هل أنا غلطان ..!!

[alpencil]

بسم الله الرحمن الرحيم

السلام عليكم ورحمة الله وبركاته ..
بالأمس القريب ذهبت لروضة أم القطا وشعيب المسعودي وماجاورها .. وكان الغرض الصيد والحمد لله صدت 32 دخله فقط .. بس الحمد لله كافية ووافية وخصوصا إني لوحدي .
وخلاصة الموضوع .. كانت الراحلة ووسلية التنقل سيارتي الددسن موديل 2009 غمارتين .. بدون دبل وكنتت محمل أغراض البر كلها من خيمة وجراكل الماء .. الخ .. يعني السيارة ثقيلة جدا وكنت معبي الكفرات هواء لأن المنطقة أغلبها حجارة صلبة ...
المهم كنت إذا واجهت بعض الرمال حاولت ان أجد أسهل الطرق لتجنبها حتى لاأضطر لتنسيم الكفرات أو تعلق السيارة ,, المهم تعللقت السيارة على طرف الشعيب فقعدت أهز السيارة إلى الأمام والخلف حتى أعمل مسار وتخرج وكانت التغريزة سهله جدا .. ولكن تفاجأت بصاحب سيارة من نوع هوندا أكورد جزاه الله كل خير شاهدني من بعيد وحاول الحضو إلي بسيارته الصغيرة إلى أن وقف على مقربة مني ونزل شخصان وفورا ذهب خلف السيارة وقاموا بدفعها وخرجت ..وشكرتهم بعد ذلك وألحوا علي بتناول الغداء معهم ولكني رفضت حتى لا أحرجهم .. جزاهم الله كل خير ..
لكن المشكلة والمصيبة أني أكملت طريقي أبحث عن القميري .. وإذا بي أواجه سيارة يوكن ويجلس بجانبها ثلاثة أشخاص .. ولم اجد مخرج إلى بأن أمر من بجانبهم وكانوا يجلسون بجنب أرض ريغا يعني رمل خفيف جدا لو مريت بجوارهم سيتطاير الغبار في ووجوههم والطريق الآخر بعيد عنهم قليلا والأرض رملية يعني لومريت ماراح يطير عليهم غبار ولكنه صعب جدا على سيارتي الثقيلة ومن المحتمل أن تعلق السيارة ..
فجلست أفكر هلى أغامر وأذهب مع الطريق الصعب الرملي ام مع الطريق السهل والذي سيملأ الجو بالغبار وسيتسبب بأذيت من في المكان ..
وقررت اخيرا ان أذهب مع الطريق الصعب وأن أحترم من في المكان ولا أزعجهم بالغبار وخصوصا أنهم جالسين يطبخون الغداء ..
ولكن عندما ذهبت مع الطريق تعللقت السيارة في الرمال .. فقلت خيرا ونزلت ورفعت صوتي بالسلام على أصحاب السيارة اليوكن ولم يرد السلام سوى شخص واحد والبقية إكتفوا بالبحلقة بالأعين ..نسمت الكفرات ولم تخرج السيارة وجلست أحفر للسيارة أماما وخلفا ولم تخرج .. وبدون حلف الساعة كانت الواحدة ظهرا وجلست حوالي الساعة والنص وأنا أحاول إخراج السيارة من الرمال الحارة جدا .. وهؤلاء يتفرجون علي ولا واحد قالي تبي مويه وإلا مساعدة والا تعال تحت الشجرة عن الشمس والا تفضلمعنا على الغدا ولو مجاملة .. وربي ما أبعد عنهم إلا حوالي 8 خطوات .. بل كان واحد يصلح الغداء ويتفرج علي والثاني شايل جريدة وبرضه قاعد يتفرج علي والثالث مايسوي شي بس جالس يتفرج علي .. من جد شي يقهر .. المهم بعد المعاناة خرجت السيارة وحاولت ان أجد طريقا للخروج فلم أجد بد إلا أن أعود للنفس المشكلة إما طريق الغراز او طريق الغبار ولكن هذه المره وبلا تردد إخترت الطريق الريغا الغبار وأحط قير السيارة بالأول وعثيت في الأرض فسادا وماعاد شفتهم من الغبار ماغير أسمع أصوات السب واللعان وأكملت طريقي وأنا غضبان لأنهم هم من أجبروني على فعل ذلك .. !!
أرجو ممن يقرأ موضوعي إفادتي عن تصرفي هل هو صحيح وماذا سيفعل لو كان بنفس مكاني .!!

[ابو99]

قلعتهم و جزاهم الغبار لأن الله في عون العبد ما دام العبد في عون اخيه والله يا خوي ان السلسله ما تنزل من الجيب وافرح اذا لقيت احد اساعده

[عبدالله الجري]

اسكت لايطلع واحد منهم بمكشات :)
ثم(ن) ...........

الشيبان دايم يستخدمون اللفظ (ولو)

[دل البحار]

أعتقدت لو طلبت منهم خدمه ماراح يقصرون معاك ولكن تعرف تصير جلافه في بعض الاحيان أو بلاهه بالاصح وتصرفك الثاني سليم 100 في الميه ولا عليك تسلل ولا اي خطاء
تحياتي لك،،،

[دليلة1]

قرارك غير صائب المفترض إنك ترجع مع الريغه ثانيه وثالثه ورابعه ولو حصل انك تدخل عليهم بالموتر وتحوس فرشتهم وغداهم بيكون افضل .. أجل قاعدين يبحلقون بعيونهم ويتفرجون ..!!

[ساحووق]

ههههههههه

ماافيهم خيييير

[fares2011]

بيض الله وجهك...
وأقولها من جد يالحبيب ... لي كم يوم بشعبان أنا والربع دوران وتمشيات وتقنص "
لكن اليوم الصباح شفنا شيء عجيب ...
أحد الاخوان البدو ومعروف بهذا المكان بخيمته وابله وغنمه
وأهله معه من سنوات ... >>
الطآمه شباب جايين من 6 سيارات وضاق الشعيب وأشجاره
إلا بالطلحه اللي بجنبهم...
يا ناس يا عالم والله عيــــــــب !!
وهالعينات أكيد شوي بيطلعون سلاحهم وبيرمون ولو جت فوقهم
دخله مسكينه نتفوها ولو بشوزن جعلها بعراقيبهم ...
<<< مقهووور !!

