سيـــــام تير بالون

[غيّام]

بسم الله الرحمن الرحيم
السلام عليكم ورحمة الله وبركاته
الموضوع قديم نوعا ما ولكن من باب الفائده
كثير من الناس يعاني من الكفرات وكثرة البناشر وغيرها من مشاكل الكفرات التي لا تنتهي ابدا
وهناك كفرات تصلح في الضلع لا تصلح في النفود وكفرات العكس وقليل من يجمع بين هذه الصفات
نعم صنعت تايلند نوع من الكفرات فاق جميع مثيلاته من الانواع الامريكيه واليابانيه والاندوسيه والكوريه وغيرها
يصلح في النفود ولا مثيل له ويصلح في الضلع وينافس المضلع وهو السيام تير Siam Tyri
يقاوم البناشر وهو تيوبلس طبعا يدوم ويقاوم حتى تزول خطوطه نزل منه مقاسين 825 وهو ممتاز وحجمه مناسب للجيوب ولكنه نادر جدا او يمكن يكون انقطع من الشركه 0 (اخوانا في الامارت يمكن يفيدونا لأن وكيله عندهم)
المقاس الثاني 900 وهو كبير نوعما لكنه ممتاز وهو مجرب موجود في الرياض في الغرابي عن المركز الدولي للإطارت
فيه مشكله وحده وهي انه اذا نزل مطر الله يعينك على الزلق لازم تكون حذر واحسن طريقه طق الدبل الخفيف
آمل ان اكون كتبت ماهو مفيد تقبلوا تحياتي

غيام

[صقر]

مشكور اخي غيام على هذه المعلومة

أولا سلم لي على اللي صنع البالون :good: :good: :good:

انا سمعت بالكفرات هذي ... وكنت ناوي اشتريها بس قلت لازم اشوف احد جربها :o

وأخيراً ركبت كفرات بالون من نوع ماكسيس . :)

أيضا اللي خوفني منها هو سعرها 1800/أربع كفرات.

انا اشتريت بـ 1280/أربع كفرات.

أخيرا انا سمعت ان مدة بقاءها ضعف مدة بقاء البالون العادي.... ( الكلام هذا والكفر ما جرب بعد) :j

[عاشق الجبل]

وعليكم السلام

جزاك الله خير على هذا الموضوع المفيد

وأنا ترددت كم مره قبل أركب كفرات بالون للأسباب التالية :


1- أن فيها رجه ماتروح حتى يحتمي الكفر ( تخف ولاتروح 100% )

2- خطورة البالون الــ 900 بأرتفاعها وبعد البنشر والواحد مسرع

والذي يراعي هذه الملاحظتين فلا يشتري إلا البالون

[غيّام]

اخوي صقر
كلامك صحيح البالون السيام تير قويه جدا ومجربه في الرمله وظهرة عليه وظهار الشوكي اللي تقول سكاكين مركزه واثبتت جداره متناهيه

عاشق الجبل
ملاحظتك صحيحه مره انا ما انصح انها تكون مركبه باستمرار لكن تركب اذا جا وقت المقناص والمطراد وانت خابر الظهار وفروشها وشلون تفتق الكفرات
شوف الوعول وصيدها يطرب الراس في ذمتي يغني عن الصيد كله 0 عز الله انك صادق وانا اخوك
لكما تحياتي

[عاشق الجبل]

تسلم ياخوي غيام وبلغ سلامي لغار عدين وكنف وكنيف :)

[قشاع الرمث]

السلام عليكم ورحمة الله وبركاته

انا ارشحه لافضل كفر للبر بدون منازع .

مع الشكر

[حرباش]

السيم تاير ممتازه في الرمال اما الضلعان ماقد جربت :)

ويبغالها 7 كيلو حتى يسخن الكفر وتخف الرجه كما قال اخوي عاشق الجبل

ارى في الصيف والخطوط السريعه زياده ضغط الهواء داخل الكفر مابين 45 - 50 وذلك لتصبح خفيفه سهله الحركه واخف للرجه :good:

انصح عند ترصيصها بإستخدام الترصيص الأرضى أو الليزر لدقه هذان النوعان .


يعطيكم العافيه وتقبلو تحياتي اخوكم حرباش ;)

[البرحه]

السلام عليكم

والله ما سمعت عنها ؟

لكن البلون الشاهين ....... كل كيف اهل كيفك بس تزلق في المطر

وعمرها قصير !

وتطيح عزم الموتر اذا كان 4 سلندر !

لكن للنفود عز الله انها بنت اييييه مونتازه جدا


شكرا لك

[عبادل العاصمي]

مشكور أخوي

[الـ ع ـارض]

والخلاصه

الشاهين والا السيام ؟؟؟؟


<==== جالس عند البنشري يحتري ردودكم .... :d

[غيّام]

الشكر لجميع من شارك
العرض مافيه مقارنه بين السيام والشاهين السيام افضل بكثير

[الطير]

السلام عليكم ورحمة الله


اوخوي غنام موضوع ممتاز


الخقيقة انا جربت السيام تير 900 على لا ند كروزرgxr حقيقه فوق الخيال .

اكثر من 4 سنوات عز الله انها فوق الخيال .
والله انها متشققه من جنوبها من الضلع واضرب عليها خطوط يحبها قلبك .


طرحت هليها جميع انواع الصيد من وعل وظبي وارنب وطيور يعني في السهل والوعر ما عند ك احسن منها .

