كرهة جيب البترول

[سيف العلا]

السلام عليكم ورحمة الله وبركاته

بصراحه مدري كيف اقولكم الجيب النيسان

وخاصتن الباترول القديم الي من التسعينيات

لا حد يزعل ويقول سبيته (المتعصبين )الحق حق .

شركة النيسان فاااااااااااااشله بمعنا الكلمه

انا جربة جميع السيارات وبصراحه مافيه اريح من البترول بالبر والخط

ومافيه اقوا من دبلاته لاكن كثر البترولات بالورش الي خربانه مكينه والي الروس ظاربه
ل ...لخ....
المهم انا عانيت من لبترول 90 ربع والله يجماعه
مافيه ورشه مرحتله بمنطقتنا البكستانيه والهنود سارو يكرهوه من كثر مايتعبهم

قطعني بالبر امكن 3 مرات قطعني بالمطر امكن 10 مرات ونا على قد حالي يعني ماني موظف قلت يمكن بس انا الي يخرب معي البترول يوم شفت من حولى والله الشباب الي معها جيب بترول يعااانو من المشاكل هاذي عندنا بالمنطقه

والتفتفه ماشالله متقول مع شركة بواجي كل طلعه بواجي جديده

نفسي اعرف يهل حائل ويهل القصيم ماشالله عليكم

ماشالله ماشالله كيف تظبطون اجيوبكم البترول وهل تعانون مثل معناتنا بشمال امكن عشان منطقتنا جبليه ووعيره مدري؟؟؟؟؟؟؟؟؟

ارجو الجواب

[غالي]

الله يعينك اخوي

انا مالي خبره بالباترول لكن حبيت اقول

الله يرزقك بموتر اخر موديل وافضل منه ياعلي ياقدير عاجل غير آجل

تحيتي لك

[_دربيل_999]

سيف العلا..
وش ذالهجوم على الباترول المسيكين..أمزح..
لكن بقول لك حقيقة أنت سبقتني عليها..أنت سبيت الباترول ومدحت باترولات أهل القصيم لآنها نشيطة وخراباتها قليلة صــــح..
وتسأل شباب القصيم وحائل وش يسوون بالترول..
يعني المشكلة ماهي في الباترول (فينا)...


شباب القصيم وشباب حائل يصونون السيارة يعني مايتركون العطل الصغير بسبب تفاهته يعرفون أن هذا العطل التافه يسبب عطل كبير يصعب السيطرة عليه..
أخوي كل السيارات إذا أهملت من ناحية الصيانة تصير سيارة ورش وتقطيع وطفي وإشتراك راعيها دايم ماسكه بيده ...الباترول واللاند والرنجر وكل سيارات الأرض إذا صنتها تصونك وإذا خنتها تخونك وتخليك بالمهمهية...


لاتستغرب لو شفت جيب العشة موديل 79يسوي إشتراك لمفخرة الآرض 2010
راعي جيب العشة يهتم في الصيانة وراعي المفخرة مستهتر فيها...


بارك الله فيك..


الروقي

[صقار شياهين]

اخوي الباترول ماعليه بس لازم ترفق عليه بالاستخدام ويعيش معك والعلا خابرها وعرة وردميات تنفض الموتر نفض مالك الا تركب كفرات بالون وتخلي الهواء 20 عشان مايتفكك موترك

[ابوصالح77]

وش تعاني منه ؟
الموتر إذا طاح أشغلك بالتشيك
والموديل وانا أخوك له دور
أكيد القديم بيطلب
وعليك بالأصلي والورشة الصاحية مو يتعلم عليك

[طعيميس]

ودة للورش المعروفة بالقصيم يزينونة

[عميد سامودة]

(( اللي ما يعرف الصقر يشويه ))

[بو خليفه]

السيارة موديل قديم و العمري الافتراضي للسيارة 100 الف كم او 5 سنوات انت تجاوزت المدة المسموح بها للعمل الافتراضي فيكون عليك بتصليحات وتغيير قطع لان القطع استهلكة والمصنع محدد العمر الزمني مدى صلاحية السيارة سواء نيسان او تويوتا او غيرهما

[مالت عليك]

انا عني كرهت النيسان .. هذا انا ادور لي جكسار

[قدر مكتوب]