[خيال الغلبا]

تبي الصراحة
تصرفك الاول سليم
وتصرفك الثاني خطأ وغلط

يعني خربت شغلك الاول
يعني ماتصير طيب الا مع الطيبين

هم اهل للخطأ
وانت اهل للطيب فلو استمريت في الطيب ... كان ياسلام عليك

[عادل المطيري]

الله يعطيك العافيه وحمد لله على السلامه
والله ياخوك ياليتك كاب غداهم ومخليهم يسفون تراب تكرمون ولابد من ان واحد منهم سوف يتعرض لمشكله ويتمنى من احد ان يساعده ولن يجد بمشيئة الله
الله يهديهم ويقدرنا على الطيب مع الرياجيل

[ناصح]

أولا أشكرك على صراحتك

وفعلا الطيب هو الأصل فيك

وتصرفك من البداية كان صحيح مئة بالمئة

وشكر خاص ودعوة من القلب لمن ساعدك في البداية

وكان من الأولى أن تصبر وتحتسب أجرك على الله ولا تؤذيهم

حتى لو كانوا مقصرين ومهملين في حقك من البداية

وعفا الله عن من سلف

[ولد وايل..]

قرارك غير صائب المفترض إنك ترجع مع الريغه ثانيه وثالثه ورابعه ولو حصل انك تدخل عليهم بالموتر وتحوس فرشتهم وغداهم بيكون افضل .. أجل قاعدين يبحلقون بعيونهم ويتفرجون ..!!

:good::good2::good2:


والله المفروض تلاسنهم مهوب رجال اللي مابينك وبينهم الا خطوات ولا يفزعون

صح مهوب مأمورين لكن أمحق نية وأمحق أخلاق !!

وأنت وجهك أبيض ما سويت الا الخير بس ما يستاهلون

[سحاب1]

السلام عليكم ورحمة الله
صراحة ما الومك على اللي سويته..
لاكن مثل ما قال اخونا (خيال الغلبا) لو تركتهم و واصلت على طيبتك كان افضل..

[ريان السلطان]

أشهد إنك أعجبتني بتصرفك

ولو كنت مكانك فعلت مثل مافعلت أنت

[راعي-gx97]

تبي الصراحة
تصرفك الاول سليم
وتصرفك الثاني خطأ وغلط

يعني خربت شغلك الاول
يعني ماتصير طيب الا مع الطيبين

هم اهل للخطأ
وانت اهل للطيب فلو استمريت في الطيب ... كان ياسلام عليك

أخوي المثل يقول: (اذا أنت أكرمت الكريم ملكتة واذ أنت أكرمت !!!!!!)
الرجال بداء بالطيب والكن جيزي بالرداء وش رايك تبية يروح لهم ويحب خشومهم ويقول أأأسف أنا خربت عليكم جوكم الرومانسي ؟؟؟؟؟؟؟؟؟؟
لا وبعد معهم (يوكن) يعني سيارتهم دبل والا خايفين أن يغبر اليوكن :eek::eek::eek:

لا والله وجهه أبيض ولا جاء منه قصور ........

[راعي-gx97]

أخوي أنتـــه أخـــطيت خطـــاء كبيـــر تدري وش هــو خطاك ؟؟؟؟؟؟؟؟؟




غبرت على (اليوكن) اللي تـــوه طالع من المغسلة وموقف على الكورنيش ههههههههههه !!!!!!!!!!

والله لوني مكانك كان خليت الددسن يقلط على فرشتهم ويحوسها حوس هذولي ماهم حقين بر ؟؟؟؟؟

[sultan911]

ليش كلكم متحاملين على اصحاب اليوكن ياخي مابي اساعده ولا غلطت عليه طلب مساعده وتم رفض طلبه
بعض الناس يتضايق لو جيت وساعده بدون طلب منه وانا واحد منهم وكثير من الشباب الله يهديه اذا يساعدك تجد بعد المساعده مغثه بعض الامثله من المساعده الي تفقع الكبد انا مره اقفلت علي مفتاح السياره وشوي جاني شباب يبون المساعده ويعفطون الباب ويخربون الزيج الي فوق الباب وتمنيت انهم ماساعدوني
اخوي انت في فعلك الاول صحيح وفي فعلك الثاني مخطي هم ما جاء خطاء منهم
صحيح في الشعب السعودي وفي كل الشعب الخليجي والعربي تجد من يمد لك يد المساعده وهذا كرم منهم وليس مجبورين عليه وشكل ربيعك زعلو علشان جيت من عندهم يبونك تجي من طريق بعيد عنهم والله اعلم

[بتاع بر]

عزيزي هي المرؤءه ولاغيرها واساسها التربيه حصلنا موقف اليوم بالثمامه واحد فوق طعس ياشر يوم قربنا الا هو وخويه مغرزين وقفنا وطلعنا سيارتهم تغريز خفيف وهالقصه تتكرر و تصير مع الجميع وهي بكل بساطه مواقف ساقها رب العالمين لك لزيادة حسناتك او زوال مكروه لك او لاحد من احبابك فاغتنمها واخدم بماتستطيع واصدق في النيه واحسن في مساعدتك حتى لايحدث مالايحمد عقباه

[صاحب الذئب]

عز الله عداك العيب ياابن الاجواد بتصرفك الاول
وانا واغلب الكل يقول ياليت ماجيت من جنبهم وخليتها على سنعها الاول
لكن والله عارف اللي يده بالنار ماهو مثل اللي يده باالماء
يعني اي واحد كان بموقفك مع هاالحراره اللي تشوي ولا وبعدين شايفين انك مقدر لهم ورحت من بعيد عنهم ومعه سياره دفع رباعي.
لو كان .................. قول على غداهم السلام

[ابو نايف 99]

اقووول بيض الله وجهك قسم بالله اني وانا اقرا القصه كني راكب معك بس عندك خطا في القصه الثانيه مادامك طلعت ليش مارحت عند .......... يكرم القارئ وفحط في وجيهم لين كل واحد فيهم يمتلي فمه تراب ... والله لو اني معك اني ارميه رمي بالسلاح

[اكتروس]

كان ياطويل العمر يوم طلعت وراح الغبار حطيت في قدرهم رصاصه وفي التانكي رصاصه وخليتهم يعرفون ان الله حق <<لاتورط بس ههههههه


انت ماغلطت ،، وبعض الناس لو تموت قدامه مايساعدك الا اذا قلت له ساعدني
وبعض الناس اذا جيت تساعده كانك جاي تسبه وهو محتاج لك اصلا
وبعض الناس يجي يساعدك كانك مغرز بسيارته ومعصب

الزبده انت ماغلطت

[العاذر]

الموضوع يحتاج الى شرح اكثر:

اولا: ذهابك الى البر لوحدك اكبر غلط المفروض يكون معك خوي اقل شي واحد ؟

ثانيا : دخولك الى الصحراء بسياره لايوجد فيها دبل ايضا فيها مخاطره

ثالثا : اشكرك على اخلاقك العاليه وطيبتك ورجولتك وشهامتك عندما غيرة المسار عن المراغه لكي لاتثير الغبار على اصحاب اليوكن

رابعا : اصحاب اليوكن ليسو اهل بر لعدة اسباب

1 - كشتتهم بالقرب من المراغه يدل على انهم غشمان وليسو اهل بر
2- عدم فزعتهم لك يدل على دنائتهم وسوء اخلاقهم وهذه ليست من اخلاق الرجال ابدا
وانا اعتبر هذا التصرف من اصحاب اليوكن تصرف رخوم ونذاله لايفعله اصحاب مكشات الاوفياء

والله لو كان اصحاب اليوكن باكستانيه او هنود او مصاريه كان تشوف الفزعه ؟؟ لكن للاسف يوجد اشخاص قذرين

بيض الله وجهك يوم غبرة عليهم لانهم ليسو رجال . ولا اصحاب نخوه وفزعه.

