ملاك Jeep وسيارات الدفع الرباعي الاخرى ...شاركوني الراي

[Stranger MaN]

السلام عليكم ورحمة الله

انا كنت محتار وابي سيارة دفع رباعي ...... وطاحت عيني على كم سيارة

ومنها الاف جي لالسبب الا انها منتشرة....وشكله الملفت للنظر( هذاك اول..الان ماشاء الله اكثر من

الاند تشوفها هههه) المهم ... انا عزمت اني اخذ الموتر فل.... وطبعا انا جامعي لكن انا اللي امشي

اهلي واطلعهم.....نصحني واحد بالاكستيرا وقال لي احصنة اكثر والاف جي مو للعائلة كيف اهلك

يركبون ورى ضيق وتحس بكتمه نفس النوافذ صغيرة وووو******** علما ان الاحصنة ماتفرق

معي....انا مو راعي مطامر ولا قومات ...انا احب ادخل البر روقان الى اخر حد..... الصراحة وجدت

الاف جي احلى من الاكستيرا ..لكن الاكستيرا بابين وهذي نقطة لصالحة...لكن خلفيته الله لا يوريك

ايضا هو سست يعني قاسي.....والاف جي اريح....المهم ويتصل خويي وقال لي بستلم موتري

تشارجر تجي معي قلت ما ورانا شي ....المهم واشوف سيارة راحت عن بالي اصلا ماكانت موجودة

واشوفها معروضة الا وهي ( جيب رانجلر ان ليمتيد اربع ابواب).....هي اقل احصنة من غيره....لكن مثل ماذكرت انا ما احتاج احصنة كثيرة

لكن من داخل فخمة بشاشة نفيقين ودي في دي ويو اس بي ومقاعد جلد...او اخرى ضد الماء

وجود سقف من الفايبر قابل للازالة بسهولة ويدويا.. وهذي مهمة وقت الشتاء استمتع

بالمناظر..ويجي هدية معه سقف شراع.... واوسعهم من الداخل...كما انه يوجد دفرنس في الامام

وفي الخلف....والمافاجأة ان سعره 116 الف فقط للفل....

انا طحت في دوامة ...... لان الرانجلر من موديل 2005 تلاشوا مشكلة الحرارة....بس السؤال ليه

ما شفت ولا وحده في الشارع والله ولا وحده ( اقصد الاربع ابواب).. البعض يقول خلك متميز..بس

الوضع مريب..ناس يقولون الوكيل سيئ...انا مايهمني الوكيل كثير...والصراحة سبب مو مقنع...؟؟؟ الى

الان القلب ميال للرانجلر.....

ارائكم بكل حيادية الله يجزاكم الجنه.....

ملاحظة ( ارجو عدم الرد بناء الحكم على الرانجلر السابق او القديم)

[مجنون النحم]

طقلك تاهو ابرك لك بألف مرة مع السواق من 4 سنين ولا قال شيئ

[ابوناصر426]

كان معي رنجلر ومازال القلب يميل له، بس عذروبه قطع غياره غالية بالحيل، ووكيله سيء جدا، انصحك تبتعد عنه.

[Stranger MaN]

الله ييسر الامور.........وياخوي التاهو مو لطالب جامعي.....

وسعره بعيد عني....

[عبد الله 99]

والله انه من اروع ما صنعت ال Jeep زين و حلو و خفيف و ان كنت تبيه من سنه الى خمس سنين فأنا انصحك به لاكن سيارة العمر بتستخدمه ان شاء الله 15-20 سنه ما انصحك منها ان وكيله مثل الكيا و قطعه غاليه الا ان كنت تبي اشياء استهلاكيه فهي رخيصه و تجي قطع امريكيه من العبدالقادر الي في صناعية ام الحمام ممثل او احسن من الوكاله و قطعه تقريبا نص سعر الوكاله مثلا سعر الهوب شاريه قبل فتره انا و زميلي بـ 570 مع المسامير حلو مقارنه بسع الوكالات الثانيه و مشكلته الثانيه ما كل الورش تفهم له و اكرر لا يفوتك دامه بـ 116 الفل اخبره اغلى من كذا و نسيت اقولك انه ما تلقى زبون له على المدى البعيد اذا جيت تبيع

تقبل مروري

[Stranger MaN]

يعطيك العافية.....والله ييسر الامور.....116 الف والله سعر ممتاز....

