احتبار تصادم جانبي للبرادو الجديد ... { غريب جداًً }

[زوم]

السلام عليكم



::

::



وانا افر بالنت .. لقيت مقطع اختبار تصادم جانبي للبرادو الجديد .. شئ جداً عادي بس لما شفت الفيديو انصدمت من البرادو !!!!

... انقلبت السياره ...
http://www.youtube.com/watch?v=mIxiPhRWHrw
والجيوب الثانيه ما آنقلبت .. ليه البرادو ؟


انا اقول لآن ارتفاعه عالي جداًِ .. بالنسبه للعرض



شوفوا الجيوب الثانيه :-



فورد اكسبديشن / لينكلون نافيجيتور
http://www.youtube.com/watch?v=45rQiIOHyvs
فورد اكسبلورر
http://www.youtube.com/watch?v=rRCc_JtmJAE
شفروليه تاهو

http://www.youtube.com/watch?v=BjBBSp7o_pU


للآسف لم اجد اختبار تصادم للآند كروزر { لا آعلم السبب }

ولا للباترول { لعدم وجوده في امريكا }





::


::



بعد الفيديو .. اعتقد هناك الكثير من الآسئله سوف تطرح منها


هل انظمه الآمان والسلامه في البرادو سيئه ؟




والسلام عليكم ورحمه الله وبركاته .. :)
__________________

[عميد سامودة]

السياره اللي صدمت البرادو يوم دقت البرادو وارتفع الموتر بغى يرجع لكنها دخلت تحت السياره مما ادى الى انقلاب البرادو لو صدمتها ووقفت كان يمديها رجعت راجع المقطع وتشوف

[ابودعسان]

تصدق ضحكت يوم انقلب كنه دولاب ملابس سادحه على جنب
شف الباثفيندر
http://www.youtube.com/watch?v=kbI48mloPTI
وهذا الاف جي
http://www.youtube.com/watch?v=YtZbofbG2jw
ومو تعصب ضد البرادو لا بس كل سيارات الدفع الرباعي الثانيه نفس الطريقه تزحف على جنب ماتقلب
الله يستر على سواقين البرادو امين

[سرطوقا]

تصميم برادوا نحيف ورفيع هذي مشكلته

بارك الله فيك على ادراج المقاطع

[بدون عضويه]

بس بس عرفت المشكله هههههه

شف الضاهر ان العرب الي صدمت البرادو ضغطته
من جهت الصدمه وكانت ردت فعله ان السست بعد ما انضغطت تتمدد ويوم جات تتمدد ارتفعت السياره عن الارض من جهت الصدمه ومن الجهه الثانيه كانت مرفوعه من الاساس فطاحت السياره على الكفرات ومسك الكفر بالارض بقوه اكثر من الازم ومع اثر الصدمه انقلب وركز ع الصوره يوم جابوها من قدام






يا ويلي والاه شفتو الشفر كيف تقول سست الدنيا والاخره فيه شفتو بعد ما استقر من الصدمه يهز يمين وشمال هذي السيارات العائليه ولا بلاش
احنا معانا جي ام سي و الضاهر انه نفس السلامه ونفس الموديل




على كل حال شكرا



تذكرت شي السياره خفيفه بزياده والعربه يوم صدمتها طيرتها

[ولد وايل..]

نتيجة متوقعه وحتمية...

[أبوغمارة]

فيه فرق ،، العربة اللي صدمت البرادو نازلة مرة ،، اما اللي صدمت الباقيات وخاصة الاكسبلورر فهي مرتفعة ولذلك لم ينقلب
والله اعلم

[بعيد الهقاوي6]

البرادو معروف انه سريع الانقلاب والا اشلون يسحبونه من السوق الامريكي ويوقفون انتاجه

ويرسلونه لسوقنا اللي يقبل بالكديش

[ابن هادي502]

الله يسترنا يعطيك العافية

[ابن عكاش]

فعلاً تصميم السيارة فاشل هم مايبون يخلونه عريض مثل اللاند علشان مايصير من فئته لكن هذي هي النتيجه صندوق مرتفع اكيد بيكون عرضه للإنقلاب اكثر من غيره

