ورطة حقيقية "هذا الموضوع لسريعي البديهة فقط" ادخل وشارك

[الصحاري-KING]

ما ذا لو انك انت واصحابك كاشتين في احدى الروضات وكا ن معكم سيارتين ، جيب باترول ولاند كروزر مثلاً
وقررتم ان ان يكون العشاء دسماً( رز ودجاج ) من احدى القرى القريبة وذهبت بالباترول وكان الوقت الساعة 7:00 مساءً تقريباً وعندما عدت توقفت عند الخيمة استدعيت احد اصدقائك باسمه ليساعدك فلم ياتي عندها بادرت بتنزيل العشاء بمفردك وعندما دخلت الخيمة ومعك صحن العشاء لم تكن الخيمة خيمتكم مع العلم انها مشابها لها وبجانبها سيارة لاند كروزر .............................ما ذا تفعل؟؟؟ واكتب مشاركتك...........

[اسنافي]

اقول الله يحيكم على عشاكم

[الصحاري-KING]

هذا بلى والله من طيب اصلك يا النشمي وانك سنافي صدق و(اسم على مسمى) والله تصرف مبدع اشكرك عليه اخوي.........

[الريمى]

اقول لهم خدمة توصيل طلبات من اللى طالب من المطعم رز ودجاج

[الصحاري-KING]

مشكور اخوي على المرور وانا اكتب هذي المواضيع لك واللي زيك من سريعي البديهة ومشكور مرة ثانية

[الصحاري-KING]

انا اشوف ان الزيارات كثيرة لكن الردود؟؟؟؟؟؟؟؟؟؟ يعني سريعي البديهة من المكشاتيين قليلين ؟؟؟؟؟؟؟؟؟؟؟؟
ان اتوقع ان المكشاتي الحقيقي يعرف يتعامل مع المواقف ويتصرف حسب الظروف ؟؟؟؟؟؟؟؟


ولا نزال ننتظر سريعي بديهة؟؟؟؟؟؟؟؟؟

[* ضب *]

كاشتين واكل من المطعم وفي روضة بعد نا قصهم ملاهي وتكمل ...
الحل الصحيح انه يقول( الله ان تحييكم على شبب دلاختي فيه لكم سبب ) ويخليها ضحكة ويزهم خوية ويجي ويكمل الناقص
وثاني مرة يربط حبل فيي خيمة ربعة

[**القنيص**]

ههههههههههههههه
تفضلو على العشاء

[الصحاري-KING]

مشكورين على المرور

[الذرب جسار]

دخلت وقريت الموضوع ولاعندي مشاركة تسوى ويوم شفت إنك دريت عن دخولي إستحيت والله لاأطلع وانا ماشاركت لكن أقول الموضوع قد العنوان ممتاز بالحيل لو إن هاللي طالع لوهو كاشت بشقق مفروشه اصرف ......على العموم يقلطه لهم كما ذكر الأخوه

[الصحاري-KING]

والله انك كفيت ووفيت اخوي وما تقصر وانا مستحي منك وانت احرجتني بس انت يكفي دخولك وهذا شرف لي وشكراً مرة ثانية

[النوخذة]

السلام عليكم ورحمة الله وبركاته
اقول لهم
(حنا جيرانكم وحولكم وهذا شئ من عشانا والسموحة على القصور )
وبس اطلع اطير للقرية واجيب عشا ثاني لربعي

[الصحاري-KING]

مشكور اخوي على تفضلك بالرد وهو صراحة من افضل الردود

[تميم]

اقولهم السالفة واقلطهم على العشاء وهم يبي يعييون والزم عليهم وانقز واجيب عشاء لاخويياي.....
مره صار لي موقف مشابه بس انا شبهت على اخوياي وسيارتهم نفس سيارة ربعي ونزلت الفرشات والاغراض وانحرجت منهم ولزموا علي ويالله مشيت منهم.......................................

[المربد]

من سمعت قولت دسم وانتهى الدسم بدجاج من المطعم..؟!! الله يكرم النعمة.