يااخوي المشكلة مش في السياره والدليل على ذالك كثره الباترول وخاصه القديم منه

شف اخوي تبي تفتك من مشاكل الباترول كلها سقط له مكينه لكزس وريح بالك بخاخ وانس مشاكل الكاربريتير

[اسير الغضا]

اللي سأل عن ورشة الباترول

العثيم ببريده يقولون من افضل ورشه للباترولات

[سرطوقا]

نيسان جربت الددسن والمكسيما ولا صلحن لي ولي تجربه قديمه مع باترول 96 بس ماطول معي وبعته

جربت هايلكس 2000 وهايلكس 99 ماشاء الله مواتر ماشاء الله مايردهاء شي غير كذا كان معي تجربه سابقه للهايلكس 87 يالبى بسسسسسسسس

تحيتي

[العايد999]

كان معي قبل فترة باترول ربع 90 نفس المعك لكن مشكلته ياكل واجد لكن نظيف بمعنى الكلمة الله يعين على هذي الدنيا

[حفرآآوي]

يعني بدون زعل

الحين نص الشباب يغيرون مكينة الفتك لضعفها

فيه يركبون مكينة لاندكروزر واكثرهم يركبون ls1 واللي يركب مكينة دينالي

[الحزوبر]

يعني بدون زعل

الحين نص الشباب يغيرون مكينة الفتك لضعفها

فيه يركبون مكينة لاندكروزر واكثرهم يركبون ls1 واللي يركب مكينة دينالي


حلللللللللوه عاد مالقيت اللا الفتك ههههههه

[ALBDRANE]

موضوع يجيب ......
سيارة كرف وجبال ومشقه وعمرها حدود العشرين سنه ويقول تعبتني .... الا أنت الي تعبتها ..!

[سيف العلا]

يعطيكم العافيه والله مقصرتو وما قلتوغير الصحييييييييييح ابشركم بعت الجيب بخساره بسني مبسوط اني افتكيت منه فرقاه عيد وشريت جيب صالون تايوتا 84 قديم لاكن ميطفي غير اطفيه ماشالله عليه معنه قدم ولكم تحياتي............................................ .................................

[Abu Mnsor]

ياخوي للأسف نقدك غريب شوي
الان تنقد على الجيوب اللي موديلاتها بالتسعين وموترك موديله 90 وماتبيه يخرب
انا معي ربع نيسان 90 له معي الان 7 سنوات مخليه للبر
لو تبيني اقطع عليه مسافات واروح به لدول ماعندي مشكله ماشاءالله
اشيك عليه بشكل مستمر
ومااركب فيه إلا وكاااااله مع ان اسعار الوكاله ناااااااااااار

الشي الثاني تقولي الورش مليانه من النيسان حبيت اصحح هالنقطه

انا صاحب ورشه معروفه بحائل
لها اكثر من 20 سنه ولله الحمد العميل لنا هو التويوتا
صدقني تجيني موديلات 2006 فما فوق ربع و شاص
الاعطال دائما تقول مكينه قير و دفرنسات

بالنسبه لنيسان يعلم الله نادر تفك مكينته وبالنسبه لدفرنساته وقيره
بالسنه يجيني 2 او ثلاث سيارات فقط


انا اتكلم من شي اشوفه بعيني

لاتضنوني محارب التويوتا ياشباب
بالعكس عندي شاص 2000 ولو يسام بـ 80 مابعته


والله يستر على الجميع وهذا من باب التوضيح فقط

[التعـ King ـديل]

اي موتر تناظره وتداريه يناظرك ويداريك

والله كان عندي ربع 89 كنت اسافر به شرق وغرب ودول الخليج مشى معي لين بعته وطبلونه فوق 700 الف

مايدخل الورشه الا تغيير زيت ولا تشييك .. كل شهر اشيك عليه بالكامل من زيوت ومحركات وربلات وسيور ومشى معي

اما انك تهمل موترك وتقول ليش يخرب ياشيخ لو انه 2010 بيخرب

[سفاري959]

والله ياخي استغرب كلامك انا استخدمت اكثر من عشر باترولات غالبيتها من 97 وتحت واحد منها 93 مستخدم جلس عندي اكثر من اربع سنوات ماخليت مكان الا ورحتله نفود وردميات والله ما حطيت فيه الا اشياء استهلاكيه لو معك اخر موديل حطيتها بالعكس الباترولات القديمه لها تقدير خاص عندي بس المشكله سرقتها سهله تحياتي لك وللجميع

