هل انسم الكفرات للجيب اذا حبيت اطعس والا موب ضروري

[rhyb15]

السلام عليكم ورحمة الله وبركاته

مرحبااااااااااااا

حبيت اسأل عن ضرورة تنسيم الكفرات اذا بغيت اطعس مثلا هل هوو ضروري حتى باللاندكروزر مثلااا

وكم مقياس الكفر لاا بغيت انسمه لان معي جيب هوندا وحاولت امشي عليه بدون ما انسمه وما مشي عااد عزمه

الله بالخير موب مثل اللاندكروزر


شاكرااا لكم

[صالح المطيري]

يعتمد على حالة الرمل ، الرمل الناعم الهراد ضروري تنسيم الهوى فيه بخلاف الرمل الممطور مثلاً ، ولكن الأفضل على كل حال تنسيم هواء الكفرات لأنه يريح مكينة السيارة ويقلل من استهلاك البنزين ويسهل الحركة واجتياز المطاليع الصعبة ، وبالنسبة لي افضل ضغط الهواء يكون بين 15 إلى 20 .

[حرباش]

اولا حياك الله اخوي في المنتدى وكما اشوف هذى اول مشاركه لك وعقبال مانوشف مواضيع جيده تفيد وتستفيد ومرحبابك

بالنسبه للتنسيم حسب الرمله اللي تدخلها
اذا هي نامعه نسم على ضغط 15 اريح للموتر واسلم للدبل والكلتش في نفس الوقت
اما مشوار قصير ولا رمله ثقيله شوي ( متماسكه ) اشوف ان مافي داعي تنسم
واهم شي اذا نسمت وطلعت للقار فيما بعد لاتمشي على الكفر واجد وهو منسم لأنه بيتآكل ويتعرض للتحبيل
وسلامتك
اخوك حرباش :D

[rhyb15]

مرحباا
اخوي صاالح واخوي حرباش الف شكر على هالمعلومات

[مريقب العيفار]

أخي الكريم rhyb15

أولا اهلا وسهلا بك بين اخوانك

موقف لازلت اردده

ذات صيف كنت متعيجز اني انسم

ولما غرزت وعجزت حتى بالثقيل اطلع الموتر

نسمت الموتر

ثم تمشيت بدون دبل

هل تصدق ان الموتر منسم ازين من المشي بالدبل

لكن مثل ما ذكر الاخوان اذا كان النفود رويان والمسافه قصيره

قد ما تحتاج الى التنسيم

لكن اذا انت تبغى تتمشى لو كان النفود رويان فاحسن لك التنسيم

يريحك ويرح الموتر

وترى التنسيم ما عيب على الواحد

امهر السواقين بالبر ما يستغنون عن التنسيم

بعض الناس يحس انه لما ينسم الموتر ان الناس تقول عنه غشيم

بالعكس الانسان اللي فاهم للنفود هو اللي على طول يوقف وينسم

اما عن ضغظ الهواء تعتمد حسب حالة النفود والموتر

بعد الامطار والنفود السهل العشرين قد تكون مناسبة

اما انا في صعافيق فافضل الخمس طعش

[تبريزة]

من فوائد التنسيم غير ان السيارة تقدر تمشي بالنفود

اولا راحة للسيارة
ثانيا اقل صرفية بنزين
والثالث والاهم انه تحافظ على الدفرنس (الكورونه) الاماميه ،، على شان ماتنفرط

ودمتم
اخوكم
تبريزة

[SilverSniper]

أخوي رهيب 15..
تنسيم الكفرات ضروري في الطعوس القوية للجيوب..مثل صعافيق أو عرق دهام مثلاً..
تحياتي..

ملاحظة:. تم نقل الموضوع للخيمة المناسبة..