اللي يجيب عشاه من المطعم ما عنده مانع يسلم عليهم ويعتذر ويرجع به للسيارة.

لكن لو قلت ان كواشيت شبوا النار ويدأالسلخ والطبخ ثم غيروا رايهم بالمكان،، وتركوا اثنين من خوياهم يطبخون ثم يلحقون وراهم في فيضة قريبة...!!
على العموم هو موقف حرج صحيح.

واظن اقل ما يسويه انه يعرض عليهم العشاء

[MARINE]

السلام عليكم ورحمة الله وبركاته

بصراحه موقف اكثر من محرج ، واذا حصل لي اقول لاهل الخيمه تفضلوا على عشاكم

وترى حنا جيرانكم محنا بعاد عنكم وان شاء الله تشرفونا على القهوة واذا كانوا نشاما امثالكم

والله ان يلزمون العشاء بكرة عندهم ، وانا طالع حد الدعسه للديرة اجيب عشاء للشباب

واقولهم تراكم معزومين بكرة على العشاء عند الجيران ، والله مادروا ايش اللي صاير :D

مشكور اخوي على هذا الموضوع.

MARINE

[yass]

مافيه حل الا اقلطهم على العشاء واقول اعذرونا على القصور واتعشى معهم وانادي ربعي عشان مانحرج معهم وسلامتك

[الرماي]

احم احم

والله هذي البلشه

اقول

((الاعذر والسموحه مو خيمة ابو فلان والله شكلي مضيع يالله مع السلامه ))

بسييييييييييييييييييييطه صح

[أبو ثا بـت]

ههههههههههههههههههههههه
من جد محرج . !! أبقولهم اسف معليش كنت ابي مدخل العوائل !! ((ناوي يودع الدنيا )) .... هههههههه
لا تبون الجد عاد أبقولهم .عندكم شطة اذا قالوا لا ابقول حتى انا ماعندنا ويالله مع السلامة ومع الباب !! ههههههههههههه

[AL-OTAIBI]

اقولهم آسف على الإزعاج و بااااااااااي

[صالح المطيري]

اقول لهم خدمة توصيل طلبات من اللى طالب من المطعم رز ودجاج
هههههههههههههههه رد ذكي جداً :D

[الربذي]

طبعا داخل ومعك صحنك وهم يطالعون فيك وفجاء الا ماهم بخوياك فعلا قدامك 3 او 4 ثواني لترد بسرعة لكن انا ابي اقول السلام عليكم انا غلطان لكن ماوالله اطلع وعشاي معي وجاكم وتستاهلون واعذرونا على القصور واانزله واطلع وبعدها يتبين ماعندهم بس المشكله اذا ضيعت مره ثانيه وثالثه وراحت فلوسكم عشاوي !!!!
وتبي الصراحة اخوي فعلا موقف محرج جدا لا ويزيدها احراجا اذا جايبلك نص دجاجه والا اذا كان مندي نفرين او ثلاثه جان زين يطلق وجهك شوي والا لا وش رايكم
محبكم الربذي

[نفل]

السلام عليكم ورحمة الله وبركاته

هلا اخوي الصحاري-KING

والله بصراحة اخوي اللي يبي يرد يبي يفكر الف مرة وبعدين يكتب الرد يعني ما صارت سرعة بديهه :D

المهم بالنسبة لي اطلع وادور على ربعي لان الخيمة فاضية يعني ما به احد :D

والسلام عليكم

[الكشاح]

قوووووهم ....والسموحه يا اخوان الظاهر اني مغلط بالخيام..وهذا بيدى عشاء خفيف..جايبه من الديرة..لربعي..وفرصة سعيده اتعرف على هالوجيه الطيبه..والغداء عندنا بكرا الله يحييكم..وتسرح من الصبح الباكر وتسحب ذاك الهرفي..وتقوم بالواجب..

