ابي جدول لرحلة الى اندونيسيا

[ابويزن08]

سلام عليكم تعازمنا انا ورحيمي كلا بعائلته الى اندونيسيا هذا العام

طبعا كلنا اربعة اشخاص ونبي السكن واحد كلنا في شقة وحدة

لو تكرمتوا ترانا اول مرة راح نطلع برا المملكة ونبي فزعتكم معانا

كم راح تكون تكاليفها من تذاكر وسكن ومعيشة
طبعا راح نذهب وقت الدراسة تفاديا لاارتفاع الاسعار هنالك وقت الاجازة

[دغيم1]

السلام عليكم ورحمة الله وبركاته
حياك الله أخوي
التوقيت جيد في إعتقادي لعدم وجود الزحام
وأسعار التذاكر سوف تختلف بحكم إنتهاء الموسم
وأتوقع أن تكون أسعارها في حدود 2500 ريال للشخص وقد تزيد قليلا .
أما السكن بما أنكم سوف تأخذون شقة واحدة راح تكون رخيصة
أما بالنسبة للمعيشة فهي تختلف بالنسبة للأماكن التي ستزورونها
وعموما المعيشة في أندونيسيا ليست غالية وخاصة بعد الموسم
تمنياتي لكم برحلة سعيدة وآمنه
وعليك بالروابط التالية لتستفيد من رحلات من سبقوك
تحياتي

*** رحلة برق4 الى بلاد الأندومي ( اندونيسيا )... بالصور *** (http://www.mekshat.com/vb/showthread.php?t=112840)

رحلتي للبلاد الاندونيسيه مع الصديق والعضو mfad (http://www.mekshat.com/vb/showthread.php?t=218330)MOHAMMED..

[بن حاضر]

كم مدة الاقامه ...
يعني متى تاريخ الذهاب والعودة ..
ولي عودة ان شاء الله
..

[ابويزن08]

هلا اخوي ان شاء الله المدة راح تكون عشرة ايام

تاريخ الذهاب شهر 11هجري

[راعي بيشة]

حددوا برنامجكم الجبل وجاكرتا

تبي نصيحتي استاجر الفنادق من هناك من المطار من مكتب كاها

خذوا معكم أكل نصيحة جبن زيتون كيري قشطة مربى رز . . .

وسأرجع أعطيك تفاصيل

[بن حاضر]

يومين جاكرتا .. يوم الوصول ويوم تمشية .. وزيارة بعض الاماكن ..
4 ايام بنشاك او بنجاك او الجبل كلها نفس المنطقه بس الاسم متغير من شخص لآخر.. او تخليها 3 ايام ..
يومين باندونق .. تقدر تخليها 3 ايام ..
يومين جاكرتا للتسوق والاستعداد للعودة ..


الميزانية يالغالي تفرق من شخص لآخر ..


يعني انا عن نفسي اذا سافرت لحالي اصرف من 150 $ الى 200 $ يومياً شامله السكن والمواصلات والمعيشة ..
وآخر مره سافرت فيها قبل 6 شهور تقريباً كنا 3 اشخاص صرفنا 9 الآف ريال سكن ومعيشة وتنقلات وكانت الرحله تقريباً 14 يوم والايام الفعلية في اندونيسيا 12 يوم بالضبط ..


وللمعلومية اندونيسيا من بعد الساعة 9 الليل نايمه يعني مافي إلا المطاعم فقط .. يعني اسواق و مولات والاماكن السياحية مقفله ..
التنقلات في جاكرتا تكاسي فيه تكسي لونه ازرق اسمه ( بلو بيرد ) وعلى العداد ..
في بنشاك وباندونق لابد من سائق خاص يكون معكم خلال تواجدكم في بنشاك او باندونق واليوم اللي ما تحتاجونه تقدر تستغني عنه او انك تتفق معه من الساعه 9 الصباح الى 5 العصر مثلاً .. يعني بتطلع من جاكرتا لبنشاك لابد من السائق الخاص لان التكسي ممنوع يوصل لبنشاك ..
والسكن في جاكرتا تحجز من المطار يعني بعد ماتخلص من الفيزة والتختيم واستلام العفش تمر مكتب اسمه كاها تلاقيه عن بوابة الخروج احجز من عنده وهو ارخص من الفندق او الشقق ..
السكن في بنشاك .. عندك خيارات فلل / منتجعات / فنادق .. اذا كانت معكم عزبة طبخ ونواشف وقهوه وشوي وغيره افضل لك السكن في فله اوفر واحسن اجواء والفلل كثيره مره .. تقدر تفرفر مع السواق و تشوفها بنفسك وتختارها او تمر مكتب اسمه سلطان عند البقالات السعودية يجيك على اليسار وراعية سعودي اسمه سلطان المزيد على ما اظن وهو انسان رائع جداً ممكن انك تحصله وراح يخدمك كثييييييييير .. او فيه شخص اسمه ( زكي ) وفيه بنات كلهم يتكلمون عربي ،، او اي شخص موجود تقدر تحجز فله او فندق او منتجع .. او السائق الخاص يقدر يدلك على فلل تكون للعوائل بصراحه مو كل فله او مجمع يصلح للعوائل .. لان فيه فلل تكون تجمع الشباب وهات لك طرب و اغاني و سماعات وازعاجات الى الصبح .. وحاول تدور لك فله خاصه يعني مو في مجمع مسبح خاص وحارس وخدامه .. مع ان المجمعات فيها حراسه ومسابح خاصه وتقدر تجيب خدامه .. بس زي ما قلت لك بعض المجمعات تكون خليط من الشباب ..
واذا عجبك الجو في بنشاك تقدر تطلع لباندونق في نفس اليوم وترجع ..


