يالربع .. وش سالفة هالرجة ...شوركم ياخواني

[أبو الدحمي]

يا إخواني معي لاند كروزر 96 هدد شاريه من ستة أشهر ولاحظت أن فيه رجة خفيفة ثم بدت تزيد إلين صرت ماعاد أسرع بسببها والرجة بين 60-80 وإذا تعديت 120 وبالذات مع الفرامل .. رحت لميزان العضيب قاموا رصصو الكفرات بزعمهم أنها السبب ب80 ريال وهي وهي نفس الرجة قمت خرطت جميع الهوبات وغيرت القماشات والفحمات وكمان نفس الرجة وخصوصاً وراء .

شكلي طولت عليكم السالفة بس معليش ياخواني تحملوني :(
العلم أن الرجة باقية قالوا يمكن العمود فيه لوحة رح لمخرطة وحيد حق العمدان يفحصها لك ورحت .. قام رفعه على الرافعة وشغل ومشى عليه إلين 180 ثم قال العمود سليم مشكلتك يا بالترصيص أو بالكليبر اللي قدام يجي وراء الهوب الأمامي يمكن فيه فضاوة .. رح لميزان البادية هو أبخص فيه :confused:
ورحت للبادية وقابلت المعلم قال بسيطة قام وفك الكفرات وفك الغطاء اللي وراء الهوب الأمامي له مسمارين وحط وردة نحاسية وشوي شحم وقال رح أضمنه لك عشر سنين أتحداك تطلع الرجة مرة ثانية .
وأعطية متين وخمسين على هالشغلة مع ميزان الأذرعة وحاس أنه لاعب علي بس يالله الظميان يتبع السراب.
أول ماطلعت منه ومشيت الا نفس الرجة ماتغير شيء وأرجع عليه ويركب معي ويشوف الرجة ثم قال هذي بسبة فرامل ورا لازم تفك ونشوف خذنا الهوبات الخلفية للمخرطة قالوا أنها مطعوجة وغيرتها ب500 ريال مع قماش جديد ب105 ريال ونفس السالفة


ياناس ياهوه شوفو لي حل تعبت من النصب والخساير :mad: :mad: :mad:

[المنتفش]

اخوي ابو الدحمي سلام عليكم يمكن وانا مادري ان كان كفراتك شنبر فهو منهن لان اكثر رجات الجيوب ذولي منهن شف اللي معهم مثل موترك يجدعونهن ويركبون جنوط اللي تسمى برازيلي .......... امل اني فدك والله يخلصك من هالمشكله,,,,,,

[عاشق البسمه]

حياك اللله اخوي الدحمي

السبه والله اعلم انه من الجنوط اذا اكنت شنبر لأني كان معي باترول ويحصل لي مثل هالرجه

وانتظر الرد للإطمئنان . . . . . تحياتي

[عاشق الجبل]

الله يعينك

أنصحك تركب كفرات وجنوط سيارة واحد من ربعك على سيارتك وتجرب .

وبعدين وأنا أخوك خل بينك وبين راعي الورشة ضمان ( مكتوب بالفاتورة ) على أن المبلغ يعاد في حالة عدم الإصلاح

والله لو هذا ماخذ مني مهوب 250 ريال إن شاء الله 25 ريال ماأخليها معه لأنهم يعتقدون أننا أغبياء وتجار .

معليش تحملني وأنا أخوك :)

[جوكر]

السلام عليكم ورحمة الله وبركاته




يا اخوي ابو الدحمي يمكن الرجه من الكفرات يمكن واحد منهم محبل -مصعرر،مورّم،متفّخ.......-عاد ماأدري وش تسمونها :D ...وخاصة كفرات البالون اللي مهيب أصلية رجتها ترفع الضغط :hot: ....

والله لو مهوب تغيّر الهوبات لو تغيّر الموتر كلّه ماراحت الرجّه.. :( .......

اما من ناحية الجنوط فما اعتقد ان الجنط الشنبر هو اللي يسبب الرجّه ....لو كان هو السبب كان ما ركّب في الموتر شد بلد....لأنهم يختبرون الموتر قبل لاينزل في السوق...والله أعلم... :rolleyes:

وان كانك صامل بتغير الجنوط أنصحك ركّب جنوط المستوبيشي -باجيرو- الجديد مقاس 16 طبعاً مهيب شنبر وتجي ست مسامير وتركب على موترك بدون خرط ولا تبريزه ولا شي ... :)

وشكلها مثل شكل جنوط الهدد الـ98 ومافوق.... :good:

وقيمة الطقم الجديد حوالي 800ريال تقريباً ويمكن تزود شوي..... :j


وآسف كثّرت عليكم الهرج....