هؤلاء رخوم من النوع الاصلي سود الله وجيههم

لكن الدنيا دواره واليوكن طيحته سهله في الغراز مثل الفيل الى برك برك ماعاد يقوم

[مشرف القيسم]

ورفعت صوتي بالسلام على أصحاب السيارة اليوكن ولم يرد السلام سوى شخص واحد
احمد ربك انه فيه واحد به خير
وبيض الله وجهك

[راعي المقانيص]

ضاقت الاماكن الا يوقف عند ريغه ؟ ؟ ؟

ومن زين وجهه مسكر درب المسلمين ! ! !

هذا من معلمه البر ؟ ؟ ؟

لكن الي سويته فيهم لعله خيره لهم وتعلمهم مره ثانيه وشلون يختارون محلهم ويعرفون علوم المرجله والنخوه

[تناهيت]

مدري وش اقولك ......>شيء محزن فعلا ان تغيب الشهامة في خاصة البر

صارت واجد ونا خوووووك معنا في مواقف كثيرة لم نجد مساعدة من ناس مرو حولنا

[العاذر]

ليش كلكم متحاملين على اصحاب اليوكن ياخي مابي اساعده ولا غلطت عليه طلب مساعده وتم رفض طلبه
بعض الناس يتضايق لو جيت وساعده بدون طلب منه وانا واحد منهم وكثير من الشباب الله يهديه اذا يساعدك تجد بعد المساعده مغثه بعض الامثله من المساعده الي تفقع الكبد انا مره اقفلت علي مفتاح السياره وشوي جاني شباب يبون المساعده ويعفطون الباب ويخربون الزيج الي فوق الباب وتمنيت انهم ماساعدوني
اخوي انت في فعلك الاول صحيح وفي فعلك الثاني مخطي هم ما جاء خطاء منهم
صحيح في الشعب السعودي وفي كل الشعب الخليجي والعربي تجد من يمد لك يد المساعده وهذا كرم منهم وليس مجبورين عليه وشكل ربيعك زعلو علشان جيت من عندهم يبونك تجي من طريق بعيد عنهم والله اعلم


مرحبا اخوي

الفزعه مطلوبه وهذه من شيم العرب اللتي توارثوها من آبآئهم واجدادهم

الرجال سلم عليهم ولا ردو السلام سوا واحد منهم

ماهكذا اخلاق الرجال المفروض انهم ساعدوه مباشره لانه قدامهم وقاعد يحفر ويدفن وهم جالسين يتفرجون والله عيب ومليون عيب


بعدين وش دخل موضوع المفتاح اللي سكرة عليه في موضوع الرجال ؟؟؟؟؟



اخي الفاضل الدنيا دواره وكلامك مرفوض؟؟ المسئله ماهي مزاج اساعده ولا مااساعده

انت انظر الى الموضوع بعين الانسانية قسم بالله لو القى كافر غير مسلم لقدمة اليه المساعده بصدر رحب


بعدين انا بسألك سؤآل هل تضمن الدنيا وتقلباة الدهر وما يخفي لك القدر

لو تعطلة سيارتك وانت في البر او الخط هل ترفض مساعدة الآخرين لك

لو تعرضة سيارتك لتهريب في طرمبة الماء ولم يساعدك احد وانت في الصحراء ماذا سيكون شعورك تجاه من تجاهلك ؟؟؟



يجب ان نروض انفسنا على حب الغير وعلى حب فعل الخير وان نربي ابنائنا على فعل الخير ومساعدة المحتاج

(( لايؤمن احد كم حتى يحب لاخيه مايحب لنفسه )) واصحاب اليوكن لم يضعوا انفسهم في مكان صاحب الموضوع


الاسلام ربانا على فعل الخير والمسئله ليست مزاج نحن نسير على منهج الرسول صلى الله عليه وسلم ..



يجب ان نكون قدوه للغير وخاصة غير المسلمين .. فلو افترضنا ان شخص كافر متعطل

ووجد تجاهل من المسلمين فهل ستتوقع بانه سيسلم ؟؟؟؟؟؟


((((فما بالك بالمسلم ))))

[سديد 800]

بسم الله الرحمن الرحيم

خطا خطا خطا

اذا لم يساعدوك فهذامن اصلهم

وكان المفروض تحترم جلوسهم وتتبتعد قدر المستطاع

وبعدين لا تتوقع كل الناس عندهم علوم رجال

الدنيا فيها وفيها

ارجوا اتتقبل رائي

ودمتم بخير

[بدوري7]

الموضوع يحتاج الى شرح اكثر:





اولا: ذهابك الى البر لوحدك اكبر غلط المفروض يكون معك خوي اقل شي واحد ؟


ثانيا : دخولك الى الصحراء بسياره لايوجد فيها دبل ايضا فيها مخاطره


ثالثا : اشكرك على اخلاقك العاليه وطيبتك ورجولتك وشهامتك عندما غيرة المسار عن المراغه لكي لاتثير الغبار على اصحاب اليوكن


رابعا : اصحاب اليوكن ليسو اهل بر لعدة اسباب


1 - كشتتهم بالقرب من المراغه يدل على انهم غشمان وليسو اهل بر
2- عدم فزعتهم لك يدل على دنائتهم وسوء اخلاقهم وهذه ليست من اخلاق الرجال ابدا
وانا اعتبر هذا التصرف من اصحاب اليوكن تصرف رخوم ونذاله لايفعله اصحاب مكشات الاوفياء


والله لو كان اصحاب اليوكن باكستانيه او هنود او مصاريه كان تشوف الفزعه ؟؟ لكن للاسف يوجد اشخاص قذرين


بيض الله وجهك يوم غبرة عليهم لانهم ليسو رجال . ولا اصحاب نخوه وفزعه.