وراح يوزعون عليكم كروت في الطيارة .. تعبيها في الطيارة افضل لك .. وراح يختمون عليها في المطار ويعطونك جزء منها .. الجزء هذا لابد انك تحتفظ فيه لانهم راح ياخذونه منك عند العودة ..
يوجد ضريبة في المطار عند العودة سعرها تقريبا 60 ريال للشخص ..
وفيزة الدخول تاخذها من المطار في جاكرتا بـ 25 $ للجواز .. ومدتها 30 يوم فقط ..
ولما توصل لجاكرتا اكد حجز العودة لان احيان يلغى الحجز .. ضروري ..


والسائق الخاص سعره تقريباً من 450 الف الى 550 الف روبية .. والـ 100 الف روبية تساوي تقريباً 42 ريال .. يعني السواق تقريباً راح يكلف يوميا في بنشاك من 190 الى 230 ريال .. شامل الضرايب والبنزين .. و حاول قدر المستطاع انك تكاسر في الاسعار يعني ابو 100 حاول تاخذه بأقل من النص إلا في اماكن تكون فيها الاسعار محدده .. مثلاً الاكل اللي يكون فيه منيو والاسعار موجوده او الدخوليات في بعض الاماكن الترفيه هذي اسعارها تكون محدده .. بس في الاسواق والسواقين والفلل كاسرهم لا تخليهم .. واي استفسارات انا حاضر ..

وهذي روابط تقدر تستفيد منها
http://www.mekshat.com/vb/showthread.php?t=231666


http://www.mekshat.com/vb/showthread.php?t=233059


http://www.mekshat.com/vb/showthread.php?t=263623


http://www.mekshat.com/vb/showthread.php?t=218330


و موفق خير ..

[ابويزن08]

بارك الله فيك ويتقبل صيامك وقيامك

18000ريال راح تكفينا 10ايام مع تذاكر والمعيشة والسكن

[بن حاضر]

بارك الله فيك ويتقبل صيامك وقيامك

18000ريال راح تكفينا 10ايام مع تذاكر والمعيشة والسكن


الله يجزاك خير ..

.. ان شاء الله تكفي ..

لان التذاكر لحالها راح توصل 10000 ريال ويمكن تزود ..
يبقى 8000 ريال يعني بمعدل يومياً 800 ريال المصروف اليومي .. تكفي ان شاء الله .. بس حاول يكون معك مبلغ زيادة احتياط لا قدر الله يعني مو تروح بـ 8000 ريال بس لا حاول تاخذ زيادة 3 الآف مجرد احتياط او اكثر .. والمبلغ الاحتياطي يكون مع شخص آخر ..
لان احسب حساب الفيزة والضرايب .. الفيزة لشخص حوالي 95 ريال + الضريبة 60 ريال ( في العودة فقط ) .. يعني 155 ريال للشخص يعني الجميع 650 ريال تقريباً ..
ودايم اذا جت تحسب شي لا تحسبة بالضبط لا حاول تحط احتياط زيادة .. وحاول انك تكاسر في السلع ..

السكن في بنشاك في فله مو في فندق يكون ارخص و اوفر لكم .. و الفنادق والشقق ترى ماتكون كل غرفه فيها سرير نفرين .. لا تكون غرفه ماستر يعني سرير نفرين ودورة مياه خاصه والغرفه الثانية تكون سرير نفر او سريرين منفصله .. اما الجبل لا تلاقي غرفتين وكل غرفه مستقله بدورة مياه وسرير نفرين ..

[ابويزن08]

الله يجزاك الفردوس الاعلى

[صقرحايل]

مــــــــــــــــــاشــــــــــــــاالله تبارك الله
اول شى تروح وتجي با السلامه
وهناك لا تدور شقه عليك با الفله دورين وكل شى تبى تلقاه هناك
بس خذ الرز معكم اهم شى ولا توضح هناك انك اول مره تجى وتدرى اخر مره جيتها متى عام 18
واول مره جيته عام 1408وجيتها اكثر من 20 مره
بس يا الله حسن الخاتمه
وشكر لك

[بن حاضر]

الله يجزاك الفردوس الاعلى




وياك وجميع المسلمين يارب ..

ورحلة موفقه ان شاء الله ..
واي خدمه انا بشوفه ..