[rhyb15]

مريقب وتبريزة وسلفر الف شكررر ما قصرتوو والله لاني بصراحة حسبت العيب من سيارتي

[جوكر]

السلام عليكم ورحمة الله وبركاته







طبعاً التنسيم لابد منه(تنسيم الكفرات مهوب تنسيم الراس :D )


بعض الناس يقولون (اذا كان معي جيب ليه انسم) :confused: -من زود المهايط- :mad:


لازم التنسيم على شان تمشي السيارة في النفود وتاخذ راحتها.... :good:


طبعاً أفضّل الهوا يكون 15 أو أقل على حسب المنطقه... :light:


واذا كان الهوى أقل من 15 ما يصلح لأهل التسييييف...على شان ماينفصخ.... :)






.....

[جلوبلستار]

أخوي .... لا تدخل النفود وهواء الكفرات اكثر من 25 ...لأنه يجهد السيارة ويرفع الحرارة وممكن تغرز في أي وقت ..
واحرص ان الكفرات ماتكون من النوع النحيف .. وسلامتك .

[داب الرمث]

مايحتاج ازود على كلام الشباب يارهيب ماخلو شي ماقالوه ........................... توقيعك حلو ومضحك صراحه :D


http://www.mekshat.com/pix/upload/images9/mk13060_666.gif

[rhyb15]

مرحباا جوكر وجلوبلستار وداب الرمث مشكورين على رودكم ماقصرتوو والله بسس اخوي دااب ماكن كلامك حشششه تراهاا سيارتي اللي فرحااان فيها :rolleyes:

[salehhd]

السلام عليكم

الشباب كفو ووفو

ولاتنسى تاخذ معاك ماطور ( كمبرسر ) علشان تنفخ الكفرات اذا خلصت من التطعيس

[النفود الشرقي]

سلام أخوي

والله أن كان ما ودك بالبطانيج نسم وريح ظهرك

بس ودك بالطلعات والنزلات والتسييف نسم أريح للموتر ولا تقوم الحرارة بسرعة









و إذا ما ودك تنسم عليك بالهزاز في الاند كروزر :good:

[rhyb15]

salehhd مستر بن مشكورين على درودكم بس السيارة اللي معي مافيها هزااز :confused:

[النفود الشرقي]

اذا كان ما في السياره الي معك هزاز اشبك الدبل الخفيف و نسم شوي

[مسهي الرعيان]

السلام عليكم و رحمة الله و بركاته ..

من الضروري و اللازم تنسيم التواير عند دخول طعس .. ولا تطبع !

و لك مني خالص الشكر

[ذيب الشمال]

السلام عليكم
مساكم الله بالخير
الي اعرفه انه حتى ولو كان جيب لازم تنزل شوي من الهواء الي في الكفرات
علشان لايتعب الدبل
وسلامتكم

[rhyb15]

مستر بن ومسهي الرعيان وذيب الشمال مشكورين والله

[{السبيعي}]

السلام عليكم
اتوقع نسمها 28
وعندي وانا ابو راشد
اخوك

[rhyb15]

مشكور اخوي السبيعي بس احس ان 28 كثير شوي خصوصاا بالصيف

[القناص]

وانا اقترح عليك مثل ما قالوا
من عيار 15 الى 18 هواء
ودمتم
الحمدلله باقي شهر ويدخل الشتاء

[بو خليفه]

تحية طيبة و بعد
للملاحظة إذا كنت في وسط الرمال عليك حمل التالي :
ميزان هواء ليعطى المقاس المطلوب
اشتراك لتشغيل السيارة احتياط سواء جير عادي أو أوتوماتيك
واير سحب للحاجة
و الافضل لا تدخل الرمال إلا بسيارتين خاصة الاماكن المقطوعة أو قصد الاستكشاف أو يكون معك عدة أشخاص
و السلام عليكم

[rhyb15]

مرحباا
مشكور اخوي القناص واخوي بوخليفة واكيد راح اخذها معي وحبيت اقولكم اني قلت ابجرب ادخل الرمل وكنت معاير الهواء على 23 والحمدلله مشت معي بالراحه خصوصا ان الكفرات اصلا عريظة



ابوعبدالله

[salehhd]

الاخ رهيب
خلي الكفرات على 15 اريح للسيارة من المطبات والطلعات واريح للك لا يروح عليك العامود الفقري

[!مخاوي الليل!]

