من مكان لآخر وعلى حسب نوع السمك إلى تبي تصيدة
وفي اغلب الاماكن يكون افضل حداق مع بداية رشة الماية (بداية السقي) او مع بداية الثبر
وفي نظري ان ايام القمرة مايصلح الحداق إذاكانت الماية مرتفعة كثير(اعلى مد) لان السمك يكون ضايع ومنتشر
وعموما افضل الأيام الي يوافق فيه بداية رشة الماية قبل المغرب او الفجر بساعة او أقل

اما بالنسبة لأنواع الأسماك : بعضها ينقد(يضرب) مع بداية الرشة(بداية المد)في الاماكن الضحلة مثل :الشعم و السبيطي (الاحجام المتوسطة والصغيرة)
اما الاحجام الكبيرة مثل الهامور و السبيطي العود (الكبير) يبغا له يشوي وقت بعد رشة الماي.

[gulfhunter]

السلام عليكم ورحمة الله وبركاته

حياك الله أخوي Keynes ....... يعتمد على المكان اللي انت تحدق فيه...... لكن بداية الرشه افضل شي لأن السمك يدور على الخير وإذا صادفك اسحب عليه .......... اما في حالة الثبر فسبحان الله السمك يروح بحر وين الله أعلم.......

[SRDAL]

السلام عليكم ورحمة الله وبركاته

حياك الله اخوي Keynes

بصراحه موضوعك حلو ومفيد .. انا بصرحه مو من حداقين الأسياف بس في اعتقادي ان بداية رشة المايه لها

اهميه في الصيد ونفس الشي في الثبر ... وكما سمعت عن واحد من نواخذة البحر يقول افضل شي في وقت صيد

السمك بعد رشة المايه بساعه يمتد زمن الصيد عندك لمدة ساعتان وبعد ثبرة المايه بساعه يمتد زمن الصيد عندك 3

ساعات .

اما بالنسبه للقمر انا اعرف ومجربه ان حات الضرب يكون بداية طلعت القمر مو اذا تناصف .

تحياتي لك .

srdal

[Keynes]

نوخذة
gulfhunter
SRDAL

مشكورين شباب على الردود .. ماقصرتوا .. وباقي الاعضاء اذا عندكم اضافات شاركونا برايكم

[مشتاق البحر]

السلام عليكم ورحمة الله وبركاته

هذا الموضوع مهم جدا جدا شكرا لك يااخي Keynes على طرح هذا الموضوع ... :)

ولكن السؤال الذي يطرح نفسه متى اوكيف يتم تحديد وقت بداية المد ونهايه الجزر او العكس ؟؟؟؟؟؟ :what:

[Keynes]

مشتاق البحر
انا استخدم برنامج اسمه FishByte 5
ماعليك الا اتحط احداثيات الموقع اللي تبغاه وهو يطلع لك النتيجة

[مشتاق البحر]

شكرا على البرنامج Keynes والله يزيد من امثالك.......

[النوخذة]

وفي اغلب الاماكن يكون افضل حداق مع بداية رشة الماية (بداية السقي) او مع بداية الثبر
وفي نظري ان ايام القمرة مايصلح الحداق إذاكانت الماية مرتفعة كثير(اعلى مد) لان السمك يكون ضايع ومنتشر
وعموما افضل الأيام الي يوافق فيه بداية رشة الماية قبل المغرب او الفجر بساعة او أقل

انا اوافق اخوي نوخذة بالكلام اللي يقوله وانا جربت هالكلام في راس ابوقميص مع فارق بسيط
اللي انا لاحظته انه اذا وافق بداية الثبر الفجرية او ام سيان يصير عندنا صيد ممتاز
وبشكل عام بداية الثبر دائما وقت صيد
هذا اللي انا جربته
بالنسبة للبرنامج اخوي Keynes هل هو دقيق مرة ؟؟
ودنا نستفيد منه اذا كان مظبوط
شكرا على طرح هذا الموضوع

[بسيط]

من تجربتي و جدت ان برنامج WXTide32 المجاني دقيق جدا خصوصا اذا تم قرن النقطة المطلوب حساب المد والجزر فيها بنقطة رصد معروفه مثل

Ras at Tannurah
Reference: Ra's al Qulay`ah, Saudi Arabia

يمكن الحصول على آخر اصدار من هذا البرنامج من : http://www.wxtide32.com

يكمنك ايضا تجربة هذه البرامج:

1- FishByte 5.7 من وقع http://www.heuristicresearch.com
2- Fishinsight من موقع http://www.fishinsight.com هذا البرنامج جيد ولكن يكلف 50 دولار

يمكك ايضا استخدام آخر اصدار من برنامج قارمن على (pocketPC) من الموقع
http://www.garmin.com/support/collection.jsp?product=010-00378-00
هذا البرنامج يحسب افضل اوقات الصيد حسب الموقع.

و هناك برامج اخرى اذا اردت المزيد.

بسيط

[ابو هشام]

مشاءالله عليكم

العلم نور

[Keynes]

ياهلا فيك اخوي النوخذة .. البرنامجين اللي حطهم اخوي بسيط اثنينهم اوكي

wxtide 32 و Fishbyte استخدمهم اثنينهم .. لو تقارن النتايج في الاثنين تلاقيهم متقاربة جدا .. يعني النتايج دقيقة

[gulfhunter]

السلام عليكم ورحمة الله وبركاته

حياك الله أخوي بسيط.............. مشكور على البرامج والله يعطيك العافيه

[قحطه]

سلام عليكم شلون انزل البرنامج بطريقه صحيحه وشكرا

[Alhzzen]

يعطيكم العافية شباب


شكرا

[ღ♥ღالصيادღ♥ღ]

السلام عليكم


عندي سؤال وش معنى (رشة الماية , بداية السقي ) و كلمة ( الثبر )

انا من السعودية و ما هي عندنا هذي المصطلحات


وشكراَ لكم

[هاوي النيوه]

وعليكم السلام ورحمة الله وبركاته

موضوع جميل واحب اشارك فيه حسب معرفتي بالنسبة للمد (الرشه + السقي ) والجزر ( الثبره ).

من خبرتي في البحر وبالذات الشرقيه من الجبيل حتى العزيزيه .

أن كان القمر واضح أمامك بأمكانك تحديد وقت السقي ووقت الثبر حسب أرتفاع القمر .

بداية طلوع القمر تبدأ ثبرة الماية حتى يتناصف فوق راسك هذا يكون أخر الثبر .

ومن يبدأ نزول القمر جهة الغرب يدل على السقي حتى يختفي القمر وهذا يكون أخر السقي .

وأفضل شي لك لتحديد السقي والثبر متابعة هذه الأيام بالتاريخ الأنقليزي .

أفضل أوقات الحداق البحر هي أوقات ( الصفره ) يعني مع برود الشمس الفجر أو المغرب . هذا لداخل بحر . أن كان في قمر وانت داخل بحر بأذن الله راح تلاقي خير .

أفضل أوقات الحداق للسيف واهم شي يكون المكان هااااادئ مافيه أزعاج ناس وهي نفس الأوقات المذكوره فوق مع فارق بسيط أن أفضل وقت هو وقت القمر ولما تكون أول السقي حتى نهايته .

عن نفسي احب ليالي القمره والصبر لما تحذف الخيط أنسااااااااااه حتى يسمت عليك السبيطي والا أقل شي كل نص ساعه شيك على الخيط .

هذا والله أعلم

[الحوات]

شكرا على البرامج يااخواني الاعزاء
والشكر الاول لطارح الموضوع الاصلي