[شوفان999]

السيارة موديل قديم و العمري الافتراضي للسيارة 100 الف كم او 5 سنوات انت تجاوزت المدة المسموح بها للعمل الافتراضي فيكون عليك بتصليحات وتغيير قطع لان القطع استهلكة والمصنع محدد العمر الزمني مدى صلاحية السيارة سواء نيسان او تويوتا او غيرهما



اسمحلي أخي الكريم أنني لست معك جملة وتفصيلآ...

يا أخي ذهبنا الى ألمانيا معهم سيارات مرسيدس موديل 80تركبها سيارة أجرة ولا عندك أحسن منها...

بامريكا كذلك يهتمون بالسيارات القديمة وبصيانتها...

اخي صاحب الموضوع....

العيب فينا حنا...

لنا نظرة تشاؤمية غير صحيحة للسيارة القديمة بسبب نظرة السذج من المجتمع من يحبون الرفاهية السنوية بموديل جديد....

باترول نيسان 0 9من أفضل الاشكال التي انجبتها عائلة باترول فشكلها الكلاسيكي

يوحي بالفخامة والقوة ..

لايهمك أحد ولا تكره موترك ...

عليك باستبدال العطل القديم بجديد سواء من قطع الغيار او التشليح ومش امورك وراع موترك بالماء والزيت وانتبه للتهريبات (الليات) تراها تعدم الدودة وغيرها كثير

والله يغنيك من فضله..

[سديرآوي]

اسمحلي يالغالي ,,
انا كان معي باترول موديل 92 من أحسن مايكون ,,
جلس معي 12 سنة ولله الحمد ماشكيت منه أبدا ,,
مشيت عليه ولله الحمد فوق الـ400 ماخرب عليه أبدا سوى اعطال بسيطة طبيعية ,,
لاني كنت محافظ عليه ,,
وبالخط كنت امشي على 140 و 160 واقدر اوصل 180 بس خطر عالجيوب ,,
وطبعا هالموديلات اذا اكرمته أكرمك :d ,,
يعني لازم تحميه قبل لاتمشي ضروري ,,
وتغير زيته طبعا وتفحصه وتسوي له صيانة باستمرار ,,
ولا تطامر فيه وتعفسه مره ,, يعني خلك راكد ,,
وعز الله بالطعوس اني مرة سحبت فيه فان شفر موديل 99 ثقيييييل وغااااطس ,,
وطلعه من الغراز مثل الحلاوة ,,

وتصدق اني قبل كم سنة رحت من الرياض لسلطنة عمان فوق 2500 كيلو رايح جاي,,
والحمد لله ماشكيت منه ,,

وبعته قبل سنتين وتحسفت عليه لكن الشكوى لله :( ,,

[دل البحار]

السيارات والله حظوظ شرينا سياره كرت وكالة تويوتا هايلكس ج ال اكس تصدقون ما مشيت فيها اقل من 15 كيلو الا وجاها حادث عللا الجنب الايمن والسياره سبحان الله من كم مشوار سفر خرب المكيف وبعدها بفتره بسيطه قبل لا تخلص 60 الف انعدمت المكينه بالرغم اني محافظ على السياره بعد التوظيب ترتفع الحرار الى الاخير بعدها تفقت الطبات حق المكينه بعده توظيب ما أدري اش ذيك السياره كل يوم تخرب المهم بعتها وهي ماشيه 135 الف
وبالرغم من قلة المشي لكن السيارات حظوظ ممكن تشتري صيني ويعيش معاك سنين حسب الحظ بالسياره

[سوبر مكشات]

موترك وش فيه بالضبط

[يريور عيمان]

اسمحلي اخوي
بس ما صدقتك

[أبوصقر]

وأنا أخوك صحيح أن الباترول يطلع فيه بعض الخرابات..بس سيارة قديمة..وثاني حاجة الموتر لازم تعطيه علشان يعطيك..ولو فيه من الخرابات مادام أن الموتر يطربك..جعله فدااااااااه..تهمله وتطلبه..وبعدين تقارن مركب الباترول الــ90 بالتايوتا الــ84 حرام عليك..