[عيش صحاري]

مشكور الله ايعافيك على المقاطع

[hally]

السياره اللي صدمت البرادو يوم دقت البرادو وارتفع الموتر بغى يرجع لكنها دخلت تحت السياره مما ادى الى انقلاب البرادو لو صدمتها ووقفت كان يمديها رجعت راجع المقطع وتشوف
كلام سليم:good:
دقق بالمقطع وتشوف؟؟

[التعـ King ـديل]

عندنا برادو

المسافه بين الكفرات قصيره مررره مقارنه باللي مثله اضف على ذلك وزنه خفيف جدآ

واعرف واحد شخصيا متوفي على برادو

انا حليت مشكله الارتفاع الزايد وقصيت شوي من اليايات الاماميه والحمدلله طلع افضل شويتين

[هبس 911]

ماتوقعت بيصير كذا بالبرادو...؟
طالع فاشل صراحه مايستاهل قيمته الحاليه ..
للاسف سيارات مغشوشه..
اما الامريكي صراحه في الامان مبدع

[بعيد الارماس]

كويسات معليهن

[مكشإإت]

البرادو سياره عديمة السلامه
فاشل جداً جداً
ومع ذلك سعرها غالي

[سديراوي نت]

انا يوم شفت المقطع استغربت صراحة من سرعة انقلابه.. لكن شفت مقطع ثاني نفس الاختبار لسيارة رنج روفر وكذلك انقلب!!

[الوافي99]

هناك فرق بين الادوات المصنعه لإختبار التصادم منها ماهو واطي بنص الباب وتحت ومنها ماهو بكامل باب السائق او الراكب لاتقارن

[برهان1]

احترم اراء الجميع لكن ياليت الواحد يتكلم بدون عنصريه لان ياما شفنا سيارات بي ام والا مرسيدس منقلبه لكن ليش ما يتكلم الواحد بحياديه ويتكلم بعقلانيه مدري لازم مقارنه يعني واكيد ان كل شيء قضاء وقدر ومشيئة الله فوق كل شيء

انا رايي ان اي سيارة مرتفعه عن سطح الارض تكون اكثر عرضه للانقلاب بغض النضر وبالنسبه لثبات الامريكي طبيعي موتر جربه في البر وتعرف ليش ما انقلب دب ثقيل ونازل مقارنه بالجيوب الثانيه والباث فندر نازل وكل اللي يستخدمونه للبر يقولون لو انه ارفع بس ولاحظ الالماني وهو افضل السيارات امان ليش ما بينه وبين الارض اللا سانتيين اللا عشان الثبات
عموما رايي ان السبب انه رفيع ليس اللا واللي يبي الزين يصبر على مرره تبي الرفع تحمل خطورة الارتفاع والله اعلم وفي الاخير الله يستر على المسلمين الجيوب في الصدمه بديها قوي بس تنقلب
والصغيره قليل ما تقلب لكن كرتون ادنى دقشه خطر عليك الله يحفظنا بس واللا كل السيارات الحين خطره اما بالنسبه للسعر للسيارة فهو مبالغ فيه وبقوه

تحياتي للجميع

[جروان]

نتيجة متوقعه وحتمية

[ابن علوان]

ماتستغربون شوفو تصميمه قاعدة عجلات ليست عريضة وارتفاع السقف كبير

مثل باصات النقل الجماعي بس اقلها الباصات ماتنقلب

وفي النهايه نغش انفسنا ونقول تويوتا جوده جودة مين ياعم

[سلومي سار]

حسب ما شفت في المقطع أن عربة الاختبار كانت هي السبب




لو تدقق النظر تلاقي إن ألعربه بعد إن صدمت البرادو ارتفع البرادو وسمح للعربة ان تدخل تحته وفي اثنا مقاومته للصدمة ارتد على عربة الاختبار ونتج ضغط شديد حتى اثر على إطارات عربة الاختبار وفي اثنا تحرر العربة من تحت البرادو كان هناك ارتداد شديد ناتج عن ضغط هواء إطارات العربة لدرجة ارتفاعها عن الأرض فساعدت على رفع البرادو مما ادا للانقلاب