هؤلاء رخوم من النوع الاصلي سود الله وجيههم


لكن الدنيا دواره واليوكن طيحته سهله في الغراز مثل الفيل الى برك برك ماعاد يقوم





اهلين آخوي والله انا اعجبني هالرد بصراااحه

آنا دائماً اطلع وأخيم ولمن نشوف شخص مغرز لوحده او اثنين نفزع معاه
يعني مو مشكله وانا بعد تصير معاي هالمشكله
لكن يا آخواني ارجو الانتباه ارجو الانتباه
لآن البعض والقلة منهم حسبي عليهم حرااميه
يا طمعان بالسياره اللي معاك
او انه بيسرق من السياره
وانا من ناحيتي ما اروح مع احد يبي الفزعه إلا معاي 3 او 4
لاني من جد اخاف من هالشيئ
وتقبل مروووري اخووي

[العميد ابواروى]

هههههههههه
والله اني احس بشعورك
من جد موقف لا تحسد عليه
لكن عادي لو مريت مره ومرتين وثلاث وش يصير هم الي جالسين على الطريق
ليتك رجعت وسالتهم ( وش تقولون تراي ما سمعتكم) ثم تدوس مره ثانيه
من كلامك انك جلست اكثر من عشرين دقيقه وهذا يعني ان ما عندهم نيه ؟

[برق الشتاء]

ابد ياذيبان عداك الخطاء

ما غلطت في شيء وجيههم تستاهل الغبار

مسوين فيها مكاشيت جنب المراغه ويتفرجون على من هو في حاجة المساعدة ومطنشين
احسن ما سويت

نصيحه حط لك ماطور هوا ورا المقعدة لا تنسيم الكفرات بالغراز وتعبئتها مرة اخرى وترى الماطور يسوى اهل اليوكن مية مرة

[boyosof]

لا حول ولا قوة الا بالله
فيه ناس كده ... الساعة الواحدة ضهرا وحتى ولا يعزمون عليك بشوية موية

[alpencil]

والله شاكر لكل من رد على موضوعي .. وتمنيت لو أرد على كل شخص لحاله برد مستقل لكن ماشاء الله عليكم كفيتم ووفيتم .. وبصراحة يوم قريت الردود لقيتها مابين معارض ومؤيد لماسويته فيهم.. وربي إن أكثر الردوود شرحت صدري وخلتني اتمنى إني سويت أكثر فيهم .. وبعض الردود خلتني اندم على اللي سويته وأقول ياليت كملت الطيبة وخذيت جزاي من ربي وجزاهم على رب العالمين ..
لكن من جد وقتها ماكنت أفكر من الحر ومن القهر اللي في صدري كيف جمبي وماعرضوا علي المساعدة مع إنها ماراح تكلفهم شي من وقتهم بلعكس يعتبرونها تسلية ويحسون بطعم الطلعة للبر .. ويكسبون دعوة من أخوهم ..
والله وأنا كنت أحاول أطلع السيارة قاعد أقول في نفسي يالله يارب ماتحدني لهم وتطلع السيارة ..
عموما شاكر لكم مرة ثانية والله ردودكم جميعا تبهج النفس وتشرح الصدر ..

[السلمان2010]

الله يجزاك خير ياليتك ماخربت الطيب اللي سويه في البدايه
لانه المفترض انك قلت لهم الفزعه ترى فيه ناس مايحب
يفزع الا لما تطلب منه
-على طاري اليوكن انا الواير ماينزل من اليوكن دايم نفزع
الله يوفقك ولا تنسى تحتسب الاجر

[swead]

انصحك تحط تصويت

[العاذر]

صنائع المعروف تقي مصارع السوء

لكن فيه اشخاص الدنائة والنذاله تمشي في دمائهم

الله يعافيهم ولا يبتلينا آمين

[Al3rands]

اسمح لي شكلهم (ماحولك احد)بس دايم اقول كل اناء بمافيه ينضح بديت بالطيب ياليتك كملته

[الوجاج]

كان من الاول غبرت عليهم لان الي يجلس بالطريق يستاهل الغبرات. انا امس راجع من الشعبان الي خلف سكه القطار الي وراء البعيثه وما فيه مجال للخروج الا عبر الانفاق واتجهت لنفق للخروج وحصلت ناس جالسن يطبخون بضلال النفق وسكرو علي الطريق واظطريت ادور نفق ثاني للخروج وهاذه الطريقه للاسف بعض الناس يسويها بلا حساب ولاتفكير .اسف للاطاله تقبل مرور

[the sad]

ذولا ما يستحون على وجيههم
واي والله لو انك رجعت مره ثانيه وغبرت عليهم بعدين كيف يجلسون بالطريق

[القنصل,,,]

الحمد لله على السلامه تصرفك يمكن اي واحد يسويه بس لو انك يوم شفت الدرب الثاني وعر كان ماغامرت رجعت على طول لطريق الي به غبار اما انك تستاذن وهذى من الذوق ولا ماعليك مر مع الطريق
الطريق هذى ماهو انت اللي بادعه الغلط عليهم هم ليش يجلسون على الدرب


اذكر فيه حكمه عند الولد يوم كنت اكشت معه
يقول (حط هالكلمه في بالك دايم ان كشت ابعد عن درب الناس وعن اهل الحلال)

[بريداوي اصليm]

أنا من رايي أنك تشاورهم
تقول يا تساعدوني ولا أغبر عليكم

[دغيم1]

السلام عليكم ورحمة الله وبركاته
حياك الله أخوي وحمدا لله على سلامتك
لن أوضح أشياء بعيدة عن الهدف المقصود
يقول المصطفى عليه أفضل الصلاة والتسليم
وعلى آله وصحبة أجمعين
( ليس الشديد بالصرعة ، إنما الشديد الذي يملك نفسه عند الغضب ).
أو كما قال عليه الصلاة والسلام
حكمك على أهل اليوكن ، حكم غير مكتمل لأنك لم تقف على أسباب عدم مساعدتك لأن البعض يتحاشى المساعدة وقد يرجع السبب لأشياء نفسية أو عدم الفزعة إلا حين الطلب .
مساعدة صاحب الهوندا رصد في حسابه أجر أسأل الله أن يضاعفه له .
والإنسان الطيب لايخالط أفعاله أي شيء معاكس له لأن المخالطة صفة لاتجتمع لأمثالك .
ويجب أن نحكم عقولنا لأهوائنا
ونصدر الحكم القاطع بل الإعدام في أغلب الردود
ولاأعتقد ان تكرار الذهاب والإياب وإيذاء الناس من مكارم الأخلاق او من شيم المسلمين وليست من الدين اصلا .
هذا الموقف وضعك الله فيه لتستفيد من .. دروس وعبر .
وقد إستفدت كثيرا من تجارب الحياة ولي بعض من مقتطفاتها كتبتها هنا في مذكراتي .
بعد أن هدأت العاصفة وذهبت الغمة
تفكر ...
لو قمت بالذهاب والعودة عليهم إنتقاما لكبريائك
وكان أحدهم سريع الغضب ويملك سلاحا
وأطلق النار عليك
فما هي النتيجة .............. ؟؟
الغضب ........
مرض فتاك
والطيب .......
دواء القلوب المؤمنة
صنائع المعروف ....... تقي مصارع السوء
شاكرا لك ومقدر
مع تمنياتي لك برحلات أكثر سعادة وآمنا
تقبل تحياتي ومودتي

[جون الشمالي]