وهذا اللي خلاني افكر فيه

[ن م ر]

خذ الـ fj 2 وتوكل على الله وانسى في يوم انك فكرت تشتري رانجلر واعتبر نفسك انك شريته وجربته وانتهيت من موضوعه على خير

هذي نصيحه لك من أخ يحب لك الخير

وتذكر أن التوفيق بيد الله سبحانه

وعلى البركه الموتر مقدماً والله يعطيك من خيره ويكفيك شره

[Stranger MaN]

^^^^^^^

حلوه اعتبره نفسي شريته ههههههههههههههه....الله يسلمك

والله الاف جي طيب لكن ضيق...وابي اعرف وش فيه الرانجلر.....وش عذروبه ؟؟

[hadaj]

انحش من الرانجلر
خذ لك بفلوسك لاند كروزر إللي يسمونه هدد
أخوي اشترى له واحد من قطر 2006g بـــ 80000 ريال
عيبه أنه استاندر ومافيه مواصفات بس والله سياره
ويكفيك اقل شي خمس سنوات ماتحط فيه شي
أو باترول طويل استاندر 2009 بتحصل اصفار بحوالي 100000ريال
ومكيفين وسيارة مايعلى عليها بر وغيره

أخيراً
استخر والله يكتب لك إللي فيه الخير

[طير شلوى نجد]

والله مامثل التاهو وراكب شبابي وعوائل وتراك بهسعر وصلته

[ن م ر]

^^^^^^^

حلوه اعتبره نفسي شريته ههههههههههههههه....الله يسلمك

والله الاف جي طيب لكن ضيق...وابي اعرف وش فيه الرانجلر.....وش عذروبه ؟؟


الرانجر سيارة قوية وشبابية جدا وغير لائقه بالعائلة وأضف إلى ذلك انه عمره الافتراضي سنه الى سنتين ويبدأ يطلب ( لما تفك ما حتصك ) وهو شبيه بالكابرس واللومينا سيارات استهلاكيه لم تصنع لتدوم
غير كذا اذا فكرت من ناحية اقتصادية الرانجلر بعد سنتين أو ثلاث ( وخاصة النوع الطويل منه ) ما عاد يسوى نصف قيمته لقلة الطلب عليه ووكيله السيء ولن تعرف هذا الشيء حتى تتعامل مع صيانتهم السيئه جداً والمكلفه

بالنسبة للـ fj سيارة تعتمد عليها بعد الله في مشاويرك وقليلة الاعطال وصيانتها متاحه في كل مكان وقطع غيرها متوفره وليست بالغة التعقيد كما أنها تحافظ على جزء كبير من سعرها عند البيع

والقرار أولا وأخيرا لك

وبالتوفيق

[ن.ن.د]

السلام عليكم
انت تبي سياارة تنفع للعائلة و لك
خل كل هذولي و خذ فورتشنر vx 6 سلندر الفل ب 116500

[Stranger MaN]

الله ياخذ الحيرة وسنينها............

تعبت والله تعبت.....

الله يجيب العواقب سليمة

[musab]

أنا أول مره أرد على واحد متردد ليه....؟

لأن ماعندي خبره ولكن أنا ظروفي مثل ظروفك تماماً ونفس التفكير

ونفس الحيره لكن إذا كان تقدر على 116000 فهو ممتاز

ولكن أنا بأقولك كلام وراح تقتنع 100% إن شاء الله

أولاً الرانجلر عيوبه:

غير منشر يعني بتروح للمعارض محد معطيك وجه

السيارة شركة jeep قطع غيار غالي وسمعت أيضاً أن خراباته واجد لاكن غير متأكد

ونظامه كمبروتر وكهرب "محد يفهم له" وقد يكون حساس لأن الدبل ليس قير

يمكن يكون له مميزات لا كن أنا لاأعرف هذا بالنسبة للرانجلر

ثانياً FJ بالنسبة لي لايمكن افكر في fj ليش....؟

أولاً الشكل الخارجي بالنسبة لي لايعجبني لأنه غريب بقوه

ثانياً الباب الخلفي لايمكن فتحه إلا عن طريق فتح الباب الأمامي وهذي سلبيه كبيره جداً اعتبرها

ثالثاً الديكور الداخلي غير مناسب أنت يمكن تعارضني في هذي النقطة أقولك صح عليك..!!! كيف؟

الديكور تبز به أول شهر شهرين لأنه مبهر لاكن بعد كذا تمل منه وأعرف ناس كذا صار معهم نفس المشكلة

رابعاً لاحظ النوافذ ماتلاحظ أنها ظيقه نوعاً ما

هذا اللي اعرفه عن fj يمكن يخدم في الأداء وأن الوكاله أفضل الموجود وقطع الغيار رخيص ومتوفر والكل يعرف له لاكن هل يسوى في المعارض لا أعرف


ثالثاً fortuner وهو إختياري

لا أمدحه لأنه إختياري وأنا متحيز له بل بالعكس والله أني كنت أكره التويوتا كله كره بلا حدود

لاكن أنا مع الحق كنت مقتنع تماماً بالاكس تيرا لأنه أنشط أنواع الجيوب بلا حدود

ومتحيز له ومتعصب من ناحيته لاكن تركته لأسباب:

1- الدبل فرار وليس قير يعني كهربائي ومعروف أن القير عملي أكثر من الكهربائي

2- الوكاله الحمراني المعاملة زفت وقطع الغيار غالي

3- لاتوجد أي مواصفات لادف لك ولا داخليه زينه ولا شيء غير انه نشيط فقط لاغير

لذلك غيرته


أما الفورتشنر فهو أخف أنواع التويوتا وزناً وهذا معروف

والدبل قير ودف لك خلفي وداخليه مرضيه نوعاً ما مهوب مثل fj والموديل الجديد 2010

شكله رووعه النسبة لي وصدقني بالنسبة للشكل لاتشيل هم أنت إذا حبيت الموتر والله العظيم أنك تشوفه أفضل شكل من كل السيارات والاستبنه تحت وهذا يفرق

لأنه لو كانت الاستبنه في الباب الخلفي بتثقل عليه وبالتالي مع الوقت يقرقع الباب الخلفي وهذا معروف
المكينه 6 سرندل 4.0 لتر وهذا عزم مرضي تماماً

لا يهمك اللي يقول أنها تجميع أندنوسي ولا ماليزي شف العالم تأخذه وتطامر به لا يضره ماشاء الله

بل أن أحد الأشخاص فرط الدفرنس لأنه يبغى يركب دف لوك أمامي وصور بعض القطع في الدفرنس مكتوب عليها made in japan وأنا أرى أن هذي هي السيارة اللي تستاهل

وبعدين السيارة شيك يعني تدخل المعارض مايطيح من سعرها واجد وعمليه كما هو معروف

وإذا بتاخذها خذ قير تمامتيك لوكنت من سكان الرياض أفضل بكثيييير ولاتفرق في الفورتشنر تماتيك لا عايدي

لأنه دفع رباعي كما هو معروف


ولكن السيارة فيها عيوب وهي اللي اعرفها طبعاً يمكن فيه عيوب ثانيه لاكن ماأعرفها:

1- صوت الهواء يخرج عندما تمشي 180 أو 160 على ماأظن يخرج صوت صفير من النافذه


ولا يوجد حل له حتى الآن مرضي

فقط هذا اللي اعرفه من العيوب وسعره مرررررررررررضي لأبعد درجه

وانصح به ولا تلتفت لغيره والله يوفق ياربي ويبعد عن الحيره والله شيننه

[Stranger MaN]

^^^^^^^

يعطيك العافية .....والله يسلم الايادي ....ماشاء الله عليك والله تعبت نفسك جعلها في موازين اعمالك.....

لكن في نقاط حبيت اوضحها ( انا اشتري ما ابيع ودايم انصح ان تشتري على ذوقك مو على ذوق الشريطية) ايضا ان الرانجلر الدبل قير وليس كهرب....ايضا يحتوي على المحاور الصلبة الامامية

( دفرنش) امامي مثل الشاص....

ويا جماعه شكلي بقتل بو جميل ...اخر الاخبار ان الاف جي وصل 133الف....على ايش بالله؟

[غالي]

يارجال طع شوري

طق لك تاهو اسود والا ابيض وشف الشكل

اقسم بالله اطلق منهم كلهم مع احترامي

راحه ،وسع ،كشخه، شبابي وعائلي، ولا سمعنا عن موديل 2009 وفوق اي عيوب او خرابات واضحه

وعند البيع كل الشريطيه عليك خصوصا مواسمه واجده حتى بالصيف يطلبونه العالم للسفر

وابعد عن الرانجلر كل شيء فيه بلاستيك لا من طبلون ولا بيبان انواع القربعه بعد كم سنه

نصيحه انحش

نصيحتي لك لاتتعدى التاهو وبس وأستخر

[حقوق المطر]

انا عندي لك احسن شور



طق اللي في بالك واللي مقتنع فيه واللي تشوف اقرب لقلبك واعجبك


ومثل ماتقول اذا انت راكد ورايق اي موتر بيقضي لزومك وبيمشي معك


http://www.youtube.com/watch?v=IX3At7O_OvI

[bn_501]

وعليكم السلام ورحمة الله وبركاته

نصيحه ابعد عنه اشد البعد

سياره صحيح حقت ابو خمس سنوات بالكثير ويفتح لك الكبوت ويتطلب


يعني اتوقع لو تغير رايك لسياره اخرى افضل لك


عندك المازدا

cx-9

http://www.q8ow.com/up/uploads/f23c4cd7e9.jpg


برادو الجديد

http://www.toyota.co.za/ArticleData/News/090914_Land_Cruiser_Prado.jpg


الباث فندر

http://img2.netcarshow.com/Nissan-Pathfinder_2010_800x600_wallpaper_03.jpg


باجيرو

http://www.theautochannel.com/news/2009/01/23/381523.1-lg.jpg


سيارات كثيرهـ جيده ووكلات افضل من غيرها

تحياتي