كذلك الشي نفسه حصل في مقطع للرنج روفر



اكثر سيارة قاومت للصدمة الباث فندر لدرجه ان عربة الاختبار ارتدت


الانقلاب له عدة مسببات
01 قدرة الله
02 تعليق السيارة يختلف ( سست 0 يايات ) في عملية المرونة
03 ارتفاع السيارة
04 عرض السيارة
05 وزن السيارة
06 مكان وقوع الحادث



نتمنا لكم السلامة

[SIF]

خذها مني أنا أخوك

البرادو سريع الأنقلاب مثله مثل الجيب الربع
سخيف ورفيع

واسأل أي شخص كان عنده برادو بشرط يكون باعه لإن عنده مايسبه إلا من رحم ربي

[تريل بلدوزر]

الكلام شوفوا كيف أمريكا تحرص على اختبارات السلامة لأي سيارة تنزل عندها في السوق , عندهم منظمة NHTSA الهيئة القومية لسلامة المرور على الطرق السريعة - وتعطي تقرير كامل عن أي احتمال حادث ( أمامي ـ جانبي ـ خلفي ـ الاير باج ـ انقلاب ـ فرامل في الماء والثلج وثبات المنعطفات ـ ومانع الانزلاق ـ وغيرها ) وهذا الشي يفتقده العرب بشكل والله ,, طبعا ليس فقط أمريكا وانما كندا وأوروبا وألمانيا وروسيا .

بخصوص اختبارات البرادو فهي من منظمة يابانية JNCAP هيئة اختبارات السلامة والقيادة وليست نفس المنظمة الأمريكية التي اختبرت التاهوو والفورد ,

شف السيكويا بالاختبار الأمريكي
http://www.youtube.com/watch?v=vXnnKz06Rko&feature=related

وهذي الهايلوكس والفورنر اخو الفورتشنر
http://www.youtube.com/watch?v=DuiAG8TG_tw
نفس الشاص على مايبدو حاطينهم باختبار واحد

وشوفوا حبيبنا التريل بليزر
http://www.youtube.com/watch?v=GljDUHRRf7s

خلك بالأمريكي وبس

[gm2009]

بالنسبة لنتيجة متوقعه وبالنسبة للي يقول سبب انقلاب البرادوا ان سيارة الاختبار دخلت تحت البرادو انا اشوف انه موب سبب ابدا السبب من خف السيارة وعدم حسن تصميمها هو السبب والا لو تصميمها زين كان ما ارتفعت ولا سمحت لسيارة تدخل تحتها .
لا نقعد نبرر لا اجل لو كل واحد يمشي ويلتزم بنظام المرور كان ما صارت حوادث !!!!

[مسير عليهم]

بخصوص اللي قال ان العربه هي السبب

اقول ارجع للمقطع السيارة ارتفعت قبل لا تدخل العربه والا وشلون بتدخل والموتر ثابت

لكن مقيوله لو يجيبون سيكل وعليه علىمه تايوتا شريتوه بميه الف ويازينه

[رحال300]

http://www.youtube.com/watch?v=FBkk08gOU8E&feature=related

وهاذي لا الذيبان الاكستيرا

[((أبو أسامة))]

طلعت اكسبلور جديد قبل فترة دعواتكم بالبركة

الغريب وأنا عند محل التنجيد جاني مصري يسوي استطلاع عن البرادو الجديد قلت ليش قال الشركة مستغربه أنه ما مشى يبون يعرفون السبب .

[سديراوي نت]

الآلة اللي صدمت البرادو تختلف عن اللي صدمت الجيوب الثانية..
نفس الآلة صدمت الرنج روفر وانقلب!!!
شوفوا المقطع عند الثانية 45 لكنهم ما كملوا مشهد الانقلاب!!!
http://www.youtube.com/watch?v=AMrSxi1Ooro&feature=related