والله ياخوي اول شي راعيتهم وخفت تغبر عليهم
ولمن غرزت ماحد فكر لك بس الحمدلله ع السلامه ههههههههههههه وتساهل التغبيره هههههههههههههه
نفسي معك وانت تفحط ههههههههههههه

[رسمال]

تصرفك الأول صحيح

لكن الانتقام من موقف هم اصلا فيه بالخيار فان شاؤا ساعدوك أولا يساعدوك فهو غير جائز لاعرفا ولا شرعا خاصة انه كان من الممكن ان يثير تصرفك حنقهم ويزيد جهالتهم جهالة فيحدث ما لم يكن بالحسبان

اما موقفهم هم فلا والله يدل على نبل او مرجلة والله حسيبهم

[فصوولي]

والله شوف تصرفك بالأول صحيح وتشكر عليه

الشي الثاني قضيه ساعدوك ما ساعدوك أقلط ما تقلط من شب على شي شاب عليه والمراجل مهيب في كل واحد وأهلهم ما عودوهم على هالعلوم عشان كذا ما ينلامون والا أكبر عيب على الاقل تطرح الجانب ولو كنت منتب صامل

الشي الثالث قضيه تغبيرتك عليهم شي عادي وما فيه أي غلط لان مالك طريق الا هذا الطريق سبو لعنو الحمد لله في ميزان حسناتك وبيرجع عليهم سبهم

عموما وأنا أخوك لا تصير حساس مثل هالموقف لا تخليه أصلن في بالك
ههههههههههههههههه بس بصراحه أنا لو منهم

ههههههههههههههههههههههههههههههههههه بخليك وبجلس اطالع فيك لين أشوف شوشتك مغبره ورموشك بيضاء بجي أضحك لين أقول بس ثم عاد اساعدك ولا تحرك من عندي الا لين تغدى معنا والا نسمنا كفرات موترك كلها

الله يوفقك يالغالي تقبل نقدي بروح رياضيهـ

[صاحب الكشتات]

بيض الله وجهك عز الله ماقصرت في الاولة والثانية ومالك الا هي اجل ترجع في حوستك الاولى وش تبي بالرخمة ماهو نافعك ولانافع نفسه

[غملاس الخالدي]

لا يهمك احد تصرفك سليم سليم سليم

[راعي الطلعات]

ابداً منتب غلطان كل الي سويته صح

ولو انك صادم قدرهم كان احسن هم الي جالسين جنب الغثى ومسكرين على المسلمين طريقهم

صراحه انقهرت ليتني موجود كان اسحب سيارتك واوقفك في المكان الي تبي

بس مو كأنك مغامر لحالك ؟؟

وتمنياتي لك بالتوفيق

[الشقردي 205]

حيل بهم والله انك مجدي كفوا كفوا والله . . .


لو انا معاك كان جربعتهم بالددسن اخليهم يعرفون ان الله حق . . .


اجربعهم لما اخليهم يعضون الارض . . .


اجربعهم لما اخليهم يهدوني اليوكون . . .


عداك العيب عداك العيب والله انك البطران . . .


ايه ايه والله انك مجدي . . .

[V I P]

اقول بيض الله وجهك وتصرفاتك كلها سليمه

[الشقردي 205]

بيض الله وجهك . . .

[YOU1]

السلام عليكم ورحمة الله وبركاته

حياك الله أخوي وحمدا لله على سلامتك
لن أوضح أشياء بعيدة عن الهدف المقصود
يقول المصطفى عليه أفضل الصلاة والتسليم
وعلى آله وصحبة أجمعين
( ليس الشديد بالصرعة ، إنما الشديد الذي يملك نفسه عند الغضب ).
أو كما قال عليه الصلاة والسلام
حكمك على أهل اليوكن ، حكم غير مكتمل لأنك لم تقف على أسباب عدم مساعدتك لأن البعض يتحاشى المساعدة وقد يرجع السبب لأشياء نفسية أو عدم الفزعة إلا حين الطلب .
مساعدة صاحب الهوندا رصد في حسابه أجر أسأل الله أن يضاعفه له .
والإنسان الطيب لايخالط أفعاله أي شيء معاكس له لأن المخالطة صفة لاتجتمع لأمثالك .
ويجب أن نحكم عقولنا لأهوائنا
ونصدر الحكم القاطع بل الإعدام في أغلب الردود
ولاأعتقد ان تكرار الذهاب والإياب وإيذاء الناس من مكارم الأخلاق او من شيم المسلمين وليست من الدين اصلا .
هذا الموقف وضعك الله فيه لتستفيد من .. دروس وعبر .
وقد إستفدت كثيرا من تجارب الحياة ولي بعض من مقتطفاتها كتبتها هنا في مذكراتي .
بعد أن هدأت العاصفة وذهبت الغمة
تفكر ...
لو قمت بالذهاب والعودة عليهم إنتقاما لكبريائك
وكان أحدهم سريع الغضب ويملك سلاحا
وأطلق النار عليك
فما هي النتيجة .............. ؟؟
الغضب ........
مرض فتاك
والطيب .......
دواء القلوب المؤمنة
صنائع المعروف ....... تقي مصارع السوء
شاكرا لك ومقدر
مع تمنياتي لك برحلات أكثر سعادة وآمنا
تقبل تحياتي ومودتي


عيييييييييييييين العقل....:good2::good2:

[مطنوخ قطر]

لالا منت غلطان الا رجال وفيك خير ماشاء الله عليك وباين ان سجاياك طيبه, هل اليوكن خمه وضعوف ماهم رياجيل ولا ازيد,ومثل هذولا تقدر تحكمهم بسهوله وتمشيهم على كيفك,,شلون؟؟ انا اقول تجيهم بعد ماتحاول في موترك شوي وتسلم عليهم من قريب وتطلب منهم ماء عشان تشرب, الماء ماتشربه ونت واقف اجلس واشرب ولامن خلصت احمد الله وقل مشكورين يالربع على الماء, واسألهم من اي ديره من الديار اللي حولك هم,وبيجاوبونك ومن ذالاسئله لين تعرف من لهجتهم من وين, وعلى هالمنوال,وبعد كذا قل يالربع ايديكم معي ساعدوني في التغريسه تراني غرزت بسببكم مابغيت اغبر عليكم وجيت من هنا وغرزت,, طبعاً الرخوم رخوم يمكن مايساعدونك, لكن انت حكمتهم كذا و90% راح يساعدونك......بس شوووف ترى مالهم جميل عليك:) ولا تفكر انك نزلت نفسك لهم لالالالالالا والف لا لانهم السبب في اللي انت فيه,,بس انت بذكائك شغلت الضعوف بطريقتك وعداااااااك اللوم........