وتحياتي لك يا ملك الصحاري

[nooh79]

شلون اقول لهم تفضلو عشاكم -----------------
وماحد هناك قلي تفضل هههههههههههههههههههههههههه

[ساري15]

هههههههههههههههههههههه

تسلم والله ....

انزله واقول حقكم وجاكم ... وتفضلوا على عشاكم .... سلام عليكم

والله يعين باروح اجيب عشا ثاني .....

[مغباش]

السلام عليكم

ليش الف وادور ليش ما اقول الصراحة وبكل ثقة لان من المستحيل ان اقناعهم بغير انك مضيع
السلام عليكم اسمحولي يالربع انا مضيع ربعي وجيت عندكم بالغلط لكن والله ما اطلع الا اتعشا انا ويا هالوجيه الطيبة وتراه ماهو حقكم وانتو معزومين بكره على الغدا بمخيمنا القريب منكم ...واجاملهم كأني ماكل معهم واطلع على طول اجيب لربعي عشا ... وسلامتكم
شكرا لك الصحاري على الموضوع وعلى اعطائنا جرعة اضافية في النباهه

[قتال]

السلام عليكم ورحمة الله وبركاته ،،،،

الأمر سهل ..

إذا دخلت الخيمة ولا لقيت أحد .. أرجع لسيارتي وأدور ربعي ..

إما إذا لقيت أحد بالخيمة .. أقول آسف هذا عشا النسوان .. وأرجع بسرعة لسيارتي وأدور ربعي ..


أقول كانها على هالمواقف الأمر سهل .. المواقف والله إلي مرت وستر الله علينا .. ههههههههههههه

[الصحاري-KING]

السلام عليكم ورحمة الله
مشكورين جميعاً على الردود والمشاركة وبعد المشاروات واطلاع بعض الاخوان واكثر من مشرف لي علاقة بهم في هذا المنتدى تبين ان:

اسرع رد : الريمي

افضل رد: الربذي

رد حاز على اعجاب الجميع: مغباش

واحب اذكر الاخوان ان كل الردود ما تفرق عندي لكن هذا راي اللي سالتهم ومشكورين وما قصرتوا وجميع الردود تبين ان كل من رد في هذا الموضوع معدنه اصيل وهذا مو غريب على هالوجيه الطيبة وتحياتي لكم..........

[أبو فراس]

السلام عليكم ورحمة الله وبركاته

اسلم عليهم واقول ان النبي صلى الله عليه وسلم وصا على الجيران وحنا جيرانكم وحبينا نمالحكم

حياكم الله على قل الكلافة

[الصحاري-KING]

ما قصرت اخوي abu fares على المرور

[المموه]

بسم الله الرحمن الرحيم
اخوي الصحاري السلام عليكم ورحمة الله وبركاته
اولا كشته وخيمة يعني بيات واستعداد متكامل
ثانيا رز ودجاج ليس دسم وكان الافضل انك رحت تجيب هرفي
ثالثا حنا بالبر ماتعودنا ناكل من مطاعم هذا اذا كان بالقريه مطعم
رابعا اذا جيت للخيمة مثل ما تقول وما طلعوا اخوياك هناك تساؤلات . هل عشاك يكفي اللي دخلت عنهم ويواجه وكم عددهم وهل هم ياكلون دجاج يمكن ذبيحتهم معلقه وهذا اكيد . لذا الحل تسلم وتعتذر وترجع لأخوياك تعشيهم رز ودجاج . والسلام

[الصحاري-KING]

اخوي المموه مشكور على الرد وكل تساؤلاتك تندرج تحت الــــــــ يمكن ، يعني مو اكيد ان العشاء يكفي اما الباقي اللي هو مو دسم و...الخ فلا تدقق علينا الله يسلمك كلها بس علشان سرعة البديهه عندك والسلام

[المموه]