لكن على قولتك في الزفلت والمطر تبي ركاد .


كذلك جربت الكورية ماهب شينه بس ما تحمل الزفلت .

يعني عمرها قصير .

بالله الي له خلفيه عن سعر السيام تير يعلمني ال 900 او 825.
ووش رايكم في ال 825؟؟؟

اشكرك من اعماق قلبي

[اسيزو 4x4]

مشكور أخوي الغالي غيام

الصراحة موضوعك في قمة الروعة والتميز

أنا جربت أنواع كثيرة من الكفرات خاصة للسيزو الدبل والهايلوكس الدبل ما لقيت أزين من التويو الياباني مثل البالون ويتحمل

الحصى وأنا عرفت الأن أن الجيب قوتة بكفراتة ......

يوم كنت مركب البرجستون الله لا يعيده كنت لازم أحط الهواء 20 عند النفود

ولكن يوم ركبت التويو الياباني الهواء 40 وفي عز الصيف بالنفود ويمشي مشاء الله علية بالراحة


.

[حرباش]

أخوي الطير

البالون في منه نوعين
6 طبقات و 8 طبقات
والفرق بينهم 6 خفيف على الموتر ولكنه يمسح بسرعه

8 طبقات وهو اللي انا مركبه اثقل شوي على الموتر ورجته اخف بكثير من السته ولا يمسح بسرعه

سرعها 380 ريال بالنسبه 6 طبقات اما 8 طبقات وقليل انك تحصله يزود حول 20 ريال عن الاول

تحياتي لكم
حرباش

[الطير]

اخوي حرباش



يا مال الثانكيو والله


معلومات قيمه .



لك تحياتي

[غيّام]

شكرا لجميع من اثرا الموضوع
السيام ميزته انه قوي في الضلع وخفيف في النفد


غيام

[ابوقاسم]

يا جماعه ....................
السلام عليكم ...............نبي نعرف فيه مقاس ممكن يركب على الباثفايندر ................
من الكفرات البالون.................

[الدبل الثقيل]

كم سعر الكفر الواحد من سيام تاير ثمان طبقات...وهل الأفضل اركبه على جنط الشنمبر او جنط الهدد .. سيارتي شاص .. وهل اذا ركبته على جنط الهدد لازم اركب لستك.. وكم احط الهوا في الخط وفي الرمل... وجزاكم الله خير..

[salehhd]

مشكورين على المعلومات

واشتركت في الموضوع لاتابع

[خطير]

شكرا لك اخوي غيام على المضوع الجيد

بس السيام تاير ماله مثيل اسال مجرب ، بعدين فتح له وكيل في شارع الريل او قريب منه .

[الدبل الثقيل]

الأخ خطير وين وكيله في الرياض بالضبط... جزاك الله خير..

[غيّام]

عذرا جدا على التأخير
الغضي: نعم تقدر تركبه اذا كان الجنط 16 لكن ما انصحك تركب 900 دور 825 لأن الاول كبير على الباث
الدبل الثقيل: (اسمك ممتاز واختيار موفق) اسعاره ما اذكر بالضبط يمكن اللي عنده معلومه يمكن يفيدك لكن اوعدك اني اجيب لك سعره
تقدر تركبه على الجنوط الهلل قصدك اللي تجي فضيه لاتركب لستك الله يقلع اللستك واللي صنعه
لا ينقص عن 35 ابد لانه يفرش بسرعه اما في النفود 30 25 اذا كان الجو حار
salehhd
اسمك ماعرفته بالعربي معليش وانا اخوك اخوك الانقلينزي عنده سالب مليون
تسلم وانا اخوك على اثراء الموضوع
خطير: تسلم الظاهر انه المركز الدولي
الشكر للجميع
غيام

[الدبل الثقيل]

جزاك الله خير...

[الدبل الثقيل]

للرفع للفائدة

[ممتر البران]

استفيدو يالربع
مع التحيه والشكر لصاحب الموضوع

[Mohammad]

الزبده؟ يا النشاما

سيام 825 8 طبقات هو الحل للرمل والجبل والسفلت ولا يسبب مشاكل مع الماء...
هل هذا صحيح؟

[شاص1988]

حتى ادنلوب البالون يمشي في الطعوس احسن من المكسس والاسيام درجه اولى في الرمل بعده بجي ادنلوب بس عمره قصير بس بغيت اسالكم عن اسيام كم سعره 16 825 هل اهو غالي ولا لا

[ابوفهيدان]

نعم سيام تاير التايلندية هي الافضل بس سعرها ياخوان مبالغ فيه جدا جدا

في نوع لايقل عنها كفاءة ومجرب اللي هو التايواني القديم هيرودزرت وليس ماكسس
انا عندي من سنتين وكل يوم جارشه بطعس وغيرة وماشالله عليه ولا مرة نسم
وشاريه مستعمل بعد

[ابوعقل]

انا عندي جمس صالون 2006

ومن زمان افكر بالبالون

نبي الزين تروني راعي خطوط

وابي الوكيل بالدمام

واسف على كثرت الاسأله

[ابوفهيدان]

ابوعقل خل عندك عقل ولاتركب البوالين علي الامريكي خاصة الصوالين تراها خطرة جدا وماتتحمل الخطوط

انتبه علي نفسك
ركبها لارحت للبر ولما ترجع شلها من موترك
بالخط ترج ولمسكت فرامل تزلق