[alpencil]

الله يعطيكم العافية والله إنكم ماقصرتوا ,, والحمد لله إن الكثير مؤيد لما سويته مع إني في قرارة نفسي تمنيت إني ماسويت كذا وخليت الأجر على الله ,.,

[باث 3]

والله أنك مقدي فيهم ذا الخمق وما يستحون ع وجيهم والله أنك كفو وزين ما سويت فيهم, الرجال تعبان ومغرز وهذا يتفرج وهذا يقرا جريده ويشخل عيونه وجه الحصني ولا كنهم يشوفون شي ليتني والله معك كان ز ت في نحورهم ههههههههه

[مشعل العيسى]

السلام عليكم ورحمة الله وبركاته
حياك الله أخوي وحمدا لله على سلامتك
لن أوضح أشياء بعيدة عن الهدف المقصود
يقول المصطفى عليه أفضل الصلاة والتسليم
وعلى آله وصحبة أجمعين
( ليس الشديد بالصرعة ، إنما الشديد الذي يملك نفسه عند الغضب ).
أو كما قال عليه الصلاة والسلام
حكمك على أهل اليوكن ، حكم غير مكتمل لأنك لم تقف على أسباب عدم مساعدتك لأن البعض يتحاشى المساعدة وقد يرجع السبب لأشياء نفسية أو عدم الفزعة إلا حين الطلب .
مساعدة صاحب الهوندا رصد في حسابه أجر أسأل الله أن يضاعفه له .
والإنسان الطيب لايخالط أفعاله أي شيء معاكس له لأن المخالطة صفة لاتجتمع لأمثالك .
ويجب أن نحكم عقولنا لأهوائنا
ونصدر الحكم القاطع بل الإعدام في أغلب الردود

ولاأعتقد ان تكرار الذهاب والإياب وإيذاء الناس من مكارم الأخلاق او من شيم المسلمين وليست من الدين اصلا .
هذا الموقف وضعك الله فيه لتستفيد من .. دروس وعبر .
وقد إستفدت كثيرا من تجارب الحياة ولي بعض من مقتطفاتها كتبتها هنا في مذكراتي .
بعد أن هدأت العاصفة وذهبت الغمة
تفكر ...
لو قمت بالذهاب والعودة عليهم إنتقاما لكبريائك
وكان أحدهم سريع الغضب ويملك سلاحا
وأطلق النار عليك
فما هي النتيجة .............. ؟؟
الغضب ........
مرض فتاك
والطيب .......
دواء القلوب المؤمنة
صنائع المعروف ....... تقي مصارع السوء
شاكرا لك ومقدر
مع تمنياتي لك برحلات أكثر سعادة وآمنا
تقبل تحياتي ومودتي



بحق هذه الكلمات تكتب بماء الذهب ؛؛؛

[مخطط 2008]

بسم الله الرحمن الرحيم



السلام عليكم ورحمة الله وبركاته ..



بالأمس القريب ذهبت لروضة أم القطا وشعيب المسعودي وماجاورها .. وكان الغرض الصيد والحمد لله صدت 32 دخله فقط .. بس الحمد لله كافية ووافية وخصوصا إني لوحدي .


وخلاصة الموضوع .. كانت الراحلة ووسلية التنقل سيارتي الددسن موديل 2009 غمارتين .. بدون دبل وكنتت محمل أغراض البر كلها من خيمة وجراكل الماء .. الخ .. يعني السيارة ثقيلة جدا وكنت معبي الكفرات هواء لأن المنطقة أغلبها حجارة صلبة ...


المهم كنت إذا واجهت بعض الرمال حاولت ان أجد أسهل الطرق لتجنبها حتى لاأضطر لتنسيم الكفرات أو تعلق السيارة ,, المهم تعللقت السيارة على طرف الشعيب فقعدت أهز السيارة إلى الأمام والخلف حتى أعمل مسار وتخرج وكانت التغريزة سهله جدا .. ولكن تفاجأت بصاحب سيارة من نوع هوندا أكورد جزاه الله كل خير شاهدني من بعيد وحاول الحضو إلي بسيارته الصغيرة إلى أن وقف على مقربة مني ونزل شخصان وفورا ذهب خلف السيارة وقاموا بدفعها وخرجت ..وشكرتهم بعد ذلك وألحوا علي بتناول الغداء معهم ولكني رفضت حتى لا أحرجهم .. جزاهم الله كل خير ..


لكن المشكلة والمصيبة أني أكملت طريقي أبحث عن القميري .. وإذا بي أواجه سيارة يوكن ويجلس بجانبها ثلاثة أشخاص .. ولم اجد مخرج إلى بأن أمر من بجانبهم وكانوا يجلسون بجنب أرض ريغا يعني رمل خفيف جدا لو مريت بجوارهم سيتطاير الغبار في ووجوههم والطريق الآخر بعيد عنهم قليلا والأرض رملية يعني لومريت ماراح يطير عليهم غبار ولكنه صعب جدا على سيارتي الثقيلة ومن المحتمل أن تعلق السيارة ..


فجلست أفكر هلى أغامر وأذهب مع الطريق الصعب الرملي ام مع الطريق السهل والذي سيملأ الجو بالغبار وسيتسبب بأذيت من في المكان ..


وقررت اخيرا ان أذهب مع الطريق الصعب وأن أحترم من في المكان ولا أزعجهم بالغبار وخصوصا أنهم جالسين يطبخون الغداء ..


ولكن عندما ذهبت مع الطريق تعللقت السيارة في الرمال .. فقلت خيرا ونزلت ورفعت صوتي بالسلام على أصحاب السيارة اليوكن ولم يرد السلام سوى شخص واحد والبقية إكتفوا بالبحلقة بالأعين ..نسمت الكفرات ولم تخرج السيارة وجلست أحفر للسيارة أماما وخلفا ولم تخرج .. وبدون حلف الساعة كانت الواحدة ظهرا وجلست حوالي الساعة والنص وأنا أحاول إخراج السيارة من الرمال الحارة جدا .. وهؤلاء يتفرجون علي ولا واحد قالي تبي مويه وإلا مساعدة والا تعال تحت الشجرة عن الشمس والا تفضلمعنا على الغدا ولو مجاملة .. وربي ما أبعد عنهم إلا حوالي 8 خطوات .. بل كان واحد يصلح الغداء ويتفرج علي والثاني شايل جريدة وبرضه قاعد يتفرج علي والثالث مايسوي شي بس جالس يتفرج علي .. من جد شي يقهر .. المهم بعد المعاناة خرجت السيارة وحاولت ان أجد طريقا للخروج فلم أجد بد إلا أن أعود للنفس المشكلة إما طريق الغراز او طريق الغبار ولكن هذه المره وبلا تردد إخترت الطريق الريغا الغبار وأحط قير السيارة بالأول وعثيت في الأرض فسادا وماعاد شفتهم من الغبار ماغير أسمع أصوات السب واللعان وأكملت طريقي وأنا غضبان لأنهم هم من أجبروني على فعل ذلك .. !!


أرجو ممن يقرأ موضوعي إفادتي عن تصرفي هل هو صحيح وماذا سيفعل لو كان بنفس مكاني .!!



خير ماسويت ليتك والله فحط ومليت الدنياء غبار وخليت وجيههم تكون شهباء من الغبار ناس مافية احترام ولا تقدير يخافون تقلط معهم على الغداء لكن مرة ثانية لاتطلع الا معك جيب دبل

[ريف النشاما]

جلوسهم بالقرب من الخط هذا خطأ لأن الطريق ليس مكان للجلوس

ومن يجلس بالقرب من الطريق يتحمل ما يجيه

ثانيا - سيارتك ماهي دبل والمفروض ما تغامر بل من البداية تمر مع نفس الطريق ولكن بهدو


ولكن بعد اللي سويته ،،،،، صحيح بأن الوضع يقهر لكن الصبر أعظم وبودي لو وقفت عندهم
وعطيتهم درس في علوم الرجال

موقفك هذا صار معي مرة


كنت مغرز في طين ولكن كان معي شلة
المهم أقبل علينا شاص (وللأسف رجل كبير ) ومسوي لي فيها شيخ

المهم الرجال يوم قرب عندنا ،،،،،،،،،،، وهو يلف عنا ،،،،، إلا الشاص إلا الدفرنس بالطين :D

المهم حنا تركنا سيارتنا وفزعنا له بالخشب والمساحي والقوة المساندة

المهم وحنا جالسين نحوس في هالطين جانا واحد ثاني برضوا مسوي زحمة وعرف سيارة خوية

يوم جاء عنده قال وش فيك ياولد قال أبد جيت لهمغرزين أحسبهم فلان يوم شفت ماهم خوي لفيت عنهم وغرزت :mad:

يوم سمعنا كلامه :D قلنا بعد شين وقوي عين ،،، والله ونظف خشبنا ونمشي ونخليه :mad:


ويجلس يحفر ويخلط بالطين لين شبع

الغرازة من الساعة 11 لين ثلاث :D

[ريم البراري]

وين الرجولة والنخوة!!

انت اصببت لما تجنب انك تاذيهم ولكن اخطات لما اذيتهم في الاخير اما هم فحدهم استراحة والا على رصيف

[ريم البراري]

الاحظ كثير في البر ناس تختار شجرة جنب طريق تعود الناس يمشون عليه ويجلس تحتها ورغم ان مكانه غلط ويستاهل اي مضايقة تجيه تلاقيه يجلس يبحلق فيك اذا مريت من عنده!! لكن ((كل واحد يعامل الناس باخلاقه هو وليس اخلاقهم))

[طفران بس بطران]

http://al-7soon.com/up/files/ywwn6ct6qn7qtywmg9s8.jpg (http://al-7soon.com/up/)ياخي وشتبا فالتلفزون ابك ننحاش منه فالبر وتجيبة

[a7md al-q9em]

أولا أشكرك على صراحتك

وفعلا الطيب هو الأصل فيك

وتصرفك من البداية كان صحيح مئة بالمئة

وشكر خاص ودعوة من القلب لمن ساعدك في البداية

وكان من الأولى أن تصبر وتحتسب أجرك على الله ولا تؤذيهم

حتى لو كانوا مقصرين ومهملين في حقك من البداية

وعفا الله عن من سلف


وكان من الأولى أن تصبر وتحتسب أجرك على الله ولا تؤذيهم

اوافق آخوي نآصح

[a7md al-q9em]

أولا أشكرك على صراحتك

وفعلا الطيب هو الأصل فيك

وتصرفك من البداية كان صحيح مئة بالمئة

وشكر خاص ودعوة من القلب لمن ساعدك في البداية

وكان من الأولى أن تصبر وتحتسب أجرك على الله ولا تؤذيهم

حتى لو كانوا مقصرين ومهملين في حقك من البداية

وعفا الله عن من سلف


وكان من الأولى أن تصبر وتحتسب أجرك على الله ولا تؤذيهم

اوافق آخوي نآصح

[a7md al-q9em]

أولا أشكرك على صراحتك

وفعلا الطيب هو الأصل فيك

وتصرفك من البداية كان صحيح مئة بالمئة

وشكر خاص ودعوة من القلب لمن ساعدك في البداية

وكان من الأولى أن تصبر وتحتسب أجرك على الله ولا تؤذيهم

حتى لو كانوا مقصرين ومهملين في حقك من البداية

وعفا الله عن من سلف


وكان من الأولى أن تصبر وتحتسب أجرك على الله ولا تؤذيهم

اوافق آخوي نآصح

[بدوري7]

http://al-7soon.com/up/files/ywwn6ct6qn7qtywmg9s8.jpg (http://al-7soon.com/up/)






ياخي وشتبا فالتلفزون ابك ننحاش منه فالبر وتجيبة








والله يا آخوي كل واحد حر باللي يسويه



يمكن انت ما تبي تتابع ! وغيرك يتابع
وشنو تبيني لمن ما يكون احد عندي من الصبح لمن الظهر كخخخخ !!!!
انا من المتابعين للمباريات فقط دوري وكأس آسيا الدوري الايطالي والاسباني
وخيامي جالسه 5 شهور وانا اجلس فيها من الاربعاء لمن الجمعه واصحابي يجوني
احسن شيئ يجووون يتفرجون عندي وانتهت السالفه
عساك تقتنع بس بردي


ويعطيك العافيه آخوي على ملاحظتك

[حزين الكون]

اول شي .. الي سويته بوجهت نظرك خطا

بس الحل الصحيح للوضع هو الخطا ..

وانت ماسويت الا الصحيح بالخطا ..


كم خطا في ذالكـ .. هههههههههههه

لا والله زين ماسويت فيهم .. لانك مالك طري الا بينهم .. خلهم بدال مايكلون رز بملح ياكلون رز بتراب

[قنااااص]

أخوي أنتـــه أخـــطيت خطـــاء كبيـــر تدري وش هــو خطاك ؟؟؟؟؟؟؟؟؟





غبرت على (اليوكن) اللي تـــوه طالع من المغسلة وموقف على الكورنيش ههههههههههه !!!!!!!!!!

والله لوني مكانك كان خليت الددسن يقلط على فرشتهم ويحوسها حوس هذولي ماهم حقين بر ؟؟؟؟؟



:D:D:D:D:D

[ابن عاشور]

كفو ولا عليك ملامة
وهذا جزاء الرخوم

ولاتحسب قدرهم كبسة ودسم
هذولي أهل الأندومي والشكشوكة

[أيام العبور]

السلام عليكم ورحمة الله وبركاته

اخي الحبيب بارك الله فيك الناس اجناس تختلف اخلاقهم ودرايتهم بئمور دينهم و بما امر به الله عزوجل والرسول صلى الله عليه وسلم .وهنا اساس مكارم الاخلاق والرجوله الحقيقيه. الله عزوجل اصطفى الرسول صلى الله عليه وسلم على سائر الخلق وجعله قدوه نقتدي به ولنا فيه اسوةُ حسنه في تعامله مع الآخرين من حلم وكرم ورفق في خلق الله صلوات الله وسلامه عليه . وثق بالله اخي بارك الله فيك وتذكر قول الله تعالى ( فَمَنْ يَعْمَلْ مِثْقَالَ ذَرَّةٍ خَيْرًا يَرَهُ (7) وَمَنْ يَعْمَلْ مِثْقَالَ ذَرَّةٍ شَرًّا يَرَهُ} [الزلزلة) .

ومن يبخل فإنما يبخل عن نفسه والله الغني ونحن الفقراء. والانسان المسلم يجب ان يقتدي في رسول الله صلى الله عليه وسلم في تعامله مع الآخرين . وانت وهم جميعكم اخوان في الدين ومسلمين وربكم الله تعالى والحمدلله ولاتصل الامور ان يشتم المسلم اخوه المسلم او ان يسيئ الضن به او ان يضايقه . وكل انسان حر بتصرفاته والعاقبه له او عليه ان احسن فلنفسه وان اساء فعليها . وتذكر ان الشيطان والعياذ بالله منه عدو الانسان اللدود همه وشغله الشاغل التحريش بين المسلمين والتفريق بينهم وايقاع بعضهم في بعض من غيبه ونميمه ومشاكل لاتعد ولاتحصى والرجل يجب ان ينتبه لهذا الامر وان يحارب عدوه الحقيقي وعدو الله تعالى والمسلمين . واسال الله لنا ولكم جميعا الهدايه والصلاح والفلاح . انه جواد كريم .

وجزاكم الله خير الجزاء .

[الربذي]

وعليكم السلام ازين منها لو اخذت رقم يوكونهم وجدعته يحمل رقم كذا وكذا وبعد لو جبت اسمه من المرور

حسبي الله عليهم ساعة ونص وانت بجنبهم وش هالاوادم يذكرني بمصري بالدوام تصدقون انا واياه بس بمكتب واحد يطلع الشاهي حقه ويصلحه ويصك على اغراضه مايعرض على ان اشرب معه ولا يسوي لي كوب ياترى هل بخلة الفظيع اغناه لااعتقد لان زوجته اكرم منه وهي معنا ببعض الشفتات شقرديه الرجل بخيل قعيطي وزوجته شقردية ..


هولاء الي طحت فيهم ماادري وش عندهم من الرجوله ساعة ونصف ؟؟؟؟؟؟؟؟؟؟؟؟؟؟ ياطول بالك عليهم ومن عندي كوحة تراب بكل وجه من تلك الوجيه الكالحة ..
لاوالله انك بردت قلبي بعملتك يابعد حيي تعجبن.

[نسناس غربي]

هههههههههههههههههههههههههههههههههههههههههههههههههه هههههههههههههههههههه

والله العظيم انك اقديت فيهم

وجيه"ن"مالها الاالغبار
ههههههههههههه

[az999oz]

زين سويت ...وماعليك ماسويت الا الصحيح

[أبوفرحان]

لا والله يالغالي منت بغلطان الا هم الغلطاانين الله لا يوفقهم

وهذي تقريبآ نفس سالفتي كنت مغرز وسيارتي جيب سفاري والدبل كان مافيه شي شغال

بس لما غرزت حاولت اشغل الدبل عيا يشتغل والحمدلله كاان الشارع قريب مو بعيد

والله يااخواان اني وقفت عند الشارع ابي احد يوقفلي يمكن قعدت حول الساعتين وانا

ابي واحد يوقفلي محد راضي يوقف والمشكله حتى مويه ماامعي والجو كان حاار من الساعه 11

لين الساعه 4 العصر لين طلعت.. بعدها وقفلي واحد راعي سفاري في 3 شباب اللي يجزيهم الجنة

وقلصنا السيارة وطعلت وشكرتهم

خلاصه الموضووع ان في ناس مااتستحي ماايوقفون ويشووفونك انك مغرز وحالتك حاله

مااقول غير الله يعيين وانا اخووك

واسمحوولي على الاطالة

[بـــرق نجـــد]

بيض الله وجهك
تصرفك سليم 100%

جعل الغبار مايخطي وجيه هالرخووووم

[طفران بس بطران]

والله يا آخوي كل واحد حر باللي يسويه



يمكن انت ما تبي تتابع ! وغيرك يتابع
وشنو تبيني لمن ما يكون احد عندي من الصبح لمن الظهر كخخخخ !!!!
انا من المتابعين للمباريات فقط دوري وكأس آسيا الدوري الايطالي والاسباني
وخيامي جالسه 5 شهور وانا اجلس فيها من الاربعاء لمن الجمعه واصحابي يجوني
احسن شيئ يجووون يتفرجون عندي وانتهت السالفه
عساك تقتنع بس بردي



ويعطيك العافيه آخوي على ملاحظتك

وراك زعلت !!!!!!!!!!!!!!!!!!!!!!!!!!!!!! ؟؟؟؟؟؟؟؟؟ ماقلت شين يزعل

[برق الرمة]

مافييهم خيير ههههههههههههههه

[ولد عم هتلر]

انت مخطي
لو اني بدالك نصيت العزبة أو القدر ولا نطلت ذيك النطلة الي تخلي غداهم جريش من التراب موب رز هذولا ماهوب كفو للبر هذولا حدهم مخطط

[ابويزيد1]

السلام عليكم
لا منت غلطان لانك اخذت الطيب في الاوله وثانياً خلينا من المساعدة لك في الغراز بس الي قهرني ليش ما يرد السلام الا واحد الباقين طرمان ووقت ما ريغتهم بيض الله وجهك طلعت اصواتهم وينهم يوم تسلم عليهم
اخوي العيبة ما تلحقك لانك معذور والسيارة ماساعدتك ولا عليك ملمه لوهم يفهمون قالو الرجل ابعد عن الدرب هذا علشان ما يغبر علينا قومو نساعده بس يبحلقون بعيونهم جعلهم العماء يستاهلون ما جاهم :good2:

[زنكي]

يا ناس من ردودكم أحس انكم مليانيين غضب وزعولين وقليل الحليم فيكم
أجل أحسن للمحسن وأسئ للمسئ
راح الحلم وسعة الصدر
مأبي أدح نفسي أمس بالليل موقف سيارتي وجاء هندي ورمى قزازه عصير وانكسرت وتناثر من القزاز على السيارة
كانوا اثنين من عيالي بالسيارة
رحت ونظفت القزاز عن السيارة وقلت لعيالي مادام هندي ضعيف نبي نسامحه ولو انه سعودي كان تفاهمت معه ( يعني انصحه يناظر مره ثانيه )
لأن كثير من الناس يتقوى على الهنود والضعوف