اخوي الصحاري
السلام عليكم ورحمة الله وبركاته
مشاركتي بالموضوع لم تكن تدقيق انما استغراب (حائل وعشاء دجاج) مايصير حنا متعودين هناك على ذبايح
الامر الاخر اني اتمنى ان اي عضو يطرح موضوع يكون مدروس مع جميع النواحي لايكون مجرد فكره خطرت بالبال وقام بطرحها بالموقع ( اعني ان يكون الامر معقولا لتكون المشاركة والرد مناسبا لما طرح )
واشكر لك الرد وسعة صدرك ( اخوك المموه)

[محب الشمال]

اخوي مايبي لها كلام ولا يبي لها كيف تتصرف
من عادات المشكاتين انهم من الرجال اهل الكرم والطيبه والمرجله
فشي طبيعي اذا دخلت على ناس باين عليك انك غلطان لانك دخلت من غير استأذان
ثاني شي هم بيعرفون ان العشا ليس لهم
ثالثاً شي طبيعي بتعتذر منهم وشي طبيعي انك بتعزمهم على العشا وقد تحلف عليهم
والشي الطبيعي اكثر ان عادات المشكاتين الفهم والمعرفه بيعرفون ان هذا العشا لاخوياك فمستحيل ان الكشاته الرجال ياخذون عشاك وهم عارفين انه ليس لهم وانه فيه ناس تتنظر عشاهم
وغير كذا اكيد هم حاسبين حاسبهم على العشا وحتى لو ماهم حاسبين حسابهم ما يرضون ياخذون عشا غيرهم ولله الحمد الخير واجد والنعمه كثيرة الله يديمها

هذا رايي ولكم الشكر

[الصحاري-KING]

اخوي المموه
وعليكم السلام ورحمة الله وبركاته
بالنسبة لاستفسارك اللي هو انك تدرس الموضوع من جميع النواحي اذا صرت في هذا الموقف ما عندك وقت تدرس الموضوع من جميع النواحي ......عندك 3 ثواني او 4 ثواني علشان تتصرف وهذا المقصود بـــ سرعة البديهه .........اللي انا ناوي اوصله انك اذا قرأت الموضوع تكتب اول ردة فعل تجي على بالك

واعتقد ان اخوي ((محب الشمال)) كفى و وفى ودرس الموضوع من جميع النواحي ومن كل الافتراضات
وانا احترم وجهة نظرك واتقبل اي انتقاد منك اخوي او من الاخوان الباقين وانا جاي اتعلم من هالوجيه الطيبة فما فيها اي شي اطلاقاً
واشكرك مرة ثانية ولا انسى اخوي ((محب الشمال))ما قصرت وعساك دوم عالعافية..............

[walo]

والله الورطة صدق ما خلوا لنا الاجاويد شي نقوله

[الصحاري-KING]

ولا يهمك اخوي مرورك يكفي ................

[walo]

طيب الله حالك وطاب ترحابك

[د.الكاشت]

أقول حنا جنبكم وعازمينكم على العشاء

[القنيص]

والله الورطة صدق ما خلوا لنا الاجاويد شي نقوله

[الصحاري-KING]

مشكور اخوي على مرورك

[ابومرزوق]

:no: السلام عليكم ورحمة الله وبركاته
انا مع راى اخوى المربد في الراى

[بن نويشر]

أقول حياكم الله تفضلوا تعشوا معنا (ولا له داعي تلزم عليهم) ..

وشكراً

[ابودرويش]

بسلام عليهم واقول حن مجموعه التفقنا نوزع عشا على الي في البر كلهم تفضلو عشاكم وكمان انتظرو غداكم بكره خرفان




وسلام عليكم اخوكم أبو درويش

[الكونترولCONTROL]

انا مستغرب كاشتين .... و لاند كرزر .... و باترول !!!!!!!!!!
و يجيبون عشاهم من المطعم ... لا لا لا اتصور اكشت مع ها الاشكال
!!!!!!!!!!!!!!!!!!!!!!!!!!!!!!!!!!!!!!!!!!!!1
اذا قلت لي ان السالفة ممكن تحصل .... اقول لك وس يكون رد فعلي !!!!!!!!!!!!!!!!!!
==============================================
تدري وودي ارضيك و اقول لك وش بيكون رد فعلي الافتراضي جدا :
ابقول تفضلوا يا النشامى لو ما هوب حقكم !!!!! و لكن ارسلوني رخوم اجيب لهم عشاء و لا ودي يذوقونه !!!!
-----------------------
امحق من كشته !!!!