.......

[تبريزة]

مثل ماقالو الشباب

جرب لك جنوط وكفرات موتر واحد من اخوياك على شان الخساير

اذا راحت الرجه زين على زين

واذا ماراحت شيك على مساعد الدركسون

ودمتم
اخوك
تبريزة

[أبو الدحمي]

وعليكم السلام ورحمة الله وبركاته

أشكر جميع إخواني فرداً فردا
أعتذر على تأخر الرد ياسادة ياكرام .. .

الحقيقة كفرات الموتر شياهين والجنوط جنوط السفاري السلق موديل 98 وطالع
شيكت على الجنوط قمت وطلعت الكفرات من الجنوط وركبتهن على مكينة الترصيص عشان اشوف اذا هو لايح لكن طلعن كلهن سليمات وقمت رصصت الكفرات ترصيص أرضي وهن على الموتر وراحت الرجة بعض الشيء لكن صارت الرجة مع الفرامل أوضح وخصوصا بين 80-100 مع العلم أني مغير هوبات ورا وفحمات وقماشات وهوبات قدام مخروطة .
المشكلة أني شيكت على عمود الكردان وصار سليم بعد والحقيقة أني تغربلت لكن الظاهر أني باشوف لي أحد أخوياي وباركب كفراته وجنوطة وباشوف لعل وعسى وانتظرو ردي ياحبايب

[ابو هشام]

انا عندي نيسان باترول فيه نفس الرجه بين ال60 وال 80 وقال لي ميكانيكي يمني ثـقـه ان المشكل في الهوب ولكن لم أغيره والرجه ما زالت موجوده.

ولكن طالما تقول انك غيرت الهوبات كما ان الكفرات والجنوط ما فيهن شي ما بقي هناك شي يلف بقطر كبير سوى اللي ذكرت. ما به غير الصحن اللي خلف الهوب.

ويبقى سؤال واحد هل تحس الرجه في الطاره بشكل واضح عن طريق اليدين او انك تحسها جايه من كل مكان

[سرهيد1]

بسم الله الرحمن الرحيم


مساعدات التوازن سبب رئيسي في مثل حالتك شيك عليها عن شخص محترف

[الوسم]

انا يالحبيب عندي نفس المشكله ولا خليت شيء يفحص أويغير مافحصته أو غيرته ولا صار شيء
وموتري gx 1999
ومع انه يختلف شوي عن موترك من ناحية ان الدفرنس الأمامي عندي فليور او كما يسميه الناس عندنا بهذه التسميه
وعلى فكره من يوم طلعته من الوكاله وهذا هو شغله ماتغير
وبالنسبه لي ماباقي الا تغيير الدوده ولا نيب مغيرها
وأنصحك بحاجتين
شييك على مساعد الدوده اللي يسمونه مساعد الدركسيون
لالالالالالالالالالالا تسرع به اكثر من 120 كيلو في الساعه

[جهام القصيم]

بسم الله

السلام عليكم الحل الوحيد هو تركيب مساعد دركسون ثاني يعني دبل او تنحل المشكلة اخوك امجرب طبعاً ترهيم 0 سيارتي باترول 2003 بعد مرور شهر صار فية رجة او دبلت المساعد ونحلت المشكلة طبعاً فية ورش متخصصة في الترهيم مثل السيف في بريدة

[أبو الدحمي]

وعليكم السلام ورحمة الله وبركاته
أخواني
زي ما وعدتكم أني برد لكم خبر
ركبت كفرات أحد أخوياي ولا راحت الرجة
شار علي أحد الزملاء بتغيير الصلبان لأن المشكلة هاذي قد صارت معه على خفيف
وسمعت الشور وفكيت العمود لكن وش المفاجأة
المفاجأة هي أن الفني اللي فك العمود لاحظ شيء مهم قليل من يفطن له وهو أن العمود يعتبر قطعتين متداخلة ببعض بسنة
وهذي السنة لها مشحمة تشحم معها .. لاحظ أنه مع فحص العمود يدويا لقى فيه رجة خفيفة مع السنون اللي تتداخل مع العمود الأساسي وهذا يعني أن الحبيب صاحب السيارة الأول ماكان يشحم العمود وكان يمشي وبس
ركبنا عمود مجدد عند راعي المخرطة وجربت وياسلام ماشاء الله ماكن فيه شيء
واطير للضحيان واطق لي عمود ب 800 ريال واركبه وانا ماني مصدق
وابشركم ولله الحمد كل شي تمام الآن
وأشكركم لمتابعة موضوعي والمرور عليه وتعليقات الإخوان

:D :D :D :D