السلام عليكم ورحمة الله وبركاته

والله ياخوي مثل ماقال اخوي مستر بن ان كانك ماتبي البطانيج نسم شوي وارتح


وانكانك تبي الطلعات والنزلات نسم شوي وعليك بالدبل الخفيف

[ابوقاسم]

طال عمرك لاهزاز ولا غيره غير التنسيم ما لك وانا افضل من 15 الى10 وما جاك عندي ترقا اعلى طعس وانت مغمض........
وعساك على القوة.........

[فتـ الخرج ـى]

* نقطة ينساها أكثر الشباب أنه يهتم بالتنسيم و لا يشوف الكفر نفسه هو قاسي ولا لا
* يعني مثلا أنا معي هايلكس و مركب له كفرات يوكوهاما 225/70/15
* أنسمها 15 و تمشي ممشى يطربك ليش لأن الكفر يكون لين حتى لو ترص الكفر بمصبعك تحس أنه يدخل بسهولة
* بينما كفرات البرجستون اللي على الباثفندر وكاله لو تنسمها 15 تحس الكفر قاسي فلازم تنسم أكثر إلين تحس أن مصبعك يدخل بسهولة يعني تنسمه 10 تقريبا
**اللي أبي أوصل له هو أن التنسيم يعتمد على الكفر نفسه هل هو من الكفرات القاسية مثل البرجستون أو هو من الكفرات اللينة مثل التيو و اليوكوهاما**
و سلامتكم

[rhyb15]

salehhd مخاوي الليل والغضي وفتى الخرج مشكورين والله افتدتونا بخبراتكم

ابوعبدالله

[!مخاوي الليل!]

اخوي لاشكر على واااااااااااااااجب

[salehhd]

salehhd مستر بن مشكورين على درودكم بس السيارة اللي معي مافيها هزااز :confused:

الامر سهل وانا اخوك

خذلك شله شباب وهلهم يهزون :D

على فكرة الهزاز يتركب وقيمتة في حدود 3000 ريال مع الكمبرسر والتركيب

بي يبيله واحد خبير يركبه

[أبـ [مطلق] ـو]

والله وانا اخوك الشباب ما قصروا والله

قالو لك كل الحلول

لكن ما ودك دايم الدبل شغال

وإذا انت راعي تمشي وتستانس على جو النفود نسم وريح بالك خلها 15 او 20 وريح موترك بعد

ودام معك جيب وانا اخوك الدبل ما تطقه الا بالحاجات المهمه .. بس

تحيااتي

.

[بو خليفه]

من الأفضل يكون ضغط الهواء 10 كي تضمن أن الهوندا لا يحفر في المناطق الرملية الوعرة و على فكرة جيب هوندا لايوجد جير Low أو H فهذا يضعف العزم إذا وقف فحاول أن يكون توقفك في نزله أو ارتفاع كي تبدأ السير بسرعة و يكون عندك ميزان ضغط الهواء يكون مطبوط 100% كي لا تقع في المشكلة

[بو خليفه]

اجعل الهواء على 10 كي تمشي بسهولة و إذا شفت الوضع أصعب اجعل 5 كي تضمن أنك لاتطيح و أن الهوندا لايوجد فيها Lowأو H حيث أنها دفع رباعي لكنه يفصل بعض الأحيان في الرمل لا يعمل إلا الأمامي و الخلفي لا يتحرك و بعض الأحيان في الأماكن التي شديدة الرمل لايدور الكفر الأمامي والخلفي فأخذ الحذر و وقف عند منحدر أو مرتفع كي تمشي ويوجد لديك مجال في التسارع و لاتنسى ماطور هواء

[rhyb15]

السلام عليكم ورحمة الله وبركاته

salehhd مشكور والله والهزاز بسعره اللي قلت اعتقد ممتاز بالنسبه لميزته
مشكور ابو مطلق وبو خليفه بسس لو نسمناه خمسة بيتأثر الكفر وماقصرتو

ابوعبدالله