[الصحاري-KING]

اشكر الاخوان على الرد ،، واخوي ابو درويش الله يهديك ما ضحتك مثل ضحكي من سنة ،، واخوي ابو هبال انا عارف ان الموضوع فيه تعارض لأن الكشتة ما يجي معها عشا من المطعم وكل الاخوان اللي ما بخلوا علينا بالردود ما فاتتهم النقطة هذي لكن تصرفك جميل ولو انه عقاب قاسي وشكراً لك......

[معدي الرجـــم]

والله ياطويل العمر هاذي غلطه والغلط حاصل
لاكن ما هيب مشكله العشاء معه وعندهم ان كان الرياجيل قد تعشوا فما صار شي وان كانهم ما تعشوا يحط العشاء ويقولهم
ابي اروح انادي اخوياي ويتعشون معنا اصلا فضيحه انك تعشي الرياجييل الدجاج ولا خبرت رجال طلع للبر واشترى
الدجاج ولو انك قلت لحم ولا ذبيحه اشوى من كلمت الدجاج الا ان كان تقدر الدجاج هذا شي ثاني
الرياجيل اللي قدامه ان كانهم يعرفون السلوم وعلوم الرجال يقولوله حنا قد تعشينا وانت رح عش اخوياك على الدجاج

[الكونترولCONTROL]

ايه هين يا معدي الرجم !!!!!!!!!!!!!!1
-----------------------------------------
و الدجاج الي كل ليلة بالبريميل !!!!!!!!!!!!!!!!!11
--------------------------------------------------------------

[الصحاري-KING]

الله يهديك اخوي ابو هبال كبرت السالفة وهي ما تسوى لو اقدر اعدل الموضوع باحطها ذبيحة بس ما اقدر لكن علشانك اعتبرها ذبيحة
بس لا تروح بعيد .....وسلامتك

[الحسكولي]

انا اقول كل موقف وله ظروفه وانا متاكد ان كثير من الاخوان اللي ردو يبي يتغير تصرفهم لو الموقف حصل فعلا لانه يعتمد على ظروف كثيرة منها الشباب اللي داخل الخيمه وطبيعتهم واعمارهم واشكالهم ومثل ماقال التصرف يحتاج الى ثواني ولكن اغلب الظن انه يبي يقولهم تفضلوا على العشاء والمعذرة على التقصير : :)

[مأيـغـرّز]

والله هذا حال اهل الباترولات كله امضيعين لو ماخذ الكروزر كانك وصلت خيمتكم طوالي رررررايت

[الذيب سرحان]

السلام عليكم ورحمة الله وبركاته :
بسيطة ومهنا الا العافية ، اقولهم شبب منتب له بسبب ، وحياكم الله على عشاكم .

[هاوي قصيده]

مشكور اخوي عالموضوع

اول ما ادخل اقول حنا مقعادنا حولكم وعزلنالكم عشاكم تفضلو الله يحييكم

[malik]

العوافي يارجال تري العشاء عندي اليوم

[ع.ف.الدرويش]

اقول الله يحيكم على عشاكم

مثل ما قال اسنافي.. :p وإن كانت فيه وسيلة إتصال بالشباب دليتهم على المخيم اللي انا فيه وتصير الفرحة فرحتين.. :cool:

[خبوبي]

الحل
اني احط العشاء وقو اليوم حنا عازمينكم
علشان بكرا هم يعزمونا
وقول اخوياي يبي يلحقوني
وكلم عليهم يجون
يصير صدنا عصفورين بحجر
الاول تعرفنا عليهم
الثاني والاهم القابله يبي يعزمونا

هههههههههههههههه
همه بطينه
وسلامتكم

[الصحاري-KING]

الاخ بسباس صادق اخوي لكن ردك هذا هل هو نفس الجواب اللي بتقوله ؟؟
الاخ مايغرز تراك طحت على الجرح ولا تحكك الله يهديك باللاند، ترا المواتر اللي غيره ما حولك احد والاخوان يتفقون معي ...
الخوان : الذيب سرحان -هاوي القصيد(مشكور على الاطراء يالغالي)-milk ينطبق عليكم ((خير الكلام ما قل ودل)) وجواب حكيم
الاخ الدرويش و خبوبي ينطبق عليكم اللي انا ابغاه وهو سرعة البديهة وعلى قول اخوي خبوبي ((عصفورين بحجر))

[غالي]

انا ابقول اسف غلطان وبطلع
بعد بيصيرون ماجابوا عشاء مثلنا مشكله اكيد كلو!!!!!!!! :)

[الصحاري-KING]

مشكور اخوي الغالي على الحل لكن لو كانوا على قولتك ما جابوا عشى بتصير ورطة وافلقني اذا تركوا عشاك يروح منهم

[فزاع _555]

يااخي حرام عليك لو كنت عارف ان هذا موضوعك مادخلت تعرف اني دخلت لمشاركتك الساعه 11,40 يعني الظهر تقريبا وصايم وما تسحرت ولا تعشيت امس يعني المعده متصفطه من الجوووووووووووووووع واخرتها تقول انه جايب معه عشاء مالقيت الا موضوع فيه اكل ؟

( هذا لو يدخل علي بالخيمه مايمديه يقول السلام الا انا اكلت اللي بيده وبعدها يبغى يتعذر والا يروح براحته )

[الصحاري-KING]

حياك الله اخوي فزاع احب اكون اول من يرحب فيك في هذا المنتدى وبين اخوانك المكشاتيين وياليت كان لي الشرف وكان موضوعي اول مشاركة لك لكن يالله صارت الثانية ...... وعلى ردك اخوي على الموضوع الصراحة اثرك طلعت شرس بس اخاف كل هالشراسة علشانك جوعان .. وبعدين وش الطاري الساعة 11 وما تسحرت لاتحسب انك صايم لحالك لكن مشكور على المشاركة ولا تدخل مواضيعي وانت صايم ادخلها بعد التراويح ترى كل مواضيعي اكل في اكل .......

[فزاع _555]

اخوي الصحاري انا لما اكون جوعان خلاص اكون جوعان هههههه واذا صارت العده مبسوطه اكون اليف للاخر
المهم انا حبيت اشكرك على ذوقك بالرد علي وعلى غيري
انا لما كتبت الرد كان قصدي اغير جو شوي يعني نفرفش شوي بس وعشان ماطوووووووووووووووووووووووووووووووول عليك اقول لك الله يرفع قدرك انت واللي دخلو للمشاركتك والمسلمين امين


وتقبل تحيات اخوك / فزاع 555

[الصحاري-KING]

هلا والله اخوي فزاع وانا والله من زمان عارف ان هذا قصدك وما لك علي يمين ان كل مواضيعي اللي انا كاتبها ابي واحد يفرفشنا وانت عاد الله يسلمك طحت على الجرح وهذا اللي انا ابيه ولا يروح بالك بعيد ترا يوم قلت لك ادخل وانت مفطر ترا كنت امزح لاني زيك احب الفرفشة وعسى ما تكون زعلت بس هذا اهم شي والاخوان الله يعافيهم ويجزاهم الف خير ما قصروا

[البريمي]

ابد !
يطلب منهم السفرة ويقول (المعذرة على القصور00000 وقدركم اكبر من كذا لكن الجود من الموجود؟
وبعد العشاء يقول السهرة معنا في الخيمة المجاورة((نفس خيمتكم بالضبط))

[شـهـاب]

اقوووووووولهم

ياهلا والله اليوم مسوين عشاء واجد وناوين نوزعه على الشبات القريبه مننا

لكن لا خلصتو من العشاء اغسلو الصحون وجيبوهن لنا


ههههههههههههههههههههههههههههه

بعدين طالع للبر وتجيب العشاء من الديره ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

غريبه!!

[القصيم-الرس]

أقول بسرعه وبدون تفكير


السلام عليكم
تعيشيتو ولا لا
إذا قالو لأ نعشيهم وإذا خلصو متعشين
أعلمه بالقصه
طبعاً أعلم أخوياي قبل لا يقلطون
بالقصه على الكنود
وإذا عيو ألزم عليهم وأنشب بحلوقهم
لين يتعشون


وشكراً الرساوي

[اسـير الشـفـر]

انا بقول لهم معليش انااسف بس غلطت بالخيمه واسحب عشاي معاي وارجع ادور على خوياي
V
V
V
V
V
V
V
V
V
V
V
V
V
V
V
V
V
V
V
:eek: يخص يالنذاله ماهقيتها منك يا اسير الشفر :no2:

[ابوعلي7]

السلام عليكم ورحمة الله وبركاته
والله الموضوع لايتناسب ( من وجهة نظري ) مع العنوان اطلاقا كما ان لي تحفظ على قول اكله دسمه ثم يأتي وصفها ب رز و(دجاج؟؟؟؟؟؟؟؟؟؟؟؟؟؟؟؟؟) الا اذا كان ذلك ينطلق من جود الكاتب ( ولا أتمنى ذلك)

[الضاري]

تجيب عشاء من المطعم وأنت طالع للبر...!!!!

يالربع العذر والسموحه منكم لكن تفضلوا أبيكم تشاركونن عشاء ..

[دبارة]

مارد عليك احد يعني الخيمة فاظية ديور ودور ربعك

[مدمن القهوه]

المشكله ان اهل الخيمه ماطلعوا له وهو ينادي . لسببين اما هم نايمين وهذه (فرصه للعطه ). او خايفين وفي مثل هذه الحاله (ماعلي شرهه)

[الطعس الذهبي]

ماضنيت إنكم بكشتة والله شكلكم بسفر رايحين يجيبون العشاء من المطعم وهم كاشتين والله خوش كشتة

[كشتة اغليص]

المشكلة اللي بالخيمة صاحين ولا مخربينها ؟!

انا لو كنت محلك وشفت محد رد علي

افـــرك لــهـــا ...

[ناجز]

اعشيهم واكثر ظني انهم بيكونون متعشين

[للمبادله]

اشوف اقرب واحد واقول فلان قم جب الباقي من السيارة ابيهم يقولون غلطان واشيل العشاء وامشي

هههههههههههههههههههههههههههههههههههههههههههههههههه هههههههههههههههههههههههههههههههه

[فارس المكشات]

مادام طالع البر ورايح يجيب العشا من المطعم أجل يخلف الله بالخير
البر إذا مافيه شبت ضو وطبخ ونفخ ولا الجلسه بالبيت ارحم

[ابوفرحان]

صراحه موقف محرج
تصرفي كالاتي بسلم عليهم واحد واحد
وبضحك وبنكت معهم بخصوص تلك الموقف واقولهم سبحان الله الرازق
ثم بدخل بالجد معهم واقولهم يرجال هذا عشى جيرانكم والله كتب لكم منه نصيب لكن اختاروا
تبون تخاووني نتعشى سوى وا لا عطوني صحن بنكب لكم عشاكم وروح بعشى اخوويااي واذا مساعادتوني ترى بمشي واترك العشى
واخلي الحوار ممزوج بالمرح والجديه وبنفس الوقت التاكداذا كان شفت الرجال عشاهم عندهم او توهم متعشين ماني ملزم عليهم واذا ماشفت عندهم شي باحلف وانكب لهم عشى واخذا الباقي لخوياي واعلمهم بالسالفه وومع هذا الرجال اللي انا عندهم بيكونوا فاهمين وبيتعاملوا مع الموقف بجديه اكون لين معهم حسبت تقديري لوضعهم يمكن ريحة العشى رسخة بمخهم ومستحيل امشي وهم ما اخذوا من العشى 000000وسلامتكم

[صليب الرأس]

بصراحة موقف محرج ولكن الحل انك تقول هذي نزالتكم والله يحيكم تفضلواعلي قل القصور وتروح تشتري عشاء لخوياك اكيد انهم ينتظرونك علي العشاء وقدهم جايعين .

ودمممممممممممممممممممممممممممممتم

[السيح الجنوبي]

اولا كيف كاشتين ثانيا كيف دسم ياابا الدجاج عذرا اخي الصحاري الله يديم النعمة

[قناص مطور]

اقول ممكن اتعدى من عندكم ياجماعه الخير بعدين كاشتين مايبون عيشت المطاعم

[مستجدون]

السلام عليكم

اعجبني مقالاتكم ومعرفة الرهيبة بالصقور انا بصراحة ماعندي خبرة وعندي شاهين اشتريته من يومين صحته رائعة والحمد لله

ولكن المقلقني هو لمل يفح علي يصدر منه رائحة كريهة فمابعرف ساعدوني جازاكم الله الخير

[ابن الصحراء]

ما ذا لو انك انت واصحابك كاشتين في احدى الروضات وكا ن معكم سيارتين ، جيب باترول ولاند كروزر مثلاً
وقررتم ان ان يكون العشاء دسماً( رز ودجاج ) من احدى القرى القريبة وذهبت بالباترول وكان الوقت الساعة 7:00 مساءً تقريباً وعندما عدت توقفت عند الخيمة استدعيت احد اصدقائك باسمه ليساعدك فلم ياتي عندها بادرت بتنزيل العشاء بمفردك وعندما دخلت الخيمة ومعك صحن العشاء لم تكن الخيمة خيمتكم مع العلم انها مشابها لها وبجانبها سيارة لاند كروزر .............................ما ذا تفعل؟؟؟ واكتب مشاركتك...........

رز ودجاج دسم كيف لو لحم مندي ؟

[فورد]

القرايا مابه مطاعم الا ان كانت السياره محليه

[الجمرة]

والله اعطيه وياهم واكل معاهم اذا لزموا وارجع المطعم اجيب لاخوياي عشا ثاني اما اني اخذ العشا وروح لاوالله مو من عوايد الرجال

[مضاد حيوي]

أما طالع البر وكاشت وأجيب من مطعم حلات الكشته بالطبخ
أما الأخوان الي شبوا على راعي الموضوع عشان مسألة لا زم ذابيح أقول أكل الدجاج عيب ولا حرام؟؟؟؟؟
وبعدين هو يمكن قصده كشته خفافي يعني ثلاثة ولا أربعة طالعين ليلة وراجعين لا زم ذبيحة ترا قويييييية

[الكشاتي]

اشوف اقرب واحد واقول فلان قم جب الباقي من السيارة ابيهم يقولون غلطان واشيل العشاء وامشي

هههههههههههههههههههههههههههههههههههههههههههههههههه هههههههههههههههههههههههههههههههه

رأيي من رأي الاخ / للمبادلة......عزالله انها سرعة بديهه....ماشاء الله عليك..

تحياتي

[سيد النشاما..]

اذا قلت لي ان السالفة ممكن تحصل .... اقول لك وش يكون رد فعلي !!!!!!!!!!!!!!!!!!
==============================================
تدري وودي ارضيك و اقول لك وش بيكون رد فعلي الافتراضي جدا :
ابقول تفضلوا يا النشامى لو ما هوب حقكم !!!!! و لكن ارسلوني رخوم اجيب لهم عشاء و لا ودي يذوقونه !!!!
-----------------------
امحق من كشته !!!!

هههههههههههه الله يضحك سنك يالكنترول

أي والله وخل الرخوم جايعين فذيك الخيمة ههههه


[line]

[هاوي الصحاري]

تنويه بسيط ,جمع روضة